Kakpiʔiligele 5

Ananiyasi nɛ́ wi cuɔ Safiira pe 'kùu pe káfinɛrɛ nī dè

1Nàguɔ wáà cé sí puu baa, pe 'puu nɛ wi ye Ananiyasi, nɛ wi cuɔ ye wè Safiira. Pe cé dàala láà pári, 2a nàguɔ wi 'wali wáà làrigɛ nɛ̀ wire cò baa, a wi cuɔ wi 'ki cɛ́n, nɛ́ pɛn nɛ́ wali sɛnwɛ ní wè nɛ̀ pɛ́nì wi tìɛ Zezi tundunminɔ nɛ̄ bèle.

3A Piɛri wi 'wi yúgo nɛ́ wi yɛ: «Ananiyasi, gáa nɛ̄ Setɛni wi 'muɔ fungo nyì gè mmɛ gè, á muɔ 'siʔi ki wali wáà làrigɛ, nɛ́ pɛ́ni finɛnɛ Kulocɛliɛ Pìle yiʔɛ mɛ́ gè mmɛ gè ? 4Muɔ wuʔu bɛ̀ʔ lé siʔi gè ? Bɛ̀ sí muɔ 'ki pári gè, wali wè muɔ wuu bɛ̀ʔ lé ? Gáa nɛ̄ muɔ 'sɔ̀ngirɔ dáà líɛ dè nɛ̀ le muɔ fungo nī gè ? Ma sí ti lúʔu#5.4 Gbèle náà ni wè baa girɛki sɛbɛrɛ nī dèʔ; weli we 'lire le baa nyaʔafolido nī dè bè siɛnrɛ sáʔala dè., siɛn bɛ̀ʔ muɔ 'fáanniʔ, Kulocɛliɛ mɛ́ muɔ 'finɛ.»

5Bà siɛnrɛ dáà ti 'jíin Ananiyasi ngbúʔulo nī gèle, a wi 'fali nɛ̀ nyɛri nɛ̀ tuu nɛ̀ kùu. Siɛnnɛ bílì pe 'kaala náà lúʔu lè, a ki 'fíɛrɛ cò pe nɛ̄ kpuʔɔ. 6A nàgapunminɔ pe 'yɛ̀ nɛ̀ pɛ́nì wi puɔ nɛ́ wi líɛ nɛ̀ sɛ́nì tɔ́n.

7Liɛrilɛ taanri 'tóri kire kàduʔumɛ gè, a wi cuɔ wi pɛ́nì yiri; wire sì ki 'cɛ́n gìi ki 'tóri bile gèʔ. 8A Piɛri wi 'wi yúgo nɛ́ wi yɛ: «-Ti juu mi lúʔu wéli, nyuɔ gáà kire nɛ̄ lé yeli 'siʔi pári gè ?»

A wi 'jo: «ʔaan, kire nɛ̄ weli 'ki pári.»

9A Piɛri wi 'wi yɛ: «Gáa nɛ̄ yeli 'bìɛ ki nɛ̄ bè Kàfɔli wi Pìle puu lè bè wéli wè ? Te nyaʔa, bàli pe sɛ́nì muɔ pɔli tɔ́n wè, piyē baa yérile wìile nɛ̄ lè; pe bé pa muɔ líɛ pínɛ.»

10Tiɛnugo nī gè a cɛliwɛ wi 'nyɛri nɛ̀ tuu Piɛri táanni wè nɛ̀ kùu, a nàgapunminɔ pe 'jíin nɛ̀ wi nyaa kùuwo, a pe 'wi líɛ nɛ̀ kɛ́ nɛ̀ sɛ́nì wi tɔ́n baa wi pɔli táanni wè. 11A fíɛrɛ 'tɛ́ngɛfɔlilɔ gboli wuulo pe mìɛni cò kpuʔɔ, nɛ̀ fàri siɛnnɛ pe mìɛni nɛ̄ bàli pe cé kaala náà ni wori lúʔu dè.

Kàfɔli wi tundunminɔ pe 'kakpoliyo nìʔɛyɛ kpíʔile

12 Fìɛlɛ nɛ́ kakpoliyo nìʔɛyɛ 'puu nɛ kpínʔini Zezi tundunminɔ pe kiyɛ nī yè nɛ tundunminɔ pe kɛnmɛ tìí bè, kùlo wuulo pe sunʔɔmɔ nī bè. Tɛ́ngɛfɔlilɔ pe mìɛni cé pe sɔ̀ngirɔ pínɛ dè nɛ waa nɛ tɛ̀ní Sulomani kobigo nī gè. 13Siɛnwarilɛ sì puu nɛ sorigi nɛ pìye nyaʔami pe nīʔ. Ki 'nyaa kùlo wuulo pe 'puu nɛ pe kpóri kpuʔɔ. 14A ki 'nyaa kàa 'puu nɛ taʔala siɛnniʔɛmɛ nɛ̄ bè, nàguɔlɔ nɛ́ cɛlilɛ ní bèle, bàli pe 'puu nɛ báan nɛ tɛ́ngi Kàfɔli nɛ̄ wè. 15A ki 'kò siɛnnɛ pe nìɛ yaala kɔ́ri bèle koliyo nī yè nɛ báan nɛ pe síngi yasinɛrɛ nɛ̄, kire ga buu a Piɛri wi kâ pɛ́ni tòrí wè, wi jènyinɛ ni- tuu yaala pálì nɛ̄. 16Zerizalɛmi kàʔa táanni wuulo siɛnniʔɛnɛ 'puu nɛ yɛ̀gí nɛ báan nɛ́ yaala ní, nɛ̀ fàri bìli gbòdolilo 'puu nɛ wuʔɔ bèle. Tundunminɔ pe nɛ̂ cé pe mìɛni puʔɔ.

Zuufulo pe yiɛgininɛ pe 'Zezi tundunminɔ wuʔɔ bèle

17A kacuɔnrilɔ kàfɔli wi kɛ́nì yɛ̀ nɛ̀ yéri, wire nɛ́ bìli pe mìɛni ní bèle bàli pe 'puu nɛ́ wi ní bèle. Ki 'nyaa Sadusiɛnnɛ gboli wuulo pe 'puu; yejaʔa ki cé pe funyɔ nyì yè. 18A pe 'Zezi tundunminɔ cò bèle nɛ̀ pe le kasuu nī. 19A Kàfɔli wi nyìʔɛnɛ tundunwɔ wáà sɛ́nì kasuu kɔ̀ri múgu gè pìlige nī, nɛ́ tundunminɔ kɔ́ri bèle nɛ̀ yiri nɛ́ pe yɛ: 20«Yeri waa ye sa yéri Kulocɛliɛ Gbùʔɔrɔsaʔa nī gè, ye sìi fɔnwɔ siɛnrɛ dáà ti mìɛni juu siɛnnɛ mɛ́ bèle.»

21Bà pe 'siɛnrɛ dáà lúʔu dè, á kpìɛnmɛ pi 'yɛ̀ nɛ̀ tuu bè, a pe 'kɛ́ Kulocɛliɛ Gbùʔɔrɔsaʔa mɛ́ gè nɛ̀ sɛ́ni siɛnnɛ tɛnmɛ bèle.

A ki 'nyaa bà kacuɔnrilɔ kàfɔli wi kɛ́nì pɛn wè, wire nɛ́ bìli pe cî puu nɛ́ wi ní bèle, a pe 'pìye nyaa nɛ̀ juu kàyuʔujuulo gboli wuulo bèle, nɛ́ Isirayɛli liɛlɛ gboli wuulo pe mìɛni ní bèle. A pe 'Kulocɛliɛ Gbùʔɔrɔsaʔa wélifɔlilɔ pálì tórigo baa kasuusaʔa mɛ́ gè pe- sa Zezi tundunminɔ cò bèle de báan. 22A pe 'kɛ́ nɛ̀ sɛ́nì ki 'nyaa waʔa; piyè pe nyaa baa kasuu nī wèʔ. A pe 'koli nɛ̀ pɛn nɛ̀ pɛ́nì ti juu, 23nɛ́ jo: «Weli sɛ́nì kasuu kɔ̀riyɔ nyaa yè tɔ́nzuʔɔyɔ, nɛ́ kasuusaʔa wélile nyaa bèle baa pe yéridiɛyɛ nī yè. Bà sí weli 'kɔ̀riyɔ múgolo yè, weli sì siɛn nyaa baaʔ.»

24Bà Kulocɛliɛ Gbùʔɔrɔsaʔa wélifɔlilɔ kàfɔli wi 'siɛnrɛ dáà lúʔu dè, wire nɛ́ kacuɔnrilɔ kàfɔlilɔ ní bèle, a ki 'pe sɔ̀ngirɔ nyaʔami dè kpuʔɔ; pe 'pìye yúgo gáa ki kɛ́nì kpíʔile ?

25Kire lɛ̀lɛ nī lè, a siɛn wáà pɛ́nì pe yɛ: «Ye- nyaa, nàguɔlɔ bálì yeli cé cò nɛ̀ tɔ́n kasuu nī wè, piyē baa Kulocɛliɛ Gbùʔɔrɔsaʔa nī gè yérile nɛ siɛnnɛ tɛnmɛ bèle !»

26A Kulocɛliɛ Gbùʔɔrɔsaʔa wélifɔlilɔ kàfɔli wi 'wi siɛnnɛ pálì kɔ́ri nɛ̀ kɛ́ bè sa Zezi tundunminɔ cò bèle funnyige nɛ̄, gbànʔagbanʔa fǎga nyaa baaʔ; ki 'nyaa pe 'puu nɛ fìʔɛ́, siɛnnɛ pe fǎga peli wáa nɛ́ sìndari níʔ. 27Bà pe sɛ́nì pe cò bèle, nɛ̀ pɛn nɛ́ pe ní nɛ̀ pɛ́nì pe yérige kàyuʔujuulo gboli ni sunʔɔmɔ nī bè, á kacuɔnrilɔ kàfɔli wi séli nɛ pe yúgo, 28nɛ́ pe yɛ: «Weli sì cé túʔu ti juu nɛ̀ láʔa yeli nɛ̄, nɛ́ jo ye fǎga tí bé ní siɛn tɛnmɛ míʔɛ gáà ki wori nɛ̄ gè lé ? Bɛ̀ sí kiī ŋɔ̀ wè yeli nyɛ́nì Zerizalɛmi kàʔa nyì gè nɛ́ yeli tɛnmɛnɛ ni siɛnrɛ ní dè. Yeli yē ki mɛ́ nàguɔ ŋáà wi kùu wi- kò weli nyùgo wori wī kìɛ ?»

29A Piɛri wè, wire nɛ́ Zezi tundunminɔ bílì ní bèle, a pe 'pe siɛnnugoro kɛn dè nɛ́ jo: «Ki 'pɔ́ri siɛn de lúru Kulocɛliɛ nɛ̄, sɛ́ni nɛ́ wiri lúru siɛnnɛ nɛ̄ wè.

30«Weli tuuliɛyɛ yi Kulocɛliɛ wi nyɛ́nì Zezi nyɛ́ wè nɛ̀ yige kúbilo nī bèle bà yeli cé wi wuʔɔ nɛ́ wi kpúu tiiparigɛ nɛ̄ gè. 31Wire Kulocɛliɛ wi 'yɛ̀gɛ nɛ̀ wi tɛ́ngɛ wi kàliige mɛ́ gè, nɛ́ wi kpíʔile Kùlofɔli Jaa nɛ́ Suɔfɔli wè, gìi ki bé tí Isirayɛli wuulo pe- pe funyɔ yiʔɛ yè pé láʔa pe kapiʔile nɛ̄ gèle, dí Kulocɛliɛ sí pe kapiʔile kàsulugo suɔ gè. 32Weli bèle weli sí yē kele gálì ke nyaafɔlilɔ, weli nɛ́ Kulocɛliɛ Pìle ní lè, nàa Kulocɛliɛ wi 'kɛn tɛ́ngɛfɔlilɔ mɛ́ bèle, bàli pe nyɛ́ni lúru wi nɛ̄ bèle.»

33A siɛnrɛ dáà ti 'kàyuʔujuulo gboli wuulo yáa bèle kpúʔɔ kátii, a pe 'yɛ̀ nɛ ki caa bè Piɛriyé kpúu bèle bè yige baa. 34Fariziɛn nàguɔ wáà cé puu baa kàyuʔujuulo gboli nī lè, pe 'puu nɛ wi ye Gamaliyɛli; Fànʔa Siɛnrɛ kacɛ́nwɛ wáà wi 'puu. Wi míʔɛ ki cé tɛ́ni siɛnnɛ pe mìɛni mɛ́ bèle. A wire 'yɛ̀ nɛ̀ yéri nɛ́ jo pe- Zezi tundunminɔ yaʔa bèle pe yiri kpànʔanɛ cɛ̀.

35Nɛ́ fali nɛ̀ pe yɛ: «Isirayɛli siɛnnɛ, yeri yìye ciʔige gàa yeli nɛ caa bè kpíʔile nàguɔlɔ bálì nɛ̄ bèle ! 36Nɛ̀ taʔa gíi nɛ̄, kiì fìɛ mɔgɔʔ, cɛnyɛ nyáà nī yè, nàguɔ wáà 'puu bile pe wi ye Tedasi; wi cé wìi kpíʔile wire felige wèriʔ nɛ̀ siɛnnɛ sirasiin (400) kɔ́ri nɛ̀ taʔa wìi nɛ̄. Wi sí yē sé pàngɛ gè, piyè wi kpúu léʔ ? Siɛnnɛ bílì pe 'puu nɛ́ wi ní bèle, pe mìɛni 'láʔa nɛ̀ cɛrigɛ, yafiɛn sì ń'nɛ̀ kò wi gboli nī lèʔ.

37«Bà wire yiri baa wè, a Zudasi ń'nɛ̀ yɛ̀ nɛ́ wi wori ní dè, Galile tɛ́nimɛ wuu wè. Tɔ́rilɔ lɛ̀lɛ lire nī ki 'puu. Wi cé siɛnniʔɛmɛ kɔ́ri nɛ̀ taʔa wìi nɛ̄, nɛ̀ sí ki taa wire míɛni wè a pe 'wi kpúu; bìli pe cé puu wi kúrugu bèle a pe mìɛni 'láʔa nɛ̀ cɛrigɛ.

38«Kire nɛ̄ mi je ki juu yeli mɛ́: ye- kiyɛ láʔa siɛnnɛ bálì nɛ̄ bèle, ye- pe yaʔa pe kɛ́. A ki yē baara dáà pe kúu dàa dè siɛnnɛ wori dī dè, á kire 'laa a ki yē peli nyɛ́ni wori dī dè, ti bága yéri. 39A ki sí yē Kulocɛliɛ mɛ́ ti 'yɛ̀ dè, yeli fànʔa sì tɔ̀ni jáa bè pe cúʔɔ bè yige baaʔ. Ye fǎga tí bé kàsii nyɔ́gɔ yeli nɛ́ Kulocɛliɛ sunʔɔmɔ ní bèʔ.»

A pe 'tɔ́ri nɛ́ Gamaliyɛli siɛnrɛ ní dè. 40A pe sí koli nɛ̀ Zezi tundunminɔ yeri bèle nɛ̀ pɛ́nì tí a pe 'pe kpúɔn, nɛ́ ti juu nɛ̀ láʔa pe nɛ̄ pe fǎga ní yakaa juu Zezi míʔɛ wori nɛ̄ dèʔ, nɛ́ pe yaʔa a pe 'kɛ́. 41A pe 'yiri kàyuʔujuulo gboli saʔa nī gè níɛ fundaanra kpínʔini, bɛ̀ ki 'nyaa Kulocɛliɛ wi cé peli tɔ́ri nɛ̀ yɛli nɛ́ ki ní a pe 'peli wuʔɔ Zezi míʔɛ kɛnmɛ nɛ̄ bè.

42Cɛngɛ ó cɛngɛ pe nɛ̂ cé puu Kulocɛliɛ Gbùʔɔrɔsaʔa mɛ́ gè á kire 'laa kpáaya mɛ́ yè, nɛ siɛnnɛ tɛnmɛ bèle níɛ̀ nɛ Kataanna Siɛnrɛ jáari dè, Zezi wori dè, Kulocɛliɛ Siɛnnyiɛnɛgɔnwɔ wè.

Currently Selected:

Kakpiʔiligele 5: sev

Highlight

Copy