1 Abhakörintö 14
14
Ituho iya amangʼana agha öbhöröötina ukushumaasha ebheghambo ebhehya
1Mwiköngʼërri okobha na righonshe. Ghwiki ni-igha mutune bhököngʼu okobha na imituho ighya Umwika Ömöhörëëru, ekenene, ituho iya ukuruusya öbhörööti. 2Ömöntö ono akushumaasha ekeghambo ekehya, te-bhantö akushumaasha nabho hë, kasi nkunyoora örë arashumaasha na Waryobha, ko bhoora ghaara akoghamba, taaho ömöntö akoghamanya hë. Nkunyoora örë arashumaasha amangʼana agha imbumbure, ko obhotoro ubhwa Umwika Ömöhörëëru.#14:2 Arashumaasha amangʼana agha imbumbure, ko obhotoro ubhwa Umwika Ömöhörëëru. Ensonga iyaamo iyëndë ni-igha, arashumaasha amangʼana agha imbumbure iya mo-nkoro iyaaye. Arashumaasha amangʼana agha imbumbure iya mo-nkoro iyaaye. 3Kasi ono akuruusya öbhörööti, we nkushumaasha arë na abhantö amangʼana agha okobhatöörrya ku-mukumo ughwabho, agha okobharöörësya na agha okobhatërëmya. 4Ömöntö ono akushumaasha ekeghambo ekehya, uyö nu-mwene akwihaghaasha. Kasi ono akuruusya öbhörööti, uyö na-Bhakiristo bharikyaye akohaghaasha.
5Öni nkutuna ndë igha, n-hano bhonswe igho mokaashumaasha ebheghambo ebhehya, kasi ekenene ni-igha, n-hano mokaaruusya öbhörööti. Nkoghamba ndë igho ko bhoora ömöntö ono akuruusya öbhörööti, uyö nakërrë umushumaashi uwa ebheghambo ebhehya, hano ataasesore, okore ahaghaashe abhantö abha ekanisa. 6Bhoono abhakumya bharikyane, hano nkaasha kö-bhëënyu hayö, mbashumaashere ebheghambo ebhehya, n-hoorohooro kë eno moraanyoore? Kasi hano ndaabhatëëbhi ghano oraanyoore nhönyörrëëywë na Waryobha, handë mbahaane obhomanyi ubhwa engʼana nyabhorebhe, handë mbaraarekere engʼana iya Waryobha, handë mbëëghi, hayö moraanyoore ehoorohooro. 7Ni-igho ekobha kora kö-bhëntö ibhya ökörëëtërya. Ëbhëntö bhiyö tebhekoheeshera hë, nkekaabha ekerongwe, handë ritungu. Hano ëbhëntö bhiyö bheraange okobha na emebhari ëmëhagharë, ömöntö namanya rirëëtyö reno rëkörëëtibhwa mu-ritungu muyö? 8Na hano orotera rotaahuutirwë bhono emanyekaini, nawë araaisëëmi ukughya ukwitana riihë? 9Kora kö-bhëënyu bhonswe ni-igho ërë. Hano moraange okoghamba amangʼana ghano ghamanyekaini ko-bhantö, nawë araamanye keno mokoghamba? Hayö nkushumaasha mörë amangʼana gharaheta na rikama.
10Ebheghambo m-byaru bheno bhërëngë ko-kebhara kono, kasi tekeeho ekeghambo kora ëkëmwë keno ketaana ubhwera. 11Mbe, hano oraanyoore igha temanyirë ekeghambo ikya uwöndë, nkobha ndë kya ömöghëni ku-mwene ekeghambo uyö, na umwene wonswe nkobha arë ömöghëni ku-öni. 12Ni-ighoigho ekobha kora na kö-bhëënyu bhonswe. Ko bhono mukutuna bhököngʼu igha mobhe na ituho iya Umwika Ömöhörëëru, mokore omotono ughwa ukughinyoora, okore ekenene bhëënyu ekanisa, motoghekane. 13Mbe, ku bhuyö ni-igha, ömöntö ono akoghamba ekeghambo ekehya, asabhe Waryobha amohaane na obhotoro ubhwa okosesora ekeghambo kiyö. 14Nkoghamba ndë igho, ko bhoora hano nasaasaama ko ekeghambo ekehya, enkoro iyaane yo ekosaasaama, kasi sehakëri isyane, teseekomanya ëkëntö hë. 15Bhoono iyakë nkaakora? Nendaasaasaame Waryobha mo-nkoro iyaane ko ekeghambo ekehya, mmare ghwiki nsaasaame ko sehakëri isyane. Nendaarëëti mo-nkoro iyaane ko ekeghambo ekehya, mmare ghwiki ndëëti ko sehakëri isyane. 16Hano oraakumi Waryobha mo-nkoro iyaaho ko ekeghambo ekehya ikyene igho, ömöntö uwöndë ono atamanyirë, iyakë araaikërri igha “Amina” na ambe tamanyirë keno okoghamba hë? 17M-maheene igha, ukukumya ukwaho kuyö, koratora kobha kuuya ku-Waryobha, kasi tokohaghaasha umukumo ughwa murikyaho hë.
18Nkukumya ndë Waryobha ko bhoora nkoghamba ebheghambo ibhyaru okokera bhëënyu bhonswe igho, 19kasi hano naabha mo-kanisa, ndatuna nshumaashe ko sehakëri isyane ngakaabha amangʼana ataano igho, ghano ghamanyekaini, okore nëëghi abhantö abhandë. Iyö yo engʼana enene okokera ukushumaasha amangʼana ëbhëkwë ikömi, ko ekeghambo ekehya. 20Abhakumya bharikyane, motakaabha na amaitegherro kya agha abhaana. Nyakara mobhe abhaana ko mangʼana amaghogho, kasi mo-sehakëri isyënyu, mobhe abhantö abhakörö. 21Amaandeko Amahörëëru gharaghamba igha,
“Nindishumaasha na abhantö bhano, okohetera ko-bhantö abha ebheghambo ebhehya,
na okohetera ku-minywa ighya abhaghëni,
nokaanyoora ni-igho erebha, kasi tebharinyighwera hë.
Ni-igho Omonene Waryobha akoghamba.”#14:21 Maaha mo-ketabho ikya Isaaya 28:11-12.
22Mbe, ebheghambo ebhehya bheno, n-kemanyërryö ikya bhano bhataana umukumo, ti-igha nko-bhano bhaana umukumo. Kasi ituho iya ukuruusya öbhörööti, ne-kemanyërryö ikya bhano bhaana umukumo.
23Bhoono hano oraanyoore abhakumya mwikomaini hamwë, mbe, bhonswe igho moghambe ebheghambo ebhehya, bhasohe abhantö bhano bhatamanyirë, handë bhano bhataana umukumo, tebhaghambe igha m-bashuuru mörë? 24Kasi hano bhonswe igho moraaruusi öbhörööti, amare asohe ömöntö ono ataana umukumo handë ono atamanyirë, ghano araaighwe kö-bhëënyu bhonswe igho, ngaraaghere amanye obhoghogho ubhwaye, kora ngaraamobhotorre ikiina mo-nkoro iyaaye. 25Imbumbure iya mo-nkoro iyaaye, nkobha ërë harabhu. Bhoono hayö ho araaighwësi hansë bhubhuumaayë asaasaame Waryobha eno araghamba igha, “M-maheene Waryobha hamwë arë na bhëënyu!”
Bhono abhakumya bharasaasaamenga
26Mbe, bhoono abhakumya bharikyane, iyakë nkaghamba? Hano mwasikana hamwë, igha kera ömöntö aana rirëëtyö, aana amëëghyö, aana obhohonyoro, aana ekeghambo ekehya, aana esesoro. Amangʼana ghayö ghonswe igho, ni-igha ghakorwe ko okoghera iya okohaghaashana. 27Hano ömöntö araashumaashe ekeghambo ekehya, ni-igha bhashumaashe abhantö abhabhërë handë abhatatö, bhatakaaruha. Bhashumaashenga ömöntö ömwë ömwë. Kora ni-igha abhe-ho ömöntö uwa okosesora ghayö bhakoghamba. 28Hano oraanyoore ömöntö uwa okosesora ataaho, ni-igha akire mo-kanisa hayö, aighambere umwene na Waryobha uwaaye. 29Abharööti bhonswe bhashumaashe bhabhërë handë bhatatö, abhandë bhaitaahe amangʼana ghayö bhakoghamba. 30Kasi hano uwöndë ono aikaayë araahonyorrwe engʼana, uwa mbere oora, ni-igha akire. 31Ko bhoora ni-igha, kera ömöntö anyoore umweya ughwa okoghamba öbhörööti ubhwaye, okore abhantö bhonswe igho bheeghe na bharöörësibhwi. 32Ituho iya ukuruusya öbhörööti, nkotangatwa ërë na abharööti, 33ko bhoora Waryobha uwëëtö takoreeta riihë hë, kasi no-morembe akoreeta.
N-kya bhoora ërëngë ko amakanisa ghonswe igho agha abhahörëëru, 34ni-igha abhakari, bhakirenga mo-kanisa, ko bhoora tebhakwikërërribhwa okoghamba mo-kanisa hë, kasi bhabhe abhaighwa, kya bhono amaraghërryö agha Mosa ghakoghamba. 35Hano oraanyoore bharatuna igha bheeghe engʼana, bhabhööri bhashaasha abhaabho ka, ko bhoora në-nsöni omokari ukushumaasha mo-kanisa.
36Engʼana iya Waryobha, nkö-bhëënyu yaarwa? Handë igha m-bëënyu abheene yaahëkërëëyë? 37Hano ömöntö araaimaahe igha m-mörööti, handë igha të-möntö uwa kinyamöbhërë hë, amanye igha ghayö nkobhandekera, na-maraghërryö agha Omonene. 38Kasi hano ömöntö araaghatashere hansë, tigha atashere hansë.
39Ko okoghera iya amangʼana ghayö, abhakumya bharikyane, ni-igha mokore omotono ughwa ukuruusya öbhörööti, kora ekeghambo ekehya motakaakerebherra. 40Ekenene ni-igha, amangʼana ghonswe igho, ghatoorwe bhuuya na okokorwa ubhwa heene.
Currently Selected:
1 Abhakörintö 14: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.