2 Abhakörintö 6
6
1Mbe, ko bhono tokokora emeremo hamwë na Waryobha, ku bhuyö nkobhasaasaama törë igha, örööbhö urwa Waryobha rono mwanyoora, rotakaaheta bhosa. 2Ngambirë igho ko bhoora, Waryobha nkoghamba arë mo-Maandeko Amahörëëru igha,
“Naakwighwërëëyë ko-nkaagha inshiiya,
naakötöörri ku-rusikö urwa ökötööribhwa.”#6:2 Maaha mo-ketabho ikya Isaaya 49:8.
Itegherra mbe wighwe igha, eno yo enkaagha inshiiya, kora ndwo urusikö urwa ökötööribhwa.
Ököghömërrya ko-meremo ighya Waryobha
3Tetokokorra ömöntö wowonswe igho engʼana yoyonswe iya ukumutimba, okore emeremo ighyëtö, ghetakaaghambwa bhoghogho. 4Kasi nkwörökya törë abhantö ko amangʼana ghonswe igho igha, bhëëtö, m-baköri abha emeremo abha Waryobha törë. Nkokora törë igho, kö ököghömërrya bhököngʼu, amateeso na inyaanyi, na amangʼana amaköngʼu. 5Bhëëtö nkotemwa törë, nkobhohwa törë mo-kebhohe, nkokorrwa törë riihë, toona inyanko iya emeremo ëmëköngʼu, umweko, kora titukunyoora tero hë. 6Bhëëtö m-bantö abha heene törë, m-bamanyi abha amangʼana törë, m-baghömërrya törë, kora m-basërëënia törë. Nkokora törë amangʼana ghayö, ko okotangatwa na Umwika Ömöhörëëru, na righonshe reno retaana ubhwiköri, 7na ko okoraareka engʼana iya obhoheene. Nkokora törë amangʼana ghayö, ko obhotoro ubhwa Waryobha, ko okohetera ku-bhyöghë ibhyëtö ibhya obhoheene, ibhya okorekera na ibhya ukwikengerrya. 8Bhëëtö twamara ukwiruusya igha, abhantö mbakaatosooka, handë bhatosere, mbakaatoghamba bhuuya, handë bhatoghambe bhoghogho, te-ngʼana hë. Nkomaahekana törë igha m-barongo törë, kasi no-bhoheene tokoghamba. 9Ntörëngë kya bhano bhatamanyekaini, kasi ntomanyekaini bhököngʼu. Nkoghendania törë na uruku, kasi m-bahöru törë. Nkotemwa törë, kasi tetoraakwa hë. 10Ntörëngë kya abhantö bhano bhabhaabhayëëyë, kasi nkushomerwa törë sinsikö syonswe igho. Ntonga kya abhatöbhu, kasi m-baaru tukwamëhya. Ntörëngë kya bhano totaana ëkëntö, kasi ëbhëntö bhyonswe igho, ntoonabhyo.
11Bhare Abhakörintö, tobharaghërrëëyi bhuuya, ku righonshe rinene, kora tetobhabhisirë ngʼana hë. 12Righonshe iryëtö kö-bhëënyu, terekorebherrwa hë. Kasi bhëënyu, m-bëënyu mwaarebherra righonshe iryënyu kö-bhëëtö. 13Bhoono nkushumaasha ndë na bhëënyu kya ono nkushumaasha na abhaana abhaane, ndabhatëëbhya igha, mobhe na righonshe rinene kö-bhëëtö, kya bhono bhëëtö toona righonshe rinene kö-bhëënyu.
Okoghootana na abhantö bhano bhatarëngë abhakumya
14Motakaaghootana na abhantö bhano bhatarëngë abhakumya. Mwaakarööshë igha, obhoheene na öbhötëëyu bherarengerrania? Handë obhorabhu na ikisuntë bheraikarana hamwë? 15Ghwiki m-bwighwerrani kë bhooho, ku-Kiristo na Bheriari?#6:15 Bheriari. Ensonga iyaamo ni-igha, Oghosambwa. Maaha mo-faharaasa engʼana, Oghosambwa. M-bömwë kë bhooho ku umukumya na ono atakukumya? 16M-borengerrania kë bhooho, inyumba iya Waryobha#6:16a Inyumba iya Waryobha. Maaha mo-faharaasa. na ëbhëtöndö? Bhëëtö mbo inyumba iya Waryobha ömöhöru!#6:16b Maaha mo-ketabho ikya 1 Abhakörintö 3:16; Abhaëfësö 2:20-21. N-kya bhoora Waryobha yaaghambirë igha,
“Nendaabhenga ghatë iyaabho, ndaghenda hamwë nabho.
Nendaabhe Waryobha uwaabho, na abheene bhonswe mbaraabhe abhantö abhaane.”#6:16c Maaha mo-ketabho ikya Amangʼana agha Abharaawi 26:12; Yeremia 32:38; Ezekieri 37:27.
17Ku bhuyö Omonene Waryobha yaaghambirë igha,
“Murwe mo-bhantö bhayö, mwitashe hare nabho.
Motakaakunia ëkëntö ikinyanku,
hayö bhoono ho ndaabhasërëëni.#6:17 Maaha mo-ketabho ikya Isaaya 52:11; Ezekieri 20:34, 41.
18Kora nendaabhe Suwëënyu,
na bhëënyu moraabhe abhaana abhaane, abha ikishaasha na abha ekekari.
Ni-igho Omonene Waryobha uwa obhotoro bhwonswe igho akoghamba.”#6:18 Maaha mo-ketabho ikya 2 Samwëri 7:14; 1 Amangʼana agha Senkaagha 17:13.
Currently Selected:
2 Abhakörintö 6: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.