Lik 1

Diilití kitipiyti Lik ma gaarti kabarre ta daana

1Giimi maani icce niyyane gu kitipiyɗiy gaartee Mellayi maa ga tattipe aattine. 2Guta pa jeppineegu saa tak aleŋ maa gu beneyyine gu giimi ma elle ma iɗiico min diiliti, guu deeɗe tasaaweetee beneyti Mellayi. 3Ay kaaka appe ga naata pa kulla diyyicca balco gaari kooko ma deero, gii deeɗiyaw daanaw oko naa, na kitipiyiyyamgu ma butulco gaari kooko, oko kii Teyopil ka nabbisenta. 4Keeke pa na leyya ku maa ki leeɗo kabarre kadar gi giraane maa ki gasse ay seene.

Taasití wiyawti Yaaya ma batasayya giimi

5Oko wikinne maa ga Erod alɗo sultan kiɗa ta Yudee, ga lekka gimu kaƴi aɗe ma ay soƴoowa ka saɗikaŋgeyyo maa gu semeetee goo Zakariya. Gata pa ay min durgu kaƴi ka balti Abiya#1.5 Abiya pa ay ka balti Harun. Guta pa eddenta durgee orooruwee seera o pooɗi (24) o gu soƴaa saɗikaŋgee aatti girti Mellayi. Elloŋ 1 Jeppico Gaarco Salaataŋgeyyo 24.7-19.. Zakariya pa lekka daatte. Gita pa gu semeeti goo Elizabet, gii alɗo ta balti Harun. 6Zakariya ma daatti tee Elizabet pa, ɗayaŋ serco unti Mellayi, o gu jobokkiy ta tirta teete hukumnigeetee Mella Miltine paracco, lekka ɗa ma gederra ga luumiyɗiy gaa gu jobokkiy ɗa. 7Guu alɗo lekka ɗa miica asan gi Elizabet ay doola o serco gu deero paaɗe baabaŋgee.

8Gaa meene kaƴi, maa gi kaabane ta sooƴiti saɗikaŋgeyyo asiyyee oko durgiti Zakariya, gaa Zakariya waciɗe ga lewɗiya lubbiti oko Mellayi. 9Aleŋ ta aadanco tee aɗe maa gu soƴoowee ku saɗikaŋgeyyo lewɗo jollo jollo ku maa gu gassiyya gimu ma deeɗiya igga dokkanne#1.9 Elloŋ Oomiti min Masir 30.7-8. ɗakko girti Mella Miltine, gaa durup galiyyee oko Zakariya. Ay ɗakko appe ga un̰n̰iɗe girti Mellayi, gaa kaatiɗe were ma duwenta oko Mellayi. 10Oko wikinne maa ga egeɗɗiya dokkane kaaka pa, gu giimi ku maani paracco waraɗɗe doorane ta girti Mellayi gu enewɗo Mella. 11Gaa ɗakko iŋaakite ga malaykati Mella Miltine oomiyyee oko Zakariya ma nussane ka tiyaawati were ka iggiti dokkanni#1.11 Elloŋ Oomiti min Masir 30.1-6 o 1 Salaataŋgee 7.48.. 12Maa ga Zakariya elliyya malaykat pa, gi kelemti oome, gaa ɓayaw galiyyee. 13Gaa malaykat kaaka beneyyiyyee gaa: «Addo ɓaya ɗa, Zakariya, asan ga Mella giyyica lollikicum. Daaccum tee Elizabet akkam wee miica, kii asiyyee oyya seme kii Yaaya. 14Ki akka dee parhinenta ta kaw, o giimi maani akka parhina oko wiyawti, 15asan ga akka dee gimu tatta unti Mella Miltine, o ga akka aar̰a ɗa bala gu mirmi ku mor̰mor̰oskeyyo o bala gu mirmi ma lekka muɗugu#1.15 Elloŋ Gemmico Giimi ku Isirayel 6.3., o ga akka dee unenta ma Ruuhanti Mellayi min maa ga alɗo missa aattí yaati. 16Gaa asiɗiy yooka Isirayelitnigee maani oko Mella Milco#1.16 Elloŋ Malasi 2.6.. 17Gaa Mella asiyya n̰aama ƴa omma ma Ruuhanti o ma gudirane maa ga nabiinice Eliyas lekke. Gata pa akkiy taaca gayyee ma ronco o ga asawko giimi ma jobokka ɗa ka Mellayi gi mooyico deeɗo ɗayaŋ, guu joobiyya kee ka Mellayi#1.17 Elloŋ Malasi 3.23-24.. Gata akkiy hassila giimi ku maa gu joobiyya Milco.»

18Gaa Zakariya beneyyiyyee oko malaykaddi gaa: «Na ebenna pe naa me, kadar ga beneycum keeke ay seene? Asan ni baabaŋguwee paaɗe ma daattu.» 19Gata pa tiiliyee gaa: «Naata gu semeetaw goo Gabiriyel#1.19 Elloŋ Daniyel 8.16, 9.21 o Lik 1.26.. Ay naa, ma waraɗɗa unti Mellayi. Haŋka pa, ga n̰aaminoo na asiyyam beneyya o na asiyyamca taasa kabarre ta daana teete. 20Gaa ki pa alɗe amanna ɗa oko beneyyiŋgeetaw ma akka asaa oko wikinnico maa ga Mella caaɗee. Kaaka pa, ga biicum ube, ki gederra ɗa payya ki beneyɗo ta kaw namma ya wikinne maa gu gaari kooko asiɗo asa butulco.»

21Oko wikinne kaaka pa, gu giimi ma nowotte gu ocoɗɗiya, ajjabbe oko dummiti Zakariya aatti were ka girti Mellayi ma duwenta oko Mellayi ka. 22Gaa maa ga oomiɗe pa, ga alɗo beneyya ɗa payya ta kaw, beneyya pe ma pittee ka. Gata gederra ɗa payya ga iyyiyya biiti. Guu giimi leeɗe kabarre kadar ga lekke maatiki aɗe maa ga elle aleŋ ma waano ɗakko aatti were ma duwenta oko Mellayi.

23Maa gu meenitee ka lubbiti Mellayi gaamiɗe, gaa yookiɗe giiri. 24Maa gu gaari kooko ƴiiliɗe, gii daatti tee Elizabet icciɗe aaɗi. Gaa koyye beeƴa gi alɗe ooma ɗa renta. Gii moyowɗo galbanti ka gee: 25«Mella Miltu aŋke ga cimmicca jaalo maa na lekka unco giimo, asan na waa ɗa. Keeke ay maa ga leyyaw.»

Taasití wiyawti Iisa

26Gaa oko kooyití Elizabet ma daa ta bizgiƴi maa gi alɗo ayyenta, ga Mella n̰aamiyya malaykat Gabiriyel geegar ka Nazaret ma aaye kiɗa ta Galilee, 27wikirtí gomosso kaƴi aɗe ma esee ɗa missa miiɗi maa gu semeeti goo Mariyam maa ga Yuusup ɓaaje. Yuusup pa ay ka balti sultan Dawud. 28Gaa malaykat deeɗica gassa, gaa beneyyitti gaa: «Iŋŋe, kante. Mella Miltine leete gidaanuwe o ga aaye ma kanta.» 29Guu beneyyiŋgeetee malaykaddi kotti rawriwicca ta tirta Mariyam. Gii moyowɗo galbantí ka gee: «Ayme ga salamɗino ma beneyyiŋgee aleŋ kooko?» 30Gaa malaykat beneyyitti gaa: «Addo ɓaya ɗa Mariyam, asan ga Mella gaariteega gidaanuwti. 31Ka akka dee ayyenta, kaa asiɗo wee miica. Kaa asiyyee oyya seme ka Iisa#1.31 Iisa pa gu kolaa ma sawaŋga goo Yaasu, o goo Yaasuwa ma beneyyi ka Ebireenigeyyo. Seme kooko pa goo ‘Mella najjayya’.. 32Gaa asiɗo dee tatta unti Mellayi o unco giimo, guu giimi deeɗiya kolowwo goo Runti Mella ka Uwwa ta kaw o ga Mella Miltine akkiya gaga were ka mulunniti ka kakaati kee sultan ka tatta kee Dawud. 33Gaa asiɗiy hikimiya giimi ku balti Yakub diiman o gi mulunniti gakamma ɗa ta kaw.» 34Gii Mariyam tiiliyyee gee: «Gaari kooko deewa pe goo me asan na esee ɗa missa miiɗi?» 35Gaa tiilitti gaa: «Ruuhanti Mellayi akkite beera, gii gudiranti Mella ka Uwwa ta kaw taggitte ma kelemtí. Ay ɗakko appe ga miica kaaka maa ka akka wee alɗo duwenta ta kaw oko Mellayi o gu akkiya joora goo Runti Mellayi. 36Ellu ƴa! Haŋka, gi Elizabet kulla ma ay gimaate ocokke wiyaw ta miica ka metta ma baabaŋguwtí kaaka aɗe. Giimi goo gi ay doola. Gaa haŋka pa, gi lekkiɗo paaɗe koyyee bizgiƴi maa gi alɗo ayyenta, 37asan ga oko Mellayi ga lekka ɗa maatiki ma begerree#1.37 Elloŋ Diilo ta Lawwi Paracco 18.14. Beneyyi keeke pa, ga Mella beneyyiya ma gaartee Biraayim ma daatti tee Sarra wikinne maa ga beneyyiyyoo gaa ga akkiyo bira miica caŋ gu baabaŋguwee kulla..» 38Gii Mariyam beneyyiɗe gee: «Naa ay lubaakati Mella Miltine, ga deyyaw aleŋ maa ki beneyye.» Gaa malaykat cappitti, gaa kaatiɗe.

Mariyam kataa ellití Elizabet

39Maa gi Mariyam leeɗe meeni minnaw, gii waciɗe gi icciyya botol ma yokko, gii katawɗo geegar kaƴi aɗe ka kiɗa ta Yudee, were ma lekka dambabbi. 40Maa gi sarɗe, gii un̰n̰iɗe girti Zakariya, gii salammicca Elizabet. 41Maa gi Elizabet giyyicca salammití Mariyam pa, ga miica ma aaye aattí wisse, gii Ruuhanti Mellayi unicca Elizabet, 42gii beneyyiɗe ma raɗɗa gee: «Mella baarikite min daati paracco, o ga baarikiya kulla miica ma aaye aatte! 43Naa appe soo ay we pe namma gu gaari ku samaane kooko deeɗaw, gi yaati Miltu saa asiyyaw oko naa! 44Ellu ƴa, wikinne maa na giyyicca salammite, ga miica ka aattu wisse ma parhane. 45Kaŋ baarikenta, asan ka amanne kadar ga Mella temmeyya beneyti maa ga beneyyite!»

Mariyam logokkaa Mella

46Gii Mariyam beneyyiɗe gee:

«Galbantu paratti logokka tattuwti Mella Miltu

47o gi unenta ma parhane,

saananti Mella ma ay Najjaayatu,

48asan ga aŋke ga daaliyyaw

maa ga ellinno naa lubaakati ka koyyenta#1.48 Elloŋ 1 Samiyel 1.11..

Min meente gu giimi ku wikinne paratti

akkaw beneyya goo na baarikenta paaɗe,

49asan ga gata ma ay Miltí gudiranti

leyyaw gaari ku samaane ta kaw.

Gata kayti ka ay Mella.

50Oko giimi ma karmayya pa,

ga kawayyayo wikinne paratti.

51Gata pa gaarica gudiranti ma ammuwti ka tirta,

o ga ticiliy maaƴi giimi maa gi mooyico esekkay koolipiti.

52Gata berriy salaataŋgee min wereeriyeeco ku mulunniti,

gaa gagiɗiy uwwa giimi ma cepelliy ɗa kayyeeco.

53Ku mayyeeta pa, ga biryoo tiyaw gu ayyiɗe

guu ayaawee ga pittiɗiy ma picco ku orro.

54Gaa moogiɗiy giimi ku Isirayel,

guta ma ay lubaakeetee.

Gata pa ya haŋka kulla,

ga rawatta ɗa ga kawayɗiyo.

55Ay keeke appe, ay maa ga beneyye gaa ga akkiyooga lee

oko kookuweetine koo ini Biraayim

ma ronco rontee ya diiman.»

56Maa gi Mariyam gaamiyya beneytí keeke, gii nuntiɗe ma Elizabet latta ka koyyee subba, gii yookiɗe giiri.

Wiyawti Yaaya ma batasayya giimi

57Wikinnití Elizabet kee ka wiyaawi aseero, gii weeɗe miica ka metta. 58Guu bakeeti o gímtí leeɗe kabarre kadar ga Mella Miltine leeti latta tatta ma garaa kadar ga elle ta tirta saamuwtí. Guu parhinɗe ma gita. 59Gii meene ma daa ta poppoɗi gu asiɗe ku maa gu asiyyee taharra oko miici#1.59 Elloŋ Soƴoowee ku Saɗikaŋgeyyo 12.3.. Guu aŋkiɗo gu oyyiyyee seme ku tatti ma goo Zakariya. 60Gii yaati pa gee: «Kaw, gata gu akkiya kolaa goo Yaaya!» 61Guu tiilitti goo: «Lekka ɗa min oko gayyeete gimu maa gu semeetee goŋŋa!» 62Mileŋ ga tatti ay duwiya missa pa, gu inniya ma picco ku maa gu ibinɗo baŋ ga aŋka ga oyyiyyee seme gaa me. 63Gata pa inne loohane ku maa ga kitipiyɗiy semeetee miici. Gaa kitipiyɗe gaa: «Semeetee goo Yaaya.» Gaa paracco gu ajjibiɗe. 64Gaa oko wikinnico kaaka saa, ga Zakariya ga biiti iyyiɗe ga beneyɗo. Gaa logoɗɗiya Mella ma raɗɗa. 65Gaa ɓayaw galiyyo oko bakeeco paracco, o oko giimi ku wereeriyee paracco, guu beneyɗiy gaari kooko paracco ma deero kiɗa ta Yudee were ma lekka dambabbi. 66Guu giimi paracco ma giyyiy gaari kooko moyowɗiy o gu reeway galbigeeco, o gu enaa aacco goo: «Miica keeke akka dee pe ini me miicata?»

Gata keeke gi gudiranti Mellayi aaye ma seene ma gata.

Zakariya logokkaa Mella

67Gaa Zakariya tatti Yaaya deeɗe unenta ma Ruuhanti Mellayi. Gaa diiliɗe ga beneyɗo beneyyiŋgee ma asaa min Mellayi gaa:

68«Logokkineega Miltine,

Mella ka Isirayel,

asan ga ase moogico gimtee,

ku maa gu gassiɗiy kayyeeco.

69Gata cimmine najjaya ma lekka gudirane,

min aacco ronco rontee sultan Dawud, ma ay lubaakati.

70Keeke pa, ay maa ga beneyye min tippa

ma nabiinigeetee.

71Gata pa beneyyine gaa ga akkine najjiya

min oko giimi ma aŋkine ɗa

o min oko picco giimi ma ɗakattinee.

72Ma kaaka pa, ga elle kulla saamuwco oko kookuweetine,

o ga moyaaca liŋganti maa ga onne ma guta.

73A gata pa Mella timmiya beneyti kee

maa ga halpayyiki oko kaakatine kee Biraayim

ma gaa ga leeweneega#1.73 Elloŋ Diilo ta Lawwi Paracco 22.16-17..

74Gata pa gaa ga cemekkane min picco giimi ma aŋkine ɗa,

ku maa ke aabidiyya bala ɓayaw,

75ku maa ke nuntiɗo salan̰ bala er̰n̰e unti,

o ke deeɗo ɗayaŋ unti, meenitine parattí.

76A kii runtu pa gu akkum kolowwo goo

nabiiniciti Mella ka Uwwa ta kaw,

asan ki akka tan̰n̰a ƴa omma

ki paniyyeegu bottoltee Miltine#1.76 Elloŋ Malasi 3.1.,

77o ki gaariyyooga oko gimtee kadar ga najjayyay

ma saamiyo ta zunubgeeco.

78Mella kawayyeene ma kaawo.

Gata akkineega paca were racal min uwwa,

aleŋ paato ma ecekka,

79ku maa gi beeriyyo oko giimi ma aaye aatti namtuwwi

were maa ga muutu ocoɗɗiy.

Gaa kaatikkine ke tan̰n̰iɗo botol ka aapiyati#1.79 Elloŋ Esaya 9.1..»

80Gaa miica maɗawɗo o ga dewɗo ka ta ƴiila niyyenta. Gaa deeɗo nunta wereeriyee ku goosigeyyo namma ya wikinne maa ga asiɗo gaara ziiti unco giimi ku Isirayel.

Currently Selected:

Lik 1: mmy

Highlight

Copy