Kakpiʔiligele 11

Piɛri wi 'Kɔrinɛyi wori juu dè Zerizalɛmi tɛ́ngɛfɔlilɔ mɛ́ bèle

1 Zezi tundunminɔ bílì pe 'puu baa Zude tɛ́nimɛ nī bè, peli nɛ́ tɛ́ngɛfɔlilɔ ní bèle, a pe 'ki siɛnrɛ dáà lúʔu dè dí kùlogolo kálì siɛnnɛ míɛni nyɛ́nì Kulocɛliɛ siɛnrɛ lúʔu dè nɛ̀ fɔ̀li ti nɛ̄. 2Nɛ̀ sí ki taa bà Piɛri kɛ́nì koli nɛ̀ kɛ́ Zerizalɛmi kàʔa mɛ́ gè, tɛ́ngɛfɔlilɔ bílì pe cé kɛnɛkɛnɛ kpíʔile wè, a peli 'yɛ̀ nɛ nyu nɛ wi cɔ̀rí 3nɛ́ jo: «Muɔ sɛ́nì jíin nàguɔ ŋáà wi saʔa nī gè, ŋáà wiì kɛnɛkɛnɛ wèʔ, nɛ̀ pínɛ nɛ̀ lìi nɛ́ pe ní.»

4A Piɛri wi sí siɛnrɛ líɛ dè nɛ̀ ti sɔ́migɔ nɛ̀ juu nɛ̀ tìɛ pe nɛ̄, mɛni kele ke 'tóri gèle, nɛ́ pe yɛ: 5«Mi 'puu Zope kàʔa mɛ́ nɛ Kulocɛliɛ náari wè, a Kulocɛliɛ wi 'mi yiʔɛ múgu gè, a mi kɛ́nì fɛ̀nikpuʔɔ káà nyaa a ki 'kɔ́n nyìʔɛnɛ nī lè nɛ̀ tìgi, nɛ ní puɔjogo ki nyuɔyɔ sicɛri nɛ̄ yè, nɛ̀ pɛ́nì tɛ́ni mi yiʔɛ mɛ́ gè. 6A mi 'nyapigele le gèle ki nī nɛ ki wéli, a mi 'tɔliyɔ sicɛri yawiire felide ti mìɛni nyaa, nɛ́ yafulolido ní dè, nɛ́ sínjari ní. 7Á mi 'yékpoli láà lúʔu a ni 'jo: ‹Piɛri, yɛ̀ ma ti kpúu ma káa.› 8A mi sí jo: ‹Cí, Kàfɔli, miǐ gbɛ̀ kire kpíʔile púloʔ, nɛ́ ki cɛ́n bà mi 'yɛ̀ wè, yawiire dáà Kulocɛliɛ 'jo tiī núʔɔrɔ wire yiʔɛ mɛ́ gè, mi fìɛ ti tàa káa nɛ̀ nyaaʔ.› 9A mi ń'nɛ̀ yékpoli láà lúʔu baa nyìʔɛnɛ nī lè a ni 'jo: ‹A Kulocɛliɛ wi 'yɛgɛ gíì kpíʔile cìilige gè, ma fǎga jo kiī núʔɔgɔʔ.› 10A ki kanunɔ ni 'kpíʔile nɛ̀ taa tɔliyɔ taanri. Kire kàduʔumɛ gè a yɛrɛ dáà ti mìɛni ti 'koli nɛ̀ yɛ̀ nɛ̀ kɛ́ nyìʔɛnɛ nī lè.

11«Ki lɛ̀nunɔ nī lè, a siɛnnɛ taanri 'pɛn nɛ̀ pɛ́nì yéri saʔa táanni gè baa weli 'puu bèle; Sezare kàʔa mɛ́ pe cé kɔ́n nɛ̀ pɛn tunduro nɛ̄ mi tiʔɛ nī gè. 12A Kulocɛliɛ Pìle ni 'mi yɛ mi- pínɛ nɛ́ pe ní, mi fǎri káalaʔ. A weli siinyɛninɛ bálì kɔlini 'pínɛ nɛ́ mi ní, a we sɛ́nì jíin ki nàguɔ ŋáà wi saʔa nī gè.

13«A wi 'ti yiʔɛ juu nɛ̀ tìɛ weli nɛ̄ mɛni wire 'nyìʔɛnɛ tundunwɔ nyaa wè baa wire saʔa nī gè yériwe wè, a wi 'juu nɛ́ wire yɛ: ‹-Tunduro tórigo Zope kàʔa mɛ́ gè pe sa Siimɔ yɛ wi- pɛn náʔa, Siimɔ ŋáà pe yeri Piɛri wè. 14Wire wi bé siɛnrɛ juu muɔ mɛ́ muɔ suɔgɛnmɛ wori nɛ̄ dè nɛ́ muɔ saʔa wuulo pe mìɛni ní bèle.›

15«Bà sí mi sɛ́nì séli nɛ nyu wè, a Kulocɛliɛ Pìle ni 'tìgi pe nɛ̄, majo mɛni ki cé kpíʔile weli nɛ̄ bèle sélimɛ nɛ̄ bè. 16Kire lɛ̀lɛ nī lè a mi 'sɔ̀ngi nɛ̀ taa nɛ́ Kàfɔli wi siɛnrɛ ní dè dàa wi cé juu dè, nɛ́ jo: ‹Zan wi 'puu nɛ siɛnnɛ batiize bèle luʔɔ nī; yeli sí bèle, Kulocɛliɛ Pìle ní yeli bága yeli batɛmi kpíʔile wè#11.16 Wéli baa Mat 3.11; Kakpi 1.8..›

17«A ki sí yē Kulocɛliɛ wi 'ki kpuʔɔrɔ nuro kpíʔile dè siɛnnɛ bálì mɛ́ bèle bà pe 'tɛ́ngɛ Kàfɔli Zezi Kirisi nɛ̄ wè, majo mɛni wi cé ki kpíʔile weli mɛ́ bèle, mi yē ŋáa mi wè bé sí jo m'bé Kulocɛliɛ cɔ̀ri wè wi fǎga ki kpíʔile wè ?»

18Bà pe 'siɛnrɛ dáà lúʔu dè a siɛnrɛ ti 'kúɔ pe nyuɔyɔ nī yè, a pe 'yɛ̀ nɛ kpuʔɔrɔ tari Kulocɛliɛ nɛ̄ wè níɛ wáa: «ʔé, bɛ̀ ki yē lé, Kulocɛliɛ wi 'ki kpíʔile nɛ̀ pínɛ a kùlogolo kálì siɛnnɛ pe 'pe funyɔ yiʔɛ yè nɛ̀ jíin bànguɔ sìi koligo nī gè lé !»

Tɛ́ngɛfɔlilɔ pálì pe 'Zezi Kataanna Siɛnrɛ juu dè Antiyɔsi kàʔa mɛ́

19Ki 'nyaa tɛ́ngɛfɔlilɔ bílì pe cé fɛ̀ nɛ̀ cɛrigɛ wuʔɔgɔ kɛnmɛ nɛ̄ bè Eciɛnni kpúulo kàduʔumɛ gè, pàli cé kɛ́ Fenisii tɛ́nimɛ nī, a bìli 'fali Siipiri tɛ́nimɛ nī; ki tiʔɛ kiī luʔɔ sunʔɔmɔ nī. A pàli 'kɛ́ Antiyɔsi kàʔa mɛ́. A ki 'nyaa piyè puu nɛ Kulocɛliɛ siɛnrɛ nyu dè pàli piyeyɛ mɛ́ʔ, fúɔ macɛn Zuufulo yákuɔ mɛ́. 20Nɛ̀ sí ki yaʔa a Siipiri wuulo nɛ́ Siirɛni wuulo pálì 'kɛ́ Antiyɔsi kàʔa mɛ́ gè nɛ̀ sɛ́ni Kàfɔli Zezi Kataanna Siɛnrɛ nyu dè Girɛkilɛ mɛ́ bèle. 21Kàfɔli wi fànʔa ki 'puu pe mɛ́, a siɛnniʔɛbɛlɛ 'jíin tɛ́ngɛlɛ nī lè nɛ̀ pìye kɛn Kàfɔli mɛ́ wè.

22A Zerizalɛmi tɛ́ngɛfɔlilɔ pe 'ki wori lúʔu dè, a pe sí Barinabasi tórigo baa Antiyɔsi kàʔa mɛ́ gè. 23Bà wi sɛ́nì yiri wè, nɛ̀ Kulocɛliɛ kpuʔɔrɔ nyaa dè dàa wi 'kpíʔile dè, a ki 'fundaanra nyɔ́gɔ wi nī. A Barinabasi wi 'juu nɛ̀ lèbaanna nyɔ́gɔ pe mìɛni nī, nɛ́ pe yɛ pe- yiʔɛ le pe- Kàfɔli cò wè kpuʔɔ. 24Ki 'nyaa funjɛ̀ngɛfɔli wi 'puu Barinabasi wè nɛ ní tɛ́ngɛlɛfɔli kányiʔɛ, a Kulocɛliɛ Pìle ni 'wi nyì. A siɛnniʔɛbɛlɛ 'pìye kɛn Kàfɔli mɛ́ wè.

25Kire kàduʔumɛ gè a Barinabasi wi 'kɛ́ Tarisi kàʔa mɛ́ bàa Sɔli tiʔɛ caa. 26Bà wi sɛ́nì wi nyaa wè, a wi 'wi kɔ́ri a pe 'kɛ́ Antiyɔsi kàʔa mɛ́. A pe 'yiɛlɛ sìnbolo kúɔ baa, nɛ pínɛ nɛ gbúʔuro nɛ́ ki tiʔɛ tɛ́ngɛfɔlilɔ gboli ní lè, a pe 'siɛnniʔɛmɛ tɛnmɛ. Antiyɔsi kàʔa kire mɛ́ pe 'Zezi pìtɛnmɛnɛ yeri bèle tabelige nɛ̄ gè nɛ̀ jo Kirecɛnnɛ.

27Ki cɛnyɛ nī yè, a Kulocɛliɛ siɛnjuulo pálì 'yiri Zerizalɛmi kàʔa nī gè nɛ̀ kɛ́ Antiyɔsi kàʔa mɛ́. 28Wàa 'puu baa pe nī pe wi ye Agabusi, a wire kɛ́nì yɛ̀ nɛ̀ yéri nɛ́ juu Kulocɛliɛ Pìle ni fànʔa nɛ̄ gè, nɛ́ jo dí fungo bága pa tuu dàala wuulo pe mìɛni nɛ̄ bèle bè cùru pe nī kpuʔɔ. Ki kaala ni sí cé kɛ́nì kpíʔile Wurɔmi kùlofɔgbuɔwɔ Kulodi cɛnyɛ nī. 29A pìtɛnmɛnɛ pe sí bìɛ ki nɛ̄ nɛ̀ jo dí a ŋìi 'gìi taa wi- ki kɛn, pe- ki tórigo Zude tɛ́nimɛ tɛ́ngɛfɔlilɔ mɛ́ bèle bè pe sáʔa. 30A pe sí ki kpíʔile bɛ̀. Pe cé pe kpuʔɔrɔ kɛn dè Barinabasi nɛ́ Sɔli mɛ́ a pe 'kɛ́ nɛ́ ti ní Zude liɛlɛ mɛ́ bèle.

Currently Selected:

Kakpiʔiligele 11: sev

Highlight

Copy