1 Abhakörintö 1
1
Amakëërërryö
1Ritashandighi reno nö-öni Pauro ndyandëkirë. Öni naabherekerwa igha mbe omotomwa uwa Kiristo Yëësu, ku righonshe irya Waryobha. Öni na Sositene umukumya murikyane, 2nkobhakëërya törë bhëënyu bhano mörëngë mo-kanisa iya Waryobha, eno ërëngë Körintö hayö. Bhëënyu mwasaabhuurwa na Kiristo Yëësu. Mwabherekerwa igha, mobhe abhantö abha Waryobha, hamwë na bhonswe igho kera ahasë, bhano bhakosaasaama Omonene uwëëtö Yëësu Kiristo, ono arëngë Omonene uwaabho, na uwëëtö na bhëëtö bhonswe.
3Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo, bhebhe hamwë na bhëënyu.
Umukumo ughwa Pauro ku-Waryobha
4Nkukumya ndë Waryobha sinsikö syonswe igho, ko okoghera iya bhëënyu, ko okoghera iya örööbhö urwaye rono yaabhahaana okohetera ku-Kiristo Yëësu. 5Ko okobha na öbhömwë na Yëësu Kiristo, mwamëhirë ko obhoghambi bhwonswe igho, na ko obhongʼaini bhwonswe igho. 6Ghayö nkwörökya gharë igha, amangʼana agha Yëësu Kiristo ghano twaabharaarëkëëyë na-agha obhoheene. 7Ku bhuyö, bhoono timukusuuhwa na ituho yoyonswe igho iya Umwika Ömöhörëëru, ko-nkaagha eno mokeeghanya ukukyora ukwa Omonene uwëëtö Yëësu Kiristo. 8Waryobha naraabhatogheke okohekera urusikö urwa umuhiko, okore amasoro ghatakaasha okotooka kö-bhëënyu urusikö ruyö, urwa Omonene uwëëtö Yëësu Kiristo. 9Waryobha nu-uwa heene, yaabhabherekera, okore mobhe na öbhömwë na Omoona uwaaye, Yëësu Kiristo Omonene uwëëtö.
Öbhömwë ubhwa ekanisa
10Abhakumya bharikyane, ndabhasaasaama okohetera iriina irya Omonene uwëëtö Yëësu Kiristo igha, mobhe na ubhwighwerrani, hayö ho moraabhe ëkëntö ëkëmwë. Mwangarre motakaahokana, kasi mobhe ëkëntö ëkëmwë, bhanyakiina ëkëmwë. 11Abhakumya bharikyane, abhantö nyabhorebhe abha eka iya Kirowe, bhaantëëbhya igha, timukwighwerrana bhuuya hë. 12Mbe, keno nkoghamba ni-igha, kera ömöntö mö-bhëënyu n-gaaye igho akoghamba, uwöndë araghamba igha, “Öni nu-uwa Pauro ndë.” Uwöndë igha, “Öni, nu-uwa Apöörö ndë.” Ghwiki uwöndë aghamba igha, “Öni, nu-uwa Keefa#1:12 Keefa. Keefa uyö we Peetero. Ensonga iya iriina Peetero ni-igha, Ritare. ndë.” Uwöndë igha, “Öni, nu-uwa Kiristo ndë.” 13Bhoono ndabhabhöörya igha, Kiristo nahokaini? Kasi Pauro, we yaahanëkirwë ko-mosarabha ko okoghera iya bhëënyu? Handë igha, mwaabhatiisiibhwi okohetera iriina irya Pauro?
14Nkukumya ndë Waryobha igha, Kirisipo bhaana Ghaayo abheene igho, mbo naabhatiisya kö-bhëënyu hayö, tinkuhiita igha naabhatiisya ömöntö uwöndë hë. 15Ku bhuyö, taaho ömöntö ono akotora okoghamba igha, yaabhatiisibhwa okohetera iriina iryane. 16Nhitirë igha, naabhatiisya abhantö abha eka iya Sitefana. Tenkomanya ghwiki igha naabhatiisya ömöntö uwöndë wowonswe igho kutigha bhayö. 17Ko bhoora, Yëësu Kiristo tiyaantömirë igha mbatiisi abhantö. Yaantömirë ndaareke Amangʼana Amaiya, kasi ntakesegha obhongʼaini ubhwane ubhwa okoghamba bhuuya, okore omosarabha ughwa Yëësu Kiristo, ghotakaabhorwa ubhwera ubhwagho.
Kiristo we obhotoro na obhongʼaini ubhwa Waryobha
18Engʼana iya omosarabha ughwa Yëësu Kiristo ko bhano bhakusira, nkomaaha bharë igha, m-bokangi, kasi ko bhano tökötööribhwa, nkomaaha törë igha, engʼana iyö, no-bhotoro ubhwa Waryobha. 19N-kya bhono yandëkirwë mo-Maandeko Amahörëëru igha,
“Nendaasiki obhongʼaini ubhwa abhantö abhangʼaini.
Nendaasari na obhomanyi ubhwa amangʼana ubhwa abhamanyi abha amangʼana.”#1:19 Maaha mo-ketabho ikya Isaaya 29:14.
20Hai akotooka omongʼaini? Hai akotooka umwëghya uwa amaraghërryö? Hai akotooka umuri uwa senkaani uwa reero eno? Kasi obhongʼaini ubhwa ko-kebhara kono, Waryobha tiyaakora bhomaahekane igha m-bokangi? 21Nkoghamba ndë igho ko bhoora igha, Waryobha ko obhongʼaini ubhwaye, yaakörrë igha, abhantö bhatakaamomanya okohetera ko-bhongʼaini ubhwabho abheene. Kasi Waryobha akamaaha igha, atööri abhantö bhano bhakukumya engʼana eno ekoraarekwa, eno abhantö abhandë bhakomaaha igha m-bokangi. 22Ko bhoora Abhayahudi, bho ne-kemanyërryö bhakutuna, na Abhaghiriki bho, na-mangʼana agha obhongʼaini bhakutuna. 23Kasi bhëëtö, Yëësu Kiristo we tokoraareka, ono yaahanëkirwë ko-mosarabha. Engʼana iyö, yo Abhayahudi bhakwituuratuura-ko, na ko-Bhaghiriki, m-bokangi. 24Kasi ko bhano Waryobha yaabhabherekera bhabhe abhaaye, mbakaabha Abhayahudi handë abhantö bhano bhatarë Abhayahudi, Yëësu Kiristo, we obhotoro na obhongʼaini ubhwa Waryobha. 25Ko bhoora igha, engʼana iya Waryobha eno ekomaahekana igha ni-iya obhokangi, nkunyoora örë eena obhongʼaini okokera obhongʼaini ubhwa abhantö. Engʼana iya Waryobha eno abhantö bhakomaaha igha m-botaaniinu, neena obhotoro okokera ubhwa abhantö.
26Bhoono abhakumya bharikyane, muhiitoke kya bhono mwaarë, enkaagha eno Waryobha yaabhabhërëkëëyë. Momanye igha, abhantö bhano bhaabherekerwa abha obhongʼaini ubhwa kinyamöbhërë, abha obhotoro, na abha ibhyeo te-bhaaru hë. 27Kasi Waryobha yaashaaghööyë amangʼana agha ekekangi ko-kebhara kono, okore asööki abha obhongʼaini. Ghwiki akashaaghora ëbhëntö bheno bhetaana obhotoro ko-kebhara kono, okore asööki abha obhotoro. 28Waryobha yaashaaghööyë ëbhëntö ebhetaaniinu na bheno bhekoserwa ko-kebhara kono, amangʼana ghano ghataaho, okore asöökërri ghano ghaaho. 29Yaakörrë igho, okore ömöntö wowonswe igho atakaikumya ku-Waryobha. 30Waryobha we abhaghootaini hamwë na Kiristo Yëësu. Uyö, we Waryobha yaamokora abhe obhongʼaini kö-bhëëtö, bhono bhukurwa ku-Waryobha, obhoheene, esaabhuuro na ubhutungurya ubhwa ëbhëbhë ibhyëtö. 31N-kya bhono yandëkirwë mo-Maandeko Amahörëëru igha, “Ömöntö wowonswe igho ono akwihasha, aikumi ko okoghera iya Omonene Waryobha.”#1:31 Maaha mo-ketabho ikya Yeremia 9:23-24.
Currently Selected:
1 Abhakörintö 1: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.