Lik 4

Seetanne cokokkaa Iisa

(Elloŋ Matiye 4.1-11, Mark 1.12-13)

1Gaa maa ga Iisa deeɗe unenta ma Ruuhanti Mellayi, gaa yookiɗe min ƴiiro ta Yurden, gii Ruuhane taata kaatikki kayni o gi gawwiɗiya 2orooruwee pooɗi meeni. Oko wikinne kaaka pa, ga Seetanne sekelkiliya. Gaa oko meeni kotti, ga alɗe tee ɗa ya maatiki. Maa gu meeni kotti ƴiiliɗe, gii maya deeɗiya. 3Gaa Seetanne beneyyiyyee gaa: «Gaa ay ma seene aɗe goŋŋakite ki ay Runti Mellayi, ki beneyyee oko dambu ka roota keeke ga deeɗo mappa.» 4Gaa Iisa tiiliyyee gaa: «Kitamniti Mellayi beneyye gee ga gimu nowotta ɗa ma mappa ka#4.4 Elloŋ Ɗillico Hukumnigeyyo 8.3..»

5Gaa Seetanne kaatikkiki Iisa uwwa were ka siƴƴa jeɗeŋ. Gaa oko wikinnico kaaka saa, ga gaariyyeegu mulunnigee paracco ku dunuuniti. 6Gaa beneyyiyyee gaa: «Gudirane o ayaawi ku mulunnigee kooko pa birenta oko naa o na beray oko gimu maa na aŋka ka. 7Kii darse untu ki aabidinno, na beramgu kooko paracco, gu deeɗo kuncam.» 8Gaa Iisa tiiliyyee gaa: «Kitamniti Mellayi beneyye gee ki aabidu Mella Milcum o ki lobokkee oko gata ka.»

9Gaa Seetanne kaatikiki geegar ka Zerizalem, ga deeɗiya wirra curumti girti Mellayi. Gaa beneyyiyyee gaa: «Kii ay Runti Mellayi aɗe goŋŋakite, ki loogu kiɗaati min iŋee, 10asan gi Kitamniti Mellayi beneyye gee ga Mella beneyyayo oko malaykatnigeetee gu tarɗum#4.10 Elloŋ Soom 91.11.. 11Gita beneyye kulla gee: “Gu malaykatnigee acappam picco ku maa ga asincum alɗo ɓaaca ɗa dambi#4.11 Elloŋ Soom 91.12..”» 12Gaa Iisa tiiliyyee gaa: «Kitamniti Mellayi beneyye kulla gee ki cokokkaa ɗa Mella Milcum#4.12 Elloŋ Ɗillico Hukumnigeyyo 6.16..» 13Maa ga Seetanne gaamiɗe cokkiti Iisa ma garrarri paracco, gaa tirriyɗe arro minnanti namma ya wikinne kaƴi ma wagee.

Iisa delaa lubbiti kiɗa ta Galilee

(Elloŋ Matiye 4.12-17, Mark 1.14-15)

14Gaa Iisa yookiɗe kiɗa ta Galilee, unenta ma gudirane ta Ruuhanti Mellayi. Guu giimi beneyɗo ma gaartee kiɗa taata parattí. 15Gaa garawɗo gaartee Mellayi gerraco Yawudigeyyo ku giraaniti. Guu giimi paracco logoɗɗiya.

Iisa gu pocaa Nazaret

(Elloŋ Matiye 13.53-58, Mark 6.1-6)

16Gaa Iisa kaatiɗe geegar ka Nazaret were maa ga maɗawɗe. Gaa ma meene ta nambiti ga deeɗe un̰n̰a girco Yawudigeyyo ka giraaniti, aleŋ maa ga leewa kee aɗe diiman. Gaa waciɗe ku maa ga garkiyɗo Kitamniti Mellayi. 17Gaa gimu ma dommoyyiy kutubgee biryeeca kitamniti nabiinice Esaya. Gaa Iisa ipiricca min kutumtí, ga gassiya were maa gu ketepeyɗe goo:

18«Ruuhanti Mella Miltine aaye ma naata,

o ga Mella apirnoo na taasiyyooca kabarre ta daana oko giimi ku saamo,

o ga n̰aaminoo na beneyyiyyo oko giimi ma aaye daŋayi kadar gu capakkayo,

o oko giimi ma ay koor̰ee kadar gu eyaa,

o ga n̰aaminoo ku maa gu giimi maa gu gagakkiyo suuruwe gassiɗiy kayyeeco,

19o ga n̰aaminoo ku maa na taasicca ƴila maa ga Mella Miltine asiyya gaara gidaanuwti#4.19 Elloŋ Esaya 61.1-2..»

20Maa ga gaamicca giraane teete, gaa kutumicca kitamne taata, ga biriyyeca oko gimu kee ma dommoyyiy kutubgee, gaa nuntiɗe ga garkayɗiy. Guu giimi kotti paracco ma aaye iŋaa ger kaaka elelɗiya ƴoy, guu ocoɗɗo gu giyyiya beneyti. 21Gaa beneyyiyyoo gaa: «Wikirti Kitamniti Mellayi maa na garkiye keeke haŋka ku giyyiyya, gata aseero paaɗe butulti meente.» 22Gaa paracco gu beneyɗo samaane ma gaartee Iisa, o gu ajjibe oko beneyyiŋgeetee ku gidaanuwti Mellayi ma okomma min biiti, goo: «Keeke ay runti Yuusup ɗa aɗe e?» 23Gaa Iisa beneyyiyyoo gaa: «Ma seene ku akkinawca taala masal teete kuu: “Daktor, dawwiyu kayaacum”, o ku akkinaw beneyya kulla kuu: “Ni leyyoo kabarre oko gaari paracco maa ki leelo geegar ka Kaparnawom. Haŋka pa, ki leyyiy iŋee kulla geegarcum.”» 24Gaa Iisa beneyyiɗe payya gaa: «Na beneyyatoŋca seene: Nabiinice gu giimi ku darriti jobaa ɗa samaane. 25Na beneyyatoŋ payya ma seene: Wikinniti nabiinice Eliyas, gu kur̰aar̰ee deero maani kiɗa ta Isirayel. Wikinne kaaka pa, gu ammi n̰aawe ɗa ƴilaakee subba o nussane, gii maya yaata galɗe kiɗa parattí#4.25 Elloŋ 1 Salaataŋgee 17.1.. 26Mella pa n̰aamiya ɗa Eliyas oko ya kaƴi min oko kur̰aar̰ee kotti. Gata n̰aamiya soo oko kur̰aar̰a kaƴi ta geegar ka Sarepta ma aaye kiɗa ta Sidon#4.26 Elloŋ 1 Salaataŋgee 17.8-16.. 27Lekke kulla majaddimnigee maani kiɗa ta Isirayel oko wikinniti nabiinice Elizee, gaa alɗo lekka ɗa soo ya kaƴi min aacco maa ga rayyiɗe ga deeɗe samaane unti Mellayi. Illa ay Naama ka, ka kiɗa ta Sirii#4.27 Elloŋ 2 Salaataŋgee 5.1-14..»

28Guu giimi paracco ma aaye girco Yawudigeyyo ka giraaniti unɗe ma bogor maa gu giyyiɗiy beneyyiŋgeetee kotti. 29Guu waciɗe, gu cimmiyya renta min geegarri, gu kaatikki curumtí jappe maa gu gekewɗiya geegarco, asan gu aŋka gu n̰aamiyya ga galɗo kiɗaati. 30Gaa Iisa peetiɗe ma aacco iŋaa aɗe, gaa kaatiɗe.

Iisa rayyadda gimu maa ga aarinne deegeyye

(Elloŋ Mark 1.21-28)

31Gaa min iŋaa, ga Iisa kaatiɗe geegar ka Kaparnawom ma aaye kiɗa ta Galilee. Gaa ma meene ta nambiti, ga garkayɗiy giimi girco Yawudigeyyo ka giraaniti. 32Guu giimi ajjabɗiyee ta tirta oko giraaniti taata, asan ga garkayyay ma beneyyiŋgee ma galaa. 33Gaa iŋaa ger ka giraaniti kaaka, ga lekkiɗo gimu maa ga aarinne deegeyye. Gaa waciɗe ga cayyakɗo ma raɗɗa ta tirta gaa: 34«Wayyawwee Iisa ka Nazaret, ki aŋkini ini me? Ki asee ɗa ka ɗeɗe bittitini? Na lekka kabarre tak kadar ga kiita ay gata maa ga Mella n̰akamme!» 35Gaa Iisa makkiyyee oko aarinne kaaka gaa: «Ƴaapu gonek! Oomu min oko gimu keeke!» Gaa aarinne baagiyya gimu kaaka kiɗaati daɗɗakkico giimi paracco. Gaa oomiɗe min oko gata o ga leyyee ɗa ya maatiki ka miɗɗa. 36Gaa paracco ga ɓayaw galiyyoo. Guu beneyɗo aacco goo: «Beneyti gimu keeke ay ini me beneyta? Gata makakkayo oko awaaradgeyyo ma beneyyiŋgee ma galaa o ma lekka gudirane, guu okomɗo!» 37Guu giimi beneyɗo were paratti ma gaartee Iisa.

Iisa rayyadda giimi maani ma parayya

(Elloŋ Matiye 8.14-17, Mark 1.29-34,35-39)

38Gaa Iisa waciɗe ga oomiɗe min girco Yawudigeyyo ka giraaniti, gaa kaatiɗe girti Simo. Yaatí daatti Simo pa, ga ziití koɗosse ta tirta teete. Guu giimi inniyya Iisa goo ga rayyidica. 39Gaa Iisa daalitti, gaa beneyyiyyee ma makko oko parayti ka kuɗisiti ziití kaaka gaa ga duwaati. Gaa duwitti. Gii waciɗe parat gii joobiɗiy samaane ini Iisa ma jobookeetee.

40Gaa maa gi paato galɗe gu giimi paracco ma deegeyye ma paraayiŋgee pay pay gu gimco itiriyyeegu oko Iisa. Gaa gagiyyeegu pittee oko kulla kaƴi aɗe min aacco, guu rayyidiɗe. 41Guu awaaradgee oomiɗe kulla min oko giimi maani ma parayya o gu kawwakka goo: «Kii ay Runti Mellayi!» Gaa Iisa makkiyyoo o ga toɗɗiyoo gaa gu addo beneyya ɗa asan gu ibinya kadar ga gata ay Masi, gata maa ga Mella aparre.

42Gaa maa ga were walɗe, gaa Iisa oomiɗe min geegarri gaa kaatiɗe kayni were ma lekka ɗa gimu. Guu giimi maani deyeɗɗiya wikirti maa ga kaatiɗe. Gaa maa gu gassiyya gu aŋkiɗo gu toɗɗiyyee, ku maa ga alɗiyo utta ɗa. 43Gaa Iisa pa beneyyiyyoo gaa: «Ay tirta na taasicca kabarre ta daana ta mulunniti Mellayi oko giimi ku gawaagargee daare kulla, asan ga ay oko keeke appe, ga Mella n̰akamɗinoo.» 44Gaa Iisa tasawɗica gerraco Yawudigeyyo ku giraaniti koo ku kiɗa ta Yudee.

Currently Selected:

Lik 4: mmy

Highlight

Copy