2 Abhakörintö 12
12
Pauro araimaaha igha m-mötëntëëru
1Ni-igha niikumi, nokaanyoora igha ti-bhuuya hë. Kasi nendaahekeere amamaaho ghano nkomaaha na obhohonyoro ubhwa amangʼana ukurwa ko-Monene. 2Mmanyirë Umukiristo ömwë, Umukiristo uyö, yöönyööywë ukughya ighörö iyö, imyoka ikömi na inye gheno ghyaaheta. Yaainyökiibhwi, akihikibhwa mu-ryobha irya katatö,#12:2 Mu-ryobha irya katatö. Ahasë hayö, ho Abhayahudi bhaaghambanga igha, ho Waryobha amënyirë. hanga yaainyökiibhwi arëngë mö-möbhërë ughwaye muyö, hanga yaaghëëyë igho atarëngë mö-möbhërë ughwaye muyö, Waryobha we amanyirë. Kasi öni temanyirë hë. 3Öni temanyirë nyoore ömöntö uyö yöönyööywë arëngë mö-möbhërë ughwaye, handë igha tiyaarë mö-möbhërë ughwaye muyö hë, Waryobha we amanyirë. Kasi keno mmanyirë ni-igha, ömöntö uyö 4yöönyööywë, akahika Paradiso.#12:4 Paradiso. Kare hayö iyö ni ibhusitaani iya omokama yaarë, ghwiki rekabha na ensonga iya ibhusitaani iya Ëdëëni. Kasi ko-nkaagha iya Pauro, ensonga iyaako yaarë igha, ahasë hano Waryobha amënyirë. Hano yaarë Paradiso iyö, akaighwa amangʼana ghano ömöntö ataatore okoghamba, amangʼana ghano ömöntö atakutunwa igha aghaghambe. 5Bhoono nendaaikumi ko okoghera iya ömöntö uyö, kasi te-ko okoghera iyaane öni umwene. Ëkëntö keno ndaaikumiri, nö-bhötëntëëru ubhwane. 6Kora hano okaanyöörrë ndatuna ukwikumya, tenkaabhaayë omokangi hë, ko bhoora no-bhoheene okaanyöörrë ndaghamba. Kasi nkwirebherra ndë, okore ömöntö wowonswe oora, atakaasha okomaaha igha, neena ubhwera okokera bhono bhakwighwa na bhono bhakomaaha.
7Naahaaywë inyanko kö-möbhërë ughwane, eno enga kya reehwa. Inyanko iyö, ni-iya umihiri uwa amangʼana uwa Oghosambwa, ono yaatömirwë anyanki, okore ntakaikumya bhököngʼu ko okoghera iya amangʼana ghayö nööröökiibhwi. 8Naasabhirë Omonene hare katatö, okore anduusiri-ho inyanko iyö. 9Kasi Omonene akantëëbhya igha, “Örööbhö urwane ndukwisirë, ko bhoora mö-bhötëntëëru muyö, mo obhotoro ubhwane bhokomaahwa.” Ku bhuyö nendaaikumi ku ukushomerwa bhököngʼu, ko okoghera iya öbhötëntëëru ubhwane, okore obhotoro ubhwa Yëësu Kiristo, bhobhe hamwë na öni. 10Ku bhuyö öbhötëntëëru ubhwane nkunshomera bhörë, hamwë na okotokwa, inyanko, amateeso, inyaanyi ko okoghera iya Kiristo, ko bhoora hano naabha ömötëntëëru, ho nkobha na singuru.
Entarëki iya Pauro ko-Bhakörintö
11Ngambirë igho kya omokangi, ko bhoora bhëënyu m-bëënyu möghërrë ngambirë kya omokangi. Ko bhoora yaarenga igha bhëënyu munkumi. Nokaanyoora igha tiningʼarëëyi hë, kasi öni te-moke ndë, okokera bhayö bhakwihasha igha, “M-batomwa abhanene.” 12Hano naarë kö-bhëënyu hayö, naaiyörökëri igha, m-motomwa ndë, ko bhoora naakörrë amakono, ebhemanyërryö na amangʼana agha ököröghöörya kö ököghömërrya kwonswe igho. 13Tekeeho ëkëntö keno naakora ko-makanisa aghandë, kasi nkanga okokekora kö-bhëënyu hayö. Nyoore eeho engʼana eno naabhasarëëyi, nu-kwanga okobharitohera. Nyoore bhuyö mbo obhoghogho ubhwane bhamurë, munyabhere.
14Motamaaha, nkwisëëmya ndë niishe iyö urwa katatö, kasi tembaritohere hë. Të-bhëntö ibhyënyu nkutuna hë, kasi m-bëënyu nkutuna. Ngambirë igho, ko bhoora igha, ta-bhaana igha mbo bhakobheeka ëbhëntö ko okoghera iya abhaibhöri abhaabho, kasi abhaibhöri mbo bhakobheeka ëbhëntö ko okoghera iya abhaana abhaabho. 15Öni nendaashomerwe ukuruusya ëbhëntö ibhyane, na ukwiruusya öni umwene, okore mbatöörri. Kasi bhoono, nkomaahekana ërë igha, enkaagha eno öni nköghëndërrya okobhahansha bhököngʼu, ho bhëënyu mukusuuhya righonshe iryënyu ku-öni.
16Öni tenabharitöhëëyë ko-ngʼana yoyonswe eera hë, kasi abhandë mö-bhëënyu muyö nkoghamba bharë igha, “Pauro mongʼaini, yaabhangʼënërrëëyi.” 17Bhoono m-bongʼaini naakörrë ubhwa okobharuusya kyokyonswe keera ko-bhantö bhano naatömirë bhaashe kö-bhëënyu hayö? 18Naasaasaamirë Tiito aashe kö-bhëënyu. Naatömirë umukumya murikyëtö aashe nawe hamwë kö-bhëënyu iyö. Tiito yaabharuusiri ëkëntö kyokyonswe keera? Kasi temokomaaha igha, öni na Tiito n-këntö këmwë törë ko okokora emeremo? Eteemo iyëëtö në-ëmwë.
19Kasi nkokanya mörë igha, nkwikoorerra törë kö-bhëënyu. Bhëëtö nkoghamba törë amangʼana ghano mbere iya Waryobha, ntoona öbhömwë na Kiristo. Amangʼana ghayö ghonswe igho tokokora, abhaghonshe abhëëtö, n-ko okoghera iya okobhatöörrya, okore monaghe ku-mukumo ughwënyu. 20Bhoono nkoobhoha ndë igha, ndatora ukuusha, nyoore morakora amangʼana ghano ghatakunshomera. Engʼana kya iyö eratora okokora mbakorre engʼana eno etaabhashomere. Ndatora ukunyoora morabheehana, moona rikenge, okorerrana, okokora ikisiiyomba, okohaamërrania, obhoghambi ubhwa abhantö, ubhwihëëmi, na riihë. 21Ghwiki nkoobhoha ndë igha, hano ndiisha, Waryobha nareghera nsooke kö-bhëënyu. Ndebhaabhayera hano ndemaaha abhantö abhaaru, bhano bhaakora ëbhëbhë mö-bhëënyu, tebhakaahöngööyë ëbhëbhë ibhyabho hë. Kasi mbakeena amangʼana aghaabho amaghogho ghaara agha obhosooraare, na amangʼana aghandë agha sënsöni ghano bhaarë nagho ukurwa kare.
Currently Selected:
2 Abhakörintö 12: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.