Kakpiʔiligele 6

Zezi tundunminɔ pe 'nàguɔlɔ kɔlisiin nyíɛnɛ nɛ̀ kɔ̀nnɛ̀ fàri pìye nɛ̄

1Kire lɛ̀lɛ nī lè, a pìtɛnmɛnɛ pe 'niʔɛ. A ki 'nyaa Zuufulo bílì pe 'puu nɛ girɛki siɛnrɛ nyu dè, a pe 'yɛ̀ nɛ kúnʔɔri Eburu wuulo nɛ̄ bèle, nɛ́ jo dí pe wè nɛ peli lakicɛlilɛ kanʔa bèle nɛ yɛligi yaliire liɛlɛdiʔɛ nī gè bɛ̀ bìli tíɛlɛ bèle cɛngɛ ó cɛngɛ wèʔ.

2A Zezi tundunminɔ kiɛ nɛ́ siin pe sí pìtɛnmɛnɛ gboli yeri lè nɛ̀ pɛ́nì pe yɛ: «Kiì yɛli weli Kulocɛliɛ siɛnrɛ ti juʔu yaʔa gèʔ, bé pa puu yaliire liɛlɛdiʔɛ nīʔ. 3Kire nɛ̄ we siinyɛninɛ, ye- ki wéli baa yeli nī bèle, yé nàguɔlɔ kɔlisiin yige, pe- puu bàli nɛ̄ siɛnnɛ pe 'tɛ́ngɛ bèle, pé sí puu Kulocɛliɛ Pìle ni- pe nyì, pe- puu sícilile pe kele yiʔɛ cɛ́n. Peli weli bé pa cáan baara dáà nɛ̄ dè. 4Dí weli sí de waa Kulocɛliɛ náarigɛ nɛ̄ gè, nɛ́ Kulocɛliɛ siɛnrɛ ti juʔu ní gè.»

5A siɛnrɛ dáà ti 'gboli ni mìɛni dɛ́ni. A pe 'Eciɛnni nyíɛnɛ nɛ̀ kɔ̀n; tɛ́ngɛlɛ 'puu wi mɛ́ kpuʔɔ ki nàguɔ ŋáà wè, a Kulocɛliɛ Pìle ni 'wi nyì, nɛ́ Filipi, nɛ́ Purokɔri, nɛ́ Nikanɔri, nɛ́ Timɔn, nɛ́ Parimɛnasi, nɛ́ Niikola, Antiyɔsi kàʔa wuu wè; kùlo láà wuu wi cé puu á wi sí jíin Zuufulo Kulocɛliɛ caagoligo nī gè. 6A pe pɛ́nì yéri tundunminɔ pe yiʔɛ mɛ́ gè, a pe 'náari pe mɛ́ nɛ́ kiyɛ taʔala pe nɛ̄.

7A Kulocɛliɛ siɛnrɛ ti 'cɛ̀ri nɛ̀ màʔa, a pìtɛnmɛnɛ pe 'niʔɛ Zerizalɛmi kàʔa nī gè bɛ̀ ki caa mmɛ, nɛ̀ pínɛ a kacuɔnrilɔ nìʔɛbɛlɛ 'jíin tɛ́ngɛlɛ nī lè.

Zuufulo pe 'Eciɛnni cò wè

8Eciɛnni wire wè, wi cé kpuʔɔrɔ taa Kulocɛliɛ mɛ́ kpuʔɔ, nɛ́ fànʔa ní, nɛ fìɛlɛ nɛ́ kakpoliyo kpínʔini kùlo wuulo sunʔɔmɔ nī bè. 9A siɛnnɛ pálì kɛ́nì kɔ́n baa Zuufulo pe tɛnmɛzaʔa mɛ́ gè, gàa pe ye «Sùkulolo pe 'kò pìyemɛ bèle», peli nɛ́ Siirɛni kùlo wuulo, nɛ́ Alɛgizandiri kùlo wuulo, nɛ́ Silisii tɛ́nimɛ wuulo, nɛ́ Azii tɛ́nimɛ wuulo ní. A pe pɛ́ni nyu nɛ kìí nɛ́ Eciɛnni ní wè. 10Nɛ̀ sí ki taa piyè yé je gbɛ̀ jáa bè yéri Eciɛnni yiʔɛ mɛ́ gèʔ, ki 'nyaa wi siɛnjuuro ti 'puu sícilile siɛnrɛ, nɛ́ bɛ̀ Kulocɛliɛ Pìle ni 'puu nɛ́ wi ní wè. 11Kire tiʔɛ gáà nī gè, a pe 'wali làri nɛ̀ kɛn nàguɔlɔ pálì mɛ́ nɛ́ pe yɛ pe sa jo: «Weli cé wi nyaa wi siɛncuʔɔrɔ táà nyu nɛ wáari Misa nɛ́ Kulocɛliɛ kɔli mɛ́ gè.»

12Kire kɛnmɛ báà nɛ̄ bè, a pe 'siɛnnɛ líʔi bèle nɛ̀ wáa Eciɛnni nɛ̄ wè, peli nɛ́ Zuufulo pe liɛlɛ ní bèle, nɛ́ Fànʔa Siɛnrɛ sɛbɛcɛ́nminɛ ní bèle. A pe sɛ́nì tuu wi nɛ̄, nɛ̀ wi cò nɛ̀ kɛ́ nɛ́ wi ní kàyuʔujuulo gboli mɛ́ lè.

13A pe 'pàli caa a pe pɛ́nì finɛ nɛ̀ taʔa Eciɛnni nɛ̄ wè nɛ́ jo: «Nàguɔ ŋáà yeli 'nyaa ŋàa wè, wi 'cíi nɛ siɛncuʔɔrɔ nyu nɛ wáari Kulocɛliɛ Gbùʔɔrɔsaʔa kɔli mɛ́ gè, tiɛwalidɛngɛgɛ gè, nɛ́ Misa Fànʔa Siɛnrɛ ní dè nɛ̀ pínɛ. 14Weli cɛ́nì lúʔu wi mɛ́ dí Zezi wè Nazarɛtiyé wuu wè, dí wi bága pa tiʔɛ gáà cáan gè bé sí Misa kaliʔɛlɛ fɛ̀ni gèle, gàli wi 'tìɛ we nɛ̄ gèle.»

15Bìli pe mìɛni pe 'puu baa tɛ́ninɛ kàyuʔujuulo gboli tiʔɛ nī gè, a pe 'nyapigele le gèle Eciɛnni nī wè nɛ wi wéli sɛni, a pe 'wi yiʔɛ nyaa gè ki ní majo nyìʔɛnɛ tundunwɔ yiʔɛ gī.

Currently Selected:

Kakpiʔiligele 6: sev

Highlight

Copy