Ruuka 11

Amëëghyö agha okosaasaama Waryobha

(Mataayo 6:9-13, 7:7-11)

1Urusikö nyabhorebhe, Yëësu yaasaasaamanga Waryobha. Hano yaamarrë, ömwë uwa abheegha abhaaye akamötëëbhya igha, “Uwe Omonene uwëëtö, utwëghi bhono toraasaasaamenga Waryobha, kya bhoora Yohana Omobhatiisya yëëghya abheegha abhaaye.”

2Yëësu akabhatëëbhya igha, “Hano mwasaasaama Waryobha, mosaasaamenga igha,

‘Taata [uwëëtö ono örëngë mu-ryobha,]

iriina iryaho, rëhörëëribhwi.

Obhokama ubhwaho bhuushe.

[Righonshe iryaho, rehekerane

ko-kebhara kono, kya igho ërë mu-ryobha iyö.]

3Otohaanenga ibhyakorya ibhyëtö kera urusikö.

4Utwabhere ëbhëbhë ibhyëtö,

kya bhono tukwabhera bhano bhakotosarrya.

Otakaatohatërrya mo-mashaashyo,

[kasi ötötöörri ko-mashaashyo agha Omoghogho oora].#11:2, 4 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.’ ”

5Ho Yëësu yaabhatëëbhëri igha, “Toghambe igha, hano ömwë wëënyu araaghi wa mosaani uwaaye, mu-bhutikö ghatë, na amötëëbhi igha, ‘Mosaani uwaane, tangʼaana-ko hayö emekaate etatö. 6Mosaani uwaane yaarë ko-roghendo, ahëkëëyë waane hayö, na mbe teneena ibhyakorya ibhya okomohaana hë.’

7“Kasi omosaani uyö amohonshore igha, ‘Tigha ukunnyankya. Öni marrë kusiika-ho, nendaayë na abhaana abhaane. Tentore okobhooka nkohaane ëkëntö kyokyonswe igho hë.’

8“Ndabhatëëbhya igha, nokaanyoora igha ömöntö uyö taabhooke ahaane mosaani uwaaye uyö omokaate, ko bhoora igha m-mosaani uwaaye, kasi bhoono, naraabhooke amohaane keno akutuna, ko bhoora mosaani uwaaye uyö, akotonerra okomosabha.”

9Ku bhuyö Yëësu akaghëndërrya okobhatëëbhya igha, “Mosabhenga Waryobha keno mukutuna, naraabhahaane. Mutunenga, Waryobha naraabhatöörri munyoore kiyö mukutuna. Mokongʼontenga ko-kesaku, Waryobha naraabheghorre-ho. 10Ko bhoora ömöntö wowonswe ono akosabha Waryobha keno akutuna, Waryobha nkomohaana arë. Ömöntö ono akutuna ëkëntö ku-Waryobha, nkunyoora arë. Na ömököngʼönti uwa ekesaku, Waryobha nkumweghorra arë-ho.

11“M-mwibhöri kë, ono omoona uwaaye araamosabhe omokaate, amohaane reghena? Handë amosabhe inswë amohaane inshoka? 12Handë omoona amosabhe riighe, kasi umwene amohaane ëkëtörömööni? 13Nokaanyoora igha bhëënyu abhantö m-baghogho mörë, kasi momanyirë okohaana abhaana abhëënyu ëbhëntö ibhiiya. Mbe, Taata uwa mu-ryobha, nu-uwa heene, nahanshirë bhököngʼu okohaana abhantö bhano bhakomosabha, Umwika Ömöhörëëru.”

Yëësu araghambwa igha obhotoro ubhwayenku-Bhërizëbhuri bhukurwa

(Mataayo 12:22-30; Maariko 3:22-27)

14Urusikö nyabhorebhe, Yëësu yaatirë risambwa, reno ryaakörrë ömöntö akobha rimuumu. Hano risambwa riyö ryaaruurë kö-möntö uyö, akaghamba. Abhantö bhakaroghoora bhököngʼu.

15Kasi abhandë bhakaghamba igha, “Ono nkwata arë risambwa, ko obhotoro ubhwa Bhërizëbhuri,#11:15 Bhërizëbhuri ne-ngʼana eno ikushumaashera Oghosambwa. Maaha mo-ketabho ikya 2 Abhakama 1:2. oghonene ughwa amasambwa!” 16Abhandë bhaatunanga ukushaashya Yëësu. Bhakasabha abhööröki ekemanyërryö ikya rikono, keno keraabhööröki igha, Waryobha we yaamotoma.

17Kasi ko bhoora Yëësu yaamanyirë amaitegherro aghaabho, akabhatëëbhya igha, “Obhokama bhobhonswe igho hano bhoseraini, nkusika bhörë. Ni-igho na abhantö bhonswe hano bhaseraini, umughi nkusika ghörë. 18Mbe, hano obhokama ubhwa Oghosambwa bhotaighwerrane, iyakë bhoraakore bhöghëndërri okobha-ho? Nembabhöörri engʼana iyö, ko bhoora mokoghamba igha, nkwata ndë amasambwa ko obhotoro ubhwa Bhërizëbhuri. 19Kasi nyoore öni nkwata ndë risambwa ko obhotoro ubhwa Bhërizëbhuri, abheegha abhëënyu#11:19 Abheegha abhëënyu. Ensonga iyaamo iyëndë ni-igha, Abhayahudi bharikyënyu. bhonswe nkwata bharë amasambwa ko obhotoro ubhwa Bhërizëbhuri? Ku bhuyö, abheegha abhëënyu nkwörökya bharë igha, ghayö mokoghamba, te-maheene hë. 20Kasi obhotoro ubhwa Waryobha mbwo bhokoghera ndaata amasambwa, ku bhuyö hayö nkwörökya ërë igha, Obhokama ubhwa Waryobha, bhobhahëkërëëyë. 21Mwitegherre ëkërëngyö keno! Ömöntö ono aana singuru hano yaghoota ibhyöghë, arende ëbhëntö ibhya mu-nyumba iyaaye, tibhikunibhwi na ömöntö hë. 22Kasi hano araashe ömöntö uwöndë ono amökërrë singuru, naraamörööni, amuruusi ibhyöghë ibhyaye bheno akwisegha, na ëbhëntö ibhyaye bhyonswe igho, atwenani abhandë.

23“Mbe, momanye igha, ömöntö ono atarëngë mosaani uwaane, uyö nu-mubhisa uwaane. Na ömöntö ono atakokomania hamwë na öni abhantö abha Waryobha, uyö m-nyaraghania uwa abhantö abha Waryobha.”

Ëkërëngyö ikya okokaania abhasarya

(Mataayo 12:43-45)

24Yëësu akaghëndërrya okoghamba igha, “Hano risambwa ryarwa kö-möntö, nkughya rërë ku-riköngö, ahasë hano amanshë ghatarë, reratuna ahasë aha ukumuunya, kasi hano ryabhorwa nkoghamba ërë igha, nendaakyore mu-nyumba iyaane moora. 25Hano reraahike kö-möntö oora, rinyoore n-kya inyumba eno yëëyirwë bhuuya, itighirwë hayö kya ritongo, 26mbe hayö ho bhoono risambwa riyö rikughya ukutuna amasambwa aghandë muhungatë, amaghogho bhököngʼu koreheteera. Na amasambwa ghayö ghonswe igho, nkuusha gharë ghamenya kö-möntö uyö. Ku bhuyö ömöntö uyö, nkobha arë omoghogho okokera mbere haara.”

Ukushomerwa ukwa heene

27Hano Yëësu yaarenga akeeghamba ghayö, omokari uwöndë ono yaarë mo-bhantö bhayö, akaghamba bhököngʼu igha, “Möntö ankore nyakuwëënyu ono yaakwebhora akaköghönkya.”

28Kasi Yëësu akamohonshora igha, “Ti-igho hë, kasi nyakara ömöntö ono akwighwa, na okoghoota engʼana iya Waryobha.”

Yëësu arahamera bhano bhakutuna ekemanyërryö

(Mataayo 12:38-42; Maariko 8:12)

29Enkaagha eno abhantö abhaaru bhaaikomanianga, Yëësu akabhatëëbhya igha, “Abhantö abha rikora reno, na-bhantö abhaghogho bhököngʼu. Keno bhakutuna ku-öni, n-dikono irya ekemanyërryö ikya ököbhööryökya igha, nku-Waryobha naarwa. Kasi tëbhöröökibhwi hë. Ekemanyërryö keno bharöörökibhwi, ni-ikya Yoona. 30Ko bhoora kya igho Yoona yaabhaayë ekemanyërryö ko-bhantö abha mu-mughi ughwa Ninaawi, ni-igho öni Omoona uwa Ömöntö wonswe, nendebha ekemanyërryö ko-bhantö abha rikora reno.

31“Omokama omokari uwa ikyaro ikya Shebha, wonswe naryemerra hamwë na abhantö abha rekora reno, urusikö rono Waryobha arebhotorra abhantö ibhiina ibhyabho. Narebhotorra ibhiina abhantö abha rekora reno igha, m-basarya. Ko bhoora umwene yaaruurë ikyaro ikya hare, akaitegherra, na akaghoota amangʼana agha obhongʼaini, agha omokama Seremaani. Ndabhatëëbhya igha, hano aaho ömöntö omonene okokera Seremaani.#11:31 Maaha mo-ketabho ikya 1 Abhakama 10:1-10; 2 Amangʼana agha Senkaagha 9:1-12. 32Rono Waryobha arebhotorra abhantö ibhiina ibhyabho, abhantö abha Ninaawi, mbaryemerra hamwë na abhantö abha rekora reno. Abhantö abha Ninaawi, mbarebhotorra ikiina abhantö abha rekora reno igha, m-basarya. Nerebha igho, ko bhoora abhantö abha Ninaawi, mbaahöngööyë ëbhëbhë ibhyabho,#11:32 Maaha mo-ketabho ikya Yoona 3:5. hano Yoona yaabharaarëkëëyë engʼana iya Waryobha. Na bhoono igho aahano ömöntö omonene okokera Yoona, kasi bhëënyu temwahöngööyë ëbhëbhë ibhyënyu hano yaabharaarëkëëyë engʼana iya Waryobha.

Amaiso ngo etara iya ömöbhërë

(Mataayo 5:15, 6:22-23)

33“Taaho ömöntö ono aköghöötya etara, amare aghibhise, handë aghikundikiri. Ömöntö hano yaghöötya etara, nkoghetoora arë ko-katangora, okore hano abhantö bharaasohe mu-nyumba, bhamaahe obhorabhu.

34“Kya bhoora etara ëkömërëkya, amaiso aghaaho ghonswe kö-möbhërë, n-kya etara. Hano waanyoora amaiso m-mahöru, nkomaaha örë bhuuya igho. Kasi hano amaiso ghahukura, ömöbhërë ghwonswe igho, nkobha ghörë ikisuntë. 35Ku bhuyö mbe mwangarre igha, obhorabhu bhono moonabho, bhotaakaabha ikisuntë. 36Ko bhoora hano oraanyoore ömöbhërë ughwaho ghwonswe igho ghoona obhorabhu, ikisuntë te-keemo hë, noraamaahe bhuuya, kya hano wamorekerwa na etara eno ikwoka.”

Yëësu arahamera Abhafarisaayo na abhëëghya abha amaraghërryö agha Mosa

(Mataayo 23:1-36; Maariko 12:38-40)

37Hano Yëësu yaamarrë okoghamba ghayö igho, Omofarisaayo uwöndë akamösërëënia ukughya waaye. Hano Yëësu yaahikirë wa Omofarisaayo uyö, akasoha mu-nyumba, akaikara okorya. 38Omofarisaayo uyö, akaroghoora, hano yaarööshë igha Yëësu ararya igho ataisaabhirë amabhoko, kya igho eteemo iya Abhafarisaayo yaarë.

39Kasi Omonene Yëësu akamötëëbhya igha, “Bhëënyu Abhafarisaayo, nkwöghya mörë kebhara iya ekekombe na esahaani, kasi obhoghogho, na obhosaki ubhwene igho, mbwo bhwishööyë mo-senkoro isyënyu. 40Bhëënyu m-bakangi mörë, Waryobha ono yaabhömbirë agha kebhara, we yaabhömbirë na ibhya mönsë. 41Mötöörringa abhatöbhu kwa enkoro nshiiya, hayö ho moraabhe abhantö abha heene.

42“Haahö bhëënyu Abhafarisaayo, morahaana Waryobha ikitweno ikya ikömi, ikya kera ebherongo ibhya ibhyakorya, kya ömöönyö, ibhitungura na ibhyëndëbhyëndë igho, kasi temokokorra abhantö amangʼana agha obhoheene na okohansha Waryobha. Ghayö ngo mokaatönibhwi igha mokore, hamwë na sesadaaka siyö.

43“Haahö bhëënyu Abhafarisaayo, mwahansha ukwikarra ibhitumbë ibhya abhanene, bheno bhërëngë mu-sinyumba isya esango iya Abhayahudi. Mwahansha okosookwa na ökökëëribhwa na abhantö mo-meteera. 44Haahö bhëënyu bhano mokobha kya sembeehera, seno setaana ekemanyërryö igha ne-mbeehera seehano, kora abhantö nkosetasha bharë bhatamanyirë.”

45Umwëghya uwöndë uwa amaraghërryö agha Mosa, akatëëbhya Yëësu igha, “Kasi Yëësu omanyirë igha, amangʼana agha obhoghogho ghayö oghambirë, na bhëëtö bhonswe notohombaini-mo.”

46Yëësu akamohonshora igha, “Na bhëënyu abhëëghya abha amaraghërryö agha Mosa, haahö. Morakora amaraghërryö agha Mosa, ghabhe imirigho imirito,#11:46 Imirigho imirito. Ensonga iyaamo ni-igha, amaraghërryö agha abhëëghya m-maköngʼu ghaarë kya umurigho umurito ghono ömöntö ataatore ukughweteeka. gheno mukwitëëkya abhantö, kasi bhëënyu abheene, temokobhatöörrya okogheghegha, kora ukughikunia na ikyara hë! 47Haahö bhëënyu abhëëghya abha amaraghërryö agha Mosa, ko bhoora nkohaghaashera mörë sembeehera, isya abharööti bhano bhaaitwa na abhaibhöri bhëënyu. 48Ku bhuyö möröörökya igha, nkwikererrania mörë, na ghano abhaibhöri abhëënyu bhaakörrë. Ko bhoora, abheene bhaaita abharööti bhaara, na bhëënyu, nkohaghaashera mörë sembeehera isya abharööti, na mbe nkosera mörë amangʼana ghano bhaaghambirë!

49“Kiyö nkyo kyaaghërrë Waryobha ko-bhongʼaini ubhwaye, akaghamba igha, ‘Nendaabhaherre abhatomwa na abharööti, kasi abharööti abhandë, mbaraaitwe, na abhandë mbaraateeswe.’ 50Ku bhuyö rekora reno, ndërëbhööribhwa amaanyinga agha abharööti bhonswe igho, bhano bhaaitirwë ukurwa okosemoka ukwa ekebhara. 51Ukurwa ko-maanyinga agha Abhëëri, okohekera uruku urwa Zakaria,#11:51a Ko-mangʼana agha Abhëëri, maaha mo-ketabho ikya Okosemoka 4:8-12. Ko-mangʼana agha Zakaria, maaha mo-ketabho ikya 2 Amangʼana agha Senkaagha 24:20-22. ono yaitëëywë ghatëghatë iya riighyö irya ikimwenso, na Ahasë Ahahörëëru aha inyumba iya Waryobha.#11:51b Inyumba iya Waryobha. Maaha mo-faharaasa. Keno nkobhatëëbhya ni-igha, rekora reno, ndyo rërëbhööribhwa ghayö ghonswe igho.

52“Haahö bhëënyu abhëëghya abha amaraghërryö agha Mosa. Nkusiika-ho mörë, morarebherra abhantö bhatakaasoha mo-bhongʼaini ubhwa okomanya Waryobha, na kora mbe bhëënyu abheene temokosoha-mo hë.”

53Hano Yëësu yaaruurë hayö, Abhafarisaayo na abhëëghya abha amaraghërryö agha Mosa, bhakasimya ukumunyeera senkaani bharërëëyë. Ukusimirya hayö, bhakabha bharamöbhöörya amangʼana amaarumaaru igho, 54okore bhanyoore ikibhuno ikya ukumushongera.

Currently Selected:

Ruuka 11: ssc

Highlight

Copy