Kakpiʔiligele 13

ZEZI TUNDUNMINƆ BAARA DE AZII TƐNIMƐ WUULO MƐ BELE NƐ GIRƐKI KULO WUULO NI BELE

(13.1–20.38)

Kulocɛliɛ Pìle ni 'jo pe- Barinabasi nɛ́ Sɔli wàli pe tɛ́ngɛ wire mɛ́

1Baa Antiyɔsi tɛ́ngɛfɔlilɔ gboli nī lè, Kulocɛliɛ siɛnjuulo 'puu baa nɛ́ tɛnmɛfɔlilɔ ní, pe míɛyɛ yi n'yɛ: Barinabasi nɛ́ Simɛyɔ ŋáà pe ye Nawuɔ wè, nɛ́ Lusiyɔsi ŋáà wi 'kɔ́n Siirɛni kàʔa mɛ́ gè, nɛ́ Manayɛni wire ŋáà wi cé wúɔ nɛ̀ pìire pùrɔ nɛ́ kùlofɔli Erodi ní wè, nɛ́ Sɔli. 2Cɛngɛ káà, pe ní baa nɛ Kàfɔli gbùʔɔrɔ́ wè nɛ́ ní sún nɛ̄ wè, a Kulocɛliɛ Pìle ni kɛ́nì jo: «Ye- Barinabasi nɛ́ Sɔli wàli ye tɛ́ngɛ m'mɛ́ baara díì nɛ̄ mi 'pe yeri bèle.» 3Bà sí ki 'kpíʔile, a pe 'sún le nɛ́ náari, nɛ́ kúɔ nɛ́ kiyɛ taʔala yè pe nɛ̄, nɛ́ pe yaʔa a pe 'kɛ́.

Barinabasi nɛ́ Sɔli pe 'kɛ́ Siipiri tɛ́nimɛ nī

4Bɛ̀ Kulocɛliɛ Pìle ni sí 'pe tun bèle, a Barinabasi nɛ́ Sɔli ní wè a pe 'yɛ̀ nɛ̀ kɛ́ Selosi kàʔa mɛ́, nɛ̀ sɛ́nì jíin kɔ́rikpuʔɔ#13.4 Kɔ́rikpuʔɔ gáà ki 'puu a pe 'fɛ̀ni puɔ ki nɛ̄ naamɛ gè. Káfaligɛ ki nàa ki fɛ̀ni ŋáà píle wè, á kɔ́rikpuʔɔ ki nìɛ waa luʔɔ nɛ̄ gè. nī nɛ̀ fali Siipiri tɛ́nimɛ nī; ki tiʔɛ ki 'puu luʔɔ sunʔɔmɔ nī. 5Bà pe sɛ́nì nɔ̀ Salamiini kàʔa nɛ̄ gè, a pe 'yɛ̀ nɛ Kulocɛliɛ siɛnrɛ nyu dè Zuufulo pe tɛnmɛzaaya nī yè; Zan Mariki míɛni 'puu baa nɛ̀ fàri pe nɛ̄.

6A pe 'sùuri ki tiʔɛ nī gè gàa ki 'puu luʔɔ sunʔɔmɔ nī bè, fúɔ nɛ̀ sɛ́nì nɔ̀ Pafɔsi kàʔa nɛ̄. A pe 'nàguɔ wáà nyaa baa, Zuufulo pe nìnyuʔɔnigɔfɔli wáà wi 'puu, pe 'puu nɛ wi ye Bari Zezi. Wi 'puu nɛ wìi kpínʔini wire yē Kulocɛliɛ siɛnjuuwo, nɛ̀ sí ki taa jànvaafɔli wi 'puu. 7Ki nàguɔ wi 'puu nɛ́ Sɛrizusi Pɔlɔsi ní wè, wire ŋáà wi 'puu ki tiʔɛ tɛ́nimɛ fànʔafɔli wè. Pɔlɔsi wi 'puu siɛn síciliwe, a wi 'Barinabasi nɛ́ Sɔli yeri bèle pe- kɛ́ baa wire mɛ́, ki 'nyaa Kulocɛliɛ siɛnrɛ ti lúʔu láa 'puu wi nɛ̄ kpuʔɔ. 8Nɛ̀ sí ki taa, a Bar Zezi wi 'yɛ̀ nɛ kìí nɛ́ pe ní. Pe 'puu nɛ wi ye míɛni Eliimasi; ki míʔɛ ki kɔri wire wī nìnyuʔɔnigɔfɔli. Wi 'puu nɛ kɛnmɛ caa bè fànʔafɔli pùunni wè, wi fǎga jíin tɛ́ngɛlɛ nī lèʔ.

9Kire tiʔɛ gáà nī gè, Sɔli wè, ŋàa pe 'puu nɛ wi ye nɛ pínɛ Pɔli wè, bɛ̀ Kulocɛliɛ Pìle ni cé wi nyì lè, a wi 'nyapigele le gèle wi nī nɛ̀ wi kɛ̀ni, 10nɛ́ wi yɛ: «Nàguɔ muɔ, kpìlikpili nɛ́ sìpiire ti 'muɔ nyì. Gbòdolilo kàfɔli pùɔ wī muɔ wè, sínmɛ feliye yi mìɛni leguuwo wī muɔ wè. Gáa lɛ̀lɛ nī muɔ bága láʔa bɛ̀ muɔ nɛ ki caa bè Kàfɔli wi kozinge koli gè ? 11Ma sí de nyaʔa píra ŋáà nī wè, Kàfɔli wi bé muɔ kpúɔn; muɔ bé fùn muɔ sǐ ní de cɛngɛ kpìɛnmɛ nyaʔa bèʔ, fúɔ bè pa lɛ̀lɛ láà kúɔ.»

Tiɛnugo nī gè a Eliimasi 'fali nɛ̀ ki 'nyaa nàwirile sɛni, a ki 'kò yebilige. A wi 'yɛ̀ nɛ tali nɛ tári, nɛ siɛn caa wi- wire cò. 12Bà fànʔafɔli wi 'kire nyaa gè, a wi 'tɛ́ngɛ. Ki 'nyaa tɛnmɛnɛ náà Kàfɔli wi cé kɛn nàa lè, ni cé wi cò fungo nī gè.

Pɔli nɛ́ Barinabasi pe 'kɛ́ Antiyɔsi kàʔa mɛ́

13 Pɔli wè nɛ́ wi kobinɛnyɛninɛ ní bèle, a pe 'yiri Pafɔsi kàʔa nī gè nɛ̀ jíin kɔ́rikpuʔɔ nī gè, nɛ̀ kɛ́ Pɛrizi kàʔa mɛ́ Panfilii tɛ́nimɛ nī. A Zan Mariki wi 'koli pe kúrugu, nɛ̀ kɛ́ Zerizalɛmi kàʔa mɛ́. 14Peli bèle a pe 'sùuri Pɛrizi kàʔa nī gè, nɛ̀ kɛ́ Antiyɔsi kàʔa mɛ́ Pisidii tɛ́nimɛ nī. Cɛndɛnigɛ cɛngɛ gè a pe 'kɛ́ tɛnmɛzaʔa mɛ́ gè, nɛ̀ sɛ́nì jíin nɛ̀ tɛ́ni.

15Bà Kulocɛliɛ Fànʔa Siɛnrɛ ti kɛ́nì juu nɛ̀ kúɔ dè, nɛ́ Kulocɛliɛ siɛnjuuliɛlɛ pe wori ní dè, a tɛnmɛzaʔa kàfɔlilɔ pe 'tunduro tórigo Pɔliyé mɛ́ bèle nɛ́ jo: «We siinyɛninɛ, a ki yē siɛnrɛ yē yeli mɛ́ bè juu bè lèbaanna nyɔ́gɔ siɛnnɛ nī bèle, tiʔɛ yē baa yeli mɛ́.»

16A Pɔli wi 'yɛ̀ nɛ̀ yéri nɛ́ kɔli yɛ̀gɛ gè siɛnnɛ mɛ́ bèle nɛ́ jo: «Nɛ siinyɛninɛ Isirayɛli wuulo, nɛ́ yeli bálì bīɛlɛ kùlogolo kálì siɛnnɛ níɛ fìʔɛ́ Kulocɛliɛ nɛ̄ wè, ye- mi siɛnrɛ lúʔu dè ! 17Kulocɛliɛ wè, Isirayɛliyé wuu wè, wi 'weli tuuliɛyɛ nyíɛnɛ yè nɛ̀ kɔ̀n, nɛ̀ ń'nɛ̀ kpuʔɔrɔ taʔa Isirayɛliyé wuulo nɛ̄ bèle lɛ̀lɛ níì nī pe 'puu baa Ezipiti kùlo nī lè, nɛ́ pe kpíʔile a pe 'niʔɛ wè. A wi ń'nɛ̀ pe kɔ́ri nɛ̀ yige Ezipiti wuulo sunʔɔmɔ nī bè nɛ́ wi ŋɔri kɔli ní gè, 18nɛ́ pe kpàri nɛ̀ cò fúɔ nɛ waa yiʔɛlɛ togosiin larigɛ nī waama kùlo nī lè. 19A wi 'kùlogolo kɔlisiin kpúɔn nɛ̀ cɛrigɛ Kanaa kùlo nī lè, nɛ́ ki kùlo kɛn lè Isirayɛli pìile mɛ́ bèle kɔrigɔ, 20fúɔ nɛ̀ taa yiʔɛlɛ sirasiin togosiin nɛ́ kpɔrigɔ (450). Kire kàduʔumɛ gè a wi 'kàyuʔujuulo kɛn pe mɛ́ fúɔ nɛ̀ pɛ́nì nɔ̀ Samiyɛli lɛ̀lɛ nī lè, Kulocɛliɛ siɛnjuuliɛwɛ wè.

21«A pe kɛ́nì jo piyē nɛ kùlofɔli caa, a Kulocɛliɛ wi sí Sawuli kɛn pe mɛ́, Kiisi jaa wè, Bɛnzamɛ saʔa tùlugo wuu wè. A wire 'tɛ́ni fànʔa nɛ̄ gè nɛ̀ pɛ́nì taa yiʔɛlɛ togosiin. 22Bà Kulocɛliɛ wi cé kɛ́nì wi tìrige fànʔa nɛ̄ gè, a wi 'Dawuda tɛ́ngɛ kùlofɔlilɔ kácunʔɔ nɛ̄ gè. Kire Dawuda wire wori Kulocɛliɛ wi cé juu dè, nɛ́ jo: ‹Mi nyɛ́nì Dawuda caa nɛ̀ nyaa, Yese jaa wè. Wi kɛnmɛ pi 'yɛli nɛ́ siɛn ŋáà mi nɛ caa wè, ŋàa wi bé mi nyɛ́ni kele ke mìɛni kúɔ gèle#13.22 Ŋún 89.21 nɛ́ Sam1 13.14 tire ti 'juu náʔa gè..›

23«Wire siimɛ tùlugo kire nī Kulocɛliɛ wi cé kɛ́nì suɔfɔli yige wè nɛ̀ kɛn Isirayɛli wuulo mɛ́ bèle, Zezi wè, nɛ̀ yɛli nɛ́ nyafɛnigɛ gáà ní wi cé kpíʔile gè. 24Sɛ́ni wi cé pɛn wè, Zan wi cé kíni nɛ̀ ki juu nɛ̀ kúɔ Isirayɛli kùlo wuulo pe mìɛni mɛ́ bèle nɛ́ pe yɛ pe- pe funyɔ yiʔɛ yè, pé sí batɛmi kpíʔile wè. 25Bà Zan baara ti yé kɛ́ni waa ti kúɔdiʔɛ nī gè, a wi 'jo: ‹Yeli nɛ ki sɔ̀ngí ŋáasiɛn wī mi wè ? M'bɛ̀ʔ ŋàa yeli nɛ siri wè díɛʔ ! Wàa yē nɛ báan baa mi kàduʔumɛ gè, miì nyuɔ nɛ̀ yɛliʔ bè gbɛ̀ wi tɔriyɔ fòlilo yè wi nɛ̄ʔ.›

26«Mi siinyɛninɛ, yeli bèle Birayima siimɛ pìile bèle, nɛ́ yeli bálì ye nyɛ́ni fìʔɛ́ Kulocɛliɛ nɛ̄ wè, weli mɛ́ Kulocɛliɛ wi cé suɔlɔ siɛnrɛ dáà tórigo dè. 27Ki 'nyaa Zerizalɛmi kàʔa wuulo bèle nɛ́ pe yiɛgininɛ ní bèle, piyè cé Zezi cɛ́n wèʔ, nɛ̀ pínɛ piyè cé Kulocɛliɛ siɛnjuuliɛlɛ pe siɛnrɛ ti kɔri cɛ́n wèʔ. A ki 'nyaa bà pe 'wi kàyuʔu juu gè, a ki 'kpíʔile a pe 'ki siɛnrɛ dáà fori dè, dàa pe sí nɛ wéli sɛbɛ nī wè cɛndɛniyɛ cɛnyɛ nī yè.

28«Kire ki mìɛni láara gè, piyè kaala yafiɛn nyaa wi nɛ̄ʔ, nàa ni 'kakpuulo kúɔ lèʔ, nɛ̀ sí ki taa a pe 'bèli nɛ̀ Pilati yɛ wè wi- wi kpúu. 29Fúɔ nɛ̀ taa bà pe kɛ́nì kele ke mìɛni kpíʔile wi nɛ̄ gèle, gàli ke cé sɛbɛ nɛ́ wi míʔɛ ní gè, a pe sɛ́nì wi wokuugo tìrige gè tiiparigɛ nɛ̄ gè, nɛ̀ sɛ́nì wi le nyɛgɛ nī. 30A Kulocɛliɛ wi sí wi nyɛ́ nɛ̀ yige kúbilo nī bèle. 31Bìli pe cé kɔ́n Galile tɛ́nimɛ nī bè nɛ́ tánʔa nɛ̀ kɛ́ nɛ́ wi ní Zerizalɛmi kàʔa mɛ́ gè, a wi 'wìi tìɛ pe nɛ̄ nɛ̀ taa cɛnyɛ nìʔɛyɛ. Peli bīɛlɛ píra ŋáà nī wè, pe 'káà cɛ́n wi wori nī dè níɛ ti nyu kùlo wuulo mɛ́ bèle, bɛ̀ ki 'nyaa peli bīɛlɛ pe cé wi nyaa wè.

32«Kire Kataanna Siɛnrɛ tire weli nɛ nyu yeli mɛ́, kaala níì nɛ̄ Kulocɛliɛ wi cé nyuɔ fɛ̀ni weli tuuliɛyɛ mɛ́ yè. 33Wi nyɛ́nì ki nyasiɛnrɛ fori dè weli mɛ́, weli bálì bīɛlɛ pe pìile bèle, bɛ̀ ki 'nyaa wi 'Zezi nyɛ́ wè nɛ̀ yige kúbilo nī bèle, nɛ̀ yɛli nɛ́ siɛnrɛ díì ti 'sɛbɛ baa Ŋúnuyɔ Sɛbɛ nyùyɔ siinwuʔu nī gè; ti 'jo:

Muɔ yē mi jaa,

pàngɛ gè mi 'muɔ sii # 13.33 Ŋún 2.7 tire ti 'juu náʔa. .

34«Bɛ̀ sí Kulocɛliɛ wi 'Zezi yɛ̀gɛ wè kúbilo nī bèle; kiǐ gbɛ̀ kpíʔileʔ wi- céri ti fúnʔɔʔ. Kire nɛ̄ a Kulocɛliɛ wi sí jo:

Nyafɛniyɛ nyáà mi 'kpíʔile

Dawuda mɛ́ wè,

ki siɛnrɛ tiǐ gbɛ̀ suɔ tuuʔ,

m'bé ti fori yeli mɛ́ # 13.34 Eza 55.3 tire ti 'juu náʔa nɛ̀ yɛli nɛ́ girɛki siɛnliɛrɛ ní dè. .

35«Kire nɛ̄ a wi ń'nɛ̀ ki juu tiʔɛ káà nī nɛ́ jo:

Muɔ sǐ fɔ̀li ki nɛ̄ʔ

bè muɔ siɛn yaʔa wèʔ

ŋàa wī muɔ wuu wè,

wi- fúnʔɔ nyɛgɛ nī gèʔ # 13.35 Ŋún 16.10 tire ti 'juu náʔa nɛ̀ yɛli nɛ́ girɛki siɛnliɛrɛ ní dè. .

36«Nɛ̀ sí ki taa Dawuda wire tíimɛ wè, wi lɛ̀lɛ nī lè bà wi cé Kulocɛliɛ fungo kele kpíʔile gèle nɛ̀ kúɔ gèle, a wi 'kùu, a pe sɛ́nì wi tɔ́n wi tuuliɛyɛ táanni yè, a wi céri ti 'fúnʔɔ. 37Siɛn ŋíì sí Kulocɛliɛ wi 'nyɛ́ nɛ̀ yige wè, fúnʔɔrɔ tiì wi céri cò dèʔ.

38«Mi siinyɛninɛ, ye- sí ki cɛ́n Zezi wire nyúmɔ nī kapiʔile kàsulugosuɔ wori ti 'juu nɛ̀ nɔ̀ yeli nɛ̄, nɛ̀ pínɛ wire nyúmɔ nī gìi mìɛni yeli sǐ cî gbɛ̀ jáa bè taa Misa Fànʔa Siɛnrɛ nī dèʔ, a wi 'ki kpíʔile yeli mɛ́, kire 'nyaa bè siɛn juu bè yige kaala nī wè. 39Wire nyúmɔ nī bè, siɛn ó siɛn wi 'tɛ́ngɛ wè, Kulocɛliɛ nɛ wi tɔ́ri siɛnsinwɛ.

40«Ye- sí yìye cò díɛ, ye fǎga tí siɛnrɛ dáà Kulocɛliɛ siɛnjuuliɛlɛ pe 'juu dè ki siɛnrɛ ti- yeli còʔ. 41Ti 'jo:

Ye- nyaa, yeli bálì ye nyɛ́ni

Kulocɛliɛ kele cúɔnnɔ gèle,

ki bága puu yeli mɛ́ funwuɔrɔ wuʔu,

yeli bé cúʔɔ bè yiri bile.

Ki 'nyaa kaala náà

mi je ga kpíʔile yeli cɛnyɛ nī yè,

a siɛn cɛ́nì ti tɔ́ri nɛ̀ tìɛ yeli nɛ̄,

yeli sǐ tɛ́ngɛ ti nɛ̄ʔ # 13.41 Yab 1.5 tire ti 'juu náʔa nɛ̀ yɛli nɛ́ girɛki siɛnliɛrɛ ní dè. .»

42Bà Pɔli nɛ́ Barinabasi pe kɛ́ni yigi tɛnmɛzaʔa nī gè, a pe 'pe náari nɛ́ pe yɛ cɛndɛnigɛ cɛngɛ gíì ki báan gè, pe ní pa ki siɛnnuro dáà juu dè. 43Bà siɛnnɛ pe kɛ́nì yiri tɛnmɛzaʔa nī gè, a Zuufulo nìʔɛnɛ 'líɛ nɛ̀ taʔa pe kúrugu, nɛ́ pàli ní bàli pe cé yiʔɛ nɛ̀ jíin Zuufulo koligo nī gè. A Pɔli nɛ́ Barinabasi pe 'juu nɛ́ pe ní, nɛ̀ ki juu nɛ lèbaanna nyɔ́gɔ pe nī, nɛ́ pe yɛ pe- yéri pe nyayerigele nī gèle Kulocɛliɛ kpuʔɔrɔ nī dè.

44 Cɛndɛnigɛ cɛngɛ gíì ki 'yɛ̀ nɛ̀ taʔa gè, a ki 'kpíʔile majo kàʔa ki mìɛni 'kɛ́ nɛ̀ sɛ́nì kìi pínɛ bè Kàfɔli siɛnrɛ lúʔu dè. 45Bà Zuufulo pe sí siɛnnɛ nyaa bèle nìʔɛnɛ mmɛ gè, a ki 'yejaʔa yɛ̀gɛ pe nī kpuʔɔ, a pe 'yɛ̀ nɛ nyu nɛ teri nɛ Pɔli siɛnrɛ kìí dè.

46A kire sí juudiʔɛ kɛn Pɔli nɛ́ Barinabasi mɛ́ bèle, a pe 'juu nɛ́ nàzorido ní nɛ́ jo: «Yeli mɛ́ Kulocɛliɛ siɛnrɛ ti cé yɛli ti kíni ti juu gbínʔɛnɛ. Bɛ̀ sí yeli 'ti cíi yeli tíimɛ bèle, nɛ́ yìye kpíʔile yeli sì yɛli nɛ́ bànguɔ sìi ní wèʔ, ao, weli bé sí koli de waa nɛ́ ti ní kùlogolo kálì wuulo mɛ́. 47Nɛ̀ taʔa gíi nɛ̄, n'gɛ gàa Kàfɔli wi 'juu nɛ̀ gbɛ̀ngɛ weli mɛ́ gè:

Mi 'muɔ tɛ́ngɛ ma puu

kpìɛnmɛ kùlogolo kálì

siɛnnɛ mɛ́ bèle,

ma suɔlɔ koligo tìɛ gè pe nɛ̄

fúɔ ma sa nɔ̀ duniya

láʔala nɛ̄ lè # 13.47 Eza 49.6 tire ti 'juu náʔa gè. .»

48Bà kùlogolo kálì wuulo pe 'siɛnrɛ dáà lúʔu dè, a ti 'fundaanra nyɔ́gɔ pe nī a pe 'yɛ̀ nɛ kpuʔɔrɔ tari Kàfɔli wi siɛnrɛ nɛ̄ dè, nɛ̀ pínɛ bìli mìɛni Kulocɛliɛ wi cé tɛ́ngɛ nɛ̀ yaʔa bànguɔ sìi wori nɛ̄ dè, a pe 'kò tɛ́ngɛfɔlilɔ.

49A ki 'kpíʔile a Kàfɔli siɛnrɛ ti 'cɛ̀ri ki tiʔɛ tɛ́nimɛ pi mìɛni nī bè. 50Nɛ̀ sí ki taa a Zuufulo pe 'larigboliyo cɛlilɛ pálì líʔi peli nɛ́ kàʔa ki yiɛgininɛ ní bèle, nɛ̀ wáa Pɔli nɛ́ Barinabasi nɛ̄ bèle. Ki larigboliyo cɛlilɛ pe 'puu nɛ Zuufulo Kulocɛliɛ caagoligo gbùʔɔrɔ́ gè. A pe 'wuʔɔgɔ taʔa Pɔli nɛ́ Barinabasi nɛ̄ wè, nɛ̀ pe cìra nɛ̀ yige pe tiʔɛ nī gè.

51Bà pe waa bèle a pe sí pe yedaʔala cúbugo cúru gè nɛ̀ wáa baa pe nɛ̄#13.51 Wéli baa Mar 6.11 kaliwɛgɛ táanmɛ gè., nɛ́ yiri nɛ̀ kɛ́ Ikonɔmi kàʔa mɛ́. 52Fundaanra ti cé pìtɛnmɛnɛ pe funyɔ nyì yè, nɛ̀ pínɛ Kulocɛliɛ Pìle ni cé pe nyì.

Currently Selected:

Kakpiʔiligele 13: sev

Highlight

Copy