1 Abhakörintö 16
16
Emesorro ighya ökötöörrya abhakumya
1Bhoono ko mangʼana agha okosororra abhahörëëru, mokore kya bhono naaraghërrya amakanisa agha Gharatia. 2Urusikö urwa Jumapiri, kera ömöntö mö-bhëënyu, abheeke eheke iyaaye ko bheno akunyoora, okore hano ndiisha, omosorro ghotakaasha okobha-ho. 3Hano ndiisha iyö, nendehaana abhantö bhano murishaaghora ritashandighi irya okobhakora bhamanywe Yërusarëëmu, hano bharihira omosorro ughwënyu. 4Hano moremaaha igha m-buuya nhinane nabho, nindihinana nabho.
Ësëëmyö iya Pauro ukughya Körintö
5Hano ndirwa Makedonia, ho ndeheterrania niishe kö-bhëënyu iyö. 6Hano ndiisha, hamwë ndetora ukwikara wëënyu hayö nkaagha nke igho, handë enkaagha yonswe igho iya embeho, okore monsororre nnyoore obhotoro ubhwa ukughya hano honswe igho ndituna ukughya. 7Tinkutuna igha mmaahane na bhëënyu enkaagha eno urinyoora ndaheta, kasi nkutuna ndë igha nnyoore umweya ughwa ukwikara na bhëënyu enkaagha nyabhorebhe, hano Omonene arehansha.
8Kasi nendaaikare Ëfësö hano, okohekera enkaagha iya inyangi iya Pentekosite. 9Ko bhoora nkomaaha ndë igha, nighörrëywë ikihiita nkore emeremo, nokaanyoora abhabhisa bhano bhakondebherra m-baaru.
10Hano Timoteo arihika hayö, muushe kömösërëënia bhuuya, okore atakaabha na entarëki yoyonswe eera, ko bhoora nkokora arë emeremo ighya Omonene kya bhono öni wonswe nkoghekora. 11Mbe, ömöntö wowonswe igho, atakamosera. Kasi mömötöörri emoke oroghendo urwaye ukuusha ku-öni aana omorembe, ko bhoora öni na abhakumya bharikyane nkomoghanya törë.
12Nasaasaama bhököngʼu Apöörö umukumya murikyëtö igha, bhareetane hamwë na abhakumya abhandë, kasi umwene takutuna aashe bhoono igho hë. Rono arinyoora umweya, nariisha.
Amangʼana agha okoragha
13Mwiraarerrenga, mokarehe kora monaghe bhököngʼu ku-mukumo ughwënyu. 14Mobhenga na righonshe ko amangʼana aghëënyu ghonswe igho, ghano mokokora.
15Abhakumya bharikyane, mmomanyirë bhuuya igha, abhantö abha wa Sitefana Akaaya hayö, mbo bhaarë abha mbere ukukumya. Bhairuusya ukutighinkanera abhahörëëru. Bhoono bhamurë ndabhasaasaama igha, 16mwighwerenga abhantö kya bhayö, na abhandë bhano bhaana omotono ughwa okokora hamwë nabho emeremo.
17Naashömëëywë hano Sitefana hamwë na Foritunato bhaana Akaiko bhaahikirë hano. Naashömëëywë ko bhoora mbaangʼaayë ëbhëntö bheno mokaangʼaayë, bheno naarë nabhyo obhohabhë. 18Nkoghamba ndë igho, ko bhoora bhaghërrë nkasambaaroka mo-nkoro iyaane, ndamanya na bhëënyu bhonswe mosambaarokire mo-senkoro isyënyu. Mbe, abhantö kya bhayö mobhasërëëninga.
19Abhantö abha amakanisa agha Asia Enke, bharabhakëërya. Akiira na Purisika, na abhakumya bhano bhakosaasaamera waabho hayö, bharabhakëërya bhököngʼu ku iriina irya Omonene wëëtö Yëësu Kiristo. 20Abhakumya bhonswe igho bharabhakëërya. Mokeerani ku ukwibhaarana ököhörëëru.
21Amakëërërryö ghano, nö-öni Pauro ngandëkirë, ku umwandeko ughwane öni umwene. 22Ömöntö wowonswe ono atahanshirë Omonene Yëësu Kiristo, aihiimwe. Maranata!#16:22 Maranata. Ensonga iyaamo ni-igha, Omonene nshö.
23Örööbhö urwa Omonene uwëëtö Yëësu Kiristo, robhe hamwë na bhëënyu. 24Righonshe iryane rebhe hamwë na bhëënyu kö bhömwë bhono toonabho ku-Kiristo Yëësu.
Currently Selected:
1 Abhakörintö 16: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.