Amangʼana agha Abhatomwa 26
26
Pauro araikoorerra ko-Aghiripa
1Ho, Aghiripa yaatëëbhëri Pauro igha, “Ohaaywë umweya ughwa ukwikoorerra.”
Ku bhuyö Pauro akainyökya okobhoko, akaikoorerra igha, 2“Ore Omokama Aghiripa, öni nkomaaha ndë igha, iryobha iryane ni-nene, ko bhono nnyöörrë umweya ughwa ukwikoorerra ku-uwe hano, ko-mangʼana ghonswe igho ghano Abhayahudi bhakunshongera. 3Ekenene ni-igha, uwe nomanyirë bhuuya seteemo isya Abhayahudi, na amangʼana aghaabho ghonswe igho. Ku bhuyö ndakosabha öghömërri, unyitegherre bhuuya.
4“Abhayahudi bhonswe igho mbamanyirë bhuuya eteemo iyaane, ukurwa nkërëngë moke mu-kyaro ikyane, na enkaagha eno naamënyirë Yërusarëëmu. 5Ko bhoora mbammanyirë ukurwa kare, hano bharaahanshe, bharatora okoghamba obhoheene igha, m-Mofarisaayo naarë, rikomo iriiya irya idiini iyëëtö. 6Keno kekoghera ndaimërribhwa hano reero okobhotorrwa ikiina, nu-bhweseghe ubhwa okohekerana ukwa engʼana eno Waryobha yaaraghaini abhakörö abhëëtö. 7Riraghaniö riyö irya ukuusha ukwa Kiristo, ndyo amakabhira aghëëtö ghonswe igho ikömi na abhërë ghakwitengʼera igha nderebha. Kiyö nkyo kekoghera bharasaasaama Waryobha ko motono ubhutikö na omobhasö. Ore omokama Aghiripa, engʼana iyö, yo ikibhuno ikya Abhayahudi ukunshongera ku-uwe hano! 8Kana, n-kwakë mukwanga ukukumya igha Waryobha nkuryökya arë abhaku?
9“Kora öni wonswe naakanyanga igha, ni-igha nkore omotono ughwa okorebherra iriina irya Yëësu uwa Nazarëëti. 10Amangʼana ghayö ngo naakörrë Yërusarëëmu haara. Naahaaywë ubhwera na abhanene abha abhasëngëri, ku bhuyö nkaghoota abhantö abhaaru abha Waryobha, nkabhatoora mo-kebhohe. Abhandë bhano bhaabhotorrwanga ibhiina igha bhaitwe, öni wonswe mo-bhabhötöri abha ibhiina bhiyö naarë. 11M-mara kaaru naabhashibhyanga mu-sinyumba isya esango iya Abhayahudi. Naabhabhandërryanga igha, bhatoke Yëësu. Nkabharererra bhököngʼu, nkabha ndabhaghwema kora mu-mighi ighya ibhyaro ibhyëndë.
Pauro araghamba kya bhono yaasyöriibhwi
(Amangʼana agha Abhatomwa 9:1-19, 22:6-16)
12“Mbe, urusikö nyabhorebhe, naarenga ko-nshera ndaghya Damasiko, okanyoora abhanene abha abhasëngëri bhaangʼaayë ubhwera na amaraghërryö. 13Uriighwa ore omokama, hano omobhasö ghwaahikirë entemekera, kamwë igho, nkamaaha emerengaari ëmërörö kai, okokera ighya iryobha, gherarwera mu-ryobha. Emerengaari ghiyö, ghekammërëkërya ahasë honswe igho. 14Tokaghwa hansë bhonswe igho. Nkaighwa engamba eramberekera ku-Kiëbhuraania, ekamböörya igha, ‘Sauri! Sauri! N-kwakë ukunnyankya igho? Tokomaaha igha nkunyahaareka örë bhosa! Bhoono heene notora okorebherra Waryobha? Obhaayë kya ömöntö ono akwikarra öbhööghë ubhwa ritimö?’
15“Nkabhöörya igha, ‘Kana Omonene, nu-uwe wë?’
“Akahonshora igha, ‘Nö-öni Yëësu, ono ukunyankya. 16Kasi bhoono emoka, wemerre! Ko bhono ikibhuno ikya okokobhooshokera ni-igha, nkokore ömököri uwaane uwa emeremo. Noraabhe umwimërërri uwa amangʼana ghayö örööshë, na ghano ndekohonyorra. 17Nendaakötööringa mo-Bhayahudi na mo-Bhakyaro bhano nkokotoma-mo. 18Okore obharamöki bharwe mu-kisuntë, bhaghi ko-bhorabhu. Bharwe mo-mabhoko agha Oghosambwa, bhaghi ku-Waryobha. Hayö ho bhoono bhaabherwe ëbhëbhë ibhyabho, okohetera ku-mukumo ughwabho ku-öni. Bhabhe hamwë na abhantö abha Waryobha bhonswe igho bhano bhasaabhuurwa.’
19“Ku bhuyö, ore Omokama Aghiripa, öni nkakora kya igho naatëëbhiibhwi ukurwa mu-ryobha. 20Nkasimya ukwëghya abhantö abha Damasiko, nkaghya Yërusarëëmu, hano nkomara hayö, nkaghya Yudea na ko-Bhakyaro bhonswe. Bhonswe igho bhayö, naabhatëëbhyanga igha, bhahongore ëbhëbhë ibhyabho, bhabhe abhantö abha Waryobha. Bhakorenga amangʼana amaiya agha ukwörökya igha, bhahöngööyë ëbhëbhë ibhyabho. 21Amangʼana ghayö ngo ghaabhaayë ikibhuno ikya Abhayahudi okongoota mo-bhogho ubhwa risengerro irya Waryobha, bhakatuna igha bhaanyite. 22Kasi ko bhono Waryobha nköntöörrya akërë, nkyo kekoghera ndaimererra amangʼana aghaaye ko bhonswe igho, abhanene na abhake. Te-mangʼana aghandë ghaaho hë. Kasi n-gaaraghaara abharööti bhaana Mosa bhaaghambirë igha, ngarebha. Ngo öni wonswe nkoghamba, 23igha Kiristo nakaatëësirwë, atangate ukuryoka ukurwa mo-bhaku, okore araareke amangʼana agha Obhokama ubhwa Waryobha ko-Bhayahudi na ko-Bhakyaro.”
Pauro aratuna igha Aghiripa akumi Yëësu
24Mbe, hano Pauro yaaikorerranga, Fesito akamobhasha igha, “Kana Pauro, okosoma ukwaho bhököngʼu kono waasoma, nkwakushuurya!”
25Pauro akamohonshora igha, “Ore Omosookwa Fesito, öni ti-mushuuru ndë hë. Kasi amangʼana ghano nkoghamba, n-ga bhoheene, te-gha eketwe hë. 26Nkoghamba ndë neena ubhweseghe igha, amangʼana ghayö ghonswe igho, Omokama Aghiripa naghamanyirë bhuuya, ko bhoora amangʼana ghano te-gha bhubhise hë, harabhurabhu igho ghaakorrwa. 27Ore Omokama Aghiripa, orakumya amangʼana ghonswe igho ghano abharööti bhaaghambirë? Öni nemanyirë igha, nkoghakumya örë.”
28Aghiripa akamohonshora igha, “Nkokanya örë igha Pauro, notora okonkora Umukiristo ko-mangʼana amake kya ghayö?”
29Pauro akamohonshora igha, “Nkosaasaama ndë Waryobha igha, m-bono bhonswe ekaabha, ebhe igha kwa amangʼana amaaru handë make igho, tu-uwe umwene igho hë, kasi bhonswe igho bhano bhakunyitegherra hano bhoono igho, bhabhe kya bhono ndë, kasi bhatakaabhohwa ebheraangʼani kya bheno.”
30Mbe, omokama uyö na ömötöngi Fesito, Bherinike, bhaana abhandë bhayö bhonswe igho waanyöörrë bhaikaayë hayö, bhakeemoka. 31Hano bhaatanööyë ukurwa hayö, bhakatëëbhania igha, “Ömöntö ono taana risoro irya okoghera aitwe, handë abhohwe.”
32Aghiripa akatëëbhya Fesito igha, “Singa ömöntö ono ataasabhirë igha ikiina ikyaye kekorwe na Kaisaari, nakaahaatëëywë.”
Currently Selected:
Amangʼana agha Abhatomwa 26: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
