Matio 17

Yěsô ne ńnyɛɛ shʉ́shÿɔ́g we mbwó tsɔ̌ ngàŋa kwò yé

(Malékuse 9.2-9; Lukase 9.28-36)

1É cʉa lyɛ̌’ ntɔgɔ́, Yěsô faga Piɛ, ńgÿo Jâg, ńgÿo Jâŋ á gwɔ́ fɛ́ Jâg, ńdɔgɔ wɔ́b ńgʉa ńkwɔ́’ɔ nà tsɔ̌ mâ lekwɛ́. Pâ pɔ́ gwɔ́ jʉ’ó gíle pɔ́b. 2Pɔ́ gyá àliŋé Yěsô pú sele mvfò pɔ́b, eshÿó wé ŋwʉŋe pá’ nèm la. Menzsǒ mé pú fɔ́g tà ńkyɛ’ jʉ’. 3Pɔ́ gyá, mbà Mǒsê pɔ́ *Elîɛ vegé vege ńkẅɛ, pâ Yěsô ne shwóŋe. 4Piɛ leen ḿvege vege, ńgɔɔn mbwó Yěsô ngie: Cʉ̀apʉ̀a, á pǒŋ pá’ pege ee jʉ’ɔɔn lɔɔn. Zẅíŋe mèŋ n juŋ *mentàb méntá, tà’ gwɔ́ jù, tà’ gwɔ́ ye Mǒsê, yetsɔ́ gwɔ́ ye *Elîɛ. 5Á nyé ńgɔɔn gɔɔn, etsɔ́ melɔ́ɔn, mie é ŋwʉŋe ŋwʉŋe sẅɛ́’ ńkábte wɔ́b, ngyè nyìŋ fó tsɛ̀ɛ wó ńgɔɔn ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág, pi jú’ ncwò wé. 6*Ngàŋa kwò Yěsô gwóon ńjú’u yɔɔn nò, ńgwe ssé, ésɔb shÿó wɔ́b ssé, ḿbú ne ḿbɔ́gɔ tɛ’. 7Yěsô tó, ńzába pwó ná pɔ́b, ńgɔɔn ngie: Pi lute ssé, tà pi gíŋe ḿbɔ́g. 8Pɔ́ pʉ’ʉ twó yɔ́b ńnáŋte, ńcʉ́’ ńgyá pɔ́ Yěsô gíle yé.

9Pâ pɔ́ gÿo ne fóo ndùm lekwɛ́ ńcwóŋo, á tsẅiŋe wɔ́b ngie, tà pɔ́ kím tà nyìŋ ndyɛ̀’ɛ lwo ńzsé mmó gie pɔ́ gyǎ, tà ndá’ ńkú fʉ̀’ gie *Míŋ Nyìŋ zimé nà legwé.

10Pɔ́ jú’ pú’u, ńzɛ́te Yěsô ngie: Tà mélà’a kɔ́ *pàkyagte lepʉ̌ Mǒsê gɔɔn ngie *Elîɛ ge lá’ vɔg tó?. 11Yěsô tsɔ́’ ngie: Pi shwóŋó nò, à *ntsẅì nkʉ̀ Ssé *Elîɛ vɔgɔ ńtóo, lézába kɔ́ɔkɔ́ nà yé jʉ’. 12Tá’ tà mèŋ n ké shwóŋó gẅí, *Elîɛ kěen ńtó, epʉ̀a té yé zẅíŋ, ńnyɛɛ yé ngɔ́’ pá’ pɔ́ kwǒŋ, pɔ́ ge gÿo gíŋe nyɛɛ *Míŋ Nyìŋ ngɔ́’ pɔ́ pú’u, 13ńgɔ́ɔn pú’u, *ngàŋa kwò yé leen ńké ńjú’ ngie à gɔɔn pá’a pɔ́ Jâŋ Mbabtis.

Yěsô gÿǒ tsɔ̌ múɔ gẅie aa ngwègwá’ zeŋe

(Malékuse 9.14-29; Lukase 9.37-43)

14Pɔ́ gʉa tà ńkúu jʉ’ gie lá’ laa wó, àtsɔ̌ nyìŋ tó ńkẅí’te mvfò Yěsô, 15ńgɔɔn né yé ngie: A nde, tsétsɔ’, tsɔ́ɔn mezìŋe míŋ wɔ̀ɔn mɔɔn, aa ngwègwá’. À gyá ngɔ́’ tɛ’, à gwǎ ńgwe tsɛ̀ɛ mmɔ̌g, tà mbɔɔ tsɛ̀ɛ ntse. 16Mèŋ n ně ńdɔgɔ yé ńtóo mvfò *ngàŋa kwò jú, tá’ pɔ́ té ku’u légÿo á zeŋe wɔ́. 17Yěsô jú’ pú’u, ngie: Yee! Pi pʉ̀a ngù’ɔɔn, pi tè záb ntʉ́m nà Ssé wɔ́, ńgÿo pɔ́ nò tepòŋ, aa pá’ɔɔn pege lá’ ńnéŋe tà ńkú pɔ́ síŋe? Mèŋ n ge lá’ shÿɔgɔ ná menò mí tà kú pɔ́ síŋe? Pi lɔgɔ múɔ ŋwɛ́ ńtóo jʉ’ɔɔn ńná né mèŋ. 18Pɔ́ lɔgɔ yé ńtó, Yěsô cÿɔ́g *ssé tepòŋ, é kẅɛɛ ná múɔ ŋwɛ́, á gwóon sẅéte pɔ́ fʉ̀’ó.

19Pâ *ngàŋa kwò yé gÿo ńgwɔ́ gíle pɔ́b, pɔ́ zɛ́te yé ngie: Àkɔ́ ně ńgÿo, peg tè ku’u léjwoŋ *ssé tepòŋ ŋwɛ́ wɔ́? 20Á tsɔ́’ɔ mbwó pɔ́b ngie: Ee, mélà’mie pi záb ntʉ́m nà Ssé pɔ́ méjʉ’ lepile. Pi lɔɔn fó ńzáb ntʉ́m gẅi nà Ssé pɔ́ méjʉ’ pá’ lesɔ́ɔn sésɔg, mbà à lɔɔn ńgwɔ́ pi gɔɔn né lekwɛ́ sɛ̂ ngie: Tsɔ́’ɔ ńgʉa ńtyé jʉ’ʉ, é gʉa ńtyé jʉ’ó. Mbà à lɔɔn ńgwɔ́ tsɔ́ nò á le lá’ ńcʉa gẅi wɔ. [ 21Á gʉa nà yɛ̂ ntí *ssé tepòŋ, mbà nyìŋ lɔɔn tè zɔ́g nzyè, ńké sẅíŋte pɔ́ Ssé, tá ńjwoŋ wɔ́ é le kẅɛ.]

Yěsô giŋé ne ḿbÿé ngie à ge gÿo kwé é piŋ zím

(Malékuse 9.30-32; Lukase 9.43-45)

22Á gwɔ́ tsɔ́ lyɛ̌’, *ngàŋa kwò Yěsô pú ńcú’te Galilea, Yěsô gɔɔn né pɔb ngie: Mé ge sẅiŋe *Míŋ Nyìŋ mbwó pʉ̀a mesoŋ. 23Pɔ́ gÿo à kwé, a piŋ ngwɔ́ ḿbɔ́ɔnte lyɛ̌’ tá á zíme na le gwe. *Ngàŋa kwò yé jú’, ḿbú ḿmÿɔg tɛ’.

Ànò ncùb jʉ’ʉ Ssé

24Yěsô pâ *ngàŋa kwò yé gʉa tà ńkúu Kapernawúm, pàkẅé ncùb *jʉ’ʉ Ssé tó ńzɛ́te Piɛ ngie: Tá gẅi aa ntě ńnáa yé ncùb *jʉ’ʉ Ssé wɔ́ ka?. 25Piɛ tsɔ́’ ngie: Aa nâ nǎ, ńgɔɔn pú’u, ńkúu ndá, ńnyé pɔ́ tè ŋǎ’ ncwò wé, Yěsô gɔɔn né yé ngie: Símo, ɔ̀ kwǎŋ jú ngie kɔ́. Áa tsɛ̀ɛ njÿó yɔɔn pé’e, pàwɔ̌ ma’ ncùb ntÿɔ́’ lâ tsɔ́ mencùb, ńná né mefùɔ? Pàlá’ pé ka pàlá’a ntÿɔ́’ɔ? 26Piɛ tsɔ́’ ngie: Pʉ̀a lá’a ntÿɔ́’ zɔ̌ ná. Yěsô gɔɔn né yé ngie: Pʉ̀a lá’ té ńdɔgɔ ńgẅiin lénáa tsɔ́ mmó wɔ́, á té pú’u wɔ́ ka? 27Tá’ tà pɔgɔ gÿo nò pÿɔ́g pàkẅé ncùb. Gʉa ntse ḿma’ lezɔ́b. Ɔ̀ ge gwoon ndùŋ mvfò mbab ssó, é nyɛ́’ ncwò we, é gyá pàga nkáb, é kẅile lɔg gʉa ma’ yɔgɔ ncùb.

Currently Selected:

Matio 17: NGBM

Highlight

Copy