Ruuka 12

Amëëghyö agha ubhwiköri ubhwa Abhafarisaayo

(Mataayo 10:26-27)

1Enkaagha iyö, abhantö ëbhëkwë na ëbhëkwë, mbaaikomanianga, kora abhantö bhakatashana. Yëësu akasimya ukushumaasha na abheegha abhaaye, akabhatëëbhya igha, “Mwiyangarre na ehamiira#12:1 Ehamiira. Yëësu ararengʼania ehamiira iyö, na öbhösëëghërrya obhoghogho bhono Abhafarisaayo bhaakoranga ko-bhantö. Öbhösëëghërrya ubhwa Abhafarisaayo bhwaarenga ubhwa amëëghyö agha obhorongo. Herode Antipa yaarë ömösëëghërrya uwa enshera engogho. iya Abhafarisaayo, kuyö kwo okoghamba igha, ubhwiköri ubhwabho. Bhuyö, nkoromaana bhörë kya ehamiira eno ikubhimbya obhose ubhwa engano.

2“Ëkëntö kyokyonswe keno ömöntö akundikiiyi, Waryobha narekekondokora, na kyokyonswe keno kibhisirwë, nkeremanywa. 3Ghonswe igho ghano mwaaghamba mu-kisuntë, ngariighwebhwe aharabhu igho. Na ghonswe ghano mwashamerrananga riiko, ngareraarekwa aharabhu igho, ko-rosara urwa inyumba.

Waryobha we uwa okoobhoha

(Mataayo 10:28-31)

4“Bhasaani abhaane, ndabhatëëbhya igha, motakoobhoha abhantö bhano bhakwita ömöbhërë ughwene igho. Hano bhaamara ukwita ömöbhërë, tebhaana ghwiki engʼana iyëndë hë. 5Kasi nendaabhatëëbhi uwa okoobhoha. Mwobhohenga Waryobha, ko bhoora hano yamara ukwita ömöntö, aana ubhwera ubhwa okomorekera mo-morro ghotakurima. Uyö we uwa okoobhoha.

6“Ibhitintighiri bhitaano, tëköghöribhwa bhërë öbhöghöri obhoke igho? Waryobha takwebha ikitintighiri kora ëkëmwë hë. 7Kasi bhëënyu, Waryobha namanyirë ubhwaru ubhwa situukya isya ko-metwe ighyënyu. Ku bhuyö motakoobhoha. Ko bhoora bhëënyu ku-Waryobha, mmoona ubhwera bhököngʼu, okokera ibhinyönyi ibhyaru.

Ukwikërrya Yëësu mo-bhantö

(Mataayo 10:32-33, 12:32, 10:19-20)

8“Ndabhatëëbhya igha, kera ömöntö ono akunyikërrya mo-bhantö, öni Omoona uwa Ömöntö nindimwikërrya igha nu-uwaane, ko-bhamaraika abha Waryobha. 9Kasi ömöntö ono akunyikaana mo-bhantö igha, tu-waane hë, uyö nindimwikaana, ko-bhamaraika abha Waryobha. 10Kera ömöntö ono akoghamba amangʼana amaghogho agha ukunyikaana öni Omoona uwa Ömöntö, uyö naryabherwa. Kasi kera ömöntö ono akotoka Umwika Ömöhörëëru, uyö taryabherwa hë.

11“Hano abhantö bharebhahiranga mu-sinyumba isya esango iya Abhayahudi, ko-bhatöngi na abhaahokania, motakaaitegherra bhono moraaikoorerre, na bhono moraaghambe. 12Ko bhoora Umwika Ömöhörëëru, naraabhatëëbhi hayö na hayö amangʼana agha okoghamba.”

Umwamë omokangi

13Ömöntö ömwë mo-bhantö muyö, akatëëbhya Yëësu igha, “Umwëghya uwëëtö, otatëëbhya mura uwëëtö, tutwenane umwandö ughwëtö.”

14Yëësu akamohonshora igha, “Mora, nawë yaantoora-ho mbe umwahokania uwa umwandö ughwënyu?” 15Ho Yëësu yaatëëbhëri abhantö bhayö igha, “Mwiyangarre na eteemo iya oronamba urwa ëbhëntö. Ko bhoora öbhöhöru ubhwa ömöntö, tebhokotooka mu-bhwaru ubhwa ëbhëntö bheno aanabhyo hë.”

16Ho bhoono Yëësu yaabharëngëëyi ëkërëngyö igha, “Yaarenga-ho umwamë uwöndë, ono ömöghöndö ughwaye ghwaamirë bhököngʼu omooka nyabhorebhe. 17Akaibhöörya mo-motwe ughwaye igha, ‘Kana iyakë nkaakora? Teneena ahasë aha okotoora ibhyakorya ibhyane, bhyangʼana hano!’ 18Mbe, akaghamba igha, ‘Nendaataabhore ebhetara ibhyane bheno, nkore ebhetara ebhenene okokera bheno. Ntoore-mo ibhyakorya ibhyane bhyonswe igho na ëbhëntö ibhyane ibhyëndë. 19Mare ngambe mo-nkoro iyaane igha, “Bhoono mböökirë nikaayë. Tigha nikare muunye, ndaagherenga na ukunywa, nshömëëywë.” ’

20“Kasi, Waryobha akamötëëbhya igha, ‘Uwe örë mokangi tomanyirë igha nu-bhutikö ubhwa reero oraakwe! Bhoono ëbhëntö bhiyö waaibheekera ni-ibhya wë bheraabhe?’ ”

21Yëësu, akamarërrya ko okoghamba igha, “Ni-igho erebha kö-möntö ono akwibheekera ëbhëntö, kasi aanga ukwibheekera ku-Waryobha.”

Amëëghyö agha ukwinyankera

(Mataayo 6:25-34)

22Ho Yëësu yaatëëbhëri abheegha abhaaye igha, “Ko okoghera iya ghayö, ndabhatëëbhya igha, motakaahaha na ukwibhöörya igha, ‘Hai toraanyoore ibhyakorya, handë igha nkë toraatoorenga?’ 23Kana mwëbhirë igha, öbhöhöru ubhwënyu mbökërrë ibhyakorya, na ömöbhërë ngökërrë singibho?

24“Momaahere ko-manyamoko. Teghaana ömöghöndö ughwa ukwëmya, handë ughwa okoghesa hë, teghaana eketara hë, handë ahasë aha okotoora ibhyakorya. Kasi Waryobha nköghasumya arë ibhyakorya. Bhëënyu mökërrë ibhinyönyi ahare iyö. 25Taaho ömöntö mö-bhëënyu muyö, ono ehaho iyaaye, araamötöörri iyëngëri ribhagha irya esa ëmwë iyeene igho kö-bhöhöru ubhwaye.#12:25 Iyëngëri ribhagha irya esa ëmwë iyeene igho kö-bhöhöru ubhwaye. Ensonga iyaamo iyëndë ni-igha, ikihiko ikyaye kora okobhoko ökömwë. 26Mbe, ko bhono motakotora okokora ëkëntö ekeke kya kiyö, n-kwakë mokobha na ehaho iya amangʼana aghandë ghayö?

27“Momaahere kö-bhëmörë kya bhono bhikukiina. Tebhekokora emeremo hë, tibhikwishonera singibho hë. Kasi ndabhatëëbhya igha, kora omokama Seremaani, ko-bhonene na ubhwamë ubhwaye, tiyaarë na singibho sinshiiya kya ëkëmörë ëkëmwë ikya ëbhëmörë ibhya mwi-sisi. 28Mbe, oraanyoore igha ni-igho Waryobha akwibhöhya amanyanki agha kö-möghöndö, ghano igha reero ho gharë, kasi isho ngaretabhutwa mo-morro, bhoono tabhaibhöhi bhököngʼu bhëënyu bhanyamukumo omoke?

29“Bhoono bhëënyu motakaanyanka ukwitegherra igha, ‘N-kë toraare?’ handë igha, ‘N-kë toraanywe?’ Motakoorekera ghayö. 30Motakaabha kya abhantö abha ko-kebhara kono bhano bhatamanyirë Waryobha. Ko bhoora abhantö bhano bhatamanyirë Waryobha, ghayö ngo ghakobhahahya. Kasi bhëënyu, Suwëënyu uwa mu-ryobha, namanyirë bhuuya igha, nkoghatuna mörë. 31Ku bhuyö mokore bhono Waryobha akutuna mo-Bhokama ubhwaye, na kora aghandë ghayö ghonswe igho, naraabhahaane.

Ubhwamë ubhwa mu-ryobha

(Mataayo 6:19-21)

32“Nokaanyoora te-bhaaru mörë hë, kasi motakoobhoha. Ko bhoora Suwëënyu arööshë igha, abhahaane Obhokama ubhwaye. 33Möghöri ëbhëntö ibhyënyu, musumi abhatöbhu. Ko okokora igho, moraaibhekere emongo mu-bhighushi bheno bhetakosareka mu-ryobha iyö. Mu-ryobha iyö, umwibhi takwibha-yo hë, kora omoswa teghokosarya hë. 34Ahasë hano emongo iyaaho ërë, ho ubhweseghe ubhwa enkoro iyaaho bhörë.

Mwisëëmi ko okoghera ukwa ukuusha ukwa Omonene Yëësu

35“Mwisëëmi senkaagha syonswe igho, na setara isyënyu syokenga. 36Mobhe kya abhaghorwa bhano bhakoghanya omonene uwaabho, akyore ukurwa mu-bhwenga, okore hano araashe abherekere, bhangohe ukumweghorra. 37Nyakara abhaghorwa bhano omonene uwaabho, araanyoore bharamoghanya. No-bhoheene nkobhatëëbhya igha, naraaisëëmi okobhatighinkanera, abhasërëëni ibhyakorya. 38Nyakara bhano omonene araakyore mu-bhutikö ghatë, handë nyinkyo shiri, anyoore igha nkomoghanya bharë. 39Kasi momanye engʼana eno igha, singa mwene inyumba akaamanyirë enkaagha eno umwibhi akaaishirë, nakaaisëëmëri. Takaaraayë, atighe umwibhi atemore inyumba iyaaye. 40Ku bhuyö bhëënyu bhonswe ni-igha mwisëëmi, ko bhoora öni Omoona uwa Ömöntö, nindiisha ko-nkaagha eno motakotemera omotwe.”

Ëkërëngyö ikya omoghorwa uwa heene

(Mataayo 24:45-51)

41Ho Peetero yaabhöörri Yëësu igha, “Omonene uwëëtö, ëkërëngyö kiyö m-bëëtö örëngëëyi, kasi m-bantö bhonswe igho?”

42Omonene akamohonshora igha, “Umwimërërri uwa heene na omongʼaini nö-öhë? Nö-mököri uwa emeremo ono omonene uwaaye araakumi, amotoore ku-bhwimërërri ubhwa bharikyaye, abhahaanenga ibhyakorya ko-nkaagha yaako. 43Nyakara omoghorwa ono omonene uwaaye hano araashe, amunyoore arakora kya bhoora yaamoraghërrëëyi. 44No-bhoheene nkobhatëëbhya igha, naremohaana ikyeo abhe umwimërërri uwa ëbhëntö ibhyaye bhyonswe igho.

45“Kasi hano omoghorwa uyö araaighambere mo-motwe ughwaye igha, ‘Omonene uwaane, atëghëtirë ukukyora.’ Ku bhuyö, asimi okotema abhaghorwa bharikyaye bhano akwemererra, abha ekekari na ikishaasha. Aikarre obhoraaghëri, ubhunywi na öbhörëëbhi. 46Mbe, omonene uwaaye uyö, narikyora urusikö na enkaagha eno omoghorwa uyö, atakotemera omotwe. Bhoono omonene uwaaye uyö, naraamushibhi bhököngʼu, amare amotoore hamwë na abhantö bhano bhataana umukumo.

47“Hano oraanyoore aaho omoghorwa ono amanyirë bhono omonene uwaaye akutuna, kasi ange okokora bhuyö, kora takwisëëmya amuturungʼane hë, omoghorwa kya uyö, naretemwa bhököngʼu. 48Kasi omoghorwa ono atamanyirë bhono omonene uwaaye akutuna, hano araakore engʼana eno yingʼarëëyë ubhushibhu, uyö n-hake igho araatemwe. Ömöntö ono yaahaanwa ëbhëntö ibhyaru, m-byaru aresabhwa. Ömöntö ono yaasagharibhwa ibhyaru, omonene uwaaye m-byaru bhököngʼu araamosabhe.

Yëësu araghera abhantö bharaahokana

(Mataayo 10:34-36)

49“Öni naasha okore ngööti öbhöhë ko-kebhara kono, bhono bhoraaghere abhantö bhaahokane. Na nkutuna ndë bhököngʼu mmaahe omorro ghwökirë. 50Kora öni wonswe, neena obhobhatiisyo ubhwa ëhëghë, bhono ndaahete-mo. Neena inyanko enene, okohekera hano bhorehekerana. 51Kasi bhëënyu, nkokanya mörë igha no-morembe naareeta ko-kebhara kono? Ti-igho hë. Ndabhatëëbhya igha, naasha okosarekania abhantö. 52Ku ukurwa bhoono igho, umughi ughwa abhantö bhataano, abhatatö mbaraahokane na abhabhërë. Abhabhërë bhonswe mbaraahokane na bhatatö bhayö. 53Amangʼana ngarebha igha, umumura naryanga ukwighwerrana na suwaabho. Suwaabho wonswe naryanga ukwighwerrana na mura uwaaye. Umwisëkë naryanga ukwighwerrana na nyakuwaabho. Nyakuwaabho wonswe naraahokane na mwisëkë uwaaye. Omokaamoona wonswe naryanga ukwighwerrana na nyakubhyara uwaabho, nyakubhyara uwaabho wonswe naryanga ukwighwerrana na omokaamoona uwaaye.”

Ukwanga okomanya ekemanyërryö

(Mataayo 16:2-3)

54Yëësu yaatëëbhëri abhantö abhaaru bhano bhaarë hayö igha, “Hano mwamaaha risaarö rerarwera nyansha, moghamba igha, ‘Imbura m-böngö eraatwe,’ na heene etwa. 55Na hano mwamaaha rikama rerahuusha ukurwa syömya, moghamba igha, ‘Reero orooha ndoraabhe-ho,’ na ni-igho ekobha. 56Bhëënyu m-baihunaania mörë. N-kwakë mokomanya bhuuya senkaagha isya omooka, kasi temokotora okomanyërrya ensonga iya amangʼana ghano ghakwikora reero eno hë?

Ukwighwerrana na umushöngëri

(Mataayo 5:25-26)

57“N-kwakë bhëënyu abheene motakwahokania amangʼana ko obhoheene? 58Enkaagha eno umushöngëri uwaaho akukuhira mo-bharasa, okore omotono ughwa ukwighwerrana nawe mökërëngë ko-nshera. Hano otaakore igho, naraakuhiki ku-mwahokania. Na umwahokania uyö, naraakuhire ku-musirikare, okore akösöhi kwa nguru mo-kebhohe. 59No-bhoheene nkökötëëbhya igha, tuurwe mo-kebhohe muyö hë, okohekera hano oremara okohaka isiirë yonswe igho.”

Currently Selected:

Ruuka 12: ssc

Highlight

Copy