Kakpiʔiligele 12

Erodi wi 'tí a pe 'Zaki kpúu nɛ́ Piɛri cò nɛ̀ tɔ́n

1Kire lɛ̀lɛ náà nī lè kùlofɔli Erodi wi cé tɛ́ngɛfɔlilɔ pálì cò nɛ̀ pe wuʔɔ. 2A wi 'tí a pe 'Zaki kpúu wè, Zan siinyɛni wè, nɛ́ ŋɔsii ní. 3Bà sí wi cé ki 'nyaa a ki 'Zuufulo dɛ́ni bèle, a wi 'Piɛri míɛni cò wè; Sìnvarifun Búru Fundaanra cɛnyɛ nī ki 'puu. 4Bà pe 'wi cò wè, a wi 'tí a pe 'wi tɔ́n kasuu nī, nɛ́ kapiɛngbuɔnnɔ sicɛricɛri tòyo sicɛri tɛ́ngɛ peri wi wéli. Ki 'nyaa wi cé puu nɛ ki siri Torimakiyaʔa cɛnyɛ yi- yiri, bé sí wi kàyuʔu juu gè kùlo wuulo pe mìɛni pe nyaamɛ nɛ̄. 5Bà sí Piɛri wi 'puu baa kasuu nī wè, a tɛ́ngɛfɔlilɔ gboli ni 'yiʔɛ le nɛ Kulocɛliɛ náari wè wi mɛ́.

Nyìʔɛnɛ tundunwɔ wáà 'Piɛri yige kasuu nī wè

6Bà sí Erodi wi 'puu nɛ gbòborí bè Piɛri kàyuʔu juu gè kùlo ni mìɛni yiʔɛ mɛ́ gè, a ki 'nyaa ki pìlige nī gè Piɛri wi 'puu nɛ ŋɔ́ni baa kasuu nī wè, kapiɛngbuɔnnɔ siin sunʔɔmɔ nī. Pe cé wi puɔ nɛ́ nɛ̀gɛjɔliyɔ siin ní, á kapiɛngbuɔnnɔ pálì yéri baa kasuusaʔa wìile nɛ̄ lè.

7Cɛ̀ri sìʔɛrɛ a Kàfɔli wi nyìʔɛnɛ tundunwɔ wáà 'yiri, a kpìɛnmɛ páà 'càanna baa kasuusaʔa nī gè. A wi 'Piɛri kpúɔn wè tɛ́bitɛbi lìʔɛlɛ nī lè a wi 'yɛ̀, a wi 'wi yɛ: «Yɛ̀ fáari!» A nɛ̀gɛjɔliyɔ yi 'fali nɛ̀ yiri wi kiyɛ nɛ̄ yè nɛ̀ tuu. 8A nyìʔɛnɛ tundunwɔ wi 'wi yɛ: «-Muɔ bururo le dè nɛ́ tɔriyɔ ní yè.» A wi 'ki kpíʔile. A nyìʔɛnɛ tundunwɔ wi 'wi yɛ: «-Muɔ burugbuʔɔ líɛ gè ma le, má taʔa mi nɛ̄.»

9A Piɛri wi 'yiri nɛ̀ taʔa wi nɛ̄. Wiì cé ki cɛ́n ga kányiʔɛ gīʔ, gàa nyìʔɛnɛ tundunwɔ wi cé kpíʔile gèʔ; wi cé jo dùʔɔ ŋɔ́nigɔ ki 'tuu wire nɛ̄. 10A pe 'tóri nɛ̀ yiri kasuuwelile gboli pélile táanni lè, nɛ̀ sɛ́nì tóri siinwoli táanni lè, nɛ̀ sɛ́nì nɔ̀ timɔri wìikpuɔlɔ kɔ̀ri nɛ̄ gè, ki cé yiʔɛ wáa kàʔa mɛ́ gè. A kɔ̀ri ki 'múgu kìimɛ pe yiʔɛ mɛ́ gè, a pe 'yiri nɛ̀ koligo líɛ gè. Cɛ̀ri sìʔɛrɛ a nyìʔɛnɛ tundunwɔ wi 'koli Piɛri kúrugu wè.

11A Piɛri wi yiʔɛ ki 'cìile, a wi 'jo: «Mi nɛ́ béli nɛ̀ ki cɛ́n kányiʔɛ gī, Kàfɔli wi 'wi tundunwɔ tórigo wè a wi pɛ́nì mi suɔ Erodi kiyɛ nī yè, nɛ́ gìi ní Zuufulo pe 'puu nɛ sɔ̀ngí nɛ́ mi ní wè.»

12Bà wi yiʔɛ ki 'cìile wè, a wi 'kɛ́ Maari kpáa mɛ́, Zan yàa wè, Zan ŋáà pe 'puu nɛ ye nɛ pínɛ Mariki wè. Siɛnnɛ 'puu baa nìʔɛbɛlɛ; pe cé sɛ́nì pínɛ nɛ Kulocɛliɛ náari wè. 13A wi 'kɔ̀ri kóli gè, a baakuɔsinboriwo wáà kɛ́ baa wìile mɛ́ lè, pe 'puu nɛ wi ye Wuroda. 14A wi 'Piɛri yékpoli lúʔu lè nɛ̀ cɛ́n, bà sí fundaanra ti yé 'cíi wi nɛ̄ dè, a wi 'koli nɛ̀ láʔa nɛ̀ kɛ́, wiì kɔ̀ri múgu gèʔ. Nɛ́ fɛ̀ nɛ̀ sɛ́nì ti juu nɛ́ jo dí Piɛri wiī baa yériwe kɔ̀ri táanni gè.

15A pe 'wi yɛ: «Gáa kàalafɔlilɔ siɛnrɛ ma 'juu mmɛ gè ?» Wire wè, a wi sí faan nɛ ti nyu nɛ́ jo kányiʔɛ sí gī. A pe 'jo: «Ki bé nyaa wi nyìʔɛnɛ tundunwɔ wire wī.»

16Piɛri wi sí cé puu baa nɛ kɔ̀ri kóli gè nɛ tíin. Bà sí pe kâ sɛ́nì ki múgu gè, nɛ̀ ki 'nyaa wire wī, a ki 'pe funyɔ wúɔ kpuʔɔ. 17A wi 'kɔli yɛ̀gɛ pe mɛ́ nɛ́ pe yɛ pe- pìiri, nɛ́ sí ki juu pe mɛ́ mɛni Kàfɔli wi 'wire yige nɛ̀ síɛ kasuusaʔa nī gè. A wi 'fali nɛ̀ pe yɛ: «Ye- sa ti juu Zaki#12.17 Kàfɔli Zezi wi siinyɛni wi 'puu Zaki ŋáà wè. Wi cé baakpuɔrɔ kúɔ Zerizalɛmi kàʔa tɛ́ngɛfɔlilɔ gboli wuulo sunʔɔmɔ nī bè. Wéli baa 15.13-21; Mat 13.55; Gal 1.19. mɛ́ wè nɛ́ we siinyɛninɛ bílì ní bèle.» Nɛ́ fali nɛ̀ yiri pe táanni nɛ̀ kɛ́ tiʔɛ káà nī.

18Bà kpìɛnmɛ pi 'yɛ̀ nɛ̀ tuu wè a kàgbaaligɛ 'yɛ̀ kpuʔɔ baa kasuusaʔa wélifɔlilɔ sunʔɔmɔ nī bè: pe nyu níɛ wáa sétiʔɛni Piɛri wi kɛ́nì kɛ́ ? 19A Erodi wi 'tí a pe 'wi caa nɛ̀ màʔa; piyè wi nyaaʔ. A wi 'kasuusaʔa wélifɔlilɔ yúgo bèle, nɛ́ kúɔ nɛ́ jo pe- pe kpúu. Bà tire 'kúɔ dè a Erodi wi 'yiri Zude tɛ́nimɛ nī bè nɛ̀ kɛ́ Sezare kàʔa mɛ́, nɛ̀ sɛ́nì lɛ̀lɛ láà kúɔ baa.

Erodi kùugɛnmɛ bè

20 Erodi fungo ki cé tanʔana Tiiri kàʔa wuulo kúrugu bèle, peli nɛ́ Siidɔn kàʔa wuulo ní bèle. A pe sí bìɛ ki nɛ̄ bè sa wi nyaa, a pe 'juu nɛ́ Bilasitusi ní nɛ̀ wire nyasiɛnrɛ taa; wire wi 'puu nɛ kùlofɔli wi saasinɛgɛ gbòborí gè. Nɛ́ sí kɛ́ nɛ̀ sɛ́nì Erodi náari wè, yanyige- puu pe sunʔɔmɔ nī peli nɛ́ wi ní wè. Ki 'nyaa kùlofɔli wire tiʔɛ nī yaliire ti 'puu nɛ kɔ́ngi níɛ báan baa peli tiʔɛ nī gè.

21Cɛngɛ gíì pe yé tɛ́ngɛ bè pìye nyaa wè, bà ki cɛngɛ ki pɛ́nì nɔ̀ gè, a Erodi wi 'wi kùlofɔlilɔ bururo le dè, nɛ́ tɛ́ni kùlofɔlilɔ kácunʔɔ nɛ̄ gè, nɛ́ séli nɛ wi siɛnrɛ nyu dè siɛnnɛ yiʔɛ mɛ́ gè. 22A siɛnnɛ pe kɛ́nì kòkuulo wáa, nɛ́ jo: «Kulocɛliɛ wáà yékpoli nī nàa lè, siɛn yékpoli bɛ̀ʔ !»

23Tiɛnugo nī gè, a Kàfɔli wi nyìʔɛnɛ tundunwɔ wáà 'fali nɛ̀ wi kpúɔn nɛ̀ cáan sɛni, bɛ̀ ki 'nyaa wiì kpuʔɔrɔ taʔa Kulocɛliɛ nɛ̄ wèʔ. A fiɛnrɛ 'jíin wi nī nɛ̀ wi káa nɛ̀ kpúu.

24Nɛ̀ sí ki taa Kulocɛliɛ siɛnrɛ tire dè, ti 'puu nɛ nyu nɛ waa yiʔɛ mɛ́.

25Bà Barinabasi wire nɛ́ Sɔli ní wè, pe kɛ́nì kúɔ pe tunduro nɛ̄ dè baa Zerizalɛmi kàʔa mɛ́ gè, a pe 'koli nɛ̀ kɛ́. Pe cé Zan kɔ́ri nɛ̀ pínɛ nɛ́ pìye ní, Zan ŋáà pe 'puu nɛ ye Mariki wè.

Currently Selected:

Kakpiʔiligele 12: sev

Highlight

Copy