Luk 21
21
1Yesu ku yainamwire amaisho, yaareeba abatungi nibata emitoijo yaabo omu ibiikiro; 2kandi yaareeba omufaakazi omworo buzima, nawe naatamu otusente tubiri. 3Atyo yaagira ati: Buzimazima nimbagambira ku omufaakazi ogwo omworo yaatamu bingi okukira abo boona; 4ahabw'okuba bo baahayo nibakora aha bi bashaagize, kwonka we omu bworo bwe yaatamu kyona ekyakumutungire.
Yesu okuranga eby'okucwekyerezibwa kwa Yerusalemu
(Mat. 24:1-2; Mar. 13:1-2)
5Abantu bamwe, ku baabaire nibagaaniira aha bya Nyaruju, nibagamba oku yaahunzirwe n'amabaare marungi, kandi n'ebyahairweyo abantu ahabwabo, Yesu yaabagira ati: 6Ebyo byona ebi murikutangaarira hati, obunaku buryahika obu hataritsigara ibaare na rimwe eritungamiire erindi eritarisheenyagurwa.
Okutandika kw'eby'obusaasi
(Mat. 24:3-14; Mar. 13:3-13)
7Nabo nikwo kumubuuza bati: Mwegyesa, beitu ebyo biryabaho ryari, kandi ni kamanyiso ki akaryoreka ahi biribeeraho? 8Yesu yaagarukamu ati: Mwerinde mutarihabisibwa, ahabw'okuba baingi baryaija nibaanyeyeterera, nibagira ngu, Niinye. Kandi bati: Obunaku buri haihi kuhika. Mutaribakuratira. 9Mbwenu ku murihurira engamba n'okujagarazibwa obugomi mutaryekanga ahabw'okuba ebyo byona n'eby'okubanza kubaho; kwonka emperu yo eryaba etakahikire.
10Yaagumizamu ati: Eihanga riryateera erindi ihanga, n'obugabe buteere obundi. 11Haryabaho emitsitsa y'amaani n'enfu nyingi n'enjara y'oku n'oku; habeho ebirikutiinisa ebirikureebwa, kandi n'obumanyiso bukuru oburikuruga omu iguru. 12Kwonka ebyo byona bitakabaireho, abantu baryabakwata, babahiiganise, babaheyo omu mateeraniro, babate omu bihome, babahitsya n'omu maisho g'abagabe n'ag'abategyeki bakuru nibabantura. 13Kandi obwo nibwo muritunga omwanya gw'okuunyemera. 14Eki mugume nimukiijuka; ku mutari b'okuteekateeka bukiri kare ebi muryetonganira. 15Manya niinye ndibaha ebi murigamba hamwe n'obwengye, ebi abazigu baanyu bataribaasa kwanga nari kuhakanisa. 16Muryaheebwayo abazaire baanyu na beene shoimwe, abanyabuzaare na banywani baanyu; kandi bamwe omuriimwe baryaitwa. 17Abantu boona baryabanga nibabantura. 18Kwonka akashokye k'aha mutwe gwanyu tikarihwerekyerera. 19Omu kugumisiriza nimwo murijunira amagara gaanyu.
Akagwe akarigwera Yerusalemu
(Mat. 24:15-21; Mar. 13:14-19)
20Ku murireeba Yerusalemu ekubirwe amahe g'abazigu, mumanye ngu eri haihi kuhwerekyerezibwa. 21Abariba bari omuri Buyudaaya bahungire aha nshozi. Abariba bari omu nda y'orurembo barurugyemu, kandi abariba bari omu byaro batariruhungiramu. 22Manya ebyo biryaba ebiro by'okufubirwa, ngu Ebyahandiikirwe bibone kuhikiirira. 23Ebishi bambe, abariba baine enda n'abarikwontsya omu biro ebyo baryagwerwa akagwe! Ahabw'okuba egi nsi eryagira omunyangararo mwingi kandi Ruhanga agirire abantu baamwo ekiniga kingi. 24Abamwe baryaitwa rurara, n'abandi batwarwe omu mahanga goona bari enkwatwa; kandi Yerusalemu egume neeribatiirirwa Abanyamahanga, okuhitsya obu ebiro byabo birihwaho.
Ebiribaho Omwana w'omuntu ari haihi kugaruka
(Mat. 24:29-31; Mar. 13:24-27)
25Haryabaho obumanyiso aha izooba n'aha kwezi n'aha nyonyoozi. Omu nsi amahanga garyagira obusaasi bwingi, gashoberwe ahabw'okuhoorera kw'amayanja n'ebingonzi byago. 26Abantu baryaitwa obwoba ahabw'okutegyereza akagwe akarigwera ensi, ahabw'okuba eby'amaani eby'omu iguru biryatengyetsibwa. 27Haza obwo nibwo barireeba Omwana w'omuntu naizira omu kicu aine obushoboorozi n'ekitiinisa kingi. 28Ebyo ku biritandika kubaho, mwemerere murarikye emitwe, ahabw'okuba muryaba muri haihi kucungurwa.
Obunaku bw'okwija kwe
(Mat. 24:32-35; Mar. 13:28-31)
29Kandi Yesu yaabacwera enfumu egi, ati: Mureebere aha muti gw'omutiini n'ahari ibara muti. 30Ku mureeba gwatandika guti kutooka, mumanya ku ekyanda kiri haihi. 31Naimwe nu nikwo kiri. Ku murireeba ebintu ebyo nibibaho, mumanye ku obukama bwa Ruhanga buri haihi. 32Buzimazima nimbagambira nti: Obusingye obu tiburihwaho ebyo byona bitakabaireho. 33Eiguru n'ensi biryahwaho, kwonka ebigambo byangye tibirihwaho.
Mugume mweteekateekire
34Mwerinde, emitima yaanyu etakaasiraazibwa omururu, obusinzi n'amaganya g'eby'amagara aga, ekyo kiro kikabagwaho kitaraariire nk'orugogo. 35Manya kiryaizira abantu boona abari omu nsi. 36N'ahabw'ekyo mugume nimureeba, nimushaba obutoosha amaani agariboozya omuri ebyo byona ebiribaho, gakababaasisa kwemerera omu maisho g'Omwana w'omuntu.
37Nyomushana Yesu akaba asiiba omuri Nyaruju naayegyesa, kandi nyekiro aza kuraara omu rushozi orurikwetwa orw'Emioliva. 38Reero bukiba nibwaba, abantu boona bamushanga omuri Nyaruju kuhurira ebi arikugamba.
Okucumira Yesu enaama y'okumwita
(Mat. 26:1-5; Mar. 14:1-2; Yoh. 11:45-53)
Currently Selected:
Luk 21: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
