2 Abhakörintö 7
7
1Mbe, abhaghonshe abhaane, ko bhono mokomaaha igha m-maaru ghano Waryobha yaatoraghania, ku bhuyö ni-igha twisaabhuure, tutighane na ubhunyanku#7:1 Ubhunyanku. Maaha mo-faharaasa engʼana, Ubhwikööni na ubhunyanku. bhwonswe igho, ubhwa kinyamöbhërë na kinyamwika. Tobhe abhahörëëru ko-nshera iya okosooka Waryobha.
Ukushomerwa ukwa Pauro
2Motohaane umweya mo-senkoro isyënyu, ko bhoora titwasarrya ömöntö wowonswe oora hë, taaho ono twaanyahaara ko engʼana nyabhorebhe, handë okomongʼaina. 3Tenkoghamba amangʼana ghayö, ko okobhabhotorra ikiina igha bhëënyu, m-baghogho mörë, a a, ko bhoora nengambirë ekembere hayö igha, bhëënyu mmo-senkoro isyëtö mörë, n-hamwë törë na bhëënyu nekaabha igha nu-ruku handë öbhöhöru. 4Neena obhokarë ubhwa ukushumaasha na bhëënyu, kora nkwihasha ndë ko okoghera iya bhëënyu ko bhoora möndöörësëri bhököngʼu. Nokaanyoora mu-nyanko törë, kasi bhoono nshömëëywë bhököngʼu.
5Kora enkaagha eno twaahikirë Makedonia haara, tetwanyöörrë umweya ughwa ukumuunya hë, ntwaarenga na inyanko kera ahasë. Kebhara, n-diihë ryaare-yo, mo-senkoro isyëtö, ntwaarenga na entarëki. 6Kasi Waryobha ömöröörësya uwa bhano bhabhaabhayëëyë, yaatohaayë singuru hano Tiito yaaishirë. 7Ti-igha ntwaashömëëywë ku ukuusha ukwa Tiito ukwene igho, kasi na kya igho mwaamöröörësëri. Yaatötëëbhëri kya bhono mukwighomba okommaaha, na kya bhono mokobhaabhayera, na omotono ughwënyu ghono moonagho ko okoghera iya öni. Ghayö ngo ghakörrë nshömëëywë bhököngʼu.
8Nokaanyoora ritashandighi iryane ryaaghërrë mokabhaabhayera, kasi tenkomaaha igha, m-boghogho naakörrë hë. Eeho enkaagha nyabhorebhe nke igho, eno naaighuurë bhobhogho mo-nkoro iyaane igha, ritashandighi riyö, ryaaghërrë mokabhaabhayera, kasi kwa nkaagha enke igho. 9Bhoono nshömëëywë, ti-igha n-ko okoghera iya bhono mwaabhaabhayëëyë, a a, kasi n-ko bhono igha, okobhaabhayera ukwënyu, kwaaghërrë mokahongora obhoghogho ubhwënyu. Temwabhaabhayëëyë ko okoghera iya ritashandighi reno twaabhandëkëëyë, kasi mwaabhaabhayëëyë ko okoghera iya keno Waryobha yaatunanga kebhe. Ku bhuyö bhëëtö, tetwabhanyahaarrë ko enshera yoyonswe eera hë 10Okobhaabhayera kono Waryobha akutuna, n-kono kokoreeta öbhöhöngöri ubhwa ëbhëbhë. Okohongora ëbhëbhë kya kuyö, të-këntö ikya ukwighwera obhoghogho hë, ko bhoora nkoreeta körë öbhöhönia. Kasi okobhaabhayera ukwa ko-kebhara kono, kuyö nu-ruku kokoreeta. 11Maaha! Okobhaabhayera kono kokoreeta keno Waryobha akutuna, kobhahaayë ehoorohooro enene. Okobhaabhayera kuyö, köghërrë mobhaayë na omotono ughwa okokora ghano ghakutunwa, na ukwikoorerra ko ghano mokokora, igha na-agha obhoheene. Okobhaabhayera kuyö, kobhakörrë mörëghirë amangʼana amaghogho, mösöökirë Waryobha, mobhaayë na amaigha agha okommaaha, na okomaaha igha, ömöntö uyö yaasarya, arashibhibhwa. Ko amangʼana ghayö ghonswe igho, momaahekaini igha, temoona isoro ryoryonswe reera ko amangʼana ghayö.
12Mbe, nokaanyoora igha naabhandëkëëyë ritashandighi reera, kasi tenaandëkirë ko okoghera iya oora yaasarri, handë ko okoghera iya oora yaakörëëywë bhoghogho. Kasi naatunanga mbahonyorre momaahe bhëënyu abheene kya igho mukwiruusya mbere iya Waryobha, ko okoghera iya bhëëtö. 13Ku bhuyö, möghërrë tushömëëywë. Ghwiki ntwaashömëëywë bhököngʼu, hano twaarööshë Tiito ashömëëywë, ko bhoora m-bëënyu mwaaghërrë akashomerwa mo-nkoro iyaaye. 14Nyoore naaihëëmëëyë Tiito ko engʼana yoyonswe eera ko okoghera iya bhëënyu, temwansöökëri hë, kasi kera engʼana eno twaamötëëbhëri ko amangʼana aghëënyu, n-ya heene yaarë. Mbe, ku bhuyö ukwiheema ukwëtö ku-Tiito ko okoghera iya bhëënyu, n-kwa heene kwaarë. 15Righonshe irya Tiito kö-bhëënyu, ni-nene, ekenene n-hano yaahiita bhono mwaamwighweranga, na kya igho mwaamösërëënëri, kwa okoobhoha na ukurighita. 16Bhoono öni, nshömëëywë, ko bhoora nkobheesegha ko amangʼana ghonswe igho.
Currently Selected:
2 Abhakörintö 7: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.