Matayo 16
16
Eing'oru Lparisayo o Sadukayo nkitodolunoto
(Marko 8:11–13; Luka 12:54–56)
1 #
Mat 12:38; Luka 11:16 Nepuonu Lparisayo o Sadukayo netii Yeso aatem. Neomon ꞉ninche ninye meitoduaa nkitodolunoto naing'uaa chumata.
2Newoliki ajoki,#16:2 Meata mpala e apa mbata e lkereri le oare o lkereri le okuni pooki. <<Kore payie eaku teipa nijoijo, <Keisupat anapar seer amu kedoruta nkeper e nkai,> 3naa kore te siran nijoijo, <Kelotu anapar girrarri amu kedoruta, nenukuta.> Kore ntae, niyielolo aaibonu nejo nkeper e nkai kake nimiyielolo aaibonu nkitodolunot ee ng'amat. 4#Mat 12:39; Luka 11:29Ltung'ana le mpukunoto torno o le mpukunoto nemeata nkurukoto! Iyiaya nkitodolunoto e nking'asia, kake meatae naichori ntae, mara ake nkitodolunoto e Yona.>> Nelamari Yeso aing'uaa ninche.
Mukate kini naisiicho
(Marko 8:14–21)
5Kore payie ebaya Yeso o looiteng'eni lenyena ildo kokun le mpaso, nerikino looiteng'eni eitu enap mukateni. 6#Luka 12:1Nejoki ꞉Yeso ninche, <<Eng'ura, nirritata ate te nkini mukate naisiicho ee Lparisayo o Sadukayo.>>
7Neiro maate aajo, <<Mikiata mukateni.>> 8Kore tankaraki nayielo Yeso mparrunot enche, neipar ajoki, <<Ntae oaata nkurukoto kini, aanyo pii iroritata maate tankaraki nimiatata mukateni? 9#Mat 14:17–21Ewuon ake mining'ung'u? Amaa, miparrurru naapa mukateni imiet too ltung'ana nkalupuni imiet, o naapa kikapuni kumo nitumo? 10#Mat 15:34–38Anaa sii naapa mukateni sapa taa laapa tung'ana nkalupuni ong'uan o nkikapuni kumo nitumo? 11Aaku mining'ung'u aajo mara mbaa ee mukateni airorita? Kake errita ate to mukate kini naisiicho ee Lparisayo o Sadukayo.>> 12Kore inia kata, neyielou ꞉ninche aajo kore rerei lenye oipirita mukate kini naisiicho, naa meipirita ntoki naitibirieki mukate kake nkiteng'ena ee Lparisayo o Sadukayo eipirita.
Eibalunyie Petero nchere kera Yeso Mesia
(Marko 8:27–30; Luka 9:18–21)
13Kore payie elotu Yeso mbata e lkerenket le Kaisaria Pilipi, neipar looiteng'eni lenyena ajoki, <<Amaa Nkerai e Ltung'ani, kejo ltung'ana ng'ae era?>>
14 #
Mat 14:1,2; Mrk 6:14,15; Luka 9:7,8 Newoliki aajoki, <<Ketii loojo Yoana Laipatisani, nejo lkulie Elija, netii sii lkulie oojo Yeremia anaa lobo loo loibonok le Nkai.>> 15Nejoki, <<Oo ntae, ijoijo ng'ae ara nanu?>>
16 #
Yoa 6:68,69 Newoliki ꞉Simon Petero ajoki, <<Ira iyie Mesia, Nkerai e Nkai naichu.>>
17Nejoki ꞉Yeso, <<Imayiana iyie Simon layieni le Yona, amu mara ltung'ani likimbalakinyie ana, kake Papa lai oti chumata likimbalakinyie. 18Naa kaajoki nchere ira iyie Petero,#16:18 Kore Petero naa ndadapoi to nkutuk ee Yeso. naa te nkeper e ana dadapoi achet nkanisa ai,#16:18 Kore nkanisa naa keipirita lturrur loo ltung'ana oiruko Yeso. nememir ninye ꞉ngolon e nemeneng'a. 19#Mat 18:18; Yoa 20:23Kaaicho lboleta le nkitoria e chumata, paa kore ntoki nien to nkop naa keena abaki te chumata, naa kore nilaku to nkop naa kelakuno sii te chumata.>> 20Neitanap looiteng'eni lenyena ajoki payie meliki ꞉ninche hoo ltung'ani aajo kera ninye Mesia.
Etilimua Yeso lkiye o mpiunoto enye
(Marko 8:31–33; Luka 9:22)
21Kore ang'asu inia kata, neng'asu Yeso aliki looiteng'eni lenyena nchere meata ajo melo Yerusalem, nemeata ajo metum sina taa nkaik ee lpayiani kutuaa o lkutuaa laa laitainok la lasar o laiteng'enak loo nkitanapat, nemeata ajo meri metua, kake kore ta mparri e uni, neitipiuni.
22Neicho ꞉Petero, neya ninye aitalam lkulie, neng'asu akusakan ajoki, <<Laitoriani, mikintopong'o ꞉Nkai! Mikipukoki aikata inia!>>
23Nemerregela Yeso nejoki Petero, <<Chomo tesiedi nanu Chitani! Ira rruachet ai, amu mara mbaa e Nkai iparraa, kake mbaa e ltung'ani.>>
Mbaa naagol naatum ꞉lolo ooirukurukore Yeso
(Marko 8:34—9:1; Luka 9:23–27)
24 #
Mat 10:38; Luka 14:27 Kore te inia kata, nejoki ꞉Yeso looiteng'eni lenyena, <<Tenetii ltung'ani oyieu naairukurukore, nchoo emiki koon, nenap lmusalaba lenye naairukurukore. 25#Mat 10:39; Luka 17:33; Yoa 12:25Amu kore loyieu neitejeu nkichui enye, neiminie, naa kore loiminie nkichui enye tankaraki nanu, netum. 26Naa amaa, kaa dupoto kenya etum ltung'ani, tenetum nkop pooki, kake neiminie nkichui enye? Anaa nyo eichooyo ltung'ani aitapaachie nkichui enye? 27#Mat 25:31, SNk 62:12; Rrom 2:6Naa kelotu Nkerai e Ltung'ani te nkitoo e Papa lenye tenebo o lmalaikani lenyena, nemeata ltung'ani lemelaaki te risioroto e siaai enye. 28Kedede kajoki ntae, kore atua kulo tung'ana ooitachoo tene, keti ltung'ana lemedol lkiye ewuon eitu edol Nkerai e Ltung'ani elotu te nkitoria enye.>>
Currently Selected:
Matayo 16: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
