Lik 5

Iisa kolay jobookee ku omma

(Elloŋ Matiye 4.18-22, Mark 1.16-20)

1Gaa meene kaƴi, ga Iisa alɗo goŋgomnití baharre ta yaata ta Zenezaret#5.1 Baharre ta Zenezaret gu kolaaca kulla goo Baharre ta Galilee.. Guu giimi maani asiyya kadira gu seƴewɗiya ku maa gu giyyiɗo beneyti Mellayi. 2Gaa Iisa elliɗe markabanigee seera goŋgomnití baharriti. Markabanigee#5.2 Markabanigee ku ɗebbiti kotti pa, ecekka giimi bizgiƴi e baŋ pa orro o seera. kotti pa, gu ɗebeekee berre min aacco gu kaatiɗe apilco sippanigeeco ku ɗebbiti buuso. 3Gaa Iisa kalpiɗe kaƴi min markabanigee kotti ma ay tanti Simo. Gaa inniyya Simo gaa ga saapica paalta ta ɗakko min goŋgomni. Gaa nuntiɗe, ga garkayɗiy giimi.

4Maa ga Iisa gaamicca giraaniti taata, gaa beneyyiyyee oko Simo gaa: «Saapica markaba oko were maa gu ammi alɗo siƴƴa. Gaa ma giccam ku dawwiɗiy sippanigeetoŋ ku ɗebbiɗo buuso.» 5Gaa Simo tiiliyyee gaa: «Tattuwtu, ni diigiye ɗebbiti aandoŋ keeke paratti, nii alɗe gassa ɗa ya maatiki. Haŋka pa, mileŋ ki beneyyiyaw, ga ma gittaw ni dawakkay.» 6Guu dawwiɗiy sippanigeeco, guu tiiriɗe buusi maani namma gu sippanigeeco diiliɗe reppo. 7Guu kolliɗiy ma picco gicco ma aaye markaba kaƴi ku maa gu asiɗiy gaaya cimmico buuso. Guu onniɗiy markabanigee ku seera kotti ta jelet jelet ma buusi namma gu markabanigee serco aŋkiɗo kattiso ammo. 8Maa ga Simo Piyer elliyya liyaw kaaka, gaa darsiɗe markabati unti Iisa ga beneyyiyyee gaa: «Saapu arro min sariptu, Miltu, asan ga naa ay gimu ma leewa zunubgee!» 9Gata pa beneyyiyee goŋŋa asan ga ma gittee ga ɓayaw galiyoo maa gu tiiriɗe buusi maani ta kaw. 10Ya gittee Simo koo ini Zak ma sinti kee Yaaya ma ay rontee Zebedee kulla ɓaye. Gaa Iisa beneyyiyyee oko Simo gaa: «Addo ɓaya ɗa, min meente ki teraa ɗa payya buusi, ki deeɗo terewwo pe giimi.» 11Maa gu asikkiko markabanigeeco goŋgomni, guu cappiyyoo oko lawco paracco, guu jobbiyya Iisa.

Iisa rayyadda gimu ma lekka judaam

(Elloŋ Matiye 8.1-4, Mark 1.40-45)

12Gaa lekkiɗo meene maa ga Iisa alɗo geegar kaƴi aɗe, gaa miiɗi maa ga ziiti paratti n̰oppoyye ma judaam asiyyee. Maa ga elliyya Iisa, gaa darsiɗe unti ga weeciyya unti kiɗaati, gaa wakkiyya gaa: «Miltu, kii aŋka ki gederra ki rayyiddinno na deeɗo samaane unti Mellayi.» 13Gaa Iisa n̰aamiyya pitti ga eesiyya, gaa beneyyiyyee gaa: «Haa, na aŋka. Dee samaane unti Mellayi!» Gaa ma haŋka keeke aɗe saa ga judaamti cappiyyee. 14Gaa Iisa beneyyiyyee gaa: «Warru maaƴi! Addo beneyya ɗa ya oko gimu kaƴi. Addo soopa ki deeɗeega gaara ziicum oko soƴoowa ka saɗikaŋgeyyo, gaa ellum pa, gaa sooƴiɗo saɗikane aleŋ maa ga Muusa beneyye Kitamniti#5.14 Beneyyi ku gaartee judaammi kooko pa ku gasakkay Soƴoowee ku Saɗikaŋgeyyo 14.2-32.. Ay goŋŋa appe ki gaariyyo oko giimo kadar ki rayyide ki deeɗe samaane unti Mellayi.» 15Gii kabarriti Iisa tacalɗo ka ta ƴiila. Guu giimi maani asawɗo gu temeɗɗo ku maa gu giyyiyya beneyti o ga rayyidiɗiy min paraayiŋgeeco. 16Gaa Iisa soopa kaatiɗe wereeriyee ma lekka ɗa giimi, gaa enewɗiya Mella.

Iisa rayyadda ruŋguyne

(Elloŋ Matiye 9.1-8, Mark 2.1-12)

17Gaa meene kaƴi payya maa ga Iisa nowoɗɗe ga garkayɗiy giimi, guu Pariziyennigee o aalimnigee ku Kitamniti Muusa alɗo saripti. Guta pa asaa min diyargee paracco ku kiɗa ta Galilee o ta Yudee o min geegar ka Zerizalem. Gii gudiranti Mella Miltine alɗo ma gata ga rayyaɗɗiy ma parayya. 18Guu lekkiɗo giimi ma ɗeɗee ruŋguyne tarmati ma ase. Guta pa deyekke gu issiyya giiri, guu asiyya suuba unti Iisa. 19Guu alɗe gassa ɗa were ka ƴiiliti asan gu giimi kotti maani pile. Ay kaaka appe gu kalpikkiki uwwa kayaati daŋayi, guu noomiɗe buule iŋaa, guu onnicca tarma ma seppe, guu beeriyya unti Iisa ɗaɗɗakkico giimo. 20Maa ga Iisa elliɗiy gaarco kotti pa, ga leelo kabarre kadar gu dowwiy galbigeeco oko gata. Gaa beneyyiyyee oko ruŋguyni gaa: «Lanjintu, na saamiyamgu zunubgeecam.»

21Guu aalimnigee ku Kitamniti Muusa o Pariziyennigee moyowɗo ma galbigeeco ka goo: «Ay me gimta keeke ma n̰elekkaa Mella? Ay we ma gederra ga saamiyɗo zunubgee? Lekka ɗa. Illa ay Mella kayti ka!» 22Gaa Iisa soopa ibinicca mooyico taata, gaa beneyyiyyoo gaa: «Ayme ku moyowɗo goŋŋa galbigeetoŋ? 23Min oko beneyyiŋgee ku seera kooko maa naa: “Na saamiyamgu zunubgeecam”, e baŋ ga maa naa: “Wacu uwwa, kii tan̰n̰iɗo”, ay ŋawwa ma raɗɗa ɗa ƴiila? 24Naa pa garaatoŋ ku maa ku ibinɗo kadar ga Runti Gimi lekka gudirane kiɗaati maa ga saamayɗiyoogu zunubgeeco giimo.» Gaa beneyyiyyee oko ruŋguyni gaa: «Na beneyyam: Wacu! Iccica tarmacum, kii yookiɗo gircum!» 25Gaa koɗok ga ruŋguyne waciɗe unco giimi paracco. Gaa iccicca tarmati maa ga oƴowɗe, gaa yookiɗe girti o ga logokkaa Mella. 26Guu giimi kotti paracco ajjibiɗe ta tirta, guu logoɗɗiya Mella ma ɓayaw goo: «Ni elle meente gaari ku ajjibiti ta kaw!»

Iisa kolaa Leebi

(Elloŋ Matiye 9.9-13, Mark 2.13-17)

27Maa gu gaari kooko ƴiiliɗe, gaa Iisa oomiɗe min iŋaa, gaa elliɗe gimu kaƴi aɗe ma sokokka miiri. Gimu kaaka pa gu semeetee goo Leebi. Gata pa nowotte ger maa gu peleɗɗo miiri. Gaa Iisa beneyyiyyee gaa: «Jobbino!» 28Gaa Leebi waciɗe ga uttiyyo oko lawtee paracco, gaa jobbiyya Iisa. 29Gaa Leebi leeɗiyee tiyaw maani ku maa ga joobiyya girti. Guu giimi maani ma ay sokookee ku miiri o giimi daare, alɗo ma guta tiyaawi. 30Guu Pariziyennigee ma gicco aalimnigee ku Kitamniti Muusa ŋor̰omr̰omɗiyo oko jobookeetee Iisa goo: «Ayme ku tewɗo o ku ar̰aa ma sokookee ku miiri o ma giimi daare ma leewa zunubgee?» 31Gaa Iisa tiiliyyoo gaa: «Giimi ma parayya ɗa aŋka ɗa payya daktor. Ay ma parayya soo aŋka. 32Na asee ɗa na asiɗo kolla giimi ma ɗayaŋ unti Mellayi. Innasoopa na asee na asiɗo kolla giimi ma ibina kadar gu leewa zunubgee, guu meeliɗiy gaarco ku miɗɗa, guu deeɗo ɗayaŋ unti Mellayi.»

Iisa beneyya ma gaari ku samkiyti

(Elloŋ Matiye 9.14-17, Mark 2.18-22)

33Guu Pariziyennigee beneyyiyyee oko Iisa goo: «Jobookeetee Yaaya ma batasayya giimi samkayya aɗe goŋŋa diiman, maa guu lollokkaa Mella, o jobookeetini kulla leewa goŋŋa. A jobookeecam soopa, guta teewa o gu ar̰aa kanco!» 34Gaa Iisa tiiliyyoo gaa: «Meene ta jiizanti, ku gederra ɗa ku asarriɗiy lanjigeetee oko gimu maa gu jawwazze gu samkiyɗo oko wikinne maa gaa maa gu jawwazze aaye missa aacco! Kaw, samkayya ɗa! 35Innasoo ga wikinne akka asa maa gu giimi asiyya cimma min aacco maa gu jawwazze. Ay oko wikinne kaaka pe guu asiɗo samkiya.»

36Gaa Iisa beneyyiyyooca kulla masal teete gaa: «Lekka ɗa gimu ma gederra ga eeriɗo min kaɗiyyu ka marawta, gaa uwwiyya ka raawenta. Goneka kee, gi eraa ka marawta, gii uwwiti alɗo wagaa ɗa ma ka raawenta. 37Lekka ɗa kulla gimu ma kalaa mirmi ku marawta aɗicco oko seheŋgee ku raawenta#5.37 Yawudigee pa, oko aadanco gu kalay mirimco aɗicco seheŋgeyyo aleŋ ta migaamo maa gu kalawɗiy mirimco kuɗuŋgeyyo.. Goneka kee gu mirmi ku marawta ma wacakka daaɓanco baɗassay seheŋgee ku raawenta. Guu pottiɗo kiɗaati o seheŋgee nagakka. 38Haha, kaaka daa ɗa! Aŋka ku kalliɗiy mirmi aɗicco seheŋgee ku marawta. 39A giimi ma megesse gu ar̰awɗo mirmi ma neewe appe pa, aŋka ɗa ma wacakke dabanco. Guta kotti beneyya pe goo gu ma neewe daana ƴiila.»

Currently Selected:

Lik 5: mmy

Highlight

Copy