Kut 9
9
1Bwanyima Ruhanga akaha Noa n'abatabani omugisha, yaabagira ati: Muzaare, mukanye, mwijure ensi. 2Muryaguma mwitse obwoba enyamaishwa z'omu nsi, muzitiinise. Byona ebirikugurukisa amapapa omu kaabunga, na ibara kintu ekirikugyendesa enda ahansi n'ebyenyanja byona eby'omu mayanja naabibarekurira. 3Kyona ekiine amagara ekirikwegyendesa, kiryaba ebyokurya byanyu. Byona ebyo naabibaha nk'oku naabahaire ebirikumera. 4Kureka eki mutarirya n'enyama erimu orwamba; ahabw'okuba eshagama niyo egihaisa amagara. 5Kandi buzimazima eshagama y'amagara gaanyu ndyagijunaanira, ngihoorere enyamaishwa yoona n'omuntu. Omuntu weena oriita mugyenzi we, nawe ndyamumutura. 6Weena orisheesha eshagama y'omuntu, n'eye baryagisheesha, ahabw'okuba Ruhanga akahanga omuntu naamushusha. 7Mbwenu nimuzaare, mukanye, mwijure ensi, kandi mugitegyekye.
8Bwanyima Ruhanga yaagira Noa n'abatabani ati: 9Reeba, naabateeraho endagaano yangye, imwe na baijukuru baanyu, 10na buri kihangirwe kyona ekiine amagara ekiri hamwe naimwe, n'ebirikugurukisa amapapa, n'ebitungwa, n'enyamaishwa zoona ez'omu nsi ezi mwine, zoona ezaarugire omu meeri. 11Nimpamya endagaano yangye naimwe, ku byona ebiine omubiri bitarigaruka kucwekyerezibwa mwegyemure, kandi ku hataribaho bundi mwegyemure kugaruka kucwekyereza ensi.
12Reero Ruhanga yaagira ati: Aka niko kamanyiso k'endagaano ei naaragaana naimwe, na buri kihangirwe kyona ekihuriire ekiri hamwe naimwe, ahabw'enzaaro zoona eziribaho. 13Mbwenu naataho omuhanganzima omu bicu, gugume guri akamanyiso k'endagaano yangye n'ensi. 14Ku ndiguma naahiikisa enjura, omuhanganzima gwareebeka omu bicu, 15ndyaijuka endagaano yangye ei naabaragaaniire imwe n'ebihangirwe byona ebiine amagara; haza amaizi tigarigira bu gabaire omwegyemure obundi, kubicwekyereza. 16Omuhanganzima ku gurireebeka omu bicu, ndyagunagira eriisho, nyijukye endagaano etahwaho, ei nyowe Ruhanga naaragaaniire ebihangirwe byona ebiine amagara, ebiri omu nsi.
17Mpaho Ruhanga yaagira Noa, ati: Aka n'akamanyiso k'endagaano ei naaragaana n'ebiine amagara byona ebiri omu nsi.
Noa n'abatabani
18Batabani ba Noa abaarugire omu meeri ni Sheemu na Haamu na Yafeeti. Haamu ogwo niwe ishenkuru w'Abanyakanaani. 19Abo bonshatu, nibo baabaire bari batabani ba Noa, abaakomookirweho abantu b'ensi yoona.
20Noa niwe muhingi owaabandize kubyara emizaabibu. 21Haza ku yaanyweire viino, yaasinda, yaabyama omu ihema rye ateeshwekire. 22Reero Haamu, ishenkuru Abanyakanaani, ku yaareebire ishe ajwaire busha, yaagyenda, yaabigambira beene ishe aheeru. 23Sheemu na Yafeeti nikwo kwihaho omwenda, bakagweta aha mabega, bakagyendesa ekitsigaanyima, bakagushweka ishebo ojwaire busha, bakiikire omushaya batarikureeba ishebo ajwaire busha. 24Noa, ku yaasinduukire viino, yaamanya eki omutabani omuto yaamukora; 25yaagira ati:
Kanaani naakakyeenwe,
akaba omuhuuku w'abahuuku ba beene ishe!
26Yaayongyera yaagira ati:
Sheemu, Mukama Ruhanga wangye naakamuhe omugisha,
haza Kanaani akaba omuhuuku we!
27Ruhanga naakakanyise Yafeeti,
akamutuuza omu mahema ga Sheemu,
haza Kanaani akaba omuhuuku we!
28Omwegyemure ku gwahwaire, Noa yaamara emyaka magana ashatu na makumi ataano. 29Ebiro bya Noa byona bikahitsya emyaka magana mwenda na makumi ataano; atyo yaafa.
Oruzaaro rwa beene Noa
Currently Selected:
Kut 9: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
