2 Abhakörintö 1
1
Amakëërërryö
1Ritashandighi reno nö-öni Pauro ndyandëkirë. Öni no-motomwa uwa Kiristo Yëësu ndë, ku righonshe irya Waryobha. Öni na umukumya murikyane Timoteo, torabhakëërya bhëënyu bhano mörëngë mo-kanisa iya Waryobha eno ërëngë mu-mughi ughwa Körintö. M-bëënyu tökökëërya, hamwë na abhahörëëru abha Waryobha bhonswe igho, bhano bharëngë mo-mokowa ughwa Akaaya.
2Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo, bhebhe hamwë na bhëënyu.
Waryobha nköröörësya arë ömöntö mu-nyanko
3Akumibhwi Waryobha, Suwaabho Omonene uwëëtö Yëësu Kiristo, Taata nyamaabhë, Waryobha ono aköröörësya ko amangʼana ghonswe igho. 4We akötöghösörrya mu-nyanko iyëëtö yonswe igho, okore na bhëëtö bhonswe töghösörri abhandë bhano bharëngë mu-nyaanyi yoyonswe eera, kya bhono bhëëtö tököghösörribhwa na Waryobha. 5Mbe, kya bhono tukunyoora inyanko insharu ko okoghera iya Yëësu Kiristo, ni-ighoigho Waryobha arëtöghösörrya bhököngʼu okohetera ku-Yëësu Kiristo. 6Nokaanyoora toranyanka, kasi n-ko okoghera iya ököröörësibhwa ukwënyu na ököhönibhwa ukwënyu. Ghwiki igha, hano twaghösörribhwa, na bhëënyu bhonswe nköghösörribhwa mörë. Ököröörësibhwa kuyö, nko koraaghere möghömërri inyanko kya eeraeera na bhëëtö bhonswe tukunyoora. 7Toona ubhweseghe bhököngʼu kö-bhëënyu, ko bhoora tomanyirë igha, ko bhono mukunyanka kya bhëëtö, ni-ighoigho kora mörëröörësibhwa kya bhëëtö.
8Keno tukutuna abhakumya bharikyëtö, ni-igha momanye inyaanyi eno twaanyöörrë mo-mokowa ughwa Asia Enke. Twaanyöörrë inyaanyi indito eno yaatökërrë, kora ntwaakanyanga igha, ntokaakuurë. 9Obhoheene ntwaarenga kya abhantö bhano bhaabhotorrwa ikiina igha bhakwe. Engʼana iyö yaaikörrë, okore totakaisegha singuru isyëtö, kasi tweseghe Waryobha ono akuryökya abhaku. 10Waryobha uyö, we yaatöhönia, tokahona rwa ukwaghura, kora naraaghëndërri ökötöhönia. Bhëëtö we tukwitengʼera igha, ni-igho araakorenga nkaagha syonswe igho. 11Kora bhëënyu nkötötöörrya mörë okotosabhera ku-Waryobha. Waryobha nkwighwa arë amasabhi aghëënyu, kora nkotongʼoora arë. Ku bhuyö abhantö abhaaru mbaraamukumi ko okoghera iya örööbhö urwaye kö-bhëëtö.
Pauro arakubhya oroghendo urwa ukughya Körintö
12Mbe, ikibhuno keno kekoghera toraikumya, ni-igha, amaitegherro aghëëtö nkutwimererra gharë igha, eteemo iyëëtö m-buuya ërë ko-kebhara kono, ekenene n-ku ubhwighwerrani ubhwëtö na bhëënyu, ko obhorabhu na obhoheene bhono bhukurwa ku-Waryobha. Tetwakörrë igho ko obhongʼaini ubhwa ko-kebhara kono, kasi nö-rööbhö urwa Waryobha, ndwo rwaaghërrë tokakora ghayö. 13Tetokobhandekera amangʼana ghano gharaabhataami okomanyërrya, kasi mmoraaghasome moghamanyërri. Neena ubhweseghe igha, moraamanyërri bhuuya amangʼana ghayö, 14nokaanyoora igha, bhoono igho, amangʼana te-ghonswe igho momanyirë hë. Kasi nkwitengʼera ndë igha moremanya bhuuya igha, bhëëtö mbo esemoko iya ukwikumya ukwënyu, kya bhono bhëënyu bhonswe mörëngë esemoko, iya ukwikumya ukwëtö, urusikö roora Omonene Yëësu Kiristo arikyora.
15Naarenga na obhoheene ubhwa amangʼana ghayö, kiyö nkyo kyaaghërrë nkatuna igha niishe kö-bhëënyu ekembere, okore munyoore umweya ughwa okomaahana na bhëëtö harë kabhërë. 16Naatunanga nhetere kö-bhëënyu hayö, enkaagha iya ukughya Makedonia, mmare nkyore kö-bhëënyu hayö, okore nnyoore omosorro kö-bhëënyu ughwa ukunhira Yudea. 17Hano naakubhiri ësëëmyö iyaane iya ukuusha kö-bhëënyu, tenaakörrë igho ntaitëghërrëëyë igha, n-kë nkokora hë. Motakaakanya igha, naakubhiri oroghendo ruyö, ko okohansha ukwane öni umwene, igha nikërri engʼana igha “Yëë,” ghwiki nteme hayö nange igha “A a.”
18Kasi ko bhono Waryobha arëngë uwa obhoheene, amangʼana ghano twaabhatëëbhëri, teghaarenga agha ömöntö ukwikërrya igha “Yëë,” ghwiki atema hayö aanga igha “A a.” 19Nkoghamba ndë igho, ko bhoora Yëësu Kiristo, Omoona uwa Waryobha,#1:19 Omoona uwa Waryobha. Maaha mo-faharaasa. ono öni, Siriwano, na Timoteo tokoraareka kö-bhëënyu, tiyaarenga ömöntö uwa ukwishooghania amangʼana agha ukwikërrya igha, “Yëë,” ghwiki ateme hayö ange igha, “A a.” Kasi ku-uyö, nkaagha sonswe igho ni-igha, “Yëë.” 20Ni-igho ërë, ko bhoora ghonswe igho ghano Waryobha yaaraghania okohetera ku-Yëësu Kiristo, na-agha obhoheene. Kiyö nkyo kekoghera toraghamba “Amina,” ko okoghera iya ökötöönia Waryobha. 21Mbe, Waryobha ono yatwahora, we akotokora toranagha ku-Yëësu Kiristo, bhëëtö hamwë na bhëënyu. 22Waryobha, we yaatomaameka umuhuri ughwaye, kora akatohaana Umwika Ömöhörëëru mo-senkoro isyëtö, abhe ekebhete ikya ghonswe igho ghano aretohaana.
23Tenaishirë Körintö iyö, ko bhoora ntatunanga munyahaareke mo-senkoro isyënyu. Ghayö nkoghamba no-bhoheene, kora Waryobha wonswe namanyirë igha, no-bhoheene nkobhatëëbhya. 24Ti-igha nkobhaaha törë umukumo ughwënyu, kasi bhëëtö na-bhaköri abha emeremo hamwë na bhëënyu, ko okoghera iya ukushomerwa ukwënyu, ko bhoora umukumo ughwënyu ghwanagha.
Currently Selected:
2 Abhakörintö 1: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.