Matyo 18
18
Lə́ Əwə á Gháʼ nə́ Ńtsɛɛlə̂ Ŋwu Ntsəmə á Mə́mə Anuə Nəfoonə Nəpóolə?
(Mag 9.33-37; Luk 9.46-48)
1Əghâ yi wɨ́, ngaŋə́zoŋə́ndzəm Yeso yǐəə á mbô yí ḿbítə ńgə́, “Ŋwunə á gháʼ nə́ ńtsɛɛlə̂ ŋwu ntsəmə á mə́mə anuə nəfoonə nəpó lə́ əwə?”
2Yeso a fóŋə mɔ́ kə́nyaŋ móonə, ńgɛlə̂ a yǐ ńtə́əmə a mbi pó. 3A tíʼ sóŋ ńgə́, “Maŋ fiʼtə̂ áwɨ́ nə́ ndə̌ŋdəŋ ńgə́, tə ńdéʼtə nə kwúblə ńchîə ándó pɔ̂nkə̂, tə ḿbə́ nə́ yǒ kě á mə́mə anuə nəfoonə nəpó kwú pô. 4Ŋwu ntsəm páʼ a tsóokə nə́ mbɨ əjǐə ándó mɔ́ nə́, lə́ ŋwunə á gháʼ nə́ ńtsɛɛlə̂ ŋwu ntsəmə á mə́mə anuə nəfoonə nəpóolə. 5Ŋwu ntsəm páʼ a kə́ nə́ ḿbímə mɔ́ nə́ yitsə̌ á ndɛ̂ yə́ á pí lə́ mə.”
Əkwaʼlə Páʼ ə̈ Ghɛd nə́ Pɨ pó Wǔəə a Mə́m Mənu mə́ Təpɔŋə
(Mag 9.42-48; Luk 17.1, 2)
6Mbɔʼ ŋwu tsə̌ a ghɛd ńgə́ táʼ mɔ́ nə́ yitsə̌ páʼ a pí nə́ nə́ maŋ a ghɛlə̂ təpɔŋ, tə ḿbə́ a pěʼ ḿbɔŋ ńgə́ pə kwúlə tə́kɔʼ ngɔʼə yə aghɔʼə́péenə á ndě yí ḿmaʼə̂ yə́ á mə́m nə́ənə, a fə́mnə ə́wə́. 7Ndɔ ə́ chîə atû mbî ńté mənu páʼ mə̈ ghɛd nə́ ńgə́ pɨ pə̈ ghɛlə̂ təpɔŋə! Ndɛn mənu ghɛn ə́ chîə á mə́ yǐ nə́, lə́ ndɔ pə́ ńchîə atû ŋwu páʼ mə̈ laŋ nə́ á mbô yí ńgyǐəə.
8Mbɔʼ apô azô kəənə akoolə azô a ghɛd ńgə́ gho ghɛlə̂ təpɔŋ, lə́gə ájɨ́d ḿmyaʼə̂. Á pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎ mɔʼə́ nə́ táʼə apô kɨ nə́ táʼə ako ńtsɛɛlə̂ á mə́ túg nə́ mbô mɛ́n mbɛ̌ kɨ məko mɛ́n mbɛ̌ pə pə́ ḿmaʼə̂ gho á mə́m móg tə měe. 9Mbɔʼ nələ́g zô nə́ kə́ ńgɛd ńgə́ gho ghɛlə̂ təpɔŋ, gho fwɔŋə̂ ájɨ́d ḿmyaʼə̂. A pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎ mɔʼə́ nə́ táʼ nələ́g ńtsɛɛlə̂ mə́ túg nə́ əmə́g mɛ́n mbɛ̌ pə́ pə́ ḿmaʼə̂ á gho á mə́m móg Satanə.
Atséebə́nə́múʼ ńté Mbéŋ Ndzɛd Páʼ ə́ Péŋ nə́
(Luk 15.3-7)
10Lɔg nə́ ndɛd ńgə́ nə́ kě mɔ́ kə́nyaŋ mɔ́ ghɛn yitsə̌ wág pô, ńté ńgə́ mäŋ sóŋə áwɨ́ nə́ ndə̌ŋdəŋ ńgə́ pətseŋpə́ndɛ́pə́sê póobə́ á nəpó pə́ zá ńtə́əmə á mbi Tǎ mə á nəpóolə əghâ ətsəmə.#18.10 Pətsə́ əŋwaʼlə ə́ peg nkaŋ 11 ńté ńgə́ Mɔ́ Ŋwunə a kə́ yǐ lə́ á mə́ chwádkə nə́ pɨ pə́ péŋ nə́. 11#18.11 Ńté ńgə́ Mɔ́ Ŋwunə a kə yǐ lə́ á mə́ chwádkə nə́ pɨ pə́ péŋ nə́.
12Nə́ kwaŋ ńgə́ akə̂? Mbɔʼ ŋwunə a túg məmbéŋ mə́ ndzɛd táʼ nkɛd, táʼə á mə́m ə́wə́ á péŋ, a kě apuʼ zə̂ məghə́m mɛ́n nəpuʼə́ nə́ mɛ́n nəpuʼə́ á ndu kɔŋ mɛdtə̂ ńgɛn ńchwaalə̂ táʼ wə̂ páʼ á pěʼ nə́ ḿbéŋ lə̂? 13Maŋ fiʼtə̂ áwɨ́ nə́ ndə̌ŋdəŋ ńgə́ mbɔʼ a zə́ənə ájɨ́d mbɨ əjǐ pyádnə ḿbɔŋ á ndu táʼ mɔ́ mbéŋ wə̂ ńtsɛ ndzaŋ mbɨ əjǐ ə́ pɔŋ nə́ á ndúmə apuʼ zə̂ məghə́m mɛ́n nəpuʼə́ nə́ mɛ́n nəpuʼə́ páʼ á pěʼ nə́ ńkě péŋ pô lə̂. 14Lə́ələ́ pə́ ńgə́ lə́ kě akwaŋə anuə Tǎ əwɨ páʼ a chî nə́ nəpó ńgə́ táʼ mɔ́ nə́ yitsə̌ a péŋ pô.
Mɔ́mɛ́ Əgho páʼ a Wǔ nə Anuə á Mbô Gho
15Mbɔʼ mɔ́mɛ́ əgho á wǔəə anuə á mbô gho, ghɛnə̂ á mbô yí ńnəələ̂ afankə́nuə ajíə á mbô yí tsɔʼə a tətɨ pɨ yí pɛ́n pɛ̌. Mbɔʼə a jwə́ʼtə á mbô gho, gho pɨ ńdɔgə̂ yə́ ándó mɔ́mɛ́ əgho. 16Lə́ təmbɔʼ a chî jwə́ʼtə pô, lɔgə̂ táʼ ŋwu kɨ pɨ pɛ́n pɛ̌ pɨ pó ghɛn ə́wɨ́ ńjî ńgə́ anuə atsəm páʼ pə́ sóŋ nə́, pɨ pɛ́n pɛ̌ kɨ pə́ teelə́ pə́ zóʼ, ńjɨ́ ńkə́ ńtɔ́mtə. 17Lə́ mbɔʼ a kə́ ńkǐəə yə́ á mə́ jwə́ʼtə nə́ á mbô pó, fiʼtə̂ zə́ələ́ á mbô nkyeetə pɔ́ pə́ Əsê. Mbɔʼə a kə́ ḿbɛ́d ńkǐəə yə́ mə́ jwə́ʼtə nə́ á mbô nkyeetə pɔ́ pə́ Əsê, gho lɔgə̂ yə́ ándó Təjǐsê kɨ nkwânchubə aláʼə.
Anu pə́ Kǐ nə́, nə́ yi pə́ Pí nə́
18Ndə̌ŋdəŋə́, mäŋ sóŋə áwɨ́ ńgə́ anuə atsəm páʼ pɨ kǐ nə́ á ndu ndəsê, pə́ yǒ kə́ kǐə zə́ələ́ á nəpóolə. Anuə atsəm nə́ kə́ nə́ ḿbímə á zə́ələ́ á ndu ndəsê, pə́ yǒ kə́ pímə ázə́ələ́ á nəpóolə.
19“Maŋ pɨ ńkə́ fiʼtə̂ áwɨ́ ńgə́ mbɔʼ pɨ pɛ́n pɛ̌ pə́ pímnə á mə́ pítə nə́ anuə atsəmə á ndu ndəsê, ḿbə́ Tǎ mə á nəpóolə a yǐ faʼə̂ zə́ələ́ á mbô pó. 20Ńté ńgə́ aliʼə́ atsəm páʼ pɨ pɛ́n pɛ̌ kɨ pə́ teelə́ pə́ kyeetə̂ nə́ ə́wɨ́ nə́ əlɛ́nə mə, maŋ chîə á tətɨ pó.”
Atséebə́nə́múʼ ńté Ngaŋəfaʼ páʼ a kě nə́ Mələ́ŋ Kóolə pô
21Pita a tíʼ ńgyǐəə á mbô Yeso ḿbítə ńgə́, “Mmaʼmbî, mbɔʼ mɔ́mɛ́ mə a wǔəə anuə á mbô maŋ lə́ ngǎ ə́shíʼə́ maŋ ləgnə̂? Tə ńkoʼ ngǎ asaambɛ̂?”
22Yeso a kwěe ńgə́, “Maŋ kě á mbô gho sóŋ ńgə́ lə́ ngǎ asaambɛ̂ pô. Lə́ ngǎ məghə́mə asaambɛ̂, ngǎ asaambɛ̂.”#18.22 Əŋwaʼlə pətsə́ sóŋ ńgə́, ngǎ məghə́m mɛ́n asaambɛ̂ nə́ asaambɛ̂. 23Lə́ələ́ pə́ ńgə́ anuə nəfoonə nəpóolə a chî lə́ ándó əfo yitsə̌ a nə ńtə́ nə́ ńdoonə̂ mə́ shitə̂ nə́ mənu mə́ nkáb pópə ngaŋə́faʼ əjíə. 24Ndzaŋə a kə́ chúʼ nə́ mə́ náŋ nə́ lə́, pə́ yǐ nə́ táʼ yitsə̌ páʼ a nə ńtə́ nə́ ńgwaamə̂ yí nə́ nkáb əpa məghə́m míə. 25Ngaŋəfaʼ əyǐ wə́ a nə ńkě túg nkáb ə́ koʼ mbɔʼ a tû nəkyɛ́ jí nə́ wɨ́ pô, Tǎ afaʼ əyǐə a sóŋ ńgə́ pə finə̂ ághɔ́b pə ngwě əyǐ nə́ pɔ́ pí ándó əpoʼ ḿbéenə ajúmə atsəm páʼ a nə ńtúg nə́ ńdɔg ńtû nəkyɛ́ jí ə́wə́.
26Ngaŋəfaʼ əyǐ wə́ a kwə́ʼtə mbi yí ḿbóʼmbô nə yi ńgə́, Wam ntɨ́ əghô ńté mə, maŋ yǐ tûə ajúmə atsəmə á mbô gho. 27Tǎ afaʼ əyǐə a kó mələ́ŋ mí ńdəgnə̂ yí nəkyɛ́ jí yi nə́ wɨ́, ńtíʼ ḿmɛdtə̂ yə́ a ghɛnə̂.
28Ngaŋəfaʼ wə́ a fɛ́lə apeŋ ńdzə́ənə ngaŋəko əyǐ yitsə̌ aliʼə́ afaʼ páʼ a tə nə́ ńgwaamə̂ yí nə́ nkáb tɔsə nəghə́mə, ə́faŋə̂ yə́ a ndě əyí ə́sóŋ ńgə́, “Tû nkéebə mə zə̂ páʼ gho tə́ nə́ ńgwaamə̂ mə ə́wɨ́ lə̂!”
29Ngaŋəko əyǐ wə̂ a kwə́ʼtə ndəsê ḿbóʼmbô nə́ yí ńgə́ wam ntɨ́ gho ńté mə, maŋ yǐ tû nkáb əzo. 30A kǐəə yí ńdɔgə̂ yí ńgɛn ńnéŋə a nkáʼə atsáŋ ńgə́ a yǐ tû nəkyɛ́ jí záʼə. 31Ndzaŋə ándó yitsə̌ ngaŋə́faʼ nə ńjɨ́ nə́ anu páʼ a laŋ nə́ lə́, anu yəwə́ a jwaʼə̂ ághɔ́b lɛ tətətə pó tíʼ ńgɛn fiʼtə̂ tǎ afaʼ əghɔb nə́ anuə atsəm páʼ a laŋ nə́. 32Tǎ afaʼ əghɔb wə́ a tíʼ fóŋə yí ńgə́ a kwúnə á ndɛ̂. A tíʼ ə́sóŋ nə́ yí ńgə́, ngaŋə afanə apoʼ ghɛn, maŋ kə ləgnə̂ nəkyɛ́ zə̂ tsɔʼə nətsəm gho nə ńtə́ nə́ ńgwaamə̂ mə ə́wɨ́ lə́ ńté ńgə́ gho nə ḿbóʼmbô ńgə́ maŋ ləgnə̂. 33Mbɔʼ gho nə ńkě kə́ ńkó mələ́ŋ mə́ ngaŋəko əgho tsɔʼə ndzaŋ maŋ nə ńkə́ nə́ ńkó məmô lə̂? 34Tǎ afaʼ əyǐ a lɔgə̂ azáŋə́ndé ə́fɛ̂ yə́ á mbô ngaŋə́pyáabə nkáʼə́tsáŋ#18.34 Atsáb jɨ ńgə́ ngaŋə́pyáabə nkáʼə́tsáŋ á sóŋə lə́ ńgə́ pəənə ándó pó nɨd nə́ ngaŋə́tsáŋ nə́ ngə́ʼə. ńgə́ pó ghɛn ńtsaŋkə̂ yí tə a láʼ ńtû nəkyɛ́ jí tsɔʼə nətsəmə.
35Lɛ̌ ndzaŋ ándó Tǎ mə á nəpóolə a lǒo nə́ ghɛd nə́ pɨ pətsəm páʼ təmbɔʼ nə́ chîə təpɔŋ pɔ́pə́mɛ́ pə́ənə́ á mə́m ntɨ́ pɨ ləgnə̂ pô.
Currently Selected:
Matyo 18: azo
Highlight
Share
Copy
Want to have your highlights saved across all your devices? Sign up or sign in
