Byak 14
14
1N'omuri Ikonio nikwo kyabaire. Paulo na Barinaba ku baagiire omu iteeraniro ry'Abayudaaya, baagamba ebigambo birikuhika aha njoka, byareetera Abayudaaya n'Abaguriiki baingi munonga kwikiriza. 2Kwonka Abayudaaya abamwe baayanga kwikiriza, baata omu Banyamahanga omutima mubi kwanga abaikiriza. 3Paulo na Barinaba baamarayo omwanya nibarangirira ebya Mukama batarikutiina, na Mukama ebi baagambire aha kiconco kye eky'embabazi yaabihamisa obumanyiso n'eby'okutangaaza. 4Abantu b'omu rurembo bakeebaganisamu; abamwe baagwera orubaju rw'Abayudaaya, abandi orw'Entumwa. 5Ekyarugiremu Abanyamahanga n'Abayudaaya bakwataniise n'ab'obushoboorozi, baacuma enaama y'okubarwanisa n'okubateera amabaare. 6Entumwa ku zaakihuriire, zaahungira Lusitura na Deribe, ebirorero by'omuri Lukaoniya n'omu byanga ebihereeraine nabyo, 7ei zaagambiire Amakuru Marungi.
Paulo okuteerwa amabaare omuri Lusitura
8Omuri Lusitura hakaba hariyo omuntu owaabaire atarikubaasa kugyenda ahabw'okuzaarwa n'ebigyere biramaire. 9Ogwo muntu akahurira Paulo naagamba. Paulo ku yaamureebire naayesiga ngu naabaasa kukizibwa, 10yaagamba n'eiraka rihango ati: Imuka oyemerere n'ebigyere byawe. Ogwo murema yaabandatuka, yaatandika kugyenda. 11Ekimbuuro ky'abantu ku baareebire eki Paulo yaakora, baayomba omu rurimi rwabo rw'Orulukaoniya bati: Aba bantu ni baaruhanga abatwiziremu beehindwire abantu! 12Barinaba baamukubya Zeusi, kandi Paulo owaabaire ari omugambi mukuru, baamweta Herume. 13Abahongyerezi ba Zeusi, ou endaaro ye yaabaire eri omu maisho g'orurembo, ahabw'okwenda ngu abantu boona batambe nabo ekitambo, baareeta aha marembo enimi zijwekirwe ebishaba by'ebirabyo. 14Barinaba na Paulo, ku baahuriire ebyabaho, baatagura ebijwaro byabo, baayeshuka omu bantu nibagamba n'eiraka rihango bati: 15Bashaija 'mwe, n'enki ekirikubakoresa ebyo? Naitwe turi abantu nyabuntu nkaimwe. Tubareeteire Amakuru Marungi, ngu murekye ebitaine mugasho, mwehongyere Ruhanga ohuriire, owaahangire eiguru n'ensi n'enyanja na byona ebirimu. 16Omu busingye bw'aba ira, akaikiriza buri ihanga kwekorera ebyaryo nk'oku ririkwenda; 17kwonka shi imwe, tiyaabareka kugumira aho mutaine kirikumubahamiza omu birungi ebi abakorera; abagwisiza enjura kuruga omu iguru, abeereza emyaka yaanyu omu bunaku bwayo, abaha ebyokurya hamwe n'okushemererwa. 18Nobu baagambire ebyo, bakabura hakye kuremwa kuzibira abo bantu kubatambira ekitambo.
19Bwanyima hakaija Abayudaaya bamwe nibaruga Antiokiya na Ikonio; baayosya abantu kurwanisa entumwa. Baateera Paulo amabaare, baamukurura, baamushohoza aheeru y'orurembo nibateekateeka ngu yaafa. 20Abaikiriza ku baamwehinguririize, yaimuka, yaagaruka omu rurembo. Aha izooba eryakuratsireho, we na Barinaba baaza Deribe.
21Ku baaherize kugamba ebigambo by'Amakuru Marungi omuri ekyo kirorero, baatungamu omubaro muhango gw'abakuratsi, baagaruka Antiokiya nibaraba Lusitura na Ikonio. 22Baagumya abaikiriza baayo nibabeehanangiriza kuhamira omu kwikiriza bati: Twena turi ab'okuhikwaho eby'oburemeezi bingi, tutakataahire mu bukama bwa Ruhanga. 23Ku baaherize kutooranira buri kigombe ky'Abakristo abakuru baakyo, obwo nibashaba kandi nibeesiibyakwo, baabakwatsa Mukama ou baikiriize.
Paulo na Barinaba okugaruka Antiokiya
24Paulo na Barinaba bakaraba Pisidiya, baahika Panfuliya. 25Ku baaherize kurangirira ekigambo kya Ruhanga omuri Periga, baashuuma Ataliya. 26Omu kurugayo, baatoora ogw'enyanja nibaza Antiokiya, ei bwabiso baabaire babakwatsiize embabazi za Ruhanga ahabw'omurimo ogu baakozire obwo. 27Ku baahikireyo bati, baateerana ab'ekigombe ky'Abakristo, baabateekyerereza byona ebi Ruhanga yaabakoreise, kandi n'oku yaiguriireho Abanyamahanga omuhanda gw'okwikiriza. 28Batyo baaguma n'abakuratsi okumara ebiro.
Orukiiko rw'omuri Antiokiya
Currently Selected:
Byak 14: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
