Matayo 22

Nkitanyanyukoto e latim kitok le nkiyema

(Luka 14:15–24)

1Neitoki Yeso airorie ninche tee nkitanyanyukot ajoki, 2<<Kore nkitoria e chumata, naa keinyinyukore lkinkii oitaka layieni lenye latim le nkiyema. 3Neipaaya laisiaayiak lenyena meipoto lolo pooki ooitoomonoki inia kiyema. Kake neany ninche epuonu. 4Neitoki aitoki aipaaya lkulie aisiaayiak ejo, <Entiaki lolo pooki ooitoomonoki nchere, <<Kore taata, kaidipa aitibira ndaa, naa keyiang'a lmong'i o nkichu ainien naapir, neidipie ntoki pooki. Ootu latim.>> >

5<<Neany epuo, nepuo aas siaitin lenche. Kechomo lobo lchampa lenye, nelo likae nkinyang'a o mirare enye. 6Kore lolo leitu epuo, neibung lolo aisiaayiak lenyena, neitaas ninche mbaa torrok, near metuata. 7Kore ilo kinkii, negoro, Neirruaaya njore enye netii lolo oaatara laisiaayiak lenyena, neidakie, nepejoo lkerenketi lenche. 8Kore tesiedi inia, nejoki laisiaayiak lenyena, <Keidipunye latim, kake nemeichiaakino lolo ooitoomonoki payie enya. 9Enchom naa ntumot ee nkoito naalala naapach lkerenket, nintoomonono lolo pooki litumtum meotu latim.> 10Neipung lolo aisiaayiak aapuo nenia oito naalala, neiturrur lolo pooki ootumo, nemenya ajo ltorrok anaa supati, neiputi nkaji e latim.

11<<Kake kore payie ejing'u ilo kinkii aduaare lomon lenyena, nedol te inie ltung'ani lemeata nkilani e latim. 12Nejoki ninye, <Lchore, aji nkuna pii ijing'u ene miata nkilani e latim?> Nelau ꞉ilo tung'ani wolet.

13 # Mat 8:12, 25:30; Luka 13:28 <<Nejoki ꞉ilo kinkii laisiaayiak, <Enteen ninye nkaik o nkejek, nimpung'ieng'ie aanang'aki atua naimin e aulo, ng'oji neichirieki, neonyieki lala te mion. 14Amu lkumo eipotoki, kake lkuni oogeluno.> >>

Eteyiekita lbata laa larikok loo lyiaudi Yeso loseg

(Marko 12:13–17; Luka 20:20–26)

15Kore inia kata, nepuo Lparisayo aaiguana pee edol neiko teneibung Yeso to loseg tankaraki nkiroroto enye. 16Neirruaaya looiteng'eni lenche tenebo o lolo otii mbata e Erode netii Yeso, nejoki, <<Laiteng'enani, ikiyielo aajo ira ltung'ani loosipat, ninteng'en sii nkoitiei e Nkai te ndedei, nimintaa toki mbaa naajo ꞉ltung'ana, amu miing'or iyie nkitoo e ltung'ani. 17Tiliki naa iyioo, kaa idol iyie? Keichiaakino tenelaakini Kaisari kodi tana meichiaakino?>> 18Kake kore amu keyielo Yeso ntorno enche, nejoki, <<Ntae looitaakino! Aanyo payie kitemtem? 19Entoduaaki ropiyia e kodi.>> Kore inia ropiyia naa keji aitoki dinari. Neyaki ninye. 20Nejoki, <<Ne ng'ae ana omom? Oo lkigerot, keigero ajo ng'ae?>>

21Newoliki ꞉ninche aajoki, <<Ne Kaisari.>> Nejoki ꞉Yeso, <<Enchoo naa Kaisari nenia naara ne Kaisari, ninchocho Nkai nenia naara ne Nkai.>> 22Kore payie ening ꞉ninche inia, neing'asia oleng, nepuo aaing'uaa ninye.

Eiparita Sadukayo Yeso nkipara naipirita mpiunoto

(Marko 12:18–27; Luka 20:27–40)

23 # Asat 23:8 Kore aitoki inia parri, nepuonu Sadukayo neti Yeso. Kore apa ninche naa keiruk aajo meatae mpiunoto. Neipar 24#Nkit 25:5aajoki, <<Laiteng'enani, ketejo apa Musa, kore teneye ltung'ani meata nkera, naa meata ajo meeyem ꞉lalache lenye inia oiliai, payie eiiki ilo alache lenye nkera. 25Keatae apa lalachera sapa taatua iyioo. Kore lekue neyemicho, neye meata nkera, neing'uaki lalache lenye inia kitok. 26Neasai aitoki inia te le oare o te le okuni ana metabaki le sapa. 27Kore tesiedi ninche pooki, neye inia kitok. 28Amaa kenya ta mparri e mpiunoto, nkitok e ng'ae too lolo sapa eaku ninye, amu keyema ꞉ninche pooki?>> 29Kake newoliki ꞉Yeso ninche ajoki, <<Itopong'ori amu miyielolo Lkigerot tanaa sii ngolon e Nkai. 30Amu kore kenya te mpiunoto meyemicho ltung'ana, nemeyemi, kake ketuwuanai ana lmalaikani le chumata. 31Amaa taa mbaa naaipirita mpiunoto ee lootuata, eitu isomsom netiiaka apa ntae Nkai payie ejo, 32#Nai 3:6<Nanu Nkai e Abraam o ne Isaka o ne Yakobo?> Mara ninye Nkai e lootuata kake noo looichu.>> 33Kore payie ening lturrurri ninye, neing'asia oleng te inia kiteng'ena enye.

Nkitanapata naaisul pooki

(Marko 12:28–34; Luka 10:25–28)

34Kore payie ening Lparisayo aajo eitigira ꞉Yeso Sadukayo, netumo aaiguana. 35Kore payie eidip aaiguanata, nelo lobo lenche oara laiteng'enani loo nkitanapat e Musa atem ninye, neipar ajoki, 36<<Laiteng'enani, amaa tee nkitanapat e Musa, kaa naisul pooki?>> 37#Nkit 6:5Nejoki ꞉Yeso ninye, << <Tachama Laitoriani Nkai ino ta ltau lino pooki o te nkichui ino pooki o te ng'eno ino pooki.> 38Ana taa nkitanapata kitok too pooki, naa ninye nekue. 39#Lal 19:18Kore ne are nainyinyukore inia, naa ana, <Tachama le latia ino ana koon.> 40#Luka 10:25–28Kore kuna kitanapat pukura are, naa ninche eitacheyie nkitanapat pooki e Musa o loibonok le Nkai.>>

Layieni le ng'ae Mesia?

(Marko 12:35–37; Luka 20:41–44)

41Kore payie eiturrurro Lparisayo, neipar ꞉Yeso ninche 42ajoki, <<Amaa, kaa ijoijo ntae naipirita Kristo, ilo Aitejeunoni lianyutata? Layieni le ng'ae ninye?>> Nejoki ꞉ninche, <<Layieni le Daudi.>> 43Nejoki ꞉Yeso, <<Aji naa eikuna Daudi payie eipot ninye ajo <Laitoriani> eidimie ꞉Ltau Sinyati? Amu kejoito ninye,

44 # SNk 110:1 <Kore Laitoriani, naa ketiaka Laitoriani lai,

<<Towuana ta mbata ai e tetene,

ana maichoo lmang'ati linono ndacha murto.>> >

45<<Amaa naa, tanaa keipot ꞉Daudi ninye ajo <Laitoriani> aji eiko payie era Kristo layieni lenye?>> 46Kake nemetii hoo lobo oidima atowoliki ninye toki. Naa kore ang'asu inia parri, meatae ltung'ani oitieu aipara ninye likae rereii.

Currently Selected:

Matayo 22: saq

Highlight

Copy