Byak 12
12
1Omu biro ebyo Omugabe Herode akatandika kuhiiganisa bamwe omu b'ekigombe ky'Abakristo. 2Yaitsa Yakobo mukuru wa Yohaana rurara. 3Ku yaareebire ekyo Abayudaaya baakisiima, yaaragiira kukwata na Petero. Ekyo kikabaho omu biro by'Obugyenyi bw'Emigaati Etatumbisiibwe. 4Atyo akwata Petero, amuta omu kihome, kandi ataho emiteeko ena y'abaserukare bana bana kumurinda nibaihaihana. Obwo Herode akaba naayenda kumureeta omu maisho g'abantu kutonganisibwa, Obugyenyi bw'Okuhingurwaho bwahwaho. 5Obunaku bwona obu Petero yaamazire ari omu kihome, ekigombe ky'Abakristo kikaguma nikimushabira ahari Ruhanga kitaireho omutima.
6Ekiro ki Herode yaabaire araariire kumucweraho orubanja, Petero ogwo akaba agwejegyereire ahagati y'abaserukare babiri, bamuboheise enjegyere ibiri, kandi obwo n'abarinzi barindiire aha irembo ry'ekihome. 7Ahonaaho maraika wa Nyakubaho yaamubonekyera; akashengye koona kaayaka. Yaateerateera Petero omu rubaju, yaamusisiimura naagira ati: Rahuka kwimuka! Enjegyere zaamuruga aha mikono, zaaragara. 8Maraika atyo amugira ati: Yezirikye orukoba rwawe, ojware enkaito. N'onu akora atyo. Maraika agaruka amugira ati: Jwara omunagiro gwawe, onkurate. 9Mpaho Petero ashohora, amukurata, kwonka atarikumanya ki maraika arikukora, yaaba kiri kyo; ateekateeka ngu shana yaabonekyerwa. 10Baagyenda nibaraba aha barinzi b'okubanza n'aba kabiri, baahika aha irembo ry'ebyoma eririkushohorera ow'orurembo. Ryayeigura ryonka, baashohora, baagumizamu omuhanda okuhitsya obu maraika yaamurugireho.
11Obwo nibwo Petero yaagarukirwemu obwengye, akagira ati: Mbwenu naamanyira kimwe ku Mukama atumire maraika we, akanjuna Herode na byona ebi Abayudaaya babaire nibagira ngu nibiija kumbaho.
12Ku yaaherize kukyetegyereza, yaagumizamu, yaaza omwa Mariya nyina Yohaana-Mariko, ei abantu baingi baabaire bateeraniire nibashaba. 13Yaakongoota aha rwigi rw'eirembo, omwishiki omuheereza orikwetwa Rooda yaija kureeba. 14Ku amanya eiraka riri erya Petero, okushemererwa kwenda kumwita; omu mwanya gw'okwigura orwigi, airuka naagaruka omu nju kugambira abarimu ku Petero ayemereire aha irembo. 15Bamugira bati: Ohugire omutima. Kwonka we ayangisiriza ati: N'eky'amazima. Bwanyima bagira bati: Ogwo nu ni maraika we! 16Petero ku yaabaire naakiiguza, batyo baigura orwigi, baamureeba, baatangaara munonga. 17Yaabahunamisisa omukono kandi yaabateekyerereza oku Mukama yaamwiha omu kihome. Yaayongyeraho n'eki ati: Mugambire mutyo Yakobo n'abanyaruganda. Atyo abatsigaho, aza ahandi.
18Ku bwaseesire haabaho akaimukiiriro kahango omu baserukare ahabw'okutamanya oku Petero abaire. 19Herode yaateeraho kumuronda, kwonka yaaremwa; yaatonganisa abarinzi, yaaragiira kubaita.
Bwanyima Herode ogwo yaaruga Buyudaaya, yaashuuma Kaisaariya, yaagumayo.
Oku Herode yaafiire
20Herode akaba agwereirwe kubi Abatuuro n'Abasidoni. Ab'endembo ezo zombi baamwijaho baaherize kwenywanisa na Bulasito, omukuru w'abambari be, owaababaasiise kumushaba obusingye. Manya ensi yaabo akaba etungirwe ebyokurya ebi baabaire bashaka omu nsi y'ogwo mugabe.
21Aha kiro ekyatairweho, Herode akajwara ebijwaro bye by'obugabe, yaasingama aha kitebe, yaagira ebi yaagambira abantu be. 22Abantu nikwo kumushunga nibagira bati: Orikugamba ni Ruhanga, ti muntu! 23Omuri ako kaanya maraika wa Nyakubaho amuteera, amugwisaho naamutura okutaha Ruhanga ekitiinwa, n'onu ariibwa enyogori, afa.
Barinaba na Saulo okugaruka Antiokiya
24Ekigambo kya Ruhanga kikongyera kuhama n'okubuga, baingi baakiikiriza.
25Barinaba na Saulo ku baaherize omurimo gwabo, baagarukayo, nibaruga Yerusalemu baine Yohaana-Mariko.
Barinaba na Saulo
Currently Selected:
Byak 12: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
