1 Abhakörintö 15
15
Ukuryoka ukwa Kiristo
1Bhoono abhakumya bharikyane, nkobhahitökya ndë Amangʼana Amaiya ghano naabharaarëkëëyë, mokaghaghoota kora mwanagha ko Amangʼana Amaiya ghayö. 2Amangʼana Amaiya ghayö, ngo ghakobhahaana öbhötöörya, hano moraaghëndërri ukukumya amangʼana ghayö naabharaarëkëëyë. Hano motaaghaghoote, momanye igha ukukumya ukwënyu n-kwa bhosa.
3Amëëghyö agha ubhwera obhonene ghano naahaaywë naabhëëghya igha, Kiristo yaakuurë ko okoghera iya ëbhëbhë ibhyëtö,#15:3 Maaha mo-ketabho ikya Isaaya 53:5-12. kya bhono Amaandeko Amahörëëru ghakoghamba. 4Ghwiki Amaandeko Amahörëëru gharaghamba igha, yaabhëëkirwë, kasi urusikö urwa katatö akaryoka.#15:4 Maaha mo-ketabho ikya Zabhuri 16:9-10. 5Akabhooshokera Keefa, ghwiki akabhooshokera abhatomwa abhaaye ikömi na bhabhërë. 6Hano yaamarrë, akabhooshokera abhakumya okoheteera ekerengere ikya amaghana ataano, abhakumya bhayö n-hamwë bhaarenga. Abhaaru mo-bhantö bhayö, kora bhoono igho hobharë, kasi abhandë bhaakwa. 7Ghwiki akabhooshokera na Yaakobho, kora na abhatomwa bhonswe igho. 8Ko okomarërrya, akambooshokera öni wonswe, nkabha kya ömöntö ono aibhööywë, ataraahika. 9Öni tondengʼaani na abhatomwa abhandë bhonswe igho hë. Tiningʼarëëyi okobherekerwa omotomwa hë, ko bhoora naanyankëri abhakumya abha Waryobha. 10Kasi bhono ndëngë bhoono igho, n-ko okoghera ukwa örööbhö urwa Waryobha. Örööbhö urwaye ruyö ku-öni, te-rwa bhosa hë, ko bhoora rwaaghera naakora emeremo okokera abhandë bhonswe igho, te-ko obhotoro ubhwane umwene hë, kasi nö-rööbhö urwa Waryobha ruyö rörëngë hamwë na öni. 11Mbe, nokaanyoora igha nö-öni, handë igha na-bhatomwa abhandë bhayö, amangʼana n-gaaraghaara tokoraareka, na ghayö ngo mwaakumya.
Ukuryoka ukwa abhaku
12Mbe, nyoore nkoraareka törë igha, Kiristo yaaryökirë ukurwa mo-bhaku, bhoono n-kwakë abhandë mö-bhëënyu bhakoghamba igha, ukuryoka ukwa abhaku tekooho hë? 13Nyoore ukuryoka ukwa abhaku kotaaho, mbe tomanye igha, Kiristo wonswe tiyaaryoka hë. 14Ghwiki nyoore Yëësu Kiristo ataaryoka, obhoraarëki ubhwëtö tebhoona ubhwera hë, na umukumo ughwënyu n-gwa bhosa, teghoona ubhwera hë. 15Kora na bhëëtö bhonswe ntoraamaahekane igha, m-baimërërri abharongo abha Waryobha törë, ko bhoora tukwimererra igha, Waryobha yaaryökëri Kiristo ukurwa mo-bhaku, hano oraanyoore igha m-maheene abhaku tebhakuryoka hë. 16Nyoore abhaku bhatakuryoka, toghambe igha Kiristo wonswe tiyaaryoka hë! 17Na nyoore Kiristo ataaryoka, umukumo ughwënyu n-gwa bhosa, temoraatööribhwa ukurwa mö-bhëbhë ibhyënyu hë. 18Mbe, hayö bhoono abhantö bhano bhaakwa bhakumiri Yëësu Kiristo, bhayö mbasira. 19Ko bhoora igha, nyoore Kiristo nkumwitengʼera törë ko öbhömënyi ubhwa ko-kebhara kono ubhwene igho, bhëëtö m-bantö abha ukwabherwa törë, okokera abhantö bhonswe igho.
20Kasi bhoono obhoheene ni-igha, Kiristo yaaryoka ukurwa mo-bhaku, omotangi uwa bhano bhaakwa. 21Momanye igha, ko bhoora uruku rwaareetwa na ömöntö ömwë, ighoigho na ukuryoka ukwa abhaku, m-möntö ömwë yaakoreeta. 22Mbe, ko bhoora abhantö bhonswe igho nkukwa bharë ko bhoora mbaasëmökirë ukurwa ko-Adamu, ni-ighoigho, na ko okoghera iya okoghootana na Yëësu Kiristo abhantö bhonswe igho mbarekorwa bhabhe abhahöru. 23Kasi kera ömöntö ko-nkaagha iyaaye, Yëësu Kiristo we omotangi, bhararoobhera-ko abhantö abhaaye hano ariisha. 24Hayö ho umuhiko ughwa ekebhara ghurihika, hano arehaana Taata Waryobha Obhokama ubhwaye. Naremohaana hano urinyoora amarrë okosarya öbhötöngi bhwonswe igho, ubhwera bhwonswe igho na obhotoro bhwonswe igho. 25Ko bhoora ni-igha Kiristo atonge okohekera hano aretashera hansë abhabhisa abhaaye bhonswe igho.#15:25 Maaha mo-ketabho ikya Zabhuri 110:1. 26Uruku we umubhisa ono aremarerribhwa ukusikibhwa. 27Amaandeko Amahörëëru gharaghamba igha, “Waryobha yaamökörrë atashere hansë ëbhëntö bhyonswe igho.”#15:27 Maaha mo-ketabho ikya Zabhuri 8:6. Kasi hano yaghambwa igha, “Yaamökörrë atashere hansë ëbhëntö bhyonswe igho,” obhoheene ni-igha Waryobha taamo hë. Ko bhoora we yaaghera ëbhëntö bhyonswe igho bhetasherwe hansë na Yëësu Kiristo. 28Mbe, hano ëbhëntö bhyonswe igho bheretasherwa hansë, ho na Omoona wonswe ariihoota ku ubhwera ubhwa Waryobha ono yaaghërrë akatashera hansë ëbhëntö bhyonswe igho, okore Waryobha abhe ömötöngi uwa bhyonswe igho.
29Nyoore ukuryoka kotaaho, abhantö bhano bhakobhatiisibhwa ko okoghera iya abhaku, n-kë bhakwesegha? N-kwakë bhakokora igho nyoore ukuryoka kotaaho? 30Na bhëëtö bho, n-kwakë tukwirekera mu-ribhëri nkaagha syonswe igho? 31Abhakumya bharikyane, öni nu-ruku nkoghenda narwo nkaagha syonswe igho. Bhuyö m-boheene kya bhono ërëngë obhoheene igha nkwikumya ndë ko okoghera iya bhëënyu, ko bhoora mwaghootana na Omonene uwëëtö Kiristo Yëësu. 32Nyoore ubhweseghe ubhwane m-bwa kinyabhantö ubhwene igho, n-kwakë naitaini na sityënyi sëmbë Ëfësö?#15:32a Sityënyi sëmbë Ëfësö. Ensonga iyaamo ni-igha, abhantö abhabhë bhano bhaamorebherranga okokora emeremo ighya okoraareka Amangʼana Amaiya. N-hoorohooro kë naanyöörrë ko engʼana iyö? Nyoore abhaku bhatakuryoka,
“Toraaghere mbe ëbhëntö reero,
ko bhoora isho nturikwa.”#15:32b Maaha mo-ketabho ikya Isaaya 22:13, 56:12.
33Mwangarre, motakangʼainwa, “Ishumaasho engogho, nkosarya ërë eteemo iya ömöntö.” 34Mokore amangʼana kwa bhongʼaini, motakaakora ëbhëbhë, ko bhoora abhantö abhandë tebhamanyirë Waryobha hë. Nkoghamba ndë amangʼana ghayö okore mbasöökërri.
Ëmëbhërë emehya
35Ömöntö aratora ököbhöörya igha, kana, “Abhaku iyakë bhakuryökibhwa? M-mëbhërë kë bhakuryökibhwa naghyo?” 36Ököbhöörya kya kuyö, n-kwa kekangi! Hano ömöntö yëëmya imbusiro, nda nkukwa ërë kangata emanya okomera? 37Imbusiro yoyonswe igho eno ikwëmibhwa, nekaabha iya engano handë iyëndëyëndë igho, tikutuubhana na ömöröngö ughwako hë. 38Kasi Waryobha nkoghehaana arë ömöbhërë ughwako kya bhono umwene akutuna, kera imbusiro na ömöbhërë ughwako.
39Ëmëbhërë ghyonswe igho tighituubhaini hë. Gheeho ëmëbhërë ighya abhantö, ighya sityënyi, ighya ibhinyönyi na ighya sinswë. 40Ghwiki gheeho ëmëbhërë ighya ighörö iyö, na ighya ko-kebhara kono, na ikuughë iya ëmëbhërë ighya ighörö iyö, nekeraini na ikuughë iya ko-kebhara kono. 41Eeho ikuughë iya iryobha na ikuughë iyëndë iya umwëri, na iyëndë iya sinyota, ikuughë iya inyota nyabhorebhe nekeraini na ikuughë iya inyota iyëndë.
42Mbe, ni-igho ërë kora ko amangʼana agha ukuryoka ukwa abhaku. Ömöbhërë omosarëku ngwo ghokobheekwa, kasi ghuryökibhwa ghono ghotakosareka. 43Nkobheekwa ghörë ghotaana ubhwera, kasi nkuryökibhwa ghörë ghoona ubhwera. Nkobheekwa ghörë ömöbhërë ömötëntëëru, ghuryökibhwa ughwa singuru. 44Nkobheekwa ghörë ömöbhërë ughwa esemoko, ghuryökibhwa ömöbhërë omohya ghono torehaanwa na Umwika Ömöhörëëru. Ko bhoora ghooho ömöbhërë ughwa esemoko, na ömöbhërë omohya ghono torehaanwa na Umwika Ömöhörëëru, ghonswe ho ghörë.
45Amaandeko Amahörëëru gharaghamba igha, “Adamu ömöntö uwa mbere, yaabhömbirwë akabha na öbhöhöru,”#15:45 Maaha mo-ketabho ikya Okosemoka 2:7. kasi Adamu uwa umuhiko we nu-Mwika, ono akohaana abhantö öbhöhöru. 46Kasi ömöbhërë ghono ghokotangata, tu-ughwa öbhöhöru hë, nu-ghwa esemoko ghoora, bhoono ho ghomanya kuusha ghono ghotakukwa. 47Ömöntö uwa mbere, yaabhömbirwë ukurwa ku-rirobha. Kasi ömöntö uwa kabhërë we mu-ryobha yaaruurë. 48Bhono arë ömöntö uwa ku-rirobha, ni-igho bharë na abha ku-rirobha bhonswe, na kya igho arë uwa mu-ryobha, ni-igho bharë na abha mu-ryobha bhonswe. 49Na kya igho twaabhaayë na ituubho iya Adamu ömöntö uwa ku-rirobha, ni-ighoigho ghwiki torebha na ituubho iya Yëësu Kiristo uwa mu-ryobha.
50Abhakumya bharikyane, keno nkobhatëëbhya ni-igha, ömöbhërë ghono ughwa inyama na amaanyinga, teghootore ukorya umwandö ughwa Obhokama ubhwa Waryobha, handë obhosarëku okorya umwandö ughwa keno ketakosareka.
51Bhoono tigha mbarome ökötwë, te-bhonswe igho turikwa hë, kasi nturisyöribhwa bhonswe igho. 52Engʼana iyö nirikora kamwë igho, engoko etaraatoosha emere, enkaagha iya ukuhuutwa ukwa orotera urwa umuhiko. Ko bhoora orotera ndurihuutwa, na abhaku mbariryökibhwa bhaana ëmëbhërë gheno ghetakosareka, na bhëëtö bhonswe nturisyöribhwa. 53Momanye igha, ömöbhërë ughwa okosareka ghono, ni-igha ghusyöribhwi ghuruusibhwi obhosarëku ubhwagho. Na ömöbhërë ughwa ukukwa ghono ghusyöribhwi ghuruusibhwi ukukwa ukwagho. 54Mbe, ömöbhërë ughwa okosareka ghono, hano ghörëtööribhwa ukwanga okosareka, na ughwa ukukwa ghono ghötööribhwi ukwanga ukukwa, hayö bhoono ho erehekerana engʼana eera yandëkirwë igha,
“Uruku rusikiibhwi, robhaahirwë këmwë.”#15:54 Maaha mo-ketabho ikya Isaaya 25:8.
55“Bhoono waruku, obhobhaahi ubhwaho hai bhörë?
Obhotoro ubhwaho ubhwa ukunyahaara hai bhörë?”#15:55 Maaha mo-ketabho ikya Hosea 13:14.
56Obhotoro ubhwa ukunyahaara ubhwa uruku, në-bhëbhë, na obhotoro ubhwa ëbhëbhë, na-maraghërryö. 57Kasi bhoono ni-igha tukumi Waryobha ono akotohaana obhotoro ubhwa okobhaaha okohetera ko-Monene uwëëtö Yëësu Kiristo.
58Mbe, bhoono abhakumya bharikyane abhaghonshe, ni-igha monaghe, motakaasingisa. Möghëndërri okokora emeremo ighya Omonene uwëëtö bhököngʼu nkaagha syonswe igho, ko bhoora momanyirë igha, emeremo ighyënyu gheno mokokorra Omonene, ti-ghya bhosa hë.
Currently Selected:
1 Abhakörintö 15: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.