Kakpiʔiligele 14

Pɔli nɛ́ Barinabasi pe 'kɛ́ Ikonɔmi kàʔa mɛ́

1Bà Pɔli nɛ́ Barinabasi pe sɛ́nì jíin Ikonɔmi kàʔa nī gè, a pe 'kanugo kpíʔile gè, a pe 'kɛ́ Zuufulo pe tɛnmɛzaʔa mɛ́ gè. A pe 'juu kɛnmɛ páà nɛ̄ fúɔ a Zuufulo nìʔɛnɛ nɛ́ Girɛki kùlo wuulo nìʔɛnɛ 'jíin tɛ́ngɛlɛ nī lè. 2Zuufulo bílì sí piyè cé fɔ̀li nɛ̀ tɛ́ngɛ bèleʔ, a peli 'yɛ̀ nɛ̀ kùlogolo kálì wuulo súguru nɛ̀ wáa pe siinyɛninɛ nɛ̄ bèle tɛ́ngɛfɔlilɔ bèle, peri pe wuʔɔ. 3Kire nɛ́ ki mìɛni ní, a Pɔli nɛ́ Barinabasi pe 'kò baa nɛ̀ mɔgɔ, nɛ Kàfɔli wi wori nyu dè nɛ́ nàzorido ní. Kàfɔli wi 'puu nɛ ŋɔri kanʔa wi siɛnjuutaanra mɛ́ dè, níɛ fìɛlɛ nɛ́ kakpoliyo kpínʔini pe kiyɛ nī yè.

4Kàʔa ki siɛnnɛ pe cé wáligi, a pàli 'taʔa Zuufulo nɛ̄ bèle, á bìli pe 'taʔa Zezi tundunminɔ nɛ̄ bèle.

5A ki 'nyaa Zuufulo bèle nɛ́ kùlogolo kálì wuulo ní bèle, nɛ́ pe yiɛgininɛ ní bèle, a pe 'bìɛ ki nɛ̄ bè Pɔli nɛ́ Barinabasi wuʔɔ bèle bè pe wáa kpúu nɛ́ sìndari ní. 6Bà pe sí kire cɛ́n mmɛ gè, a pe 'fɛ̀ nɛ̀ sɛ́nì làri Liikawoni tɛ́nimɛ nī, Liisitiri kàʔa mɛ́, nɛ́ Dɛribi kàʔa, nɛ́ ki tɛ́nimɛ tiɛrɛ ní dè, 7nɛ Kataanna Siɛnrɛ jáari dè baa kire tiɛrɛ dáà nī dè.

Pɔli nɛ́ Barinabasi pe 'kɛ́ Liisitiri kàʔa mɛ́

8Nàguɔ wáà 'puu baa Liisitiri kàʔa nī gè, tamɔnigiyɔfɔli wi 'puu; wi cé sii nɛ́ yi ní bɛ̀ wī. Wiì cé fìɛ jáa nɛ̀ tánʔa nɛ̀ nyaa wi tɔliyɔ nɛ̄ yèʔ. 9Làa nɛ̄ Pɔli wi 'puu nɛ nyu a ki nàguɔ ŋáà wi 'kɛ́ nɛ̀ sɛ́ni wi siɛnrɛ lúru dè. A Pɔli wi kɛ́nì nyapigele le gèle wi nī, nɛ̀ ki 'nyaa tɛ́ngɛlɛ yē wi mɛ́ wi bé gbɛ̀ puʔɔ. 10A wi 'juu nɛ́ wi ní yékpogbuɔlɔ nī nɛ́ wi yɛ: «Yɛ̀ ma yéri muɔ tɔliyɔ nɛ̄ yè píra píra ŋáà nī wè !» A nàguɔ wi 'yo nɛ̀ yɛ̀, nɛ̀ fali nɛ tári sɛni.

11Bà siɛnnɛ pe 'kire nyaa gè, gàa Pɔli wi cé kpíʔile gè, a pe 'juu yékpogbuɔlɔ nī Liikawoni kùlo siɛnrɛ nī dè nɛ́ jo: «Cí ! Ye- nyaa kulocɛlɛlɛ pe 'yiʔɛ nɛ̀ siɛnnɛ céri líɛ, nɛ̀ tìgi nɛ̀ pɛn náʔa weli mɛ́ !»

12A pe 'míʔɛ le Barinabasi nɛ̄ wè nɛ̀ jo «Zusi», nɛ́ sí Pɔli míʔɛ le gè nɛ̀ jo «Ɛrimɛsi#14.12 Girɛki wuulo mɛ́ bèle Zusi wire wi 'puu pe kulocɛlɛlɛ kàfɔli péliwe wè; Ɛrimɛsi wire wi 'puu kulocɛlɛlɛ pe siɛnsuɔjuuwo wè, nɛ́ ní kulocɛliɛ wáà nɛ̀ pínɛ.», bɛ̀ ki 'nyaa Pɔli wi 'puu nɛ siɛnrɛ suu dè nɛ nyu wè.

13Ŋàa wi 'puu nɛ Zusi kakuɔrɔ kúu dè, wi kòridiʔɛ ki 'puu baa kàʔa jíinmɛ wìile táanni lè, a wire 'pɛn nɛ́ nɛ̀piʔɛlɛ ní a pe 'ke fèri nɛ́ tiire fiɛnrɛ gèsiɛ ní. A ki 'nyaa wire nɛ́ kàʔa siɛnnɛ ní bèle pe ki sɔ̀ngí peli bé nɛ̀piʔɛlɛ gálì kpúu gèle bè sun Pɔli nɛ́ Barinabasi mɛ́ wè.

14Bà Barinabasi nɛ́ Pɔli ní wè, Zezi tundunminɔ bèle, bà pe 'tire lúʔu dè, a pe 'pe bururo píle dè nɛ̀ cɛnminɛ#14.14 Pe 'bururo píle dè nɛ̀ cɛnminɛ bè ki tìɛ kaala náà pe 'kpíʔile lè, niì peli dɛ́ni púloʔ. Wéli baa Tɔ́r 14.6., nɛ́ fɛ̀ nɛ̀ kɛ́ siɛnniʔɛmɛ kúrugu bè níɛ kòkuulo wáari nɛ́ jo: 15«ʔé, weli wuulo, gáa yeli je kpíʔile mmɛ gè ? Je siɛnnɛ bīɛlɛ weli míɛni bèle bɛ̀ yeli tíɛlɛ. Kataanna Siɛnrɛ tire weli nɛ nyu yeli mɛ́: ye- láʔa nyùgofun kele gálì nɛ̄ gèle, yé sí taʔa Kulocɛliɛ wewiiwe nɛ̄ wè. Wire wi 'nyìʔɛnɛ faan lè nɛ́ dàala ní lè, nɛ́ kuʔɔjii lakpoliyo ní yè, nɛ́ ti laamɛ yɛrɛ ti mìɛni ní dè#14.15 Wéli baa Ŋún 146.6.. 16Faʔa gè, Kulocɛliɛ wi cé kùlogolo siɛnnɛ pe mìɛni yaʔa bèle pe pe nyɛ́ni koliyo tári yè. 17Nɛ̀ sí ki taa wiì cé wi kacɛ̀ngbiʔilige yérige gèʔ: wiī baa nyìʔɛnɛ nī lè níɛ kàsaʔa cáanri gè yeli mɛ́, nɛ yafalidɛ kpínʔini dè ti sɛngi ti lɛ̀gɛlɛ nī gèle, níɛ yeli kanʔa nɛ kɔli laʔala yaliire nɛ̄ dè, nɛ fundaanra nyɔ́gi yeli funyɔ nī yè.»

18A Zezi tundunminɔ pe siɛnjuuro dáà ti 'ki kpíʔile a pe 'tasunmɔ yaʔa bè, bà pe 'puu nɛ caa bè nɛ̀piʔɛlɛ kpúu gèle bè sun pe mɛ́ bèle; pe sí cé pìye píle nɛ̀ mɔgɔ, cíʔɛ wi cé kò dí siɛnnɛ bálì pe sí tasunmɔ báà sun bè.

19A Zuufulo pálì kɛ́nì kɔ́n Antiyɔsi kàʔa mɛ́, nɛ́ Ikonɔmi kàʔa mɛ́, nɛ̀ pɛ́nì juu nɛ̀ tɛ́ni siɛnnɛ nī bèle. A pe 'Pɔli wáa wè nɛ́ sìndari ní, nɛ́ wi fulolo nɛ̀ sɛ́nì wáa kàʔa kúrugu gè, níɛ sɔ̀ngí wi 'kùu wī. 20Nɛ̀ ki yaʔa bà pìtɛnmɛnɛ pe 'kɛ́nì kɛ́ nɛ̀ sɛ́nì gbuʔulo nɛ̀ wi màʔa bèle, a wi 'yɛ̀ nɛ̀ jíin kàʔa nī gè. Ki kpìɛnduu gè a pe 'yiri nɛ̀ kɛ́ Dɛribi kàʔa mɛ́, wire nɛ́ Barinabasi.

Pɔli nɛ́ Barinabasi pe 'koli nɛ̀ kɛ́ Antiyɔsi kàʔa mɛ́

21Bà Barinabasi nɛ́ Pɔli pe kɛ́nì Kataanna Siɛnrɛ jáari dè nɛ̀ kúɔ baa ki kàʔa nī gè, a siɛnniʔɛnɛ 'tɛ́ngɛ nɛ̀ kò pìtɛnmɛnɛ, a pe 'koli nɛ̀ kɛ́ Liisitiri kàʔa mɛ́, nɛ́ Ikonɔmi kàʔa, nɛ́ Antiyɔsi kàʔa mɛ́. 22Pe 'puu nɛ nyu nɛ ŋɔri nɛ́ lèbaanna nyɔ́gi tɛ́ngɛfɔlilɔ nī bèle nɛ́ pe yɛ pe- tɛ́ngɛlɛ cò lè kpuʔɔ, nɛ̀ taʔa gíi nɛ̄, pe 'puu nɛ ki nyu nɛ́ jo: «Ki 'kàri fànʔa wī wuʔɔgɔ bé weli taa kpuʔɔ dí weli nɛ́ béli jíin Kulocɛliɛ Kùlofɔligɔ nī gè.»

23A ki 'nyaa tɛ́ngɛfɔlilɔ gboli ó tɛ́ngɛfɔlilɔ gboli nī lè, a Pɔli nɛ́ Barinabasi pe 'liɛlɛ pálì nyíɛnɛ nɛ̀ kɔ̀n, nɛ́ sí Kulocɛliɛ náari wè pe mɛ́, nɛ́ sún le, nɛ́ sí pe le Kàfɔli wi kiyɛ nī, wire ŋáà nɛ̄ pe cé tɛ́ngɛ wè.

24Bà tire 'tóri dè, a Pɔli nɛ́ Barinabasi ní wè, a pe 'sùuri Pisidii tɛ́nimɛ nī bè nɛ̀ kɛ́ Panfilii tɛ́nimɛ nī. 25A pe sɛ́nì Kulocɛliɛ siɛnrɛ juu dè Pɛrizi kàʔa mɛ́, nɛ́ kúɔ nɛ́ kɛ́ Atalii kàʔa mɛ́. 26A pe kɛ́nì yiri baa kire tiʔɛ nī gè nɛ̀ jíin kɔ́rikpuʔɔ káà nī nɛ̀ kɛ́ Antiyɔsi kàʔa mɛ́, ki 'nyaa baa pe cé ki séli kire kàʔa gáà nī gè, baa pe cé Kulocɛliɛ náari wè pe mɛ́ á pe 'kɛ́ nɛ̀ sɛ́nì baara dáà kúɔ dè.

27Bà sí pe sɛ́nì nɔ̀ bèle, a pe 'tɛ́ngɛfɔlilɔ yeri bèle nɛ̀ gbuʔulo, nɛ́ kele tɔ́ri gèle nɛ̀ tìɛ pe nɛ̄, gìi mìɛni Kulocɛliɛ wi cé kpíʔile nɛ̀ tóri nɛ́ peli ní bèle, nɛ́ bɛ̀ wi cé tɛ́ngɛlɛ koligo múgu gè kùlogolo kálì siɛnnɛ mɛ́ bèle. 28A Pɔli nɛ́ Barinabasi ní wè a pe 'kò baa nɛ́ tɛ́ngɛfɔlilɔ ní bèle nɛ̀ mɔgɔ nɛ́ pe ní.

Currently Selected:

Kakpiʔiligele 14: sev

Highlight

Copy