Matayo 18
18
Ng'ae sa lkitok te nkitoria e chumata?
(Marko 9:33–37; Luka 9:46–48)
1 #
Luka 22:24
Kore te inia kata nepuonu looiteng'eni netii Yeso neipar aajoki, <<Amaa dei, ng'ae sa lkitok te nkitoria e chumata?>>
2Neipot nkerai kini, neitacheyie te nkiji enche, 3#Mrk 10:15; Luka 18:17nejo, <<Kedede kajoki ntae, kore tinimimbelekenyanya, nitiuu ana nkera kunini, nimijingjing aikata nkitoria e chumata. 4Naa kore pooki ng'ae oitodou koon tana ana kerai, naa ninye lkitok to pooki ng'ae te nkitoria e chumata. 5Naa kore pooki ng'ae ong'amaa nkerai kini natuwuana ana ta nkarna ai, naa nanu etang'amayie.
6<<Kake kore loitopong'oo nabo ee kuna kunini naairuko nanu meimina to nkurukoto, naa keikach teneenikini soit sapuk dapach oidong'ieki nkano murt, neimisieki te negut e mpaso. 7Oi siake nkop tankaraki mbaa naitopong'oo ltung'ana metaasa ng'ok! Meata ajo mepuonu kuna baa, kake oi siake ilo tung'ani oipung'unyie ꞉mbae naitopong'oricho!
8 #
Mat 5:30
<<Kore tanaa nkaina ino anaa nkeju nikintopong'oo taasa ng'ok, tudung'u, nturrai! Amu naikach tinijing atua nkichon miata nkaina anaa nkeju alang tinikinang'akini nkima ee ntarasi iata nkaik o nkejek pukura. 9#Mat 5:29Naa tinikintopong'oo nkong'u ino taasa ng'ok, tukurtu, nturrai. Amu naikach tinijing atua nkichon, iata nkong'u nabo alang tiniata nkonyek pukura, nikinang'akini lmoti le nkima. 10#Luka 19:10Entodol emimen nabo ee kuna kunini. Amu kajoki ntae nchere, kore lmalaikani lenche naa kedol nkata pooki nkomom e Papa lai oti chumata. 11Kore Nkerai e Ltung'ani, naa keyewuo aitejeu looimina.#18:11 Kore mpala mbata, naa meata ele kereri le tomon o obo.
Nkitanyanyukoto e nker naimina
(Luka 15:3–7)
12<<Kaa idoldol ntae tana bae? Amaa teneata ltung'ani nkerra ip nabo, nepong'ori nabo aiminaa, aa meing'uaa ninye nenia kerra ntomoni saal o saal to lowua, nelo aing'oru inia nabo naimina? 13Naa kedede kajoki ntae, kore tenetum, neng'ida ninye naleng tankaraki inia ker nabo, alang nenia ntomoni saal o saal neitu eimin. 14Nejia naa etiu ta Papa linchi oti chumata, meyieu neimin hoo nabo ee kuna kunini.
Melet taatua nkanisa
15 #
Luka 17:3
<<Tinikintarruoki lalache lino,#18:15 Kore nkulie pala naa kejo Teneas lalache lino ng'oki. chomo ntoduaa ntorroni enye, aa iyie ake o ninye. Kore tinikining ninye, naaku itirrinyua lalache lino. 16#Nkit 19:15Kake kore tenemening, chomo netii iata likae tung'ani obo oiruko anaa oare, paa <kore mbae pooki, nesipuni te limunoto ee ltung'ana oare anaa okuni.> 17Teneany ening ninche, tiliki nkanisa, naa tenemening abaki nkanisa, nchoo eaku te iyie ana ltung'ani loo loreren lemeyielo Nkai anaa laitalakunoni le kodi.
18 #
Mat 16:19; Yoa 20:23 <<Kedede kajoki ntae, kore ntoki pooki nienien to nkop naa keena te chumata, naa kore pooki nilakuku to nkop naa kelakuno te chumata.
19<<Kajoki sii aitoki ntae, tenening'okino ltung'ana oare taa ntae mbae naje naomonoki to nkop, naa keitaas ntae Papa lai oti chumata. 20Amu kore netumore oare anaa okuni ta nkarna ai, naa katii atua ninche te inie.>>
Entapalikinoto
21 #
Luka 17:3,4 Nelotu Petero netii Yeso, neipar ajoki, <<Laitoriani, nkatitin aja aaitarroki ꞉lalache lai, apaliki? Nkatitin sapa?>>
22 #
Ng'as 4:24
Newoliki ajoki, <<Kore naajoki, mara nkatitin sapa, kake nkatitin ntomoni sapa o sapa.#18:22 Kore nkatitin ntomoni sapa o sapa naa keidimi sii aatejo ntomoni sapa nkatitin sapa.
23<<Naaku kore nkitoria e chumata, naa inji etuwuana ana ltung'ani oitoreicho oyieu neing'uraa silen enyena, naata laisiaayiak lenyena. 24Kore payie eng'asu ninye nkikena, neyakini ninye ltung'ani oata sile ee ropiyiani kumo oleng, nemeatae hoo ltung'ani obo oidim atalaa.#18:24 Kore sile ee ropiyiani kumo oleng naa kejo Matayo sile ee talantani nkalupuni tomon. Naa kore talanta nabo, nerisere laata ee laisiaayiani ee mperot nkalupuni ile. 25Kore tankaraki natala ninye ntoki nalakie inia sile, neitanapicho lkitok lenye metimiri ninye o ntomononi enye o nkera enyena o ntokitin pooki naata payie elakieki sile naata. 26Nenang nkop ꞉ilo aisiaayiani, nelej ajoki, <Lokitok ting'iria, nikianyu, payie aalaaki ntoki pooki.> 27Neduaaki ilo kitok lng'ur, nepalaa mechomo. Kore inia sile naata, nepaliki.
28<<Kake kore payie eipung ilo aisiaayiani, netum lobo loo lboitieii lenyena, oata sile enye ee nkuti ropiyiani,#18:28 Kore kuti ropiyiani naa keji dinarini ip nabo. Kore ntoki naji dinari, naa laata e mparri nabo. neibung lgos, nejoki, <Talaa taata sile ai!> 29Nerriakino ꞉lboitiei lenye nkejek enyena, nelej ajoki, <Ting'iria, nikianyu naa kaalaaki.> 30Kake neany. Nelo aing'uaa, neichooyo metanang'akini ninye jila ana metalaaki inia sile. 31Kore payie edol lboitieii lenyena naataasate, neisinanio oleng, nepuo aaliki lkitok lenche nenia baa pooki. 32Kore inia kata, neipot ꞉lkitok ninye nejoki, <Iyie laisiaayiani torno! Kaatapalika apa sile pooki niata tankaraki nikiteleja. 33Amaa, meyiere apa ning'urrie lboitiei lino ana naikuna nanu paaing'urrie iyie?> 34Kore to ngoro, nepik nkaik ee larripok le jila, lemeata lng'ur, meitama sina ana metalaa sile enye pooki.
35<<Nejia naa abaki eiko Papa lai oti chumata ntae peechu naa ipalikiki lalachera linchi taatua ltauja linchi.>>
Currently Selected:
Matayo 18: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
