2 Abhakörintö 11
11
Pauro na abhatomwa abharongo
1Nyakara mokaanyitëghërrëëyë hake igho, ko bhokangi ubhwane. Ndasabha bhamurë munyitegherre. 2Öni neena rihari reno rikurwa ku-Waryobha, ko bhoora monga kya umwisëkë intindë, ono naaghambera öbhökwë ku-mushaasha ömwë igho, ono akobherekerwa igha, Yëësu Kiristo. 3Kasi bhoono neena entarëki igha, kya bhono Hawa yaangʼainirwë na inshoka engʼaini eera, na bhëënyu bhonswe motakaangʼanwa, mutighe hayö okohansha Kiristo, kwa ubhwihöötu na kwa enkoro inshiiya. 4Ngambirë igho, ko bhoora igha, bhëënyu m-bangö mörë abha ukwikërrya amangʼana agha ömöntö ono akuusha okoraareka amangʼana agha Yëësu, ghano ghatarengʼaini na ghano twaabharaarëkëëyë. Ghwiki nkwikërrya mörë umwika uwöndëwöndë igho, handë amangʼana aghandë igho ghano ghatakorengerrania na ghano mwaaikërëëyi ekembere ukurwa kö-bhëëtö.
5Tenkokanya igha, öni m-moke ndë ko-bhayö bhakwikora igha, “M-batomwa abhanene.” 6Nokaanyoora nkomaahekana ndë igha, temanyirë okoghamba bhuuya hë, kasi obhomanyi ubhwane ubhwa amangʼana, m-bonene. Kiyö nkyo mwaarööshë bhuuya kö-bhëëtö, ahasë honswe igho, na senkaagha syonswe igho hano twaarë kö-bhëënyu hayö.
7Naaihöötirë kö-bhëënyu, ko okobharaarekera Amangʼana Amaiya agha Waryobha, ntabhasabhirë ehoorohooro, okore bhëënyu momaahekane igha, mmoona ubhwera obhonene. Bhoono hayö n-këbhë naakörrë? 8Enkaagha eno naakörrë emeremo kö-bhëënyu hayö, na-makanisa aghandë ngo ghaanhaheeneranga. Yaarenga kya hano naabharuusyanga ëbhëntö ibhyabho, okore mbatöörri bhëënyu. 9Enkaagha eno naarë na obhohabhë hano naarë kö-bhëënyu hayö, tenaritöhëëyë ömöntö wowonswe oora hë, ko bhoora abhakumya bharikyëtö bhano bhaaruurë Makedonia, mbaangʼaayë ëbhëntö bheno naatunanga. Nairebherranga, okore ntakaaritohera ömöntö wowonswe oora kö-bhëënyu, na kora ni-igho ndaaghëndërri okokora. 10Kya igho obhoheene ubhwa Yëësu Kiristo bhörë mu-öni, taaho ömöntö wowonswe oora uwa mo-mokowa ughwa Akaaya hayö, ono akotora okondebherra ntakaikumya ko engʼana iyö. 11Okoghamba ukwane igho, ensonga yaamo ti-igha tembahanshirë hë. Waryobha namanyirë kya bhono mbahanshirë.
12Nendaaghëndërri okokora kya igho nkokora, okore abhantö bhayö bhakwihasha, bhatakaanyoora umweya ughwa ukwihasha igha, nkokora bharë emeremo kya bhëëtö. 13Ko bhoora abhantö kya bhayö, m-batomwa abha obhorongo, nkokora bharë emeremo kwa ököngʼënërrya, nkwikora bharë igha, m-batomwa abha Yëësu Kiristo. 14Engʼana kya iyö ti-iya ököröghöörya hë, ko bhoora kora Oghosambwa, ughwene ghwonswe nkwikora ghörë igha, ngwo maraika uwa obhorabhu. 15Ku bhuyö te-ngʼana iya ököröghöörya hë, okomaaha abhaköri abha emeremo abhaaye, bharaikora igha, m-baköri abha emeremo abha heene. Kasi umuhiko ughwabho, ngorebhaingʼarra kya amangʼana aghaabho ghano bhakokora.
Pauro araikumirya inyanko iyaaye
16Nkobhatëëbhya ndë ghwiki igha, ömöntö atakaakanya igha, öni m-mokangi ndë. Hano moraakanye igha m-mokangi ndë, kasi munyikërri ko bhokangi ubhwane bhuyö, okore öni wonswe niikumi hake igho. 17Amangʼana ghano ndaaghambe agha ukwikumya, ti-igha Omonene we yaantëëbhëri igha ngaghambe, kasi nkoghaghamba ndë ko bhokangi ubhwane. 18Ko bhoora abhantö m-baaru bhakwikumirya amangʼana agha kinyamöbhërë, öni wonswe tigha niikumi. 19Ko bhono moona obhongʼaini, nkyo kekoghera morashomerwa ököghömërrya abhantö abhakangi. 20Moraghömërrya ömöntö ono akobhakora mobhe abhaghorwa, ömöntö ono akobheebhera kengʼainingʼaini igho, ono akobharuusya ëbhëntö, ono akwitöönia, moraghömërrya ömöntö ono akobhatema ku-bhusyö. 21Nkosooka ndë okoghamba igha, bhëëtö m-batëntëëru twaarë ko engʼana iyö!
Bhoono nkoghamba ndë kya omokangi igha, nyoore aaho ömöntö ono akwimaaha igha, naingʼarëëyë ukwikumirya engʼana yoyonswe eera, tigha ngambe kinyabhokangi igha, öni wonswe ningʼarëëyë ukwikumirya engʼana iyö.
22Nyoore abheene m-Baëbhuraania, öni wonswe m-Mwëbhuraania ndë. Nyoore m-Baisiraëri, öni wonswe m-Mwisiraëri ndë. Nyoore na-bhebhorwa Ibhurahimu,#11:22 Ibhurahimu. Maaha mo-faharaasa. öni wonswe nu-mwebhorwa Ibhurahimu ndë. 23Bhoono tigha ngambe kinyabhushuuru igha, nyoore abheene m-baköri abha emeremo abha Kiristo, öni nembahëtëërëëyë. Öni naakora omotono ughwa okokora emeremo okobhakera. Naatoorwa mo-kebhohe hare kaaru, naatemwa bhököngʼu imishariti, naahona ukukwa hare kaaru. 24Naatëmirwë na Abhayahudi mara kataano, ebhebhooko merongo etatö na kenda.#11:24 Ebhebhooko merongo etatö na kenda. Ko okorengʼaana na amaraghërryö agha Abhayahudi, hano ömöntö yaashibhibhwanga, tiyatemwanga ebhebhooko okoheteera merongo ene hë. Ku bhuyö, ubhushibhu bhono bhwaakorwanga mu-sinyumba isya esango iya Abhayahudi, mbwaarë ubhwa ebhebhooko merongo etatö na kenda igho. Maaha mo-ketabho ikya Eheetoko iya Etoraati 25:2-3. 25Naatëmirwë sinyimbo na Abharuumi hare katatö, naatëmirwë na amaghena kamwë, iryato ryasha okonsarekera ku-bhuribha hare katatö, naaikara ku-nyansha ubhutikö na omobhasö. 26Okoghenda kono naaghendanga ndaraareka engʼana iya Waryobha, nkwaarë na ibhiituurotuuro ibhyaru. Naanyöörrë inyanko iya ököhëtibhwa na imyoro, amajambaazi, inyanko ko-Bhayahudi bharikyane, inyanko ko-Bhakyaro. Naanyöörrë inyanko mu-mighi, inyanko mo-masisi, inyanko mu-nyansha, inyanko iya abhahiiri abharongo. 27Naakora emeremo ëmëköngʼu, na nkanyanka, inyanko iya ukwanga okoraara hare kaaru, inyanko iya okosengera na inyanko iya inyonta, naahika okobhorwa ibhyakorya hare kaaru, inyanko iya embeho na iya okobhorwa singibho. 28Hamwë na ghayö ghonswe igho, kasi nkuritoherwa ndë sinsikö syonswe igho, na emeremo ighya amakanisa ghonswe igho. 29Hano ömöntö abhaayë ömötëntëëru, öni wonswe nkobha ndë ömötëntëëru. Hano ömöntö yaghera murikyaye akore ëbhëbhë, öni wonswe nkwighwa ndë öbhörrö.
30Hano eraabhe igha ni-igha niikumi, nendaaikumiri amangʼana agha öbhötëntëëru ubhwane. 31Waryobha, Suwaabho Omonene uwëëtö Yëësu Kiristo, ono aingʼarëëyë ukukumibhwa amakora ghonswe igho, namanyirë igha tenkorongoha hë. 32Hano naarenga mu-mughi ghono ghokobherekerwa igha Damasiko, omotangati uwa omokowa, ono yaarë ko-bhokama ubhwa omokama Areta, yaarendanga umughi ughwa Damasiko ghuyö, okore bhangoote. 33Kasi abhantö nyabhorebhe, bhakanhëtërya mu-ridirisha irya ku-ndighi, ndëngë mo-kekapo ekenene, nkamoterroka.
Currently Selected:
2 Abhakörintö 11: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.