Matayo 17
17
Yeso to wong'an e nkitoo enye
(Marko 9:2–13; Luka 9:28–36)
1Kore payie eich mperot ile neya ꞉Yeso Petero o Yakobo o Yoana, lalache lenye, nerik nkeper e ldonyuo oodo aa ninche aapeny. 2Neibelekenya mpukunoto enye tekue ninche. Kore nkomom enye neong'u ana ndama, neiborru nankan enyena ana wong'an. 3Kore inia kata, neipung'oki ninche ꞉Musa o Elija eirorie Yeso.
4Nejoki ꞉Petero Yeso, <<Laitoriani keisupat taa kitii ene, naa kore tiniyieu, naitibir nkorrimpani uni tene, nabo ino o ne Musa o ne Elija.>> 5#Ng'as 22:2; SNk 2:7; Isa 42:1; Mat 3:17, 12:18; Mrk 1:11; Luka 3:22, Nkit 18:15#2Pet 1:17,18Kore ewuon eirorita ninye, neimulaa ninche ꞉nkidis naibor, nening'oi ltoilo taatua nkidis ojo, <<Ana Nkerai ai, nacham naa katachamayie, entining ninye!>>
6Kore payie ening ꞉looiteng'eni ana, neirrabalakino nkop too nkomomi eata ngureticho sapuk. 7Kake nelotu Yeso netii ninche, neiseyie nejoki, <<Enyuoto! Emiguretu!>> 8Kore payie eapu ninche nkonyek, nemeata likae otoduaa mara Yeso ake apeny.
9Naa kore edouta te ilo donyuo, neitanap ꞉Yeso ninche ajoki, <<Emiliki hooyia ltung'ani obo nenia nitoduaa, ana metipiu Nkerai e Ltung'ani too lootuata.>>
Etilimua ꞉Yeso lotunoto e Elija
(Marko 9:11–13)
10 #
Mal 4:5
Neipar taa ꞉looiteng'eni Yeso aajoki, <<Amaa, aanyo naa payie ejo laiteng'enak loo nkitanapat nchere meata ajo melotu Elija aituruku tekue Mesia?>> 11Newoliki Yeso ajoki, <<Ee, keituruku ꞉Elija, naa keitibir aitusupat ntokitin pooki ana netiu apake. 12#Mat 11:14Kake kajoki ntae, eidipa Elija ayeu, neitu eyielou ꞉ltung'ana aajo ninye ilo, kake eitaasita nenia pooki naayieu. Nejia sii etiu te Nkerai e Ltung'ani, ketum sina taa nkaik enche.>> 13Kore te inia kata, nening'u ꞉looiteng'eni nchere lomon le Yoana Laipatisani elikita.
Keidimai ntoki pooki te ilo oiruk
(Marko 9:14–29; Luka 9:37–43a)
14Kore payie epuonu ninche netii lturrur, nenyikaki ꞉ltung'ani obo Yeso, negilaki kung, 15ejo, <<Laitoriani ng'erru layieni lai, amu keata moyian e nkiterria naitamita sina kitok oleng. Kore nkatitin kumo naa kerriakino nkima tanaa sii nkare. 16Kayaka apa ninye looiteng'eni linono, kake meidim ninche aaichiunyie.>>
17Newoliki ꞉Yeso ajoki, <<Oi ntae ltung'ana lemeata nkurukoto, netopong'ori! Anu kenya aboitiere ntae, nang'iri o ntae? Eyautun layieni ene natii.>> 18Nebuaaki aing'ode lairiruai otii atua, neipung aing'uaa, neichiu ꞉layieni te inia kata.
19Nenyikaki ꞉looiteng'eni Yeso, aa ninche aapeny, neipar aajoki, <<Aanyo payie eitu kindim iyioo aaipung'ie ilo airirua?>>
20 #
Mat 21:21; Mrk 11:23; 1Lkor 13:2 Newoliki ajoki, <<Tankaraki nkurukoto kini niatata. Amu, kedede kajoki ntae, tiniatata nkurukoto nawuana lantararai kini,#17:20 Keasichere Matayo lantararai le mastad. Kore ilo antararai naa keikini oleng, nemeatae to nkop ee Sampur. indimdim aatiaaki ele donyuo, <Wuang'a tene chomo idie!> naa keiwuang alo, nemeata mbae nemeidimai taa ntae.#17:20 Keponiki mbata ee mpala e apa ntae. 21 Kake meidimai ana mara ake to nkomono o to nkomono e eanata e nkutuk.>>
Eigila Yeso alimu lkiye o mpiunoto enye
(Marko 9:30–32; Luka 9:43–45)
22Kore eiturrurro tenebo ta Galilaya, nejoki ꞉Yeso, <<Kore Nkerai e Ltung'ani naa kepiki nkaik ee ltung'ana, 23neri metua, kore ta mparri e uni naa kepiu.>> Neiputukuny looiteng'eni oleng.
Naipirita laata e kodi e nkaji e Nkai
24 #
Nai 30:13, 38:26 Kore payie ebaki Yeso o looiteng'eni Kapernaum, nepuonu laitalakunok le kodi e nkaji e Nkai netii Petero neipar aajoki, <<Amaa, mara kelak echi laiteng'enani linchi kodi e nkaji e Nkai?>> 25Newoliki ajoki, <<Ee, kelak.>>
Kore payie ejing'u Petero atua nkaji, neiro Yeso ewuon eitu eliki ꞉Petero mbaa naata. Neipar ajoki, <<Simon, nyo idolita iyie tana bae: Amaa laiguanak le nkop, ng'ae echi esotunyie ropiyiani naiturrurruni o kodi nalaki? Tee nkera enche ana too lkulie?>> 26Kore payie ejo Petero, <<Too lkulie,>> nejoki ꞉Yeso, <<Kore naa, keata nkera lakunoto. 27Kake kore payie mikintogor ꞉iyioo ninche, chomo tanang'aki lgiita otii ngamet naibung'ieki sinkirri atua mpaso. Kore sinkir lekue limbung, tobolo nkutuk! Kore payie ibol naa itumie ropiyia nabo. Niya aicho ninche metaa kodi ai o nino.>>
Currently Selected:
Matayo 17: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
