Ruuka 4

Ukushaashwa ukwa Yëësu

(Mataayo 4:1-11; Maariko 1:12-13)

1Yëësu yaakyörrë ukurwa ko-mooro ughwa Yorodani aishööyë Umwika Ömöhörëëru. Akabha aratangatwa na Umwika Ömöhörëëru ku-riköngö iyö. 2Akaikara-yo sinsikö merongo ene Oghosambwa#4:2 Oghosambwa. Maaha mo-faharaasa. ghoramushaashya. Ku-sinsikö sengʼana hayö syonswe igho, tiyaarëëyë ëkëntö kyokyonswe igho hë. Hano syaahööyë akaighwa umweko.

3Oghosambwa ghokamötëëbhya igha, “Nyoore m-Moona uwa Waryobha örë, tëëbhya reghena reno riisyöri rebhe omokaate oraaghere.”

4Yëësu akaghohonshora igha, “Ti-igho hë, yandëkirwë mo-Maandeko Amahörëëru igha,

‘Ti-bhyakorya ibhyene igho, igha mbyo bhekohaana ömöntö öbhöhöru.’#4:4 Maaha mo-ketabho ikya Eheetoko iya Etoraati 8:3.”

5Hano ghayö ghaahööyë, Oghosambwa ghokamuhira ku-nguku entambë bhököngʼu, ghokamwörökya ibhyaro bhyonswe igho ibhya ko-kebhara kono, kamwë igho. 6Ghokamötëëbhya igha, “Nendaakohaane ubhwera ubhwa okotonga ibhyaro bhiyö bhyonswe igho, na ubhwamë ubhwamo. Ko bhoora ghonswe ghano nö-öni naahaanwa, ndatora okohaana ömöntö wowonswe igho, kya bhono nkutuna. 7Ku bhuyö hano oraanyaghamere onsaasaame, nendaakohaane ghonswe igho ghayö.”

8Yëësu akaghohonshora igha, “Mo-Maandeko Amahörëëru yandëkirwë igha,

‘Ni-igha osaasaame Omonene uwaaho Waryobha,

na ukumwighwera umwene igho.’ #4:8 Maaha mo-ketabho ikya Eheetoko iya Etoraati 6:13.”

9Ho Oghosambwa ghwaamuhirrë Yërusarëëmu, ghokamwimërrya kighörö iya ekenono ikya risengerro. Ghokamötëëbhya igha, “Nyoore m-Moona uwa Waryobha örë, irekera hansë ukurwa hano törëngë. 10Ko bhoora yandëkirwë mo-Maandeko Amahörëëru igha,

‘Waryobha naraatome abhamaraika abhaaye,

bhakorende,’#4:10 Maaha mo-ketabho ikya Zabhuri 91:11.

11“Na ghwiki igha,

‘Bhakogheghe mo-mabhoko aghaabho,

okore otakaashe wituuretuure kwe-ghena.’ #4:11 Maaha mo-ketabho ikya Zabhuri 91:12.”

12Yëësu akaghohonshora igha, “Yandëkirwë mo-Maandeko Amahörëëru igha, ‘Otakaashaashya Omonene uwaaho Waryobha.’ #4:12 Maaha mo-ketabho ikya Eheetoko iya Etoraati 6:16.”

13Hano Oghosambwa ghwaamarrë ukushaashya Yëësu, ghokamutigha, ghokaghya ukutuna umweya ughwöndë ughwa ukumushaashya ghwiki.

Yëësu araserwa waabho

(Mataayo 4:12-17, 13:53-58; Maariko 1:14-15, 6:1-6)

14Mbe, Yëësu akakyora mo-mokowa ughwa Ghariraaya aana obhotoro ubhwa Umwika Ömöhörëëru, na amangʼana aghaaye ghakaromaana bhököngʼu, mo-mokowa ughwa Ghariraaya yonswe igho. 15Akabha arëëghya abhantö mu-sinyumba isya esango iya Abhayahudi,#4:15 Inyumba iya esango iya Abhayahudi yo yaarenga inyumba iya okosangerania-mo Abhayahudi urusikö urwa Obhotooro bharasaasaama Waryobha. Maaha mo-faharaasa. abhantö bhonswe igho, mbaamötöönianga.

16Yëësu akaghya mu-mughi ughwa Nazarëëti ghono yaakëënëëyë-mo. Akasoha mu-nyumba iya esango iya Abhayahudi urusikö urwa Obhotooro,#4:16 Obhotooro ndo rwaarenga urusikö urwa ukumuunya. Waryobha yaabhömbirë iryobha na ekebhara na ëbhëntö ibhyëndë bhyonswe igho, ku-sinsikö isansabha, emeremo ighya okobhomba ghekahwa, kasi urusikö urwa muhungatë akamuunya. Maaha mo-faharaasa. kya igho eteemo iyaaye yaarë. Akaimerra asome Amaandeko Amahörëëru. 17Akahaanwa eketabho ikya ömörööti Isaaya. Akahonyora ahasë hano handëkirwë igha,

18“Umwika uwa Omonene Waryobha, hamwë arë na öni.

Anyahööyë ndaarekere abhatöbhu Amangʼana Amaiya.

Antömirë ndaarekere abhabhohe igha, mbaraahaaterwe ukurwa mo-kebhohe,

ntëëbhi na abhahukuru igha, mbaraamaahe,

nhaane öbhötöönööni bhano bhakunyankibhwa.

19Antömirë ndaareke enkaagha iya obhongʼoore ubhwa Omonene Waryobha.”#4:18-19 Maaha mo-ketabho ikya Isaaya 61:1-2.

20Hano yaahëkëëyë hayö, akakundikirya eketabho, akakikyörya kö-mököri uwa emeremo, akaikara, okore abhëëghi. Abhantö bhonswe igho bhano bhaarë mu-nyumba iya esango iya Abhayahudi, bhakamomaaherra. 21Ho yaasimiri okobhatëëbhya igha, “Amaandeko Amahörëëru ghayö mwighuurë ndasoma, ghahekeraini reero, kö-bhëënyu hano.”

22Hano Yëësu yaamarrë ukwëghya, abhantö bhonswe igho bhakasimya okomoghamba bhuuya. Amëëghyö aghaaye agha örööbhö ghayö, ghaaghërrë abhantö bhakamoroghoora bhököngʼu. Kora abhandë bhakabhoorania igha, “Kana! Ono ti-mumura uwa Yusufu?”

23Mbe, Yëësu akabhahonshora igha, “Nemanyirë mörëndëngërya ëkërëngyö keno igha, ‘Ore mörëri, otairera umwene.’ Ghwiki mörëntëëbhya igha, ‘Kora amakono mu-kishishi ikya wëënyu keno, kya ghano tukwighwa igha, waakora mu-mughi ughwa Kaperenaumu.’ ” 24Yëësu akabhatëëbhya igha, “No-bhoheene nkobhatëëbhya igha, taaho ömörööti ono akwikërribhwa mu-kyaro ikya waabho hë.

25“M-maheene igha abhasinö m-baaru bhaare-ho ko-nkaagha iya Ëriya, enkaagha eno imbura yaarëbhërrëëywë mu-ryobha, ekanga okotwa imyoka etatö na imyëri esansabha, inshara ëndörö kai, ekaromaana ikyaro ikighima ikya Isiraëri. 26Waryobha tiyaatömirë Ëriya ku-musinö wowonswe igho, uwa Isiraëri. Kasi yaatömirwë ku-musinö ömwë ono yaarenga Sareputa, mu-kyaro ikya Siidööni keno ketarë Isiraëri!#4:26 Maaha mo-ketabho ikya 1 Abhakama 17:1-24.

27“Na ghwiki bhaare-ho abhaghenge abhaaru mu-kyaro ikya Isiraëri, ko-nkaagha iya ömörööti Ërisha. Kasi taaho kora ömwë ono Ërisha yaahwënëri hë. Ono yaahwëniibhwi, n-Naamaani umwene igho, uwa mu-kyaro ikya Siria!”#4:27 Maaha mo-ketabho ikya 2 Abhakama 5.

28Hano abhantö bhano bhaarë mu-nyumba iya esango iya Abhayahudi bhaaighuurë amangʼana ghayö, bhakarerra bhököngʼu. 29Bhakeemoka, bhakamuruusya mu-mughi muyö. Umughi ghuyö, nku-nguku ghwahaghaashirwë. Bhakamuhira kö-ngëghëni iya inguku iyö, okore bhamuhuni ukughya hansë iyö. 30Kasi umwene akaibhaghaaghaania-mo ghatë, akaghya iyö akughya.

Yëësu araata risambwa ukurwa kö-möntö

(Maariko 1:21-28)

31Ho Yëësu yaatanööyë ukurwa hayö, akaghya mu-mughi ughwa Kaperenaumu, mo-mokowa ughwa Ghariraaya. Urusikö urwa Obhotooro, akasoha mu-nyumba iya esango iya Abhayahudi, akabha arëëghya-mo abhantö. 32Amëëghyö aghaaye, ghakabharöghöörya bhököngʼu, ko bhoora ngaarë na ubhwera.

33Mu-nyumba iyö iya esango iya Abhayahudi, yaare-mo ömöntö, ono yaarenga na risambwa. Ömöntö uwa risambwa uyö akakonga igha, 34“Uwe Yëësu uwa Nazarëëti, n-kë ukututuna-ko? Kasi wishirë igha utusiki? Nenkomanyirë igha, uwe nö-Möhörëëru uwa Waryobha örë!”

35Yëësu akahamera risambwa riyö igha, “Ukire kiri! Urwe kö-möntö ono.” Risambwa riyö, rekaghwësya hansë ömöntö uyö, bhamomaahërrëëyë, rekamurwa-ko retamunyahaarrë.

36Abhantö bhonswe igho, bhakaroghoora bhököngʼu, bhakabhoorania igha, “Bhamurë m-mangʼana kë ghano? Ko obhotoro na ku ubhwera ubhwaye, nkohamera arë amasambwa, kamwë igho, gharangʼosa!” 37Ku bhuyö, amangʼana agha Yëësu ghakaromaana bhököngʼu, mu-kyaro kiyö kyonswe igho.

Yëësu arahwënia abharööyë abhaaru Kaperenaumu

(Mataayo 8:14-17; Maariko 1:29-34)

38Yëësu yaaruurë mu-nyumba iya esango iya Abhayahudi, akaghya wa Simööni. Nyakubhyara uwaabho Simööni yaarë na ehooma ëndörö kai. Abhantö bhakasaasaama Yëësu igha amuhwëni.

39Mbe, Yëësu akemerra haangʼë na ömörööyë, akahamera ehooma, ekamohaatera. Akeemoka kamwë igho ukurwa kö-bhörrë, akabhatighinkanera.

40Hano iryobha ryaaghyanga okoghwa urusikö ruyöruyö urwa Obhotooro, abhantö bhonswe igho bhano bhaarenga na abharööyë abha amarööyë agha seteemo nsharu, bhakabhahira ku-Yëësu. Yëësu akabhasambekera amabhoko, akabhahwënia. 41Hamwë na ghayö, Yëësu akaata amasambwa, ukurwa ko-bhantö abhaaru. Hano ghaarwanga-mo ngaakoranga ikituri gharaghamba igha, “Uwe no-Moona uwa Waryobha örë!” Yëësu akaghahamera na akaghakaania ghatakaaghamba igho, ko bhoora ngaamomanyirë igha we Kiristo.

Yëësu arëëghya abhantö

(Maariko 1:35-39)

42Hano bhwaakëëyë, Yëësu akaghya ahasë hano ömöntö atarë. Abhantö abhaaru bhakabha bharamutuna kera ahasë, na hano bhaamunyöörrë, bhakamwangera igha, atakaatanora ukurwa hayö. 43Kasi Yëësu akabhatëëbhya igha, “Ni-igha ngende ku-mighi ighyëndë ghyonswe, okore mbaraarekere Amangʼana Amaiya agha Obhokama ubhwa Waryobha,#4:43 Obhokama ubhwa Waryobha, keno Yëësu yaatunanga okoghamba ni-igha, keno kikutunwa ko-obho, nu-kwitegherra Amangʼana Amaiya agha Obhokama ubhwa Waryobha. Ku bhuyö bhaisyörri Waryobha, na ukukumya Yëësu Kiristo omokama uwa mo-Bhokama ubhwa Waryobha, bhasohe mo-bhokama obhohya bhuyö. ko bhoora ghayö, ngo naatomwa igha nkore.”

44Mbe, Yëësu yëëghyanga abhantö mu-sinyumba isya esango iya Abhayahudi.

Currently Selected:

Ruuka 4: ssc

Highlight

Copy