Amangʼana agha Abhatomwa 27
27
Pauro arahirwa Ruumi
1Mbe, hano ikiina kyaabhötööywë igha turiine iryato toghende mu-kyaro ikya Itaaria, Pauro na abhabhohe abhandë bhakatoorwa mo-mabhoko agha Yuriyo. Yuriyo uyö, we yaarë omonene uwa ritabhë irya abhasirikare righana imwë reno ryaabherekerwanga igha, rikomo irya Kaisaari Aughusto. 2Tokariina mu-ryato reno ryaarwërëëyë mu-mughi ghono ghwaabherekerwanga igha Adiramitiyo, reno ryaaghyanga mo-bheghobho ibhya ikyaro ikya Asia Enke. Hano twaaruurë hayö, hamwë twaarë na Arisitariko uwa Tësarönikë. Tësarönikë nu-mughi ghono ghörëngë mu-kyaro ikya Makedonia.
3Nyinkyo yaako, tokaghobha ko-keghobho ikya mu-mughi ghono ghwaabherekerwanga igha Siidööni. Yuriyo akakorra Pauro öbhöntö ubhwa heene, ko okomohaana umweya amaahane na abhasaani abhaaye, okore bhamusumi-ko ëbhëntö bheno yaarë na obhohabhë nabhyo. 4Hano twaaruurë Siidööni, tokaiharreka righinga irya Kiipuro, ko bhoora rikama rirörö kai ryaarwërëëyë iyö twaabhatanga. 5Tokaamboka inyansha, ukurwa orobhareka urwa ikyaro ikya Kirikia bheena ikya Pamfiria, tokahika mu-mughi ghono ghwaabherekerwanga igha Mira, ku-kyaro ikya Rikia. 6Hayö omonene uwa abhasirikare uyö, akanyoora-ho iryato irya mu-mughi ughwa Arekisandiria reno ryaaghyanga Itaaria, akaturiinia-mo.
7Tokamara sinsikö sinsharu törëngë mu-ryato, oroghendo nu-urwa inyanko rwaarë rwa ngʼorangʼora igho, tokakamba tokahika haangʼë na umughi ghono ghwaabherekerwanga igha Nido. Hayö rikama rirörö kai rekatorebherra, totakaaheta hano twaatunanga okohetera. Rikama riyö rekaghera tokaiharreka righinga irya Kerete, haangʼë na omosoka ughwa umughi ughwa Saarimööni. 8Tokaiharreka kwa inyanko igho, tokahika ahasë hano haabherekerwanga igha Ebheghobho Ibhiiya, haangʼë na umughi ghono ghwaabherekerwanga igha Raseya.
9Mbe, rekaheta ribhagha irya sinsikö sinsharu tökërëngë ko-roghendo kuyö, kora waanyöörrë inyangi iya ukwisasa ibhyakorya bhoono ëhëtirë. Ekamaahekana igha nyoore ntöghëndërrya na oroghendo ruyö, ntunyoora inyanko bhököngʼu. Ku bhuyö Pauro akaraghërrya abhanene abha abhasirikare igha, 10“Bhëënyu bhare abhaghaaka, ndööshë igha oroghendo urwëtö rono, ndötöhaana inyanko enene. Iryato reno hamwë na imirigho ighyaryo, bhyonswe igho mberaaghwererre mu-nyansha. Kora bhëëtö bhonswe igho, taaho möntö araahone hë.”
11Kasi omonene uwa abhasirikare uyö, tiyaikërëëyi obhoghambi ubhwa Pauro, akamaaha igha, te-ngʼana hë. Ku bhuyö akaghoota-ko amangʼana agha ömöghöbhya uwa iryato, na agha mwene ryato riyö. 12Ekeghobho kiyö, ti-kiiya kyaarë hë, ko-nkaagha iya embeho. Ku bhuyö ekaghera abhantö abhaaru mu-ryato riyö, bhaikërërrani igha, bhaghëndërri na oroghendo hanga bhakaatöörrë ukuhika mo-keghobho ikya Föinikë keno kërëngë, kwi-ghinga irya Kerete. Ekeghobho kiyö, kemaaherraini na sembareka isya syömya na nyansha, ghöösi na nyansha, ku bhuyö mbakaaikaayë iyö, okohekera hano ribhagha irya embeho rekaahëtirë.
Rikama reranyankya bhaabho Pauro ku-nyansha
13Mbe, rikama iriiya reno ryaarwërëëyë syömya, rekahuuta, rekaghera abhaghöbhya bhakakanya igha, bhanyöörrë enshera iya ököghëndërrya na oroghendo urwabho ruyö, kya bhono bhaatunanga. Ku bhuyö bhakariinia insika iya iryato. Bhakatanora ukurwa hayö, bhakaghya, bhakaiharreka ko-morambo ughwa righinga irya Kerete. 14Mbe, hake igho, rikama irya omosoke rirörö kai rekahuusha. Rikama riyö ryaabherekerwanga igha, Eurakiro. 15Rikama rirörö kai riyö rekaitema iryato, ko bhoora totaatörrë ukukinana naryo, tokatigha, rekatuhira ghatëghatë iya inyansha.
16Tokaheta nyuma iya akaghinga akake kano kaabherekerwanga igha Kauda. Kakatorebherra-ko hake igho rikama riyö. Tokatora kwa inyanko okobhoha sinsiri ko-kaato akake aka ökötöörrya abhantö. 17Hano abhaghöbhya bhaamarrë ukuruta akaato akake kayö, bhakakatoora mu-ryato iryabho, bhakainaarya sinsiri iryato ryonswe igho, bhakarebhoha, bhakarenaghya. Bhoobhohanga igha, mbaihaghya mu-risense irya ko-morambo ughwa ikyaro ikya Ribhiya. Entarëki iyö, yo yaaghërrë bhakatembora amatanga agha iryato riyö, bhakatigha rihirwe iyö rikuhirwa na rikama.
18Omosoke ghokaghëndërrya ukuhuusha. Ku bhuyö nyinkyo yaako, abhaghöbhya bhakatabhuta imirigho mu-nyansha. 19Urusikö urwa katatö, bhakaghegha ëbhëntö ibhya iryato, bhakabhetabhuta mu-nyansha na amabhoko aghaabho abheene. 20Sekaheta sinsikö sinsharu, totakomaaha iryobha handë sinyota. Omosoke ghokaghëndërrya kuhuuta bhököngʼu, kora tokakwa emetwe igha ntohona.
21Twaamarrë sinsikö sinsharu ku-nyansha kuyö, totakorya ëkëntö kyokyonswe keera. Pauro akabhaimerra-mo ghatë, akatëëbhya abhaghöbhya igha, “Bhëënyu singa mwaanyighwërëëyë enkaagha eno naabharaghërrëëyi igha totakaarwa Kerete haara, ëbhëntö ibhyënyu tebhekaasarëkirë handë ukusira hë. 22Kasi bhoono ndabharaghërrya igha, motereme mo-senkoro isyënyu, ko bhoora taaho ömöntö kora ömwë, ono araakwe, kasi ni-ryato reno ndyo retaahone.
23“Nkobhatëëbhya ndë igho, ko bhoora Waryobha uwaane ono nkokorra emeremo, yaarë atömirë maraika uwaaye, akambooshokera ubhutikö ubhwa reero. 24Akantëëbhya igha, ‘Pauro uwe, otakoobhoha! Ko bhoora ni-igha wemerre mbere iya Kaisaari. Na omanye bhuuya igha, bhano bhonswe igho onabho ko-roghendo rono, Waryobha naraabhatööri kö örööbhö urwaye.’ 25Ku bhuyö keno nkobhatëëbhya ni-igha, motakaakwa emetwe, öni nkukumya ndë Waryobha igha, ghayö antëëbhëri, ngo gharaabhe. 26Kasi ni-igha, ntoraaihaghi kwi-ghinga nyabhorebhe.”
Pauro na bharikyaye bharahona ku-nyansha
27Hano ubhutikö ubhwa urusikö urwa ikömi na kane rwaahikirë, okanyoora tuhuniibhwi na omosoke ukughya hasë honswe hano ghwaaghyanga ku-nyansha iyö yaabherekerwanga igha Adiria. Mu-bhutikö ghatë, abhaghöbhya bhakakanya igha tuhikirë haangʼë na omorambo. 28Ku bhuyö bhakarenga mo-manshë ekerengo, bhakanyoora igha m-makubha merongo ëbhërë ukuhika hansë. Bhakasuntara mbere hake igho, ghwiki bhakarëngya ekerengo kiyökiyö, bhakanyoora igha m-makubha ikömi na ataano. 29Bhakoobhoha igha, iryato ndekaaitëmirë ko-marengo. Ku bhuyö ekaghera bharekere sinsika inye mo-manshë, nyuma iya iryato. Bhakasabha igha bhwangohe okokya.
30Mbe, abhaghöbhya bhakatuna okotoroka bhatighe hayö iryato. Ku bhuyö bhakaikya mo-manshë akaato akake aka ökötöörrya abhantö, bhakaikörya kya bhano bhakutuna okorekera sinsika orobhareka urwa mbere iya iryato. 31Kasi Pauro akatëëbhya omonene uwa abhasirikare uyö bhaana abhasirikare abhaaye igha, “Hano abhaghöbhya bhayö bhataatighare hamwë na bhëëtö mu-ryato mono, momanye igha, temohone hë.” 32Ku bhuyö abhasirikare bhayö, bhakabhotora sinsiri seno Syaarenga sëbhöhirë akaato kayö, bhakakatigha katoobhetoobhe ku-nyansha.
33Mbe, hano öröghörö rwaasambirë, Pauro akatërëmya bharikyaye bhayö bhonswe igho, ko okobhatëëbhya igha, “Mwamarrë sinsikö ikömi na inye, motakomeena ëkëntö kyokyonswe igho. 34Ku bhuyö ndabhasaasaama moraaghere ibhyakorya, okore möghëndërri okobha abhahöru. Ko bhoora igha, kora urutuukya urwa ko-metwe ighyënyu tiruusire hë.”
35Mbe, hano Pauro yaamarrë okoghamba igho, akaghegha omokaate, akakumya Waryobha mbere iya bhayö bhonswe igho, akaghobhotora, akasimya okorya. 36Hayö ho senkoro isya abhantö bhayö bhonswe igho syaatërëmirë, abheene bhonswe bhakarya ibhyakorya. 37Abhantö bhonswe igho bhano twaarë mu-ryato, twaarenga abhantö amaghana abhërë na merongo muhungatë na bhasansabha. 38Hano bhaaighötirë, bhakatabhuta engano mu-nyansha, okore iryato rehohe.
39Mbe, hano bhwaakëëyë, abhaghöbhya bhayö bhakamaaha omosoka ughwa risense, kasi tebhaamanyirë igha, n-kyaro kë bhahikirë hë. Bhakamaaha igha, bhatighe iryato riyö reghobhe ko-mosoka ghuyö, hano ekaabhaayë igho. 40Ku bhuyö bhakabhotora sinsiri isya sinsika, bhakasitigha mo-manshë. Kora bhakatashora na sinsiri seno syaarenga sëbhöhirë sembaau isya ököghëndërya iryato, bhakariinia ritanga riike irya mbere, okore rikama rihuni iryato riyö, ku bhuyö rekabhata ko-mosoka ghuyö. 41Kasi iryato riyö hano ryaasuntaayë mbere hake, rekahika ahasë hano sengera ibhërë syaasikaneranga, ubhusyö ubhwaryo bhokaibhumbura bhököngʼu mu-risense reno ryaarenga mo-manshë, rekaibhandërrya-mo. Ikitunduru ikyaryo, kekaitemwatemwa na amayengo, rekabhaaroka.
42Mbe, abhasirikare bhayö bhaarenga mu-ryato riyö, bhakatuna igha, bhaite abhabhohe bhayö bhonswe igho, okore bhatakeerema, bhaamboke, bhangʼose. 43Kasi omonene uwaabho tiyaatunirë igha Pauro aitwe hë. Ku bhuyö akabhakaania bhatakaakora igho. Ho yaabhatëëbhëri igha, bhano bhamanyirë ukwerema, bhairekere mo-manshë, okore bhaamboke ukughya humbu. 44Bhano bharaatighare, bhagheghe sembaau, handë amabhaara agha iryato riyö, bhaambokere. Ku bhuyö bhonswe igho tokaamboka bhuuya tokahika humbu.
Currently Selected:
Amangʼana agha Abhatomwa 27: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
