Matayo 23

Nkiteng'ena naipirita Laiteng'enak loo nkitanapat

(Marko 12:38–40; Luka 20:45–47)

1-2Neirorie ꞉Yeso lturrurri o looiteng'eni lenyena ajoki, <<Kewaita laiteng'enak loo nkitanapat o Lparisayo lorika le Musa. 3Kore tankaraki inia, embung'a niasias pooki naaliki ꞉ninche ntae, kake emias naas, amu kelikoo kake meas. 4Keen lkurupa oirochi, lemeidimu ltung'ani atanapa, neiteleki sipi loo ltung'ana, kake kore ninche naa meyieu hoo abaki neapaki lkumojino obo lenche. 5#Mat 6:1, Nkit 6:8, Nki 15:38Kore asat enche pooki, naa keas metoduaa ꞉ltung'ana. Amu, keeniki nkomomi enche o nkaina nabo mbenia sapuki naaitodokino ꞉Lkigerot. Neitoodor aitoki oleng lpiyayo loo sarkuda ee nkilani enche, payie edoli aajo keyanyit Nkai. 6Necham aatewuenie lorikan lekue laa latimi, o lorikan supati le Sinagogi, 7necham neirorokini too ng'ojitin nemirichiereki o teneipoti aajo, <Rrabi.> 8Kake emincho meipoti ntae aajo <Rrabi,> amu lobo ake Laiteng'enani linchi, nirara ntae lalachera. 9Naa emiimpot ltung'ani aajo <Papa> to nkop, amu lobo ake Papa linchi, naa ilo oti chumata. 10Nemeipoti sii ntae aajo <lautarok,> amu lobo ake lautaroni liatata, naa ninye Mesia. 11#Mat 20:26,27; Mrk 9:35, 10:43,44; Luka 22:26Kore ilo kitok taa ntae, naa meata ajo meaku laisiaayiani linchi. 12#Luka 14:11, 18:14Kore pooki ng'ae oiliepie koon, neitodouni, naa kore loitodou koon neiliepieki.

Oi siake ntae looitaakino!

13<<Kake oi ntae laiteng'enak loo nkitanapat o Lparisayo, ooitaakino! Amu inkenokitata ltung'ana nkitoria e chumata tekue nkonyek enche, neitu ijing'jing ntae maate, niminchoritata lolo ooyieu nejing, metijing'a. 14Oi ntae, laiteng'enak loo nkitanapat o Lparisayo ooitaakino! Imutmut ntokitin taa nkajijik ee nkoilia nintoodororo nkomono intaakinono. Naaku kedung'okini ntae nkiguana torno oleng.#23:14 Kore ele kereri le tomon o ong'uan, naa metii mpala mbata. 15Oi ntae laiteng'enak loo nkitanapat o Lparisayo ooitaakino! Injulolo ta mpaso o to nkop iyiayaya ltung'ani obo meibelekenyai aaku loo Lyiaudi. Naa kore payie eibelekenya, nintaa ninye nkerai e lmoti le nkima nkatitin are alang nitiuu ntae. 16Oi ntae larikok modook, ntae oojo, <Kore teneimanyare ꞉ltung'ani nkaji e Nkai naa mara toki, kake teneimanyare saabu e nkaji e Nkai, naa keteena ꞉inia.> 17Ntae kulo mada modook! Amaa, aa naisul, saabu tana ꞉nkaji e Nkai naitisinya saabu? 18Naa ijoijo sii, <Kore teneimanyare ꞉ltung'ani lperere la lasar naa mara toki, kake teneimanyare nkichooroto natii ng'oji e lasar, eteena ꞉ilo mumai.> 19Ntae modook! Amaa, aa nkitok, inia kichooroto tana ꞉lperere la lasar oitisiny inia kichooroto? 20Naaku, kore pooki ng'ae oimanyare lperere la lasar naa etamie ilo korror o pooki toki natii nkeper enye lmumai. 21Kore lonyayie lmumai nkaji e Nkai, naa etamie inia aji o ilo owuenie atua. 22#Isa 66:1; Mat 5:34Naa kore pooki ng'ae, onyayie chumata lmumai, naa etamie ilo orika le nkitoo e Nkai o ilo owuenie ilo orika.

23 # Lal 27:30 <<Oi ntae laiteng'enak loo nkitanapat o Lparisayo ooitaakino! Intaii motua e tomon ee lkeek kunini ooitorropilichiereki, kake itung'aitie mbaa naairochi tee nkitanapat, aa sipata, lng'er o nkurukoto. Keichiaakino niasias kuna, nimirikinono nenia kulie. 24Oi ntae larikok modook! Ibiriri lajing'a kake niijoo ntamesi! 25Oi ntae laiteng'enak loo nkitanapat o Lparisayo ooitaakino! Intuktuk oriong e lkikompe o ne ncharaa, naa kore atua, nebore nkisima, nemetii nkibooroto e koon. 26Iyie Lparisayoi modooni! Ntuko ang'as atua lkikompe o ncharaa, payie esupatu sii oriong.

27 # Asat 23:3 <<Oi ntae Laiteng'enak loo nkitanapat o Lparisayo ooitaakino! Amu inyunyukorere nkuraren ee soito ooiborieki, naalio era supati tooriong, kake kore atua, naa kebore loik loo lmeneng'a o ntorrok pooki. 28Nejia sii itiuu ntae, kore tooriong, nilioii aajo irara loosipat tekue ltung'ana, kake kebore atua ntae nkitaakino o ntorno.

29<<Oi ntae laiteng'enak loo nkitanapat o Lparisayo ooitaakino! Amu ichetchet nkuraren ee loibonok le Nkai, nisikarrierie nenia ng'ojitin naacheta naaparrunyieki loosipat. 30Nintokiki aajo, <Tinikitoduaa apa ng'amata e loo papa, anata eitu kichulare ninche aaibukoo lodo loo loibonok le Nkai.> 31Naaku itachamaitie maate aajo, irara nkera ee ꞉lolo oaatara loibonok le Nkai. 32Entabai naa riot ee lmakui linchi!

33 # Mat 3:7, 12:34; Luka 3:7 <<Ntae lasuria, ichioi ee nturbubuani, aji ilanyienyie nkiguana e lmoti le nkima? 34Naaku, karewaki ntae loibonok o ltung'ana ng'eni o layielok loo Lkigerot, naa icheche lbata niarar metuata, nindongdong lkulie tee Sinagogini inchi, nintamtam sina tankaraki nkurukoto enche, irukoo lkerenketi linchi aar. 35#Ng'as 4:8, 2Ng'a 24:20,21Kore tankaraki inia, keikenakini ntae lodo loo lolo oopeny sipat oibukoyieki to nkop, ang'asu lodo le ilo oji Abel metabaki lodo le Sakaria, layieni le Barakia ilo litara terichet nkaji e Nkai o lperere la lasar. 36Kedede kajoki ntae, keipari nenia baa pooki ltung'ana le ana pukunoto.

Eichiraka ꞉Yeso Yerusalem

(Luka 13:34–35)

37<<Oi iyie Yerusalem! Iyie Yerusalem naar loibonok le Nkai, ninang lolo likirruakaki too soito metuata! Nkatitin aja ateyiewua naiturrur nkera inono tana neiko nkoko teneiturrur nkuoo enyena taabori nkaipupo enyena, kake nianyiany. 38#Yer 22:5Ng'ura, etung'akaki ntae nkaji inchi era mijoni. 39#SNk 118:26Amu kajoki ntae, mikintokiki aadol nanu ang'asu taata, ana entejo, <Emayiana ilo olotu ta nkarna e Laitoriani.> >>

Currently Selected:

Matayo 23: saq

Highlight

Copy