Kut 28
28
1Bwanyima Isaaka akeeta Yakobo yaamuha omugisha, kandi yaamwehanangiriza ati: Otarishwera omukazi omu Banyakanaani. 2Mbwenu nu imuka oze Padanarama owa Betueli shwenkuru kizaara nyoko, obe niyo waashwera omukazi omuri bahara ba Labaani nyokoromi. 3Ruhanga omushoboorozi wa byona akuhe omugisha, akuzaarukanise kandi akukanyise, obone kurugwamu ekimbuuro ky'abantu; 4akuhe omugisha gwa Aburahamu iwe n'oruzaaro rwawe oru oine, obone kukubuura ensi ei mwashuuhuukiiremu, ei Ruhanga yaahaire Aburahamu. 5Isaaka nikwo yaayohereize atyo Yakobo, onu akaza Padanarama owa Labaani mwene Betueli Omuaramu munyaanya wa Rebeka nyina wa Yakobo na Esau.
Esau okushwera Mahalati
6Mbwenu obwo Esau akamanya ku Isaaka ahaire Yakobo omugisha, kandi amwohereize Padanarama kuba niyo yaashwera omukazi. N'ekindi yaamanya ngu ku yaabaire naamuha omugisha, yaamwehanangiriza ati: Otarishwera omu Banyakanaani. 7Reero yaamanya ku Yakobo ayorobeire ishe na nyina akaza Padanarama. 8Mbwenu Esau ku yaareebire ngu Abanyakanaanikazi tibarikugwisa gye Isaaka ishe, 9Esau ogwo yaaza owa Ishimaeli, yaashwerayo Mahalati muhara wa Ishimaeli mwene Aburahamu, kandi munyaanya wa Nebayooti, yaamutungikirira abakazi abu yaabaire aine.
Ruhanga okubonekyera Yakobo omu kirooto
10Yakobo akaruga Beerisheba, yaatoora ogurikuza Harani. 11Ku yaahikire omu mwanya gumwe, yaaraara aho ekyo kiro, ahabw'okuba eizooba rikaba ryarengire. Atyo yaihaho eibaare yaaryeshegura, yaabyama omuri ogwo mwanya, yaagwejegyera. 12Reero yaaroota naareeba eitembero ritsimbire ahansi, kandi omutwe gwaryo guhikire omu iguru; na baamaraika ba Ruhanga nibaritemberaho nibaritemburikiraho. 13Atyo areeba Nyakubaho ayemereire ahaiguru yaaryo, naamugira ati: Niinye Mukama Ruhanga wa Aburahamu shoimwe, kandi Ruhanga wa Isaaka. Egi nsi ei obyamiho, ndyagikuha iwe na baijukuru baawe. 14N'oruzaaro rwawe ruryaba rwingi nk'omucuucu gw'ahansi; mukanye muhikye burengyerwa-izooba na burugwa-izooba, n'omu bukiizi-bwa-bumosho n'omu bwa buryo; kandi omuriiwe n'omuri baijukuru baawe enganda zoona nimwo ziriheerwa omugisha. 15Reeba ndi hamwe naiwe, ndyakurinda hoona ah'oriza nkugarure omuri egi nsi. Manya tindigira bu nkutsigireho okuhitsya obu ndikora eki naakugambira. 16Bwanyima Yakobo ku yaasisiimukire omu turo, yaagira ati: Buzimazima Ruhanga ari omuri ogu mwanya, kwonka nyowe naaba ntakimanyire. 17Atyo atiina agira ati: Ogu mwanya ka nigutiinisa! Ogu mwanya ti kindi, kureka n'enju ya Ruhanga, kandi n'eirembo ry'eiguru.
18Ku bwabaire nibutaagurikana, Yakobo yaimuka yaihaho eibaare eri yaabaire ayeshegwire, yaaribyara kuba enyomyo, reero yaarishukaho amajuta aha mutwe. 19Ogwo mwanya yaagweta Beteli; haza obunyakare orwo rurembo bakaba barweta Luuzi. 20Bwanyima Yakobo yaahiga naagira ati: Ruhanga ku araagume naanye, yandinda omuri oru rugyendo oru ndimu, yampa ebyokurya n'eby'okujwara, 21naagaruka buhooro omu ka ya tata, obwo Nyakubaho aryaguma ari Ruhanga wangye. 22Mbwenu eri ibaare eri naabyara kuba enyomyo, riryaba enju ya Ruhanga; kandi byona ebi orimpa tindibura kukuhaho kimwe kya ikumi.
Yakobo okuhika owa Labaani akamwetondera
Currently Selected:
Kut 28: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
