Abhaëfësö 6
6
Pauro araraghërrya abhaana na abhaibhöri abhaabho
1Bhëënyu abhaana, ko bhoora igha mmoona öbhömwë ko-Monene Yëësu, ni-igha mwighwere abhaibhöri abhëënyu. Kiyö nkyo ëkëntö ikiiya ikya okokora. 2Ko bhoora mo-Maandeko Amahörëëru yandëkirwë-mo igha, “Osooke suwëënyu na nyakuwëënyu.” Ghuyö ngwo umughiro ghono ghwaabhaayë ughwa mbere ukwëngëribhwa-ko riraghano reno igha, 3“Hano uraaighwere abhaibhöri abhaaho, amangʼana ngaraabhe bhuuya ku-uwe, kora oghote wingʼuure ko-kebhara kono.”#6:2-3 Maaha mo-ketabho ikya Ukurishoka 20:12; Eheetoko iya Etoraati 5:16.
4Bhëënyu abhaibhöri motakaarërrya abhaana abhëënyu, kasi mobhakiini kö okobharaghërrya eteemo inshiiya na ököbhëëghya engʼana iya Omonene Yëësu.#6:4 Maaha mo-ketabho ikya Abhakorosaai 3:21.
Pauro araraghërrya abhaghorwa na abhanene abhaabho
5Bhëënyu abhaghorwa, ni-igha mosooke abhanene abhëënyu abha ko-kebhara kono, na ukurighita, na eno mohanshirë mo-senkoro isyënyu. Mobhasooke kya bhono mokosooka Yëësu Kiristo. 6Motakaabhaighwera enkaagha eno ukunyoora bhaaho, okore bhabhakumi. Kasi mobhaighwere okanya igha m-baghorwa abha Yëësu Kiristo mörë. Ëkëntö keno Waryobha akutuna igha mokore, mokekore kwa nkoro nshiiya. 7Mohanshe emeremo ighyënyu, mushomerwe naghyo. Hano mwakora emeremo ighyënyu momanyenga igha, të-möntö mokokorra hë, kasi no-Monene Yëësu we mokokorra. 8Momanye igha, Omonene narituha abhantö bhonswe igho, ko amangʼana amaiya ghonswe igho ghano abhatöönööni handë abhaghorwa bhaakora.#6:6-8 Maaha mo-ketabho ikya Abhakorosaai 3:22-25.
9Abhanene, bhëënyu bhonswe, mokore bhuuya abhaghorwa abhëënyu. Motakaabhöbhöhërrya, momanye igha, abhaghorwa bhayö na bhëënyu abhanene abhaabho, Omonene uwëënyu nö-ömwë mu-ryobha iyö. Yëësu Kiristo we Omonene uwëënyu bhonswe igho mu-ryobha iyö. Umwene, taana ekeroterro kö-möntö wowonswe oora hë.#6:9 Maaha mo-ketabho ikya Abhakorosaai 4:1.
Pauro aratëëbhya Abhakiristo kya igho bharaitanenga riihë na Oghosambwa
10Amangʼana aghaane ghano nkobhatëëbhya agha okomarërrya ni-igha, monaghe ko-Monene Yëësu, mutighe abhahaane singuru na obhotoro ubhwaye obhonene. 11Momanore ibhyöghë bhyonswe igho ibhya riihë, bheno Waryobha akobhahaana, okore mobhe na obhotoro ubhwa okorebherra obhongʼaini ngʼaini ubhwa Oghosambwa. 12Nkobhatëëbhya ndë igho ko bhoora igha, riihë reno tukwitana, ti-irya kinyabhantö hë, kasi nkwitana törë riihë na ëbhëntö bheno bhetakomaahwa, ibhya ubhwera na obhotoro. Nkwitana törë riihë na abhanene abha amangʼana amaghogho, bhano bhakotonga ekebhara keno. Nkwitana törë riihë na amasambwa ghonswe igho ghano ghakokora amangʼana amaghogho, na amatöngi agha ahasë hano hatakomaahwa. 13Ku bhuyö ni-igha mogheghe ibhyöghë bhyonswe igho ibhya ukwitanera riihë bheno mokohaanwa na Waryobha, okore hano risambwa reraashe, unyoore moona obhotoro ubhwa okorerebherra, na hano moraamare ghayö, monaghe këmwë.
14Ku bhuyö ni-igha mwisëëmi ukwitana riihë. Mwibhohe umushibhi mo-bhokende. Umushibhi ghuyö no-bhoheene ubhwa Waryobha. Motoore idirii mu-kikubha. Idirii iyö, no-kokora amangʼana agha heene. 15Okotoora amabhuuti n-kya ukwisëëmya okoraareka Amangʼana Amaiya agha omorembe. 16Ëkëntö ikyëndë ni-igha, mogheghe ingubha. Ingubha iyö, nu-mukumo ghono moonagho ku-Waryobha. Iyö yo eraabhatöörri ukurimya imighwë ighya omorro gheno mokorekerrwa na Oghosambwa. 17Motoore sëngöfiira isya ikyoma, sëngöfiira siyö, nsyo öbhöhönia ubhwënyu. Mogheghe na umushonge ghono Umwika Ömöhörëëru akobhahaana, umushonge, ghuyö ne-ngʼana iya Waryobha.
18Mosaasaamenga nkaagha syonswe igho, kya bhono Umwika Ömöhörëëru akobhatangata, okore mwiraarerre. Möghëndërri okosaasaamera abhantö abha Waryobha bhonswe igho. 19Monsaasaamere na öni wonswe, okore Waryobha angʼaane amangʼana amaiya agha okoghamba enkaagha yoyonswe igho, eno ukunyoora ndashumaashera amangʼana agha Yëësu Kiristo, ndaghërri abhantö kö obhokarë, obhoheene bhono bhörëngë mo-Mangʼana Amaiya, bhaghamanye. 20Öni nu-mwimërërri uwa Yëësu Kiristo ndë uwa okoraghërrya abhantö Amangʼana Amaiya, kiyö nkyo kyaaghera abhantö bhakandekera mo-kebhohe. Ku bhuyö monsaasaamere ku-Waryobha igha, angʼaane obhokarë ubhwa okoraareka Amangʼana Amaiya ko obhotoro ubhwane bhwonswe igho.
Pauro arasaasaama Waryobha igha angʼoore Abhakiristo abha Ëfësö
21Mbe, Tikiiko nu-mukumya murikyëtö omoghonshe, ömököri uwa emeremo uwa Omonene Yëësu, m-möntö uwa heene. Uyö we araabhatëëbhi amangʼana aghaane ghonswe igho, na ghano ghaannyoora, okore momanye amangʼana aghaane na keno nkokora.#6:21 Maaha mo-ketabho ikya Abhakorosaai 4:7; 2 Timoteo 4:12. 22Kiyö nkyo kyaaghërrë nkamotoma kö-bhëënyu iyö, okore momanye ghano ghakutunyoora eno, na ghwiki igha, abhatëëbhi amangʼana ghano gharaabhatogheke.
23Abhakumya bharikyëtö, Waryobha Taata uwëëtö na Omonene uwëëtö Yëësu Kiristo bhabhahaane omorembe. Bhaghere mohanshane, kora möghëndërri okobha na umukumo ku-Yëësu Kiristo. 24Örööbhö urwa Waryobha robhe kö-bhëënyu bhonswe igho, bhano mohanshirë Omonene uwëëtö Yëësu Kiristo, ku righonshe reno retakohwa röndë.
Currently Selected:
Abhaëfësö 6: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
Abhaëfësö 6
6
Pauro araraghërrya abhaana na abhaibhöri abhaabho
1Bhëënyu abhaana, ko bhoora igha mmoona öbhömwë ko-Monene Yëësu, ni-igha mwighwere abhaibhöri abhëënyu. Kiyö nkyo ëkëntö ikiiya ikya okokora. 2Ko bhoora mo-Maandeko Amahörëëru yandëkirwë-mo igha, “Osooke suwëënyu na nyakuwëënyu.” Ghuyö ngwo umughiro ghono ghwaabhaayë ughwa mbere ukwëngëribhwa-ko riraghano reno igha, 3“Hano uraaighwere abhaibhöri abhaaho, amangʼana ngaraabhe bhuuya ku-uwe, kora oghote wingʼuure ko-kebhara kono.”#6:2-3 Maaha mo-ketabho ikya Ukurishoka 20:12; Eheetoko iya Etoraati 5:16.
4Bhëënyu abhaibhöri motakaarërrya abhaana abhëënyu, kasi mobhakiini kö okobharaghërrya eteemo inshiiya na ököbhëëghya engʼana iya Omonene Yëësu.#6:4 Maaha mo-ketabho ikya Abhakorosaai 3:21.
Pauro araraghërrya abhaghorwa na abhanene abhaabho
5Bhëënyu abhaghorwa, ni-igha mosooke abhanene abhëënyu abha ko-kebhara kono, na ukurighita, na eno mohanshirë mo-senkoro isyënyu. Mobhasooke kya bhono mokosooka Yëësu Kiristo. 6Motakaabhaighwera enkaagha eno ukunyoora bhaaho, okore bhabhakumi. Kasi mobhaighwere okanya igha m-baghorwa abha Yëësu Kiristo mörë. Ëkëntö keno Waryobha akutuna igha mokore, mokekore kwa nkoro nshiiya. 7Mohanshe emeremo ighyënyu, mushomerwe naghyo. Hano mwakora emeremo ighyënyu momanyenga igha, të-möntö mokokorra hë, kasi no-Monene Yëësu we mokokorra. 8Momanye igha, Omonene narituha abhantö bhonswe igho, ko amangʼana amaiya ghonswe igho ghano abhatöönööni handë abhaghorwa bhaakora.#6:6-8 Maaha mo-ketabho ikya Abhakorosaai 3:22-25.
9Abhanene, bhëënyu bhonswe, mokore bhuuya abhaghorwa abhëënyu. Motakaabhöbhöhërrya, momanye igha, abhaghorwa bhayö na bhëënyu abhanene abhaabho, Omonene uwëënyu nö-ömwë mu-ryobha iyö. Yëësu Kiristo we Omonene uwëënyu bhonswe igho mu-ryobha iyö. Umwene, taana ekeroterro kö-möntö wowonswe oora hë.#6:9 Maaha mo-ketabho ikya Abhakorosaai 4:1.
Pauro aratëëbhya Abhakiristo kya igho bharaitanenga riihë na Oghosambwa
10Amangʼana aghaane ghano nkobhatëëbhya agha okomarërrya ni-igha, monaghe ko-Monene Yëësu, mutighe abhahaane singuru na obhotoro ubhwaye obhonene. 11Momanore ibhyöghë bhyonswe igho ibhya riihë, bheno Waryobha akobhahaana, okore mobhe na obhotoro ubhwa okorebherra obhongʼaini ngʼaini ubhwa Oghosambwa. 12Nkobhatëëbhya ndë igho ko bhoora igha, riihë reno tukwitana, ti-irya kinyabhantö hë, kasi nkwitana törë riihë na ëbhëntö bheno bhetakomaahwa, ibhya ubhwera na obhotoro. Nkwitana törë riihë na abhanene abha amangʼana amaghogho, bhano bhakotonga ekebhara keno. Nkwitana törë riihë na amasambwa ghonswe igho ghano ghakokora amangʼana amaghogho, na amatöngi agha ahasë hano hatakomaahwa. 13Ku bhuyö ni-igha mogheghe ibhyöghë bhyonswe igho ibhya ukwitanera riihë bheno mokohaanwa na Waryobha, okore hano risambwa reraashe, unyoore moona obhotoro ubhwa okorerebherra, na hano moraamare ghayö, monaghe këmwë.
14Ku bhuyö ni-igha mwisëëmi ukwitana riihë. Mwibhohe umushibhi mo-bhokende. Umushibhi ghuyö no-bhoheene ubhwa Waryobha. Motoore idirii mu-kikubha. Idirii iyö, no-kokora amangʼana agha heene. 15Okotoora amabhuuti n-kya ukwisëëmya okoraareka Amangʼana Amaiya agha omorembe. 16Ëkëntö ikyëndë ni-igha, mogheghe ingubha. Ingubha iyö, nu-mukumo ghono moonagho ku-Waryobha. Iyö yo eraabhatöörri ukurimya imighwë ighya omorro gheno mokorekerrwa na Oghosambwa. 17Motoore sëngöfiira isya ikyoma, sëngöfiira siyö, nsyo öbhöhönia ubhwënyu. Mogheghe na umushonge ghono Umwika Ömöhörëëru akobhahaana, umushonge, ghuyö ne-ngʼana iya Waryobha.
18Mosaasaamenga nkaagha syonswe igho, kya bhono Umwika Ömöhörëëru akobhatangata, okore mwiraarerre. Möghëndërri okosaasaamera abhantö abha Waryobha bhonswe igho. 19Monsaasaamere na öni wonswe, okore Waryobha angʼaane amangʼana amaiya agha okoghamba enkaagha yoyonswe igho, eno ukunyoora ndashumaashera amangʼana agha Yëësu Kiristo, ndaghërri abhantö kö obhokarë, obhoheene bhono bhörëngë mo-Mangʼana Amaiya, bhaghamanye. 20Öni nu-mwimërërri uwa Yëësu Kiristo ndë uwa okoraghërrya abhantö Amangʼana Amaiya, kiyö nkyo kyaaghera abhantö bhakandekera mo-kebhohe. Ku bhuyö monsaasaamere ku-Waryobha igha, angʼaane obhokarë ubhwa okoraareka Amangʼana Amaiya ko obhotoro ubhwane bhwonswe igho.
Pauro arasaasaama Waryobha igha angʼoore Abhakiristo abha Ëfësö
21Mbe, Tikiiko nu-mukumya murikyëtö omoghonshe, ömököri uwa emeremo uwa Omonene Yëësu, m-möntö uwa heene. Uyö we araabhatëëbhi amangʼana aghaane ghonswe igho, na ghano ghaannyoora, okore momanye amangʼana aghaane na keno nkokora.#6:21 Maaha mo-ketabho ikya Abhakorosaai 4:7; 2 Timoteo 4:12. 22Kiyö nkyo kyaaghërrë nkamotoma kö-bhëënyu iyö, okore momanye ghano ghakutunyoora eno, na ghwiki igha, abhatëëbhi amangʼana ghano gharaabhatogheke.
23Abhakumya bharikyëtö, Waryobha Taata uwëëtö na Omonene uwëëtö Yëësu Kiristo bhabhahaane omorembe. Bhaghere mohanshane, kora möghëndërri okobha na umukumo ku-Yëësu Kiristo. 24Örööbhö urwa Waryobha robhe kö-bhëënyu bhonswe igho, bhano mohanshirë Omonene uwëëtö Yëësu Kiristo, ku righonshe reno retakohwa röndë.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.