Lukasə 4
4
Ndzaŋ Satanə a nə Ńkwaʼlə̂ nə́ Yeso
(Mat 4.1-11; Mag 1.12, 13)
1Yeso a fɛ́lə á ntsǒnkǐ Jodanə Ajwǐəsê a lwɛ́nkə yə́, ńdɔgə̂ yí ńgɛnə̂ á kɔŋ məŋkwâʼlə̌, 2A chî ə́wɨ́ nə́ əlěmbî məghə́m nəkwa Dɛbəələ a kwaʼlə̂ yə́. Nə́ əlě pɨd pə̂, a kě ajûtsə́ jî pô, əlě pə wɨ́ ə́ měe nji ə́ záŋə yə́. 3Dɛbəələ a sóŋə á mbô yí ńgə́, “Təmbɔʼ gho pə́ mɔ́ Əsê, ghɛd məngɔʼ mɨ mə́ sɛlə̂ apéenə məkálə́.” 4Yeso a kwěe yí ńgə́, “Aŋwaʼlə Əsê á sóŋ ńgə́ ŋwunə a kě á mbî chî ńté lə́ tsɔʼə apá pô.”
5Tsɔʼə əghâ yi wɨ́, Dɛbəələ a tíʼ ńdɔgə̂ yí ńkɔ́ʼ ńgɛnə̂ á ndu nkwəənə ńnəələ̂ yí nə́ məfɔ mə́ ndu mbî tsɔʼə mətsəmə. 6Ńtíʼ ə́sóŋ nə́ yí ńgə́, “Maŋ yǐ fɛ̂ mətɨ mɨ mətsəm nə́ gho pópə afoʼ zəənə́. Pə́ nə ḿbɛ́dtə ə́fɛ̂ pə́ələ́ á mbô maŋə, mbɔʼ maŋ kə́ ə́fɛ̂ á mbô ŋwu ntsəm páʼ maŋ kɔŋ nə́. 7Maŋ yǐ fɛ̂ pɨ́d ətsəmə á mbô gho, mbɔʼ gho ghóʼkə mə.”
8Yeso a kwěe yí ńgə́, “Aŋwaʼlə Əsê á sóŋ ńgə́, ‘Ghóʼkə tsɔʼə Mmaʼmbî páʼə a pə nə́ Əsê əzo, ńkə̈ faʼə̂ tsɔʼə á mbô yə́.’ ”
9Dɛbəələ a lɔgə̂ yí ńgɛnə̂ á Jɛlusalɛmə, ńkɔ́ʼkə yə́ á ndu nəloŋ nə́ Tə́kɔʼndɛ̂sê, ə́sóŋ nə́ yí ńgə́, “Mbɔʼ gho pə́ mɔ́ Əsê,” lǒo atǐə á aliʼə́ nə́ ńgwǔəə á əsê? 10Ńté ńgə́ aŋwaʼlə Əsê á sóŋ ńgə́, “A yǐ tú pətseŋpə́ndɛ̂ pí pó pyáabə gho, 11Ńkə́ ə́sóŋ ńgə́ pó yǐ ŋáŋkə gho á atǐ nə́ mbô mɔ́b ńjî ńgə́ kɔ gho tô akoolə azô nə́ ngɔʼə.”
12Yeso a kwěe yí ńgə́, “Aŋwaʼlə Əsê á kə́ ə́sóŋ ńgə́, ‘Kɔ gho kwaʼlə̂ Mmaʼmbî páʼ a pə́ nə́ Əsê əzo.’ ”
13Əghâ ándó Dɛbəələ a kə məgtə̂ nə́ á mə́ kwaʼlə̂ nə́ Yeso nə́ ndu ntsəm lə́, ḿmɛdtə̂ yí ńtə́ ḿbyáb ndɛd yi ndaʼə.
Pə́ Kǐəə Yeso á Nazalɛlə
(Mat 4.12-17; Mag 1.14, 15)
14Yeso a pəənə̂ á Galili nə́ mətɨ mə́ Ajwǐəsê. Atséebə á nə ńnyi ńté yə́ á mə́mə aláʼə atsəmə. 15A zéʼkə á mə́m məndɛ̂ mə́ Əsê mə́ pəjusə, ŋwu ntsəmə a ghóʼkə yə́.
16Yeso a pəənə̂ á Nazalɛlə páʼə a kə kwéŋ nə́ ə́wə́, Alěláʼə́sê á koʼ a ghɛnə̂ á ndɛ̂sê Pəjusə ándó a ghə́ pěʼ nə́ ńgɛnə̂, ńdǒo á əsê á mə́ fóŋ nə́ aŋwaʼlə Əsê. 17Pə́ fɛ̂ aŋwaʼlə ntûsê Izaya á mbô yə́, a ŋáʼə aliʼ pə́ ŋwaʼlə̂ nə́ ə́wɨ́ ńgə́, 18“Ajwiə Mmaʼmbîə a chîə á mbɨ maŋə ńté ńgə́ a tsɔʼə mə ńgə́ maŋ yǐ ńnáŋkə nkɨ yi əshîʼnə á mbô pəpóŋə, ə́fóg ngaŋə́tsáŋ ḿbɨ ńgɛd pəfəg pə́ jɨ́ əliʼə́, ńkə́ ńgɛd pə́ mɛdtə̂ pɨ pə̈ wágə ághóobə́ 19ńkə́ ə́fiʼtə̂ ńgə́ ndɛd ə́ koʼ páʼ Mmaʼmbîə a yǐ nə́ kwá pɨ píə.”
20A sóŋ ə́lɨ́d lə́ ńtíʼ ḿbáatə aŋwaʼlə yə wɨ́, ə́fɛ̂ á mbô ŋwunə a faʼ nə́ á ndɛ̂sê yi wə́, ńtíʼ ńnáanə yə́ á əsê. Əmə́g mətsəmə á mə́m Ndɛ̂sê Pəjusə mə́ nə ńtə́əmə á mbɨ yə́. 21A tíʼ ńchúʼə á mə́ sóŋ nə́ á mbô pó ńgə́, “Ndzaŋ nə́ zóʼ nə́ lə́, anuə atsəm pə́ nə ŋ́ŋwaʼlə̂ nə́ á mə́mə aliʼə́ aŋwaʼlə jɨ á lɔgə̂ aliʼ ə́sɛ̂nə̌.” 22Á nə ńkɨʼnə̂ ŋwu ntsəm nə́ ətsáb pə əshîʼnə ə́ fɛ́d nə́ á ntso yə́, ŋwu ntsəmə a tíʼə ńtsáb əshîʼnə ńté yə́, ḿbítə ńgə́, “Lɛ̌ kě mɔ́ Jɔsɛf pô?”
23Yeso a sóŋə á mbô pó ńgə́, “Maŋ jî ńgə́ pɨ yǐ tséebə atséebə́nə́múʼ zəənə́ á mbô maŋ ńgə́, ‘Ntsóʼ pɨ tsóʼ əzo mbəəmə. Faʼə̂ á mə́mə aláʼ pɨ ndzaŋ pəg kə zóʼ nə́ ńgə́ gho faʼə̂ á mə́m Kapanawum lə̂.’ ”
24Yeso a peg ńgə́, mäŋ fiʼtə̂ áwɨ́ lɛ̌ nə́ ndə̌ŋdəŋ ńgə́ ntûsê yitsə̌ a kě ə́wɨ́ chî páʼ pə́ pí nə́ yə́ á mə́mə aláʼ pó pô. 25Jwə́ʼtə nə́, mäŋ fiʼtə̂ áwɨ́ nə́ ndə̌ŋdəŋ ńgə́ pəkog pə́ pəngyě pə́ kə nə́ənə á mə́mə aláʼə Islɛl nə́ ndɛd Elayija, əghâ ándó mbəŋ nə ńkě nə́ lô pô nə́ ngoʼ zə̂ zɛ́n teelə́ nə́ akəm lə́, nji kə chaanə̂ á mə́mə aláʼə atsəmə. 26Lə́ pə́ pə̂ ńkě Elayija á mbô ŋwu əghɔb yitsə̌ tú pô, tə ńdéʼtə nkog məngyě yitsə̌ páʼ a kə chî nə́ Zelefat, á əlá aláʼ Sidɔnə. 27Ngǎŋnkaʼ ə́ nə ńnə́ənə Islɛl nə́ ndɛd páʼ Elisha a nə ḿbə́ nə́ ntûsê, lə́ pə́ pə̂ ńkě yitsə̌ tsóʼ pô tə ńdéʼtə Neeman páʼə a nə́ ə́fɛ́d nə́ á Sylya.
28Ŋwu ntsəm páʼə a kə chî nə́ á ndɛ̂sê Pəjus ńdzóʼə anu yəwə́ a nə ńdzáŋ ndě. 29Pó lǒo á əsê ə́soŋə̂ yí ə́fógə á mə́mə aláʼ, ńdɔgə̂ yí ńgɛnə̂ á nkaŋ nkəŋə́ á nkwəənə pə́ nə ḿbɔ́ nə́ aláʼə azɔ́b ə́wə́ á mə́ kabkə̂ nə́ yə́ á mbéenə. 30Lə́ a pə ńdaŋə̂ á məsa pó ńgɛnə̂ yə́.
Ndzaŋə Ándó Yeso a nə Fɨ́dkə nə́ Ajwiə Təpɔŋə á Mə́m Ŋwunə
(Mag 1.21-28)
31Yeso a tsó ńgɛnə̂ Kapanawum páʼə á nə́ ḿbə́ nə tə́kɔʼə aláʼ yitsə̌ á mə́m Galili lə̂, Alěláʼə́sê á koʼə̂, a chúʼə á mə́ zéʼkə nə́ pəənə. 32A nə ńkɨʼnə̂ a ŋwu ntsəm nə́ ndú páʼ a nə ńdzéʼkə nə́ ə́wɨ́, ńté ńgə́ atséebə yə́ kə túg mətəənə.
33Ŋwu tsə̌ a kə chîə á mə́m ndɛ̂sê Pəjusə páʼə a kə túg nə́ ajwiə pɛ̌sê yi təpɔŋə á mə́m yə́. A nə ńkyéŋ nə́ mɛ́ ngye ńgə́, 34“Wə̌ə! Yeso páʼə a fɛ́d nə́ Nazalɛd, gho loonə̂ lə́ akə̂ á mbô pəgə́? Gho yǐ lɛ á mə́ tsəŋkə̂ nə́ áwə́g? Maŋ jîə ŋwu páʼ gho pə́ nə́ wə́ələ́, gho lə́ ŋwu Əsê yí ŋwaʼ nə́.”
35Yeso a tsáb nə́ mətɨ ńgə́, “Naʼə̂, laŋ ə́fɛ́lə á mbɨ yə́!” Pɛ̌sê wə̂ a tsɔ́ʼə ŋwu wə̂ ńtə́mə á ndəsê á mbi ŋwu ntsəmə, ńtíʼ ə́fɛ́lə á mbɨ yí tsɔʼə tə néŋə alɔʼ yətsɨ́ nə́ yə́. 36Á nə ńkɨʼnə̂ ŋwu ntsəmə, pó tíʼə ə́sóŋə á mə́m pó ńgə́, “Lɛ̌ zə́ənə́ ndzaŋ ndzeʼkə́? A sáʼ nə́ mətɨ ńgə́ ajwiə təpɔŋə á laŋ ə́fɛ́d, á kə ńdzóʼnə yə́.” 37Atséebə á kə nyinə̂ á mə́mə aláʼə atsəm ńté anu páʼ Yeso a kə ghɛd nə́.
Yeso a Tsóʼ Pɨ Pi Nɨ́ nə́
(Mat 8.14-17; Mag 1.29-34)
38Yeso a fɛ́lə á ndɛ̂sê Pəjusə ńgɛnə̂ á ndɛ̂ Saamunə. Ngəm Saamunə a kə chî nə́ əfə́g yi tyantə̂ nə́. Pó sóŋ nə́ Yeso ńgə́ a kwáalə yə́. 39A ghɛn ńtɨ́ ḿbáatə əkwu əyí, ə́sóŋ ńgə́ əfə́g yi wɨ́ ə́ fɛ́lə á mbɨ yə́, ə́ kə́ fɛ́lə. A kə́ ńtɔ́g ńdǒo á ndəsê ńchwáakə á mə́ tád nə́ ághóobə́.
40Ndzaŋ mə́numə á kə tə́ nə́ ḿmɛ́lə lə́, pə́ lɔg pɨ pə̈ ghɔ nə́ ńgyǐ nə́ pə́ələ́ á mbô Yeso, pɨ pə̈ ghɔ nə́ tsɔʼə nə́ ndzaŋə apə́ŋə aghɔ ntsəmə, a noŋkə̂ apô yə á ndu ŋwu ntsəmə a yáŋə. 41Pɛ̌sê pə́ nə ńkə́ ə́fɛ́dkə á mbɨ pɨ pi nɨ́ nə́, ńtíʼə ńkyéŋə ə́sóŋə ńgə́, “Gho lə́ mɔ́ Əsê.” Yeso a pə́ ńnaʼkə̂ ághɔ́b ńkě pí ńgə́ pó tsáb pô, ńté ńgə́ pó nə ńjî ńgə́ yí lə́ Klisto.
42Á nkyakə̂ apeŋ, Yeso a fɛ́d ńgɛnə̂ aliʼ ŋwunə a kě nə́ ə́wɨ́ chî pô. Pɨ pə́ chúʼə á mə́ chwa nə́ yí tə ńgyǐ ńdzə́ənə aliʼ páʼə a chî nə́ ə́wɨ́ ńkě pɨ ńkɔŋə̂ á mə́ mɛdtə̂ nə́ yə́ á ghɛn pô. 43Yeso a sóŋə á mbô pó ńgə́, “Maŋ yǐ shib náŋkə nkɨ yi əshîʼnə ńté anuə nəfoonə Əsê á mbô pətsə́ əláʼə, ńté ńgə́ lə́ anu pə́ nə ńtú nə́ mə ńgə́ maŋ yǐ faʼə̂.”
44A tíʼ ńgɛn nə́ mbiə á mə́ sóŋ nə́ anǔəsê á mə́m məndɛ̂ mə́ Əsê mə́ Pəjusə á mə́m Judya.
Currently Selected:
Lukasə 4: azo
Highlight
Share
Copy
Want to have your highlights saved across all your devices? Sign up or sign in
Lukasə 4
4
Ndzaŋ Satanə a nə Ńkwaʼlə̂ nə́ Yeso
(Mat 4.1-11; Mag 1.12, 13)
1Yeso a fɛ́lə á ntsǒnkǐ Jodanə Ajwǐəsê a lwɛ́nkə yə́, ńdɔgə̂ yí ńgɛnə̂ á kɔŋ məŋkwâʼlə̌, 2A chî ə́wɨ́ nə́ əlěmbî məghə́m nəkwa Dɛbəələ a kwaʼlə̂ yə́. Nə́ əlě pɨd pə̂, a kě ajûtsə́ jî pô, əlě pə wɨ́ ə́ měe nji ə́ záŋə yə́. 3Dɛbəələ a sóŋə á mbô yí ńgə́, “Təmbɔʼ gho pə́ mɔ́ Əsê, ghɛd məngɔʼ mɨ mə́ sɛlə̂ apéenə məkálə́.” 4Yeso a kwěe yí ńgə́, “Aŋwaʼlə Əsê á sóŋ ńgə́ ŋwunə a kě á mbî chî ńté lə́ tsɔʼə apá pô.”
5Tsɔʼə əghâ yi wɨ́, Dɛbəələ a tíʼ ńdɔgə̂ yí ńkɔ́ʼ ńgɛnə̂ á ndu nkwəənə ńnəələ̂ yí nə́ məfɔ mə́ ndu mbî tsɔʼə mətsəmə. 6Ńtíʼ ə́sóŋ nə́ yí ńgə́, “Maŋ yǐ fɛ̂ mətɨ mɨ mətsəm nə́ gho pópə afoʼ zəənə́. Pə́ nə ḿbɛ́dtə ə́fɛ̂ pə́ələ́ á mbô maŋə, mbɔʼ maŋ kə́ ə́fɛ̂ á mbô ŋwu ntsəm páʼ maŋ kɔŋ nə́. 7Maŋ yǐ fɛ̂ pɨ́d ətsəmə á mbô gho, mbɔʼ gho ghóʼkə mə.”
8Yeso a kwěe yí ńgə́, “Aŋwaʼlə Əsê á sóŋ ńgə́, ‘Ghóʼkə tsɔʼə Mmaʼmbî páʼə a pə nə́ Əsê əzo, ńkə̈ faʼə̂ tsɔʼə á mbô yə́.’ ”
9Dɛbəələ a lɔgə̂ yí ńgɛnə̂ á Jɛlusalɛmə, ńkɔ́ʼkə yə́ á ndu nəloŋ nə́ Tə́kɔʼndɛ̂sê, ə́sóŋ nə́ yí ńgə́, “Mbɔʼ gho pə́ mɔ́ Əsê,” lǒo atǐə á aliʼə́ nə́ ńgwǔəə á əsê? 10Ńté ńgə́ aŋwaʼlə Əsê á sóŋ ńgə́, “A yǐ tú pətseŋpə́ndɛ̂ pí pó pyáabə gho, 11Ńkə́ ə́sóŋ ńgə́ pó yǐ ŋáŋkə gho á atǐ nə́ mbô mɔ́b ńjî ńgə́ kɔ gho tô akoolə azô nə́ ngɔʼə.”
12Yeso a kwěe yí ńgə́, “Aŋwaʼlə Əsê á kə́ ə́sóŋ ńgə́, ‘Kɔ gho kwaʼlə̂ Mmaʼmbî páʼ a pə́ nə́ Əsê əzo.’ ”
13Əghâ ándó Dɛbəələ a kə məgtə̂ nə́ á mə́ kwaʼlə̂ nə́ Yeso nə́ ndu ntsəm lə́, ḿmɛdtə̂ yí ńtə́ ḿbyáb ndɛd yi ndaʼə.
Pə́ Kǐəə Yeso á Nazalɛlə
(Mat 4.12-17; Mag 1.14, 15)
14Yeso a pəənə̂ á Galili nə́ mətɨ mə́ Ajwǐəsê. Atséebə á nə ńnyi ńté yə́ á mə́mə aláʼə atsəmə. 15A zéʼkə á mə́m məndɛ̂ mə́ Əsê mə́ pəjusə, ŋwu ntsəmə a ghóʼkə yə́.
16Yeso a pəənə̂ á Nazalɛlə páʼə a kə kwéŋ nə́ ə́wə́, Alěláʼə́sê á koʼ a ghɛnə̂ á ndɛ̂sê Pəjusə ándó a ghə́ pěʼ nə́ ńgɛnə̂, ńdǒo á əsê á mə́ fóŋ nə́ aŋwaʼlə Əsê. 17Pə́ fɛ̂ aŋwaʼlə ntûsê Izaya á mbô yə́, a ŋáʼə aliʼ pə́ ŋwaʼlə̂ nə́ ə́wɨ́ ńgə́, 18“Ajwiə Mmaʼmbîə a chîə á mbɨ maŋə ńté ńgə́ a tsɔʼə mə ńgə́ maŋ yǐ ńnáŋkə nkɨ yi əshîʼnə á mbô pəpóŋə, ə́fóg ngaŋə́tsáŋ ḿbɨ ńgɛd pəfəg pə́ jɨ́ əliʼə́, ńkə́ ńgɛd pə́ mɛdtə̂ pɨ pə̈ wágə ághóobə́ 19ńkə́ ə́fiʼtə̂ ńgə́ ndɛd ə́ koʼ páʼ Mmaʼmbîə a yǐ nə́ kwá pɨ píə.”
20A sóŋ ə́lɨ́d lə́ ńtíʼ ḿbáatə aŋwaʼlə yə wɨ́, ə́fɛ̂ á mbô ŋwunə a faʼ nə́ á ndɛ̂sê yi wə́, ńtíʼ ńnáanə yə́ á əsê. Əmə́g mətsəmə á mə́m Ndɛ̂sê Pəjusə mə́ nə ńtə́əmə á mbɨ yə́. 21A tíʼ ńchúʼə á mə́ sóŋ nə́ á mbô pó ńgə́, “Ndzaŋ nə́ zóʼ nə́ lə́, anuə atsəm pə́ nə ŋ́ŋwaʼlə̂ nə́ á mə́mə aliʼə́ aŋwaʼlə jɨ á lɔgə̂ aliʼ ə́sɛ̂nə̌.” 22Á nə ńkɨʼnə̂ ŋwu ntsəm nə́ ətsáb pə əshîʼnə ə́ fɛ́d nə́ á ntso yə́, ŋwu ntsəmə a tíʼə ńtsáb əshîʼnə ńté yə́, ḿbítə ńgə́, “Lɛ̌ kě mɔ́ Jɔsɛf pô?”
23Yeso a sóŋə á mbô pó ńgə́, “Maŋ jî ńgə́ pɨ yǐ tséebə atséebə́nə́múʼ zəənə́ á mbô maŋ ńgə́, ‘Ntsóʼ pɨ tsóʼ əzo mbəəmə. Faʼə̂ á mə́mə aláʼ pɨ ndzaŋ pəg kə zóʼ nə́ ńgə́ gho faʼə̂ á mə́m Kapanawum lə̂.’ ”
24Yeso a peg ńgə́, mäŋ fiʼtə̂ áwɨ́ lɛ̌ nə́ ndə̌ŋdəŋ ńgə́ ntûsê yitsə̌ a kě ə́wɨ́ chî páʼ pə́ pí nə́ yə́ á mə́mə aláʼ pó pô. 25Jwə́ʼtə nə́, mäŋ fiʼtə̂ áwɨ́ nə́ ndə̌ŋdəŋ ńgə́ pəkog pə́ pəngyě pə́ kə nə́ənə á mə́mə aláʼə Islɛl nə́ ndɛd Elayija, əghâ ándó mbəŋ nə ńkě nə́ lô pô nə́ ngoʼ zə̂ zɛ́n teelə́ nə́ akəm lə́, nji kə chaanə̂ á mə́mə aláʼə atsəmə. 26Lə́ pə́ pə̂ ńkě Elayija á mbô ŋwu əghɔb yitsə̌ tú pô, tə ńdéʼtə nkog məngyě yitsə̌ páʼ a kə chî nə́ Zelefat, á əlá aláʼ Sidɔnə. 27Ngǎŋnkaʼ ə́ nə ńnə́ənə Islɛl nə́ ndɛd páʼ Elisha a nə ḿbə́ nə́ ntûsê, lə́ pə́ pə̂ ńkě yitsə̌ tsóʼ pô tə ńdéʼtə Neeman páʼə a nə́ ə́fɛ́d nə́ á Sylya.
28Ŋwu ntsəm páʼə a kə chî nə́ á ndɛ̂sê Pəjus ńdzóʼə anu yəwə́ a nə ńdzáŋ ndě. 29Pó lǒo á əsê ə́soŋə̂ yí ə́fógə á mə́mə aláʼ, ńdɔgə̂ yí ńgɛnə̂ á nkaŋ nkəŋə́ á nkwəənə pə́ nə ḿbɔ́ nə́ aláʼə azɔ́b ə́wə́ á mə́ kabkə̂ nə́ yə́ á mbéenə. 30Lə́ a pə ńdaŋə̂ á məsa pó ńgɛnə̂ yə́.
Ndzaŋə Ándó Yeso a nə Fɨ́dkə nə́ Ajwiə Təpɔŋə á Mə́m Ŋwunə
(Mag 1.21-28)
31Yeso a tsó ńgɛnə̂ Kapanawum páʼə á nə́ ḿbə́ nə tə́kɔʼə aláʼ yitsə̌ á mə́m Galili lə̂, Alěláʼə́sê á koʼə̂, a chúʼə á mə́ zéʼkə nə́ pəənə. 32A nə ńkɨʼnə̂ a ŋwu ntsəm nə́ ndú páʼ a nə ńdzéʼkə nə́ ə́wɨ́, ńté ńgə́ atséebə yə́ kə túg mətəənə.
33Ŋwu tsə̌ a kə chîə á mə́m ndɛ̂sê Pəjusə páʼə a kə túg nə́ ajwiə pɛ̌sê yi təpɔŋə á mə́m yə́. A nə ńkyéŋ nə́ mɛ́ ngye ńgə́, 34“Wə̌ə! Yeso páʼə a fɛ́d nə́ Nazalɛd, gho loonə̂ lə́ akə̂ á mbô pəgə́? Gho yǐ lɛ á mə́ tsəŋkə̂ nə́ áwə́g? Maŋ jîə ŋwu páʼ gho pə́ nə́ wə́ələ́, gho lə́ ŋwu Əsê yí ŋwaʼ nə́.”
35Yeso a tsáb nə́ mətɨ ńgə́, “Naʼə̂, laŋ ə́fɛ́lə á mbɨ yə́!” Pɛ̌sê wə̂ a tsɔ́ʼə ŋwu wə̂ ńtə́mə á ndəsê á mbi ŋwu ntsəmə, ńtíʼ ə́fɛ́lə á mbɨ yí tsɔʼə tə néŋə alɔʼ yətsɨ́ nə́ yə́. 36Á nə ńkɨʼnə̂ ŋwu ntsəmə, pó tíʼə ə́sóŋə á mə́m pó ńgə́, “Lɛ̌ zə́ənə́ ndzaŋ ndzeʼkə́? A sáʼ nə́ mətɨ ńgə́ ajwiə təpɔŋə á laŋ ə́fɛ́d, á kə ńdzóʼnə yə́.” 37Atséebə á kə nyinə̂ á mə́mə aláʼə atsəm ńté anu páʼ Yeso a kə ghɛd nə́.
Yeso a Tsóʼ Pɨ Pi Nɨ́ nə́
(Mat 8.14-17; Mag 1.29-34)
38Yeso a fɛ́lə á ndɛ̂sê Pəjusə ńgɛnə̂ á ndɛ̂ Saamunə. Ngəm Saamunə a kə chî nə́ əfə́g yi tyantə̂ nə́. Pó sóŋ nə́ Yeso ńgə́ a kwáalə yə́. 39A ghɛn ńtɨ́ ḿbáatə əkwu əyí, ə́sóŋ ńgə́ əfə́g yi wɨ́ ə́ fɛ́lə á mbɨ yə́, ə́ kə́ fɛ́lə. A kə́ ńtɔ́g ńdǒo á ndəsê ńchwáakə á mə́ tád nə́ ághóobə́.
40Ndzaŋ mə́numə á kə tə́ nə́ ḿmɛ́lə lə́, pə́ lɔg pɨ pə̈ ghɔ nə́ ńgyǐ nə́ pə́ələ́ á mbô Yeso, pɨ pə̈ ghɔ nə́ tsɔʼə nə́ ndzaŋə apə́ŋə aghɔ ntsəmə, a noŋkə̂ apô yə á ndu ŋwu ntsəmə a yáŋə. 41Pɛ̌sê pə́ nə ńkə́ ə́fɛ́dkə á mbɨ pɨ pi nɨ́ nə́, ńtíʼə ńkyéŋə ə́sóŋə ńgə́, “Gho lə́ mɔ́ Əsê.” Yeso a pə́ ńnaʼkə̂ ághɔ́b ńkě pí ńgə́ pó tsáb pô, ńté ńgə́ pó nə ńjî ńgə́ yí lə́ Klisto.
42Á nkyakə̂ apeŋ, Yeso a fɛ́d ńgɛnə̂ aliʼ ŋwunə a kě nə́ ə́wɨ́ chî pô. Pɨ pə́ chúʼə á mə́ chwa nə́ yí tə ńgyǐ ńdzə́ənə aliʼ páʼə a chî nə́ ə́wɨ́ ńkě pɨ ńkɔŋə̂ á mə́ mɛdtə̂ nə́ yə́ á ghɛn pô. 43Yeso a sóŋə á mbô pó ńgə́, “Maŋ yǐ shib náŋkə nkɨ yi əshîʼnə ńté anuə nəfoonə Əsê á mbô pətsə́ əláʼə, ńté ńgə́ lə́ anu pə́ nə ńtú nə́ mə ńgə́ maŋ yǐ faʼə̂.”
44A tíʼ ńgɛn nə́ mbiə á mə́ sóŋ nə́ anǔəsê á mə́m məndɛ̂ mə́ Əsê mə́ Pəjusə á mə́m Judya.
Currently Selected:
:
Highlight
Share
Copy
Want to have your highlights saved across all your devices? Sign up or sign in