Matayo 24
24
Nkitodolunot e ng'amata e siedi
(Marko 13:1–13; Luka 21:5–19)
1Kore payie eipung Yeso eing'uaa nkaji e Nkai, nepuonu looiteng'eni lenyena aautaki nchetat naapaacha ta nkaji e Nkai. 2Newoliki ajoki, <<Ee, mara ing'oritata kuna tokitin pooki? Kedede kajoki ntae, meatae hoo soit obo oing'uari eitelekino likae, eitu edotori.>>
3Kore ewuon Yeso to Lowua loo Lng'erriyio, nepuonu looiteng'eni aa ninche aapeny netii ninye nejoki, <<Tiliki iyioo ng'amata naasai kuna, naa nyo nkitodolunoto e lotunoto ino o ne nkiting'oto e nkop?>> 4Newoliki ꞉Yeso ajoki, <<Errita ate payie meitopong'ori ntae. 5Amu kepuonu lkumo ta nkarna ai ejo, <Nanu Mesia,> neitopong'oo lkumo. 6Naa Ining'ning larrabali o lomon laa larrabali, kake entodol emiguretu, amu meata ajo mepuku kuna, kake ewuon ake eng'or nkiting'oto. 7Keinyuototo locho arare likae ocho, nera nkitoria o nkae nkitoria, nepuku lameii o nkikirikirot e nkop too ng'ojitin kumo. 8Kore kuna pooki naa ng'asunoto e mion e saisai.
9 #
Mat 10:22
<<Neichoori ntae entum sina, neri ntae entuata, neibaii ntae lochon pooki tankaraki nkarna ai. 10Naaing'uaa ꞉lkumo, nelikoro too lkutuaa, neibaino. 11Naa keipung'u loibonok kumo le sapare, nesap lkumo. 12Naa kore tankaraki natoponari ntorrok, neiropiju nchaman ee lkumo. 13#Mat 10:22Kake kore ilo ong'iri ana metabau nkiting'oto, neitejeuni. 14Kore lolo Omon Supati le nkitoria naa kelikori to nkop pooki nalulung'a payie eaku limunoto too lochon pooki. Kore tesiedi, nelotu nkiting'oto.
Netiu kenya lotunoto e Nkerai e Ltung'ani
(Marko 13:14–20; Luka 21:20–24)
15 #
Dan 9:27, 11:31, 12:11 <<Enchoo laisomani ening'u nairoro apa loiboni le Nkai Daniel naipirita ntaboi nayau mutai. Kore tinidoldol inia eitache to Ng'oji sinyati, 16enchoo lootii nkop e Yudea eisigaki lowuan. 17#Luka 17:31Kore ilo otii nkeper e nkaji emincho edou alotu aya ntokitin natii atua nkaji enye. 18Naa kore ilo otii atua lchampa, emincho errinyunyie aya nkila enye. 19Oi siake nenia naatunutete o naaitanakicho tee nenia perot! 20Entoomon, payie meaku nkisigata inchi ne ng'amata e nkijepe o ne mparri e Sabato. 21#Dan 12:1; Mbo 7:14Amu kelotu kenya sina kitok, leitu apake elotu, ang'asu payie eng'asuni nkop ana metabaki taata, nemeitoki sii kenyaake alotu aikata. 22Naa tenemeitodorropi nenia perot, anata meata hoo ltung'ani ojeu. Kake kore tankaraki lgelunot, naa keitodorropi nenia perot. 23Naa tenejoki ntae ltung'ani, <Ng'ura ketii Kristo, ilo Aitejeunoni lianyutata, ene!> anaa, <Ketii idie!> emiiruk inia. 24Amu kepuonu kenya looitaakino Kristo o looitaakino loibonok le Nkai, neitodolu nkitodolunot kutuaa o mbaa e nking'asia, payie teneidimai, neitopong'oo abaki lgelunot. 25Entodol naa ana, amu katilika ntae ewuon eng'or.
26 #
Luka 17:23,24 <<Naa kore tenejoki ntae, <Ng'ura, ketii Kristo lkees,> emiimpung, naa tenejo, <Ng'ura, ketii atua lgilata le atua nkaji,> emiiruk inia. 27Kore ana netiu nkiwuang'ata teneing'uaa nkiliepunoto e ndama neitoong abaki ndoyioroto e ndama, nejia sii kenya etiu lotunoto e Nkerai e Ltung'ani. 28#Luka 17:37Kore pooki netii lpopok, neiturrurrokino sakerin.
29 #
Isa 13:10; Yoel 2:10,31, 3:15; Mbo 6:12,
Isa 13:10; Ese 32:7; Yoel 2:10, 3:15,
Isa 34:4; Mbo 6:13 <<Kore ake inia kata payie eng'ututari ꞉ilo sina lee nenia perot,
<nemismisu ndama,
nemeitai lapa wong'an enye,
nesulunye lakir to loing'ang'e
neikirikirieki ngolon ee ntokitin naatii loing'ang'e.>
30 #
Dan 7:13; Sak 12:10–14; Mbo 1:7 <<Kore inia kata, nepuku nkitodolunoto e Nkerai e Ltung'ani to loing'ang'e, neichir loreren pooki le nkop, nedol Nkerai e Ltung'ani elotuta tee nkidisin e loing'ang'e eata ngolon o nkitoo kitok. 31Neirruaaya lmalaikani lenyena ekututa mowuarak to ltoilo kitok. Neiturrurru ꞉ninche lgelunot too lubot ong'uan e nkop, te neng'asunyie loing'ang'e o neiting'ie.
32<<Enteyielo te nkitanyanyukoto e lng'aboli nchere kore payie eyuk ntilita ee sura nebulu mbene, naa etinyikua ng'amata e lari. 33Naaku naa, kore tinidoldol sii ntae kuna baa pooki easai, enteyielo aajo etinyikua ninye nkutuk e ltim. 34Kedede kajoki ntae, meichunye naa ltung'ana le ana pukunoto, eitu easai kuna baa. 35Kore keper o nkop naa keichunye, kake meichunye hooyia rereii lainien. 36Kore kenya inia parri o inia kata naa meatae hooyia loyielo. Meyielo abaki ꞉lmalaikani le chumata anaa sii Nkerai, mara ake Papa apeny. 37#Ng'as 6:5–8Naa kore ana netiu apake too mperot e Noa, naa nejia sii etiu lotunoto e Nkerai e Ltung'ani. 38Amu kore apa tee nenia perot ewuon eitu elotu ꞉inia are sapuk natumuta nkop, kerrutuchoi nematichoe, keyemichoe neyemi, ana metabau inia parri natijing'a Noa atua sapina. 39#Ng'as 7:6–24Kake eitu eyielou ꞉ninche ana meeu ꞉inia are sapuk natumuta nkop neya ltung'ana pooki. Naa nejia kenya etiu tenelotu Nkerai e Ltung'ani. 40Kore te inia kata, netii lewa oare ang'ata aasicho, neyai lobo neing'uari likae. 41Netii sii ntomonok are aaidong'ito nkano to soit, neyai nabo, neing'uari nkae.
42<<Entirripicho naa, amu miyielolo aajo aa parri elotu Laitoriani linchi. 43#Luka 12:39,40Kake enteyielo ana, nchere tanaa keyielo lopeny nkaji nkata e nkuarie nalotu lapurroni, anata meicho nkaji enye metigili. 44Naaku enterretenata naa, tankaraki ng'amata nimintiekiki kenya elotunyie Nkerai e Ltung'ani.
Laisiaayiani oisiligai
(Luka 12:41–46)
45<<Ng'ae naa laisiaayiani oisiligai naa ng'en, oichoo ꞉lkitok lenye metaramata nkaji enye, neicho ltung'ana ndaa ta nkata naichiaakino? 46Emayiana ilo aisiaayiani, aa kore payie errinyunyie lkitok lenye, neirrachu easita nejia. 47Kedede kajoki ntae, keicho meitoria ntokitin enyena pooki. 48Kake oo tanaa keitorno ilo aisiaayiani, nejo ta ltau lenye, <Keimalmal lkitok lai.> 49Neng'asu aidong lolo kulie aisiaayiak, nerrutucho, nematicho tenebo o lamerak, 50naa kelotu lkitok le ilo aisiaayiani nkata nemeiteki ajo kelotu o nkata nemeyielo, 51naa kedung ninye katare, neituchulaki lolo ooitaakino, naa te inie eaku nkichirata o onyata ee lala.
Currently Selected:
Matayo 24: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
Matayo 24
24
Nkitodolunot e ng'amata e siedi
(Marko 13:1–13; Luka 21:5–19)
1Kore payie eipung Yeso eing'uaa nkaji e Nkai, nepuonu looiteng'eni lenyena aautaki nchetat naapaacha ta nkaji e Nkai. 2Newoliki ajoki, <<Ee, mara ing'oritata kuna tokitin pooki? Kedede kajoki ntae, meatae hoo soit obo oing'uari eitelekino likae, eitu edotori.>>
3Kore ewuon Yeso to Lowua loo Lng'erriyio, nepuonu looiteng'eni aa ninche aapeny netii ninye nejoki, <<Tiliki iyioo ng'amata naasai kuna, naa nyo nkitodolunoto e lotunoto ino o ne nkiting'oto e nkop?>> 4Newoliki ꞉Yeso ajoki, <<Errita ate payie meitopong'ori ntae. 5Amu kepuonu lkumo ta nkarna ai ejo, <Nanu Mesia,> neitopong'oo lkumo. 6Naa Ining'ning larrabali o lomon laa larrabali, kake entodol emiguretu, amu meata ajo mepuku kuna, kake ewuon ake eng'or nkiting'oto. 7Keinyuototo locho arare likae ocho, nera nkitoria o nkae nkitoria, nepuku lameii o nkikirikirot e nkop too ng'ojitin kumo. 8Kore kuna pooki naa ng'asunoto e mion e saisai.
9 #
Mat 10:22
<<Neichoori ntae entum sina, neri ntae entuata, neibaii ntae lochon pooki tankaraki nkarna ai. 10Naaing'uaa ꞉lkumo, nelikoro too lkutuaa, neibaino. 11Naa keipung'u loibonok kumo le sapare, nesap lkumo. 12Naa kore tankaraki natoponari ntorrok, neiropiju nchaman ee lkumo. 13#Mat 10:22Kake kore ilo ong'iri ana metabau nkiting'oto, neitejeuni. 14Kore lolo Omon Supati le nkitoria naa kelikori to nkop pooki nalulung'a payie eaku limunoto too lochon pooki. Kore tesiedi, nelotu nkiting'oto.
Netiu kenya lotunoto e Nkerai e Ltung'ani
(Marko 13:14–20; Luka 21:20–24)
15 #
Dan 9:27, 11:31, 12:11 <<Enchoo laisomani ening'u nairoro apa loiboni le Nkai Daniel naipirita ntaboi nayau mutai. Kore tinidoldol inia eitache to Ng'oji sinyati, 16enchoo lootii nkop e Yudea eisigaki lowuan. 17#Luka 17:31Kore ilo otii nkeper e nkaji emincho edou alotu aya ntokitin natii atua nkaji enye. 18Naa kore ilo otii atua lchampa, emincho errinyunyie aya nkila enye. 19Oi siake nenia naatunutete o naaitanakicho tee nenia perot! 20Entoomon, payie meaku nkisigata inchi ne ng'amata e nkijepe o ne mparri e Sabato. 21#Dan 12:1; Mbo 7:14Amu kelotu kenya sina kitok, leitu apake elotu, ang'asu payie eng'asuni nkop ana metabaki taata, nemeitoki sii kenyaake alotu aikata. 22Naa tenemeitodorropi nenia perot, anata meata hoo ltung'ani ojeu. Kake kore tankaraki lgelunot, naa keitodorropi nenia perot. 23Naa tenejoki ntae ltung'ani, <Ng'ura ketii Kristo, ilo Aitejeunoni lianyutata, ene!> anaa, <Ketii idie!> emiiruk inia. 24Amu kepuonu kenya looitaakino Kristo o looitaakino loibonok le Nkai, neitodolu nkitodolunot kutuaa o mbaa e nking'asia, payie teneidimai, neitopong'oo abaki lgelunot. 25Entodol naa ana, amu katilika ntae ewuon eng'or.
26 #
Luka 17:23,24 <<Naa kore tenejoki ntae, <Ng'ura, ketii Kristo lkees,> emiimpung, naa tenejo, <Ng'ura, ketii atua lgilata le atua nkaji,> emiiruk inia. 27Kore ana netiu nkiwuang'ata teneing'uaa nkiliepunoto e ndama neitoong abaki ndoyioroto e ndama, nejia sii kenya etiu lotunoto e Nkerai e Ltung'ani. 28#Luka 17:37Kore pooki netii lpopok, neiturrurrokino sakerin.
29 #
Isa 13:10; Yoel 2:10,31, 3:15; Mbo 6:12,
Isa 13:10; Ese 32:7; Yoel 2:10, 3:15,
Isa 34:4; Mbo 6:13 <<Kore ake inia kata payie eng'ututari ꞉ilo sina lee nenia perot,
<nemismisu ndama,
nemeitai lapa wong'an enye,
nesulunye lakir to loing'ang'e
neikirikirieki ngolon ee ntokitin naatii loing'ang'e.>
30 #
Dan 7:13; Sak 12:10–14; Mbo 1:7 <<Kore inia kata, nepuku nkitodolunoto e Nkerai e Ltung'ani to loing'ang'e, neichir loreren pooki le nkop, nedol Nkerai e Ltung'ani elotuta tee nkidisin e loing'ang'e eata ngolon o nkitoo kitok. 31Neirruaaya lmalaikani lenyena ekututa mowuarak to ltoilo kitok. Neiturrurru ꞉ninche lgelunot too lubot ong'uan e nkop, te neng'asunyie loing'ang'e o neiting'ie.
32<<Enteyielo te nkitanyanyukoto e lng'aboli nchere kore payie eyuk ntilita ee sura nebulu mbene, naa etinyikua ng'amata e lari. 33Naaku naa, kore tinidoldol sii ntae kuna baa pooki easai, enteyielo aajo etinyikua ninye nkutuk e ltim. 34Kedede kajoki ntae, meichunye naa ltung'ana le ana pukunoto, eitu easai kuna baa. 35Kore keper o nkop naa keichunye, kake meichunye hooyia rereii lainien. 36Kore kenya inia parri o inia kata naa meatae hooyia loyielo. Meyielo abaki ꞉lmalaikani le chumata anaa sii Nkerai, mara ake Papa apeny. 37#Ng'as 6:5–8Naa kore ana netiu apake too mperot e Noa, naa nejia sii etiu lotunoto e Nkerai e Ltung'ani. 38Amu kore apa tee nenia perot ewuon eitu elotu ꞉inia are sapuk natumuta nkop, kerrutuchoi nematichoe, keyemichoe neyemi, ana metabau inia parri natijing'a Noa atua sapina. 39#Ng'as 7:6–24Kake eitu eyielou ꞉ninche ana meeu ꞉inia are sapuk natumuta nkop neya ltung'ana pooki. Naa nejia kenya etiu tenelotu Nkerai e Ltung'ani. 40Kore te inia kata, netii lewa oare ang'ata aasicho, neyai lobo neing'uari likae. 41Netii sii ntomonok are aaidong'ito nkano to soit, neyai nabo, neing'uari nkae.
42<<Entirripicho naa, amu miyielolo aajo aa parri elotu Laitoriani linchi. 43#Luka 12:39,40Kake enteyielo ana, nchere tanaa keyielo lopeny nkaji nkata e nkuarie nalotu lapurroni, anata meicho nkaji enye metigili. 44Naaku enterretenata naa, tankaraki ng'amata nimintiekiki kenya elotunyie Nkerai e Ltung'ani.
Laisiaayiani oisiligai
(Luka 12:41–46)
45<<Ng'ae naa laisiaayiani oisiligai naa ng'en, oichoo ꞉lkitok lenye metaramata nkaji enye, neicho ltung'ana ndaa ta nkata naichiaakino? 46Emayiana ilo aisiaayiani, aa kore payie errinyunyie lkitok lenye, neirrachu easita nejia. 47Kedede kajoki ntae, keicho meitoria ntokitin enyena pooki. 48Kake oo tanaa keitorno ilo aisiaayiani, nejo ta ltau lenye, <Keimalmal lkitok lai.> 49Neng'asu aidong lolo kulie aisiaayiak, nerrutucho, nematicho tenebo o lamerak, 50naa kelotu lkitok le ilo aisiaayiani nkata nemeiteki ajo kelotu o nkata nemeyielo, 51naa kedung ninye katare, neituchulaki lolo ooitaakino, naa te inie eaku nkichirata o onyata ee lala.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy