Matayo 21

Etang'amayieki ꞉Yeso te Yerusalem ana lkinkii

(Marko 11:1–11; Luka 19:28–40; Yoana 12:12–19)

1Kore payie enyikaki ꞉ninche Yerusalem, netabakita Betepage, natii Lowua loo Lng'erriyio, neipaaya Yeso looiteng'eni oare 2ajoki, <<Enchom idia ang natii idie, naa kore ake inia kata, itumtum sikiria naena teinie, eboitiere lkurrarru lenye. Entalaku, nikirikokiki. 3Tenejoki ntae ltung'ani mbae, entiaki, <Laitoriani oyieu ninche,> naa kepalu nabokata.>> 4Ketaase ana payie ebaya apa nairoro loiboni le Nkai ajo,

5 # Sak 9:9 <<Tiaaki Nkoliontoi e Sion,#21:5 Kore Nkoliontoi e Sion naa lkerenket le Yerusalem.

<Ng'ura, kelotu lkinkii lino nitii,

ebor, nedirita sikiria,

edirita lkurrarru, ilo lkurrarru le sikiria.> >>

6Nepuo looiteng'eni, neas ana naitanapa ꞉Yeso. 7Neriku sikiria o lkurrarru, neiteleki nankan enche nkeper e inia sikiria o ilo kurrarru, nedir ꞉Yeso awuenie nkeper. 8Nesapan lturrur kitok oleng nankan enche to nkoitiei, nedung'u sii ꞉lkulikae mbene ee lkeek aasapan. 9#SNk 118:25,26Kore ilo turrur otii tekue ninye o ilo oirukurukore tesiedi, nebuak aajo,

<<Hosana#21:9 Kore Hosana naa ntejeu to nkutuk ee Lburania naa keitodolu nkisisa naichori Yeso. Netii aitoki lkereri 15. ta Layieni le Daudi!

Emayiana ilo olotu ta nkarna e Laitoriani!

Hosana te chumata!>>

10Kore payie ejing Yeso Yerusalem, neing'olng'ola lkerenket pooki nejo, <<Ng'ae ele?>>

11Newoliki ꞉ilo turrur ajo, <<Yeso ele, ilo oiboni le Nkai le Nasaret e Galilaya.>>

Etimirayie ꞉Yeso lamirak ta nkaji e Nkai

(Marko 11:15–19; Luka 19:45–48)

12Nejing Yeso atua nkaji e Nkai, nemiraa lolo pooki apa oomiricho o looinyiang'icho.#21:12 Nkata e are ana natimirayie Yeso lamirak. Kore nkata ekue, ng'ura Yoana 2:13 o lkererini ooijipaa. Neuroki nkop misaii ee lolo ooibelekeny ropiyiani o lorikan loo lolo oomirita nkutukurruki. 13#Isa 56:7; Yer 7:11Nejoki ninche, <<keigero ajo, <Kore Nkaji ai, naa keji nkaji e nkomono,> kake intaa ntae <nkapune ee lapurrok.> >>

14Nepuonu lmodook o lootigiligilete, etii ninye nkaji e Nkai, neichiunyie ninche. 15Kake kore payie edol lkutuaa laa laitainok la lasar o laiteng'enak loo nkitanapat mbaa e nking'asia naataasa ninye, neitoki aadol nkera ebuakita ta nkaji e Nkai aajo, <<Hosana ta Layieni le Daudi,>> negoro ninche.

16 # SNk 8:2 Neipar Yeso aajoki, <<Ining'ito nejoito kuna kera?>>

Newoliki ajoki, <<Ee, eitu apake isomsom,

<Too nkutukie ee nkera o nee nana newuon enakita lki

indimie mikisisa iyie>?>>

17Kore payie eing'uaa ninche, neipung te lkerenket alo Betania, nejeyio te inie.

Lng'aboli lemeata lng'anayio

(Marko 11:12–14,20–24)

18Kore naikenyunyie, errinyo Yeso alo lkerenket, near ꞉sumach. 19Kore payie edol lng'aboli tabata nkoitiei, neiwuang'aki, kake eitu etum toki mara ake mbene. Nejoki ilo ng'aboli, <<Oi mintoki aikata aiu lng'anayioi!>> Netoii ilo cheni nabokata.

20Kore payie edol ꞉looiteng'eni inia, neing'asia, neiparicho aajo, <<Aji eikuna lng'aboli payie etoi nabokata?>> 21#Mat 17:20; 1Lkor 13:2Newoliki ꞉Yeso ajoki, <<Kedede kajoki ntae, tiniatata nkurukoto nemetii lng'ach, mara ake inia naitaasaki lng'aboli indimdim aataas, kake indimdim abaki aatiaaki ele donyuo, <Mikitodotuni, nikuurokini mpaso!> Naa keasai inia. 22Naa kore pooki niomonmon Nkai to nkurukoto, naa itumtum.>>

Larikok loo Lyiaudi lemeisiligai

(Marko 11:27–33; Luka 20:1–8)

23Kore payie ejing Yeso nkaji e Nkai, nepuonu lkutuaa laa laitainok la lasar o lpayiani loo lyiaudi netii ninye, eiteng'enicho. Neipar aajoki, <<Taa kitoria iasita kuna baa, naa ng'ae likinchoo ana kitoo?>> 24Newoliki ꞉Yeso ajoki, <<Kaipar sii nanu ntae nkipara nabo, naa kore tinikiwolikiki, naliki sii nanu ntae ajo taa kitoo aasita kuna baa. 25Amaa, apa nkipatisare e Yoana, aji eing'uaa? Chumata ana ltung'ana?>>

Nenyakino maate aajokino, <<Kore tinikijo <Chumata eing'uaa,> naa keipar iyioo ajoki, <Oo apa payie eitu irukruk ninye?> 26Naa kore tinikijo <Ltung'ana eing'uaa,> nikiurie ilo turrur, amu kewuon eiken ltung'ana pooki aajo kera apa Yoana loiboni le Nkai.>>

27Newoliki aajoki, <<Mikiyielo iyioo.>> Nejoki ꞉Yeso, <<Maliki sii nanu ntae ajoki te nkitoo e ng'ae aasita kuna baa.

Eikach tinirriidu nining'icho alang tinintaakino

28<<Kaa ijoijo tana? Eti apa lpayian obo oata layiok oare. Nelo netii lekue nejoki, <Nkerai ai, chomo anapar taasa siaai ta lchampa loo lmusabibu.> 29Newoliki papa lenye ajoki, <Malo.> Kake kore tesiedi, nedol ajo keitarruoyie, nelo aas ilo siaai. 30Neitoki alo netii layieni lenye le oare, nejoki ana netiaka duo lekue. Newoliki ajoki, <Ayia, kalo papa lai!> Kake eitu elo.

31<<Amaa, too kulo ayiok oare, alo oataasa nayieu ꞉papa lenye?>> Newoliki ꞉ninche aajoki, <<Ilo lekue,>> Nejoki ꞉Yeso, <<Kedede kajoki ntae, kore laitalakunok le kodi o milayoni, naa kejing'ita nkitoria e Nkai tekue ntae. 32#Luka 3:12, 7:29,30Amu keyewuo Yoana Laipatisani eitodol ntae nkoitiei nayau sotua oipida o Nkai, neitu irukruk, kake keiruko laitalakunok le kodi o milayoni. Naa kore abaki itodua kuna, eitu irriidudu, nirukuruk ninye.

Nkitanyanyukoto e lchampa loo lmusabibu o laturok

(Marko 12:1–12; Luka 20:9–19)

33 # Isa 5:1,2 <<Entining nkae kitanyanyukoto: Eatae apa ltung'ani openy nkang otuuno lchampa loo lmusabibu, neigilunyie wuata, netur udoto naironyieki lolo ng'anayio, nechet ltalet, neiger laturok, nelo nkop nalakua. 34Kore payie enyiku ng'amata naku lng'anayio, neipaaki laisiaayiak lenyena lolo aturok, metobosoki lolo ng'anayio ooikenakino ninye. 35Kore ꞉lolo aturok neibung laisiaayiak lenyena, neidong lobo, near likae metua, nenang likae metua too soito. 36Neipaaya aitoki lkulie aisiaayiak kumo oaalang laapa lekue, neitaas aitoki ninche nejia. 37Kore tesiedi, neirruaaya layieni lenye ejo, <Keyanyit ana kerai ai.> 38Kake kore payie edol ꞉lolo aturok ilo ayieni lenye, nejokino maate, <Ele taa lajung'oni, matar payie kiya njung'ore.> 39Neibung ninye, nenang'aa aaipung'ie te ilo lchampa, near metua.

40<<Amaa sa kenya tenelotu lopeny lchampa, aji eiko lolo aturok?>>

41Newoliki ꞉ninche Yeso aajoki, <<Keidakie lolo aturok torrok, neiger lkulikae oicho ꞉ninye lng'anayio lo lchampa ta ng'amata nakunyie.>>

42 # SNk 118:22,23 Nejoki ꞉Yeso ninche, <<Eitu apake isomsom too Lkigerot:

<Kore soit oatanya ꞉lachetak,

ninye oataa soit le tipat oirichiu nkaji,

Laitoriani eing'uaa ꞉ele soit,

naa le nking'asia too nkonyek ang>?

43<<Kore tankaraki inia, kajoki ntae nchere, keoruni ntae nkitoria e Nkai, neichori ltung'ana oiu lng'anayio lenyena. 44Naa kore lorriakino nkeper ele soit negiligila aorooro, naa kore ilo tung'ani osulakino, neikaskas.>>

45Kore payie ening ꞉lkutuaa laa laitainok la lasar o Lparisayo nkitanyanyukot naatejo Yeso, neyielou aajo mbaa naaipirita ninche eirorita. 46Kake kore payie esaan aajo embung'a ninye, neuriei lturrurri, amu kedol ninche aajo loiboni le Nkai Yeso.

Currently Selected:

Matayo 21: saq

Highlight

Copy