Matyê 22
22
Saghʼ-ləghaa lə̂ no lətsei lâa-ndə̂
(Lks 14.15-24)
1Yěso kə̂ ncí ndághʼ pə́ saghʼ-ləghaa, ə́ ndǎʼ lə̂ lâʼ yi ə́ pə́ nzʉ̂ʼtə tsâr yé ngô: 2«Pei jwó ghíʼ Ləfou Sê* pə̂. Cǒ fou lǎʼ ntʉ́ŋtə́ tə́koʼ lətsei ńté no lâa-ndə̂ môu ye yi mbiŋə. 3Ə mpfu nzʉ̌ məzʉ̂ ghʉ nkûʼ, a tə̂u pəməncʉŋ-ndə̂ pé, ńgó gháp wó fúŋ pye pi a kə ghə́u gháp ńgó gháp tó gháp pə pǎp zʉ́ lətsei. Lə́ pəməncʉŋ-ndə̂ pé pêi wo njwó warə́-warə́ ŋuu lə́ páp, a lə̂ʼ yé lə̂ ntó. 4A kə̂ ncí tə̂u pəcó pəməncʉŋ-ndə̂ pé, ə́ ndǎʼ lə́ páp ngô: “Pei lâʼ lə́ pye pi məŋ kə ghə́u gháp ńgó pə́ tsuŋtə́ mə́ məzʉ̂ tə ntághʼ se, ńgó n nkə ghʉ pə́ jwî məfoŋ mâa, ə́ njwítə́ mənye mâa mi ə́ ghúʼtə́ gháʼate, ńgó məzʉ̂ yaa mə́ ndáʼ ntə́ʉ se, gháp tó ə́ pə zʉ́ lətsei lâa-ndə̂!” 5Pye pi pə́ kə ghə́u gháp lə̂ lətsei lâa-ndə̂ káa lâghʼ gháp no yi gháp lǎʼ ńfûŋ có no, warə́-warə́ ŋuu tóghʼə pə̂ yé ndə̂u. Cǒ ŋuu lə̂r lə̂ nkâʼ zʉ́, cǒ lə̂r lə̂ ntǎŋ mətǎa ye. 6Pəcó ghou pəməncʉŋ-ndə̂ fou pêi, ə́ ngághʼə́ gháp, ə́ njwítə́ gháp. 7Ə no mə́u fû nzáŋə́ fou. A tə̂u pəlwóʼó-ntso pé, ńgó gháp wó njwítə́ məfwôr mêi, ə́ ntǒu túsoŋ záp, 8ə́ nkə́ ncí ntsə́tə́ lə́ pəməncʉŋ-ndə̂ pé ngô: “Pə́ yaa mə́ ndáʼ ntághʼ məzʉ̂ lâa-ndə̂ sê. Ə pye pi n kə yǎa ngə́u gháp lətsei, ə̂ pye pi káa gháp kə́ kûʼ gháp lə̂ nzʉ́ wěi. 9Pei cʉ́ʼ ngwo mpfu wo pə́ mətû laŋə́, ə́ jwó pə́ wǒ ŋuu wó, pei fûŋ yé ńgó â tó nzʉ́ məzʉ̂ lətsei lâa-ndə̂.” 10Pəməncʉŋ-ndə̂ pé pêi wo ntə́ʉtə́ mətû laŋə́, ə́ jwó maa wǒwó, ə́ fúŋ yé, kəʉ ngaŋ pə̌ pə́ ŋuu shʉʼʉ, kəʉ ŋuu tə́poŋ ló; pə́ naa nyáŋə́ gháp pə́ cər tárə́ tə gháp lóghʼə. 11Fou ghʉ̂ nkə́u cər tárə́ lə̂ njwó lâʼ yi ə́ tô lə̂ no lâa-ndə̂, ə́ nkə́u wó, ə́ njwó cǒ ŋuu mbiŋə, yi kâa mâʼ yé ndǐ lâa-ndə̂#22.11 Ə́ lə pə́ lə́ mar pəyúda, ŋuu fúŋ lətsei lâa ndə̂, ə́ nyarə́ məndǐ mi pye wo mǎʼ poŋə́ kə́u ndə̂.. 12A lâʼ lə́ zʉ́ ngô: “Ə sə̌u ghâa, o ghʉ gháʼá mboŋə́ kə́u yaʼa tə́ mǎʼ ndǐ lâa-ndə̂?” Lə́u ŋuu wêi jî yé no yi a wo lǎʼ po. 13Fou cʉ̂ʼ ńkə́ ńdáʼ lə́ pəməncʉŋ-ndə̂ pé ngô: “Pei kə́r məku mé, ńkə́r mbô mé, ə́ mǎʼ yé péi, ə́ cər nzə̌m. A wo nyáŋ yʉʼ wó ə́ pə́ lǎa, ə́ pə́ zʉ́ŋ.” 14Yěso tsághʼə ngô: Sê pə̌ fûŋ pye tə nzáa, lə́ pye pi a tsǒʼ gháp kâa zâa gháp.»
Pə́ zʉ̂ʼ ntsʉ Yěso ńté no ntsəp fou pəlóma
(Mks 12.13-17; Lks 20.20-26)
15Pye falísia* pə̂ có leʼé, ə́ ngwo ngʉ́ cûʼtə, lə̂ ndêi lə̂ no yi Yěso laʼá, ə́ ngǒu yé, 16ə́ ntə́u có ntâʼ pye lə̂ ngaŋə-jyêʼ-no* záp, tə mbaa có ntâʼ pye lə̂ ku pye Elôdə* ńgó gháp wo ndǎʼ lə́ Yěso ngô: «Cícye, paghʼ pə̌ njî ńgó o lâʼ no, ə́ mbóu ndâʼ pə̂ no yi ə́ tə́ʉ ndʉŋ-ndʉŋ, ə́ ndǎʼ tə́ póghʼ ŋuu, tə́ náŋ ŋuu sʉ̂ zʉ́, ə́ ndâʼ pə̂ no lə́nə́ʉ ghíʼ Sê pə̌ ntúŋu ńgó pə ghʉ́ yə́rə́. 17Lǎʼ wághʼ ghíʼ o nkwaŋ zô lə́ yo no: Ləpə̌ʉ* zághʼə ə́ pə́ ghíʼi mbə́i ńgó paghʼə mâʼ ntsəp fou pəlóma pə Lóma* kəʉ ə́ ngə́?»
18Lə́ Yěso jî kwaŋtə tə́poŋ záp, ə́ ndǎʼ lə́ páp ngô: «Pəsap-ndwô-fʉ́ŋ, pei kwaʼtə ghâa ńté hó? 19Pei nyarə́ ghâa nkâp yi pə́ laghʼ ŋə̂ ntsəp.» Gháp laghʼ paghʼə nkâp ntó ńnyárə́ yé. 20A túŋu gháp ngô: «Yo sʉ̂ wó yi ə́ pə́ lə̂ nkâp? Yo pə̂ ləjôghʼ wó yi ə́ pə́ mə́u?» 21Gháp pwor lə́ zʉ́ ngô: «Ə́ yi fou pəlóma, ləjôghʼ kə̂ ḿbə́ pə̂ yé.» Yěso cʉ̂ʼ ndâʼ lə́ páp ngô: «Ə́ lə̌i mbə́ yə́rə́, pei ŋə̂ zə̂u yi ə́ pə́ yi fou pəlóma lə́ fou pəlóma, ə́ ŋə́ yi Sê lə̂ Sê.» 22Gháp zûʼ ghíʼ a pwǒr yə́rə́, ə́ kəʼə gháp. Gháp nyêr yé yʉʼ wó ńdə́r.
Pə́ zʉ̂ʼ ntsʉ Yěso lə́ ləzʉ̌ʉ lə̂ ləwʉ̂
(Mks 12.18-27; Lks 20.27-40)
23Ə́ kə̂ ḿbə́ pə̂ leʼé wêi, ə có ntâʼ pye lə̂ nou pə sadúsia* cʉ̂ʼ ńkə́ ntó mbəʉ Yěso. Pə sadúsia* ə̂ pye pi káa gháp pə̂i gháp ńgó pəpfû táa zʉ̂ʉ lə̂ ləwʉ̂. Gháp túŋu mbó Yěso ngô: 24«Cícye, Mə̌usə̂i lə lâʼ ngô: “Ŋuu lə̌i nzóʼ məngyě, ńkwʉ́ tə́ měʼ zə̂u, mə́i fə̌r ye ghwo lə̂ sóghʼ mpfǒghʼ, gháp zʉ́ jítə́ ghəpə́, ə́ ndǎghʼ ńnuŋú ngər fə̌r ye wêi.” 25Ghíʼ ə́ pə́ yə́rə́ lə́, pəcó pəfə̌r lə pə́ wó ə́ mbə́ mbiŋə saambwô, nduŋ-mbi zôʼ, ə́ nkwʉ́ tə́ měʼ zə̂u, ə mbâatə sôghʼ mpfǒghʼ, ə́ nkə́ ncí nkwʉ̂ yé tə́ měʼ zə̂u, 26mbâatə tárə́ kə̂ ncí sôghʼ yé mpfǒghʼ wêi, ə́ nkwʉ́ pə́ tə měʼ zə̂u, ə́ kə̂ mbə́ pə́ yə́rə́ tə gháp pêi saambwô zôʼ məngyě wêi, ə́ nkə́ nkwʉ́tə gháp pə́ tə měʼ zə̂u. 27Ə́ ghi lyəghʼtə́, məngyě kə̂ nkwʉ̂ yé lə́wó. 28Ghíʼ pye pwo saambwô lə zóʼ məngyě wêi lo, pə́ táa zʉ́ʉ lə̂ ləwʉ̂, â pə́ ngwě warə́ ŋuu lə́ páp?»
29Yěso pwôr lə́ páp ngô: «Jîno zéi pə́ futə wéi, ńté no káa pei pə́ njî wéi zə̂u yi ə́ pə́ cər ŋwaʼa Sê, ə́ mbóu káa pə́ jî wéi ghíʼ mətəʉ Sê pə̂. 30Pei yáa njí ńgó ə́ ghʉ̌ pə́ mpfu yi pəpfû wo zʉ́ʉ lə̂ ləwʉ̂, mbiŋə gháp pəngyě kə́ nzôʼ gháp po. Gháp ghʉ̌ cʉ́ʼ nyâŋ záp pə́ ghíʼ pəcwôʼ Sê* tʉ̌-lə́pû, 31ə́ ngwó lə̂ no nzʉ́ʉ lə̂ ləwʉ̂, mə́i pei lâa kə́ fú fúŋ wéi no yi Sê lə lǎʼ áa? Lə́u a lâʼ ngô: 32“Mə̂ŋ Sê Ábələhâm, ə́ mbə́ Sê Ísaghʼ, ə́ mbə́ Sê Yokôp péh? Ə Sê ə̂ Sê pətəʉ#22.32 Ə́ laghʼ ndâʼ ńgó pye Sê pwo pi gháp lə kwʉ́tə́ mə́ lo, gháp pə́ pə́ wó, gháp pə Sê pə̂..” Yěso kə̂ ncí ndáʼ ngô: “Ə Sê kâa pə̂ yé Sê pəpfû, ə Sê ə̂ Sê pətəʉ.”» 33Mənou lâʼ mi ə́ lə pə́ yʉʼ wó lə pə́ fə́tə mbə̂u yi Yěso laghʼ ńjyêʼ pye zə̂u yə́rə́.
Ə ntǎghʼ Sê yi jwǐ
(Mks 12.28-34)
34Pye falísia* lêi tə nzúʼ ńgó Yěso tsághʼə́ mə́ ntsʉ pye sadúsia*, ə́ nǎa nkə̂itə́ mbəʉ Yěso. 35Cǒ ŋuu təcər páp, ə́ mbə́ nkeʼtə-ləpə̌ʉ Sê tə ə́ mbə́ wěi tô ńkwáʼtə́ Yěso, ə́ mə́ ndôu lə̂ ndə̂ʼ ləkei yé, ə́ ntúŋú yé ngô: 36«Cícye, ə́ pə́ lə́ ləpə̌ʉ ghíʼi zárə́ pə̂ yi jwǐ.» 37Yěso pwôr lə́ zʉ́ ngô: «Kǒŋ Nde Sê zô lə̂ ntə̂ʉ gho tsəm, ə́ ntághʼ pə́ yé mbi lə̂ no pô tsəm, ə́ ncóghʼ kwaŋtə zô pə̂ ndaʼ lə́ zʉ́, 38ə̂ ntǎghʼ Sê* yi jwǐ, ə́ ndaghʼ ḿbə̂ nduŋ-mbi wěi. 39Ə ntǎghʼ Sê mbâatə pwô yi ə́ shwí zêi yo pə̂ ngô: “Kǒŋ fə̌r gho ghíʼ o kôŋ tû-mbəʉ zô.” 40Ləpə̌ʉ Mə̌usə̂i tsəm tə mbaa məno mi pətsətə́-nkəʉ Sê* lə lǎʼ fú pə́ lə̂ məntǎghʼ mwo mə́mbwô.»
No nzaʼ-nkʉ gháp fou Ndavîd
(Mks 12.35-37; Lks 20.41-44)
41Pye falísia* ghʉ kə̂itə́, Yěso túŋu gháp ngô: 42«Pei kwaŋ zéi ńgó nzaʼ-nkʉ yi Sê lə ghʉ̌ ndaʼá mə́u lə̂ ŋə́ lə́ paghʼə* â wǒ? Ńgó a môu wǒ?» Gháp pwor lə́ zʉ́ ngô: «Â môu fou Ndavîd.» 43Yěso lâʼ lə́ páp ńgó ə́ pou ngáʼá, mə́i Zəghʼə Ndêi-lěi lə zʉ́ fou Ndavîd a fûŋ Nzaʼ-nkʉ ńgó Nde ye, 44tə ndâʼ ngô:
«Ə Nde Sê lâʼ lə́ Nde ghâa ngô:
Tó ńnyáŋ lə̂ ndyə́ghʼə́ pô ghâa yi təʉ,
tə ndáʼ nkə́u mpfu yi n ngwo ghʉ̌ ô nyʉ̂ŋtə́ pəghaŋə mbəu pô.»
45Tə fou Ndavîd lə fûŋ yé ńgó Nde ye gháʼa, a pôu ḿbə́ môu ye gháʼá? 46Ə́ wô təcər pəfalísia*, káa cǒ ŋuu kûʼ yé lə̂ mbə́i mbwôr pə́ tâʼ no lə̂ no yi Yěso túŋú zěi. Ə́ fú leʼé wêi káa ŋuu póu nkə́ nkûʼ yé lə̂ ntúŋú yé có no.
Currently Selected:
Matyê 22: NLA
Highlight
Share
Copy
Want to have your highlights saved across all your devices? Sign up or sign in
