1 Abhakörintö 2
2
Okoraareka amangʼana agha Yëësu Kiristo
1Abhakumya bharikyane, hano naaishirë kö-bhëënyu hayö, tenaabharaarëkëëyë imbumbure iya Waryobha,#2:1 Imbumbure iya Waryobha. Senakara isyëndë syandëkirwë igha, ubhwimërërri ku-Waryobha. ko bhoghambi ubhwa amangʼana amaiya, handë kwa obhongʼaini. 2Ko bhoora hano naahikirë kö-bhëënyu hayö, tenatunanga mmanye kyokyonswe keera hë, kasi ekenene na-mangʼana agha Yëësu Kiristo, yëë, Yëësu Kiristo ono yaahanëkirwë ko-mosarabha. 3Enkaagha iyö, m-mötëntëëru naarë, kora naarenga na entarëki, kora naarighitanga bhököngʼu. 4Engʼana iyaane, na okoraareka ukwane, tibhyarenga ibhya obhongʼaini ubhwa ököngʼënërrya sehakëri isya abhantö hë, kasi n-ko ebhemanyërryö ibhya obhotoro ubhwa Umwika Ömöhörëëru. 5Naakörrë igho, okore umukumo ughwënyu, ghotakaabha ughwa ukwesegha obhongʼaini ubhwa abhantö, kasi ghwitengʼere obhotoro ubhwa Waryobha.
Obhongʼaini ubhwa ukurwa ku-Mwika Ömöhörëëru
6Nokaanyoora ni-igho ërë, kasi nkoghamba törë amangʼana agha obhongʼaini ko-bhantö bhano umukumo ughwabho ghwakongʼa, to-bhongʼaini ubhwa ko-kebhara keno hë, handë ubhwa abhatöngi abha ekebhara keno, bhayö m-manshë mahëti. 7Obhongʼaini bhuyö tokoraareka, ni-kibhisirë ikya Waryobha keno yaasëëmëri ukurwa kare, kora ekebhara ketaraabhombwa, okore atokorre ikuughë iya ubhuhika. 8Taaho ömötöngi uwa ko-kebhara kono kora ömwë, ono amanyirë obhongʼaini bhuyö. Singa bhakaabhomanyirë, tebhakaahanëkirë Omonene uwa ubhuhika ko-mosarabha hë. 9Kasi n-kya bhono Amaandeko Amahörëëru ghakoghamba igha,
“Taaho ömöntö ono yaarööshë, akaighwa,
handë okotoora mo-nkoro iyaaye,
amangʼana ghano Waryobha yaasëëmëëyi abhantö bhano bhamohanshirë.”#2:9 Maaha mo-ketabho ikya Isaaya 64:4.
10Kasi bhëëtö, Waryobha yaatorahorra amangʼana ghayö okohetera ku-Mwika Ömöhörëëru. Ko bhoora Umwika Ömöhörëëru nkwitaaha arë ghonswe igho, kora ibhibhisirë ibhya Waryobha. 11Taaho ömöntö ono akotora okomanya ghano ömöntö uwöndë akwitegherra. Kasi enkoro iyaaye iyeene igho, yo eghamanyirë. Ni-ighoigho igha, amangʼana agha Waryobha, taaho ono aghamanyirë hë, Umwika uwa Waryobha umwene igho we aghamanyirë. 12Bhëëtö, tetwahaanwa enkoro iya ko-kebhara kono, kasi nu-Mwika ono akurwa ku-Waryobha we twaahaanwa, okore tomanye amangʼana ghano Waryobha yaatohaana bhosa igho.
13Tetokoghamba amangʼana ghayö kya amangʼana ghano ghakwëghibhwa kwa obhongʼaini ubhwa abhantö, kasi nkwëghibhwa gharë na Umwika uwa Waryobha. Torarahora amangʼana agha Umwika uwa Waryobha, ko bhano bhaana Umwika uwa Waryobha.#2:13 Torarahora amangʼana agha Umwika uwa Waryobha, ko bhano bhaana Umwika uwa Waryobha. Ensonga iyaamo iyëndë ni-igha, torarahora amangʼana agha Umwika uwa Waryobha ko mangʼana ghano ghaarwa ku-Mwika Ömöhörëëru uwa Waryobha. 14Mbe, ömöntö ono ataana Umwika uwa Waryobha, uyö takotora okoghoota amangʼana ghano ghakurwa ku-Mwika uwa Waryobha, ko bhoora uyö, nkomaaha arë amangʼana ghayö igha, n-ga ekekangi. Kora taatore okoghamanya hë, ko bhoora nkomanywa gharë ko obhotoro ubhwa Umwika Ömöhörëëru. 15Ömöntö ono akotangatwa na Umwika uwa Waryobha nkwitaaha arë, kasi we takwitaahwa hë. 16N-kya bhono Amaandeko Amahörëëru ghakoghamba igha,
“Taaho ömöntö ono amanyirë amaitegherro agha Omonene Waryobha hë,
taaho ömöntö ono akotora okomoraghërrya hë.”#2:16 Maaha mo-ketabho ikya Isaaya 40:13.
Kasi bhëëtö nkwitegherra törë ghano ghakurwa ku-Kiristo.
Currently Selected:
1 Abhakörintö 2: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.