2 Abhakörintö 4
4
Öbhöbhömbi na öbhötëntëëru ubhwa ëbhëntö
1Mbe, ko bhono Waryobha atohaayë emeremo gheno ku ikyabhera ikyaye, titukukwa omotwe hë. 2Bhëëtö twanga amangʼana agha ubhubhise na agha sënsöni, kora tetokokora amangʼana agha öbhöngënërrya, handë ukwishooghania engʼana iya Waryobha na obhorongo. Kasi keno tokokora, no-koraareka obhoheene harabhurabhu igho, okore abhantö bhonswe igho, bhatomanye mo-maitegherro aghaabho igha, na-bhantö abha heene törë ku-Waryobha. 3Mbe, hano oraanyoore igha, Amangʼana Amaiya ghano tokoraareka ngakundikiiyi ikikundikiryö, ngakundikiiyi ko bhano bhakusira. 4Amangʼana Amaiya teghakomanyekana ko-bhantö bhayö, ko bhoora Oghosambwa, oghokama ughwa ekebhara keno, ghoroghaini emetwe ighya abhantö bhano bhatakukumya. Nkyo kekoghera bhatakomaaha obhorabhu ubhwa Amangʼana Amaiya agha emerengaari ighya Yëësu Kiristo, uyö we ituubho iya Waryobha. 5Bhëëtö ta-mangʼana aghëëtö tokoraareka hë, kasi na-agha Yëësu Kiristo igha m-Monene, na bhëëtö na-bhaköri abha emeremo abhëënyu törë, ko okoghera iya Yëësu Kiristo. 6Waryobha ono yaaghambirë igha, “Obhorabhu bhömërëki ukurwa mu-kisuntë,”#4:6 Maaha mo-ketabho ikya Okosemoka 1:3. we uyöuyö akömërëkya mo-senkoro isyëtö, okore atohaane obhorabhu ubhwa obhomanyi ubhwa emerengaari ighya Waryobha gheno ghëkömërëkya ku-bhusyö ubhwa Yëësu Kiristo.
7Bhëëtö bhano toona emongo iyö, ntonga kya ëbhëntö bheno bhyaabhombwa ukurwa ku-rirobha. Ku bhuyö emanyekane igha, obhotoro ubhwa ököröghöörya bhono toonabho, nku-Waryobha bhukurwa, tu-bhwëtö hë. 8Nkunyanka törë kera ahasë, kasi tetokokerwa hë. Torahaha, kasi titukukwa emetwe hë. 9Nkoteeswa törë, kasi Waryobha hamwë arë na bhëëtö. Nkotemwa törë hansë, kasi titukusikibhwa hë. 10Bhëëtö nkaagha syonswe igho, mu-nyanko iya ukwitwa törë, kya bhono Yëësu yaaitirwë, okore öbhöhöru ubhwa Yëësu bhwonswe, bhomaahekane kö-mëbhërë ighyëtö. 11Ku bhuyö bhëëtö bhano tokeheeshera, nkoghenda törë na uruku nkaagha syonswe igho ko okoghera iya Yëësu Kiristo, okore öbhöhöru ubhwa Yëësu Kiristo bhomaahekane kö-mëbhërë ighyëtö gheno ghikukwa. 12Mbe, bhoono ni-igha, bhëëtö nkoghenda törë na uruku, kasi bhëënyu, nö-bhöhöru mukunyoora.
13Amaandeko Amahörëëru gharaghamba igha, “Naakumiri, nkyo kyaaghërrë nkaraareka.”#4:13 Maaha mo-ketabho ikya Zabhuri 116:10. Na bhëëtö bhonswe nkukumya törë, nkyo kekoghera toraraareka. 14Nkoghamba törë igho, ko bhoora ntomanyirë igha, Waryobha ono yaaryökya Omonene uwëëtö Yëësu Kiristo, na bhëëtö bhonswe narituryökya ighoigho, bhëëtö na bhëënyu bhonswe igho, naretokora tobhe hamwë na Yëësu Kiristo mbere iya Waryobha. 15Inyanko yonswe igho eno tukunyoora, n-ko okoghera iya bhëënyu, okore örööbhö urwa Waryobha, rwaruhe na okohekeera abhantö abhaaru, kora abhantö bhayö bhakumi bhököngʼu Waryobha na ökömötöönia.
Ubhuhika ubhwa amakora ghonswe igho
16Mbe, kiyö nkyo kekoghera totakukwa emetwe, nokaanyoora ëmëbhërë ighyëtö gheno nkughunda ghërë, kasi senkoro isyëtö, nkokorwa sërë bhohya sinsikö syonswe igho. 17Nkoghamba ndë igho, ko bhoora igha, inyanko iyëëtö ëhöhö eno, iya ribhagha ike igho, nkotoreetera ërë ubhuhika obhonene bhököngʼu ubhwa amakora ghonswe igho. 18Ku bhuyö, totakaamaaherra ëbhëntö bheno bhekomaahekana ko-maiso, kasi tomaaherre bheno bhetakomaahekana. Bheno bhekomaahekana, m-bya ibhagha ike igho, kasi bheno bhetakomaahekana, m-bya amakora ghonswe igho.
Currently Selected:
2 Abhakörintö 4: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.