Abhaëfësö 4
4
Abhakumya mbaana öbhömwë ku-Yëësu Kiristo
1Mbe, öni m-mobhohe ndë ko bhoora nkokorra Omonene Yëësu emeremo. Ku bhuyö ndabhasaasaama igha, mokore amangʼana ghano ghakwikererrania na keera kyaaghërrë Waryobha akabhabherekera igha mobhe abhantö abhaaye. 2Mwihoote ko-ghonswe igho ghano mokokora, mobhe abhahaabhu, möghömërri na ököghömërrania ukwa okohanshana. 3Mokore omotono ughwa ököghëndërrya okobha na öbhömwë bhono Umwika Ömöhörëëru uwa Waryobha akohaana abhantö, bhaikarana bhuuya ko omorembe. 4Bhëëtö Abhakiristo n-kya bhono ömöbhërë ughwa ömöntö ghörë, ntoona Umwika Ömöhörëëru ooraoora, na ubhweseghe m-mboorabhoora toonabho bhono Waryobha yaatoraghaini hano yaatöbhërëkëëyë. 5Bhonswe igho ntoona Omonene ömwë ooraoora, umukumo ughwëtö n-gömwë, na obhobhatiisyo bhwonswe m-bömwë. 6Bhonswe igho nkosaasaama törë Waryobha, we Taata uwëëtö bhonswe igho. We ömötöngi uwëëtö bhonswe igho, nkokora arë emeremo ighyaye okohetera kö-bhëëtö, na mmö-bhëëtö bhonswe igho amënyirë.
7Kasi kera ömöntö mö-bhëëtö mono yaahaanwa obhotoro obhohagharë na Yëësu Kiristo, ubhwa okomokorra emeremo. Yaatwenaini obhotoro bhuyö, kya bhono yaatunanga. 8Kiyö nkyo kekoghera Amaandeko Amahörëëru gharaghamba igha,
“Hano yaainyökirë ukughya ighörö,
yaaghëghirë abhabhisa këghötërëëyë,
akatuha abhantö ituho.”#4:8 Maaha mo-ketabho ikya Zabhuri 68:18; Abhakorosaai 2:15.
9Mbe, ensonga iya engʼana iyö igha, “Yaainyökirë ukughya ighörö,” në-ëëhë? Ensonga iyaamo ni-igha, yaatangatirë ukwika hansë akaasha ko-kebhara kono, ataraainyoka. 10Ku bhuyö, Yëësu ono yaaishirë ko-kebhara kono, we uyöuyö ono yaainyökirë ukughya ighörö iyö, okoheteera amasaarö. Yaakörrë igho, okore abhenga ahasë honswe igho. 11Uyö we yaahaayë abhantö abhandë obhotoro ubhwa okobha abhatomwa, abhandë bhabhe abharööti, abhandë bhabhe abhainjirisiti, na abhandë akabhahaana obhotoro ubhwa okobha abhakaraabhërri, bhakaraabherrenga na ukwëghya. 12Yaakörrë igho, okore abhantö bhayö bhasëëmi abhantö abha Waryobha, bhakorrenga Waryobha emeremo. Ghwiki ikyëndë ni-igha, Abhakiristo bhanaghe. Abhakiristo bhayö, mbo bhakobherekerwa igha, ömöbhërë ughwa Kiristo. 13Engʼana iyö, neraaghëndërri igho, okohekera hano bhëëtö bhonswe igho, torebha abhamwë ku umukumo ughwëtö, na okomanya Omoona uwa Waryobha.#4:13 Omoona uwa Waryobha. Maaha mo-faharaasa. Ntorebha abhakumya bhano bhaahera ku umukumo ughwëtö. Ghwiki ntoraabhe abhantö abha heene kya Kiristo ono arëngë uwa heene. 14Kiyö nkyo keraaghere twange okobha kya abhaana abhake abha ukutuumibhwa tuumibhwa ahasë honswe igho na rikama irya amëëghyö agha obhorongo agha abhantö abhangʼaini, ko obhongʼaini ubhwabho. 15Kasi ikya okokora no-koteebhania obhoheene ubhwa Waryobha ku righonshe. Tobhe abhantö abhakörö ko amangʼana ghonswe igho. Tutuubhane na Kiristo ko bhoora Kiristo n-kya omotwe ko abhasoorani abhaaye.#4:15 Maaha mo-ketabho ikya Abhaëfësö 1:22, 5:23; Abhakorosaai 1:18. 16Yëësu Kiristo uyö, nkoroobhania arë abhantö abhaaye bhonswe igho, bhaghootana hamwë kya igho imyaho ighya ömöbhërë ughwa ömöntö gheghotaini. Hano imyaho ghyonswe igho ighya kö-möbhërë ghyatoorrani, ghekore emeremo ighyako bhuuya, ömöbhërë ghonswe igho nkukiina ghörë ghobha na singuru na okohansha imyaho ighya kö-möbhërë kuyö.
Twisyöri seteemo isyëtö
17Mbe, keno nkutuna mbatëëbhi ni-igha, mwitegherre bhuuya amangʼana aghaane ghano. Omonene Yëësu Kiristo yaangʼaana ubhwera, ku bhuyö nkobhakaania ndë igha, motakaaghëndërrya okokora amangʼana kya Abhakyaro. Bho nkokora bharë amangʼana bhono abheene bhakutuna. Amaitegherro aghaabho, teghaana ubhwera bhwobhwonswe bhoora hë. 18Tebhaamanyërrëëyi bhuuya amangʼana agha Waryobha hë, kora tebharëngë haangʼë na öbhöhöru obhohya ubhwa Waryobha hë. Ko bhoora igha, tebhamanyirë Waryobha hë. Ghayö ghonswe igho, n-ko okoghera iya ikisiraani ikyabho. 19Ku bhuyö tebhaana sënsöni hë. Bhaasareka ko okokora amangʼana agha seteemo syonswe igho isya obhosooraare. Kora nkutuna bharë bhaghëndërri okokora igho bhököngʼu.
20Kasi bhëënyu, ti-igho mweegha amangʼana agha Yëësu Kiristo hë. 21Keno mwaaighwa ko amangʼana agha Yëësu, na keno abhëëghya abhëënyu bhaabhëëghya, m-maheene igha bhuyö no-bhoheene ubhwa ukurwa ku-Yëësu Kiristo, ubhwa amangʼana aghaaye kya igho gharë. 22Abhëëghya abhëënyu bhaabhëëghya igha, mutighe seteemo isyënyu isya kare seera, seno syaabhasikyanga, isya ubhunyanku ubhwa oronamba rono rwaabhangʼënërryanga. 23Bhakabhatëëbhya igha, mutighe Waryobha abhakore bhohya mo-maitegherro aghëënyu. 24Ghwiki igha, mobhe na eteemo eehya iya ituubho iya Waryobha ko bhoheene ubhwa heene na öbhöhörëëru.
25Mbe, ku bhuyö mutighe obhorongo, kasi moteebhaninga obhoheene, ko bhoora bhëëtö bhonswe igho, n-kya imyaho ighya ömöbhërë öghömwë. 26Hano mwarerra, okorerra ukwënyu kuyö, kotakaaghera mokore ëbhëbhë,#4:26 Maaha mo-ketabho ikya Zabhuri 4:4. iryobha retakaaghwa mökërëërëëyë. 27Motakaahaana Oghosambwa#4:27 Oghosambwa. Maaha mo-faharaasa. umweya ughwa okobhashaasha ko engʼana kya iyö. 28Umwibhi atakaghëndërrya ukwibha ghwiki, kasi nyakara akore omotono ughwa okokora emeremo imiiya na amabhoko aghaaye umwene, okore anyoore ëkëntö ikya ukutwenera ono aana obhohabhë. 29Motakaaghambanga amangʼana amaghogho. Kasi moghambenga amangʼana amaiya ghano ghakotogheka mukumo ughwa bharikyënyu. 30Motakaaghera Umwika Ömöhörëëru abhaabhayere, ko bhoora Umwika Ömöhörëëru uyö, we umuhuri ghono Waryobha yaabhatoorra-ko ukwörökya igha m-bantö abhaaye mörë. Uyö we ekemanyërryö igha, rooho urusikö rono Waryobha arebhatungurya këmwë.#4:30 Maaha mo-ketabho ikya Isaaya 63:10; Abhaëfësö 1:13. 31Muruusi mo-senkoro isyënyu öbhörrö bhwonswe igho, okoregha, okorerra, riihë, amatöki, na obhoghogho bhwonswe igho. 32Mokorrane amangʼana amaiya, mohanshane na mwabherane kya bhono Waryobha yaabhabhëëyë okohetera ku-Yëësu Kiristo.
Currently Selected:
Abhaëfësö 4: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.