Jâŋ 6

Yěso zághʼə pye tóusʉ tâa

(Mat 14.13-21; Mks 6.30-44; Lks 9.10-17)

1Mêi məno lei, Yěso tə̂u ńdə́r lə̂ cǒ njʉŋə́ lətʉŋ-nci Galilêi yi pə́ kə́ ncí fûŋ ńgó lətʉŋ-nci Tiberiadə. 2Ə lâʼ tsə̂ʉ nzəm zʉ́ ə́ nzáa gháʼate, ńté no gháp lə pə́ njwô mənkəʼə-məno mi a lə ghʉ lə́ pəghou. 3Yěso gháp pə ngaŋə-jyêʼ-no yé kôʼ ndəu ləkôr, ə́ shíʼ ńnyáŋtə́ sê. 4Ə́ ghi pə́, mpfu yi Pəyúda zʉ̂ lətsei gháp yi pə́ fûŋ ńgó Pásʉ́ka pə̂ nkûʼ. 5Yěso mâʼ ləjôghʼ, ə́ njwó tə́koʼ nou lâʼ pə̂ ntó ńcə̂r yé, a túŋu Fílîp ngô: «Tə paghʼə wǒ ghó zə́u mbələ̂ghʼ ə́ lǎghʼ zághʼə́ ndwuŋ lâʼ wo?» 6A lə túŋu Fílîp yə́rə́, ə́ ndághʼ môu yé lə̂ njwó ghíʼ a wo ghʉ̌, ńté no a lə pə́ njî zə̂u yi a lə pə́ ngwo ngʉ̌ wó. 7Ə́ ntúŋú yé yə́rə́, Fílîp pwôr lə́ zʉ́ ngô: «Pə́ lə̌i mbə́i nzə́u mbələ̂ghʼ pə́ yi məndənyê nkʉ pwô#6.7 Məndənyê nkʉ pwô mêi lə pə́ nkâp yi mboʼ ŋuu kə fâʼ təcər saŋ ləfǎa mboŋə́ ghwǒ zěi., ŋuu ghap pfâr tə ə́ nzúʼ məyʉʼ?» 8Cǒ ngaŋə-jyêʼ-no Yěso pə̂ yʉʼ wó, ləjôghʼ yé pə̂ Aŋderê, ə́ mbə́ fə̌r Pyêh, ə́ ndǎʼ lə́ Yěso ngô: 9«Cǒ môu mbiŋə pə́ yaʼa, ə́ ngwǒ mbələ̂ghʼ ntâʼ taa yi pə́ lǎghʼ ôrəjə ńtsúŋú, lə̂ shû ntâʼ pwô; lə́ tə ə́ kə́ kǔʼ hó lə̂ ndwuŋ lâʼ wo?» 10Yěso lâʼ ngô: «Pei ghʉ́ lâʼ nyáŋtə́ sê.» Ləghěi lə pə́ yʉʼ wó gháʼate. Gháp shîʼ ńnyáŋtə́ sê, mboʼ ndaʼ mbiŋə pi gháp lə pə́ yʉʼ wó lə kûʼ tóusʉ tâa. 11Yěso pfû mbələ̂ghʼ wêi, ə́ ŋə́ nkhwo mbó Sê, ə́ ngaptə́ lə̂ lâʼ. Ə́ nkə́ ngʉ́ pə́ yə́rə́ lə̂ shû, wǒwó pfâr ghíʼ a kǒŋ. 12Ŋuu ntsəm pfâr tə njwə́r, Yěso lâʼ lə́ ngaŋə-jyêʼ-no yé ngô: «Pei kə̂itə́ məpfuʼ mi ə́ vǔʼ tə koo có cwî.» 13Gháp kəitə məpfuʼ mbələ̂ghʼ wêi ntâʼ taa mi ə́ lə vǔʼ, ə́ lóghʼə pətyép tsap-pwô lə̂ ləghə̂m. 14Ə pye jwô nkəʼə-no yi Yěso ghʉ̌, ə́ ncʉ́ʼ mə́ ndâʼ ngô: «Kwaʼ lə́nə́ʉ ŋuu wo, â ntsətə-nkəʉ Sê yi a lə ghwǒ lə̂ ntó cər nzʉ̂ lə̂.» 15Yěso jî ńgó gháp pə́ ndou lə̂ ndághʼ mətəʉ ńgôu yé ńdaghʼ ńgʉ̂ fou, ə́ nyér gháp yʉʼ wó, ə́ nkə́ ncí nkóʼ ńdə̂r lə̂ ndəu ləkôr zə́ghʼə́-zʉ́.

Yěso ŋəi ndəu nci

16Ə́ pou mbə́ mpfu-ngwʉ̂, ngaŋə-jyêʼ-no yé shîʼ ńdə́r lə̂ nkaŋ lətʉŋ-nci Galilêi. 17Ə́ nkə́u cər có kənyúʼ mə́ ntə́u ńdə̂r lə̂ njʉŋə́ yi túsoŋ Kapérnawûm. Ə twûʼ ghi shʉ́ŋ, mə́i Yěso kə́ tô yé tə nkwátə́ gháp. 18Gháp pə̂ ntə̂u yə́rə́ ə fə̂m pə̂ nkhʉ̂, ə́ mə́ ncʉ̂ʼ nci lə̂ mətəʉ. 19Gháp laghʼ Kənyúʼ ŋə̂i no zə̂u pəkíləu pə́taa káa ntoghʼó, ə́ njwó Yěso pə̂ ŋə̂i ndəu nci ńtó ńcə́r gháp, gháp ji lə̂ mbóghʼ, ə́ ngwə̂r. 20Lə́ Yěso lâʼ lə́ páp ngô: «Koo pei pôghʼ, ə̂ məŋ!» 21Gháp pə̂ ndôu ńkhwór yé cər kənyúʼ, lə́ ə́ ngǐ jwó, mə́i gháp kə́u mə́ nkaŋ nci.

Ə lâʼ pə́ ŋáa ndôu Yěso

22Nzʉ̂ fôghʼ, ə lâʼ yi ə́ lə pyér nkaŋ nci kʉ̂ʉtə ńgó kənyúʼ kə pə́ nkaŋ nci pə́ tâʼ moʼ, ngaŋə-jyêʼ-no laghʼ ńdə́r, ə́ ngí lǎghʼ lə̌r káa Yěso pə̂ yé cər wó. 23Məcó məkənyúʼ fû Tiberiadə ńtó ńtə́ʉ nkaŋ nci, ə́ mbəʉ yʉʼ yi Yěso kə tə́ʉ wó, ə́ ŋə́ nkhwo mbó Sê ńté mbələ̂ghʼ, ə́ mbwóʼtə́ wěi ńgáptə́ lə̂ lâʼ lə̂. 24Ghíʼ ə́ lə ghí pə́ mə́i lâʼ jwó mə́ ńgó Yěso gháp pə ngaŋə-jyêʼ-no yé kâa pyêr gháp yʉʼ wó lə̂, gháp cʉ̂ʼ nkə́utə́ cər mêi məkənyúʼ, ə́ ndə́r lə̂ Kapérnawûm lə̂ ndôu Yěso.

Yěso məzʉ̂ mi ə́ ŋə̂ ləcwôr tə me

25Ə́ nkə́u njʉŋə́, ə́ njwó Yěso, ə́ ntúŋú yé ngô: «Cícye, o wó yaʼa tə fú shʉ́ŋə́?» 26A pwôr lə́ páp ngô: «Ə̂ŋ, n ndaʼ wéi kwaʼ lə́nə́ʉ ńgó pei lou ghâa gháʼa ńté pə̂ mbələ̂ghʼ yi pei kə pfár tə njwə́r lə̂, káa pei lôu wéi ghâa ńtê no pei kə zúʼ no yi mənkəʼə məno mi n ngʉ̂ měi laghʼ ńdáʼ.» 27Koo pei fâʼ ndághʼ ńdôu pə́ məzʉ̂ mi ə́ pə́ ncoŋtə́, pei fáʼ ndághʼ ńdôu pə́ məzʉ̂ mi kâa pə́ mê yé, ə́ mbóu mə́ ŋə̂ ləcwôr tə me. Môu Ŋuu táa ŋə́ məzʉ̂ mei lə́ pei, ńté no Tǎa Sê pə̂i məfaʼ mi a faʼ měi. 28Gháp túŋu Yěso ngô: «Mboʼ paghʼ ghʉ̂ gháʼá tə ngʉ̂ zə̂u yi Sê pə̌ nkǒŋ?» 29Yěso pwôr lə́ páp ngô: «Ə faʼ yi Sê pə̌ nkoŋ ńgó pei fâʼ, ə́ pə́ ńgó pei cóghʼ ntə̂ʉ wéi lə́ ŋuu yi a lə tə́u yé.» 30Gháp laʼ lə́ zʉ́ ngô: «O wo ghʉ̌ warə́ nkəʼə-no yi paghʼ wo jwó, ə́ cóghʼ ntə̂ʉ wághʼ lə́ gho? Kwaʼ zə̂u yi mboʼ o ghʉ̂, ə̂ hó? 31Pəmə́ngâa-njʉʼ pághʼ lə zʉ́ mána koŋə-məkwaʼá, ə́ pə̂ ghíʼ tsâr Sê pə́ ndaʼ ngô: A lə ŋə́ məzʉ̂ mi ə́ fú tʉ̌-lə́pû lə́ páp.» 32Yěso lâʼ lə́ páp ngô: «Kwaʼ lə́nə́ʉ məŋ ndaʼ wéi ńgó mbələ̂ghʼ yi Mə̌usə̂i lə ŋə́ lə́ pei, kâa lə fû yé tʉ̌-lə́pû, Tə́ ghâa lə̂ ŋə̂ kwaʼ mbələ̂ghʼ yi a fǔ tʉ̌-lə́pû. 33Ńté no mbələ̂ghʼ yi Sê ŋə̂, ə̂ ŋuu yi a lə fú tʉ̌-lə́pû ə́ mə́ ŋə̂ ləcwôr mbó pye cər nzʉ̂.» 34Gháp cʉ̂ʼ ndáʼ lə́ zʉ́ ngô: «Ə́ Nde, ŋə́ wághʼ mbələ̂ghʼ wêi maa mpfu tsəm.»

35Yěso lâʼ lə́ páp ngô: «Məŋ lə̂ pə̌ mbələ̂ghʼ yi a ghʉ pə́ pə̂ wó, ŋuu lə̌i ntsə́ʉ nzəm məŋ, nji lâʼ nkə́ nzâŋ yé yé po, ŋuu póu ncóghʼ ntə̂u yé lə́ məŋ, ndě-nci lâʼ nkə́ nzə̂u yé yé po. 36Lə́ n ndə laʼ wéi: pei jwo mə́ ghâa, lə́ káa pə́ côghʼ wéi ntə̂ʉ wéi lə́ məŋ. 37Pye pə́tsəm pi Tə́ ŋə̌ lə́ məŋ wo tsə́ʉ nzəm məŋ, m mbóu ndáʼ nzûŋ ghâa gháp po. 38Ńté no káa n ndə fû ghâa tʉ̌-lə́pû ntó lə̂ ngʉ́ zə̂u yi n nkǒŋ, n ndə tô pə́ lə̂ ngʉ́ zə̂u yi ŋuu yi a lə tə́u ghâa pə̌ nkǒŋ. 39Ə zə̂u yi ŋuu yi a kə tə́u ghâa pə̌ nkǒŋ pə́ ńgó koo məŋ mbə̂i tə cǒ tâʼ lə́ pye pi a lə ŋə́ lə́ məŋ cwî. A lə tə̂u ghâa ńgó n ntáa mbə́ ndyəghʼ-nzəm leʼé, n ngʉ́ gháp zʉ́ʉ lə́ ləwʉ̂. 40Ə zə̂u yi Tə́ ghâa pə̌ nkǒŋ, ə̂ yo: Ŋuu lə̌i njwó ghâa yi m mbə̌ Môu ye, ə́ ncóghʼ ntə̂ʉ yé lə́ zʉ́ Tə́, n ngʉ̂ mbə́ ndyəghʼ-nzəm leʼé, ə́ ngʉ̌ a zʉ̂ʉ lə́ ləwʉ̂.»

41Pəyúda ji lə̂ ntsátə́ tə́poŋ ńté Yěso, ńté no a lǎʼ ńgó â mbələ̂ghʼ yi a fǔ tʉ̌-lə́pû shíʼ. 42Ə́ nkə́ ncí mə́ ntsátə́ ndâʼ ngô: «Káa ŋuu wo pə́ Yěso môu Yosêp mo? Paghʼ pə̌ ntsuŋú njî tə́ ye gháp mə́ ye; ə́ lei gháʼá a cʉ̂ʼ mə́ ndâʼ ńgó a fǔ pə́ tʉ̌-lə́pû shíʼ?» 43Yěso pwôr lə́ páp ngô: «Pei nyér lə̂ nkə́ ntsátə́ təcər pei! 44Mboʼ ŋuu tsə̂ʉ yé nzəm məŋ tə́ ghó Tə́ ghâa yi a lə tə́u ghâa lə̂ cʉ́ŋə́ yé ńŋə́ lə́ məŋ po, a wo tsə́ʉ nzəm məŋ yə́rə́, n ngʉ́ mbə́ ndyəghʼ-nzəm leʼé, ə́ ngʉ́ a zʉ́ʉ lə̂ ləwʉ̂. 45pətsətə́-nkəʉ Sê lə ŋwaʼa cər ŋwaʼa Sê ngô: “Sê táa jyéʼ ŋuu ntsəm tsâr yé.” Ŋuu lə̌i nzúʼ tsâr Tə́, ə́ mbǒu ngʉ́ ghíʼ ə́ pə́ ntúŋú, mə́i a wo tsə́ʉ nzəm məŋ. 46Káa n ndôu ndáʼ ńgó cǒ ŋuu lə jwó mə́ Tə́; ndaʼ ghâa yi n ndə fú mbəʉ Sê ńtó lə̂ lə jwó mə́ yé. 47N ndaʼ wéi kwaʼ lə́nə́ʉ ńgó ŋuu yi a cǒghʼ ntə̂ʉ yé lə́ məŋ ghwo ləcwôr tə me. 48Mə̂ŋ mbələ̂ghʼ yi a ŋə̂ ləcwôr tə me. 49Pəmə́ngâa-njʉʼ péi lə pfár mána koŋə-məkwaʼá, ə́ ngʉ́ nkə́ nkwʉ́ kwʉ́. 50Lə́ ə́ ngwǒ lə́ mbələ̂ghʼ yi a fǔ tʉ̌-lə́pû, â yi ŋuu lə̌i mpfár, a lâʼ nkə́ nkwʉ̂ yé po. 51Mə̂ŋ ŋuu yi a pə̌ mbələ̂ghʼ yi a fǔ tʉ̌-lə́pû shíʼ, ə́ mə́ ŋə̂ ləcwôr lêi. Ŋuu lə̌i mpfár wěi, mə́i a táa ghwǒ ləcwôr tə me. Mbələ̂ghʼ wêi yi n ngwo ŋə́ wó lêi, ə̂ mbap mbəʉ zâa, n ŋə̂ ndághʼ ńdou ńgó pye-mə́soŋ cər nzʉ̂ ghwô ləcwôr tə me.» 52Yěso lâʼ yə́rə́, pəyúda pə̂ nzóŋə təcər páp, ə́ mə́ ndâʼ ngô: «Ŋuu wo wo ghʉ̌ ghaʼá poŋə́ ŋə́ mbap mbəʉ ye paghʼə pfár?» 53Yěso lâʼ lə́ páp ngô: «N ndaʼ wéi kwaʼ lə́nə́ʉ ńgó pei lə̌i ndə́iʼ mpfár mbap mbəʉ Môu Ŋuu, ə́ pǒu nó məci mé po, pei lâʼ ngwô wéi ləcwôr tə me po. 54Ŋuu lə̌i mpfár mbap mbəʉ zâa, ə́ nó məci mâa, a ghwô ləcwôr tə me; n ntáa mbə́ ndyəghʼ-nzəm leʼé, ə́ ngʉ́ ngaŋ zʉ̂ʉ lə̂ ləwʉ̂. 55Ńté no mbap mbəʉ zâa, ə̂ kwaʼ mbələ̂ghʼ, məci mâa pə̂ kwaʼ məluʼ. 56Ŋuu lə̌i mpfár mbap mbəʉ zâa, ə́ nó məci mâa, mə́i paghʼ zʉ́ təmtə; m mbə̂ lə́ zʉ́, a pə̂ lə́ məŋ. 57Ə́ ndʉŋ-ndʉŋ ghíʼ Tə́ ghâa yi a ghʉ pə́ pə̂ wó lə tə́u ghâa lə̂, m mbə́ wó ə́ ńté pə́ yé, ə́ kə̂ mbə́ ndʉŋ-ndʉŋ ghíʼ ŋuu yi a pfár mbap mbəʉ zâa ghʉ̌ kə́ pə̂ yé wó ńté ghâa. 58Yo mbələ̂ghʼ yi a fǔ tʉ̌-lə́pû shíʼ; kâa pə̂ yé ghíʼ mána yi pəmə́ngâa-njʉʼ pei lə pfár ə́ mbou ngʉ́ nkwʉ́tə́ lə̂; ŋuu lə̌i mpfár mbələ̂ghʼ wo, a lâʼ nkə́ nkwʉ̂ yé po.» 59Yô məno mi Yěso lə jyêʼ pye ndə̂ cûʼtə pəyúda, ə́ mpfu yi a lə pə́ túsoŋ Kapérnawûm.

Mətsâr ləcwôr tə me

60Ngaŋə-jyêʼ-no Yěso zûʼ mətsâr mwo, lələʉ təcər páp jî lə̂ ndâʼ ngô: «Tsâr yo təi tə ndêi! Tə mboʼ wǒ zûʼ?»

61Yěso jî ńgó ngaŋə-jyêʼ-no yé pə́ ntsâtə tə́poŋ ńtê no yi a lǎʼ lêi, ə́ ndǎʼ lə́ páp ngô: «Məno mi n ndǎʼ lo, pə́ nzáŋə wéi mo? 62Tə pei lə̌i njwó Môu ŋuu kóʼ ńdə́r lə̂ yʉʼ yi a lə fú wó, pei cʉ̂ʼ fú ngʉ́ pə́ gháʼá? 63Ndaʼ Zəghʼə Sê lə́ ŋə̂ ləcwôr, mətəʉ ŋuu-məsoŋ kâa kûʼ yé lə̂ ngʉ̂ có zə̂u. Mətsâr mi n ŋə̂ lə́ pei fû mbó Zəghʼə Sê, ə́ mbou mə́ ŋə̂ ləcwôr. 64Lə́ pəcó pye təcər pei kâa pə́ mbə̂i gháp.» Yěso lə yaa fú pə́ ntû, ə́ mə́ njî pye pi káa gháp pə́ ncôghʼ gháp ntə̂ʉ gháp lə́ zʉ́, ə́ mbou mə́ njî ŋuu yi a ghʉ̌ féi yé ńŋə́. 65Yěso kə̂ ncí ndâʼ ngô: «Ə̂ zə̂u yi ə́ ghʉ̌ n ndâʼ lə́ péi ńgó mboʼ ŋuu tsə̂ʉ yé nzəm məŋ tə́ ghó Tə́ ghaa lə̂ ncʉŋə́ yé po.» 66Ə́ fû mpfu wêi, lələʉ lə́ pye pi gháp lə ŋəi nzəm Yěso fû nzəm zʉ́ nkhʉ̂ gháp, lə́u gháp pə pǎp kə̂ mbyér ntə̂m gháp ku ŋə̂i po.

Pyêh pə̌i ńgó Yěso Môu Sê

67Yěso túŋu ngaŋə-jyêʼ-no yé ntsap pwô lə̂ ləghə̂m ngô: «Ə́ ngwǒ lə́ pei, káa pei lə̂r zéi lə́wó mo?» 68Síməu Pyêh pwôr lə́ zʉ́ ngô: «Ə́ Nde, paghʼ lə̌r wǒ cə́r wǒ? O ghwo mətsâr ləcwôr tə me. 69Paghʼ pə̌i ńgó ô ŋuu yi a fǔ mbó Sê.» 70Yěso pwôr lə́ páp ngô: «Pei pwo ntsap pwô lə̂ ləghə̂m, lə́u məŋ lə̂ ndə tsóʼ wéi péh? Lə́ cǒ ŋuu pə́ təcər pei, ə́ mbə́ Sə́tə.» 71A lə laʼ gháʼá Yúda môu Síməu Isəkaryôtə; ńté no a lə pə́ tə mbə́ pə̂ cǒ tâʼ lə̂ ngaŋə-jyêʼ-no yé ntsap pwô lə̂ ləghə̂m, lə́ ə̂ pə̂ zʉ́ yi a lə wo féi Yěso ŋə́.

Currently Selected:

Jâŋ 6: NLA

Highlight

Copy