Matyê 24
24
Yěso lâʼ ńgó pə́ táa nkə̌m yʉʼ Sê
(Mks 13.1-13; Lks 21.5-19)
1Yěso fû yʉʼ Sê* ə́ nkwár mə́ ndə́r, ngaŋə-jyêʼ-no* yé tô lə̂ mbəʉ zʉ́, ə́ ndǎʼ ńgó a náŋ mbə̂u yi pə́ lə lǎghʼ ńkə́r yʉʼ Sê* ńjwó. 2Lə́ Yěso lâʼ lə́ páp ngô: «Pei jwô məzə̂u gháʼá, cʉ́ʼ məŋ ndâʼ wéi kwaʼ lə́nə́ʉ, ə́ táa pə̂ có leʼé, pə fú mvôghʼ tə ləghǒ kə́ mbyér nzápə yé lə̂ có po.»
Mələiʼi mi ə́ nyarə ńgó nzʉ̂ pə̌ ngwo mě wó
3Yěso lə̂r tə nyáŋ ndəu ləkôr mətʉ̌ məwə̂r olîvə, ngaŋə-jyêʼ-no* yé faghʼ mbəʉ záp ńtó ńtúŋú yé ngô: «Lǎʼ wághʼ mpfu yi yo no táa pə́. Lǎʼ wághʼ ləiʼi yi pə́ táa lǎghʼ jí ńgó o pə̌ ntó, tə mbaa yi wo ghʉ̌ pə jí ńgó leʼé yi nzʉ̂ wo mě wó kuʼ mə́.» 4Yěso pwôr lə́ páp ngô: «Pei lághʼə́ tû zéi, ə́ mbáa ŋuu lə̂ fútə́ wéi. 5Ńté no pye tə nzáa táa tághʼ ləjôghʼ zâa mbi, maa wǒwó lə́ páp lâʼ ngô: “Mə̂ŋ Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́*!” Ə́ laʼ yə́rə́, ə́ lǎghʼ futə́ pye tə nzáa. 6Pei táa zúʼ pə pə́ ndâʼ no ńté məntso mi ə́ kwatə́ lə̂ wéi sʉ̂ mbaa pə́ ndǐ təsə, lə́ koo pei táa mbóghʼ. Ə́ pə́ ntúŋu ńgó mêi məzə̂u pyə̂ghʼ nkwatə́, lə́ ə̂ kə́ ndághʼ ḿbə̂ yé ńgó nzʉ̂ me mə́ po. 7Ə́ lâʼ táa lěsê, ə́ lwóʼo có, fou tə̂u lesê, ə́ ndwóʼo cǒ, ndesé táa fú cʉʼʉ́ lə̂ məyʉʼ tə nzáa, ntəʉ nji póu ngwʉ̌ lə̂ məyʉʼ tə nzáa. 8Mwo məno táa lǎghʼ pə́ ghíʼ məngyě yi môu jǐ lə̂ ndə́u yé lə̂. 9Pə́ ghôu wéi ə́ wǒ ŋə́, pə ŋə́ wéi ngwôʼ, ə́ ghʉ̌ pə jwítə́ wéi. Məlâʼ mə́tsəm táa fú pǎa wéi ńté ghâa. 10Ə́ táa kə́ pə́ pə̂ tə pye tə nzáa təcər pei kə́ mbyér ncôghʼ gháp ntə̂ʉ lə́ məŋ po, gháp shə́rə́ fə̌i məmbəʉ máp, ə́ shərə́ mbaa mbəʉ záp təcər páp. 11Pəntsətə́-nkəʉ Sê* pi məlaa kwátə́ tə nzáa, ə́ futə́ lələʉ pye. 12Məno tə́poŋ kʉʼʉ́ nzáa, tə lələʉ pye kə́ mbyér nkóŋə gháp mbəʉ záp tə nkoŋə́ po. 13Lə́, ŋuu yi a wo shə̌ghʼ tə́ kâa lə̂ ghʉ̌ cwór. 14Pə́ táa tsətə́ wo Nkəʉ Shʉʼʉ yi no Ləfou Sê* ə́ maa yʉʼ tsəm ndəu ndesé, lə́ pə́ yi məlâʼ mə́tsəm wo zúʼ, nzʉ̂ cʉ̂ʼ nkə́ mé mě.»
Ə no lə̂ ngwôʼ yi njwǐ
(Mks 13.1-13; Lks 21.5-19)
15«Ə́ táa pə́ mpfu wêi, pêi jwó ŋuu yi Ndanyê ntsətə-nkəʉ Sê* lə fúŋ yé ńgó “Ngaŋə-ndou yi pə́ tsʉʉ yé tsʉ̌ʉ lə̂”, â tô ńtə́ʉ kwaʼ cər yʉʼ ndêi-lěi. Ŋuu lə̌i fúŋ yʉʼ ŋwaʼa yo, a sâʼ təʉ lə̂ ntsúŋú nzúʼ. 16Ə́ poŋ ńgó, pə́ lə̌i ndáʼ ndêi tə njwó yé, pye pi ə́ pə́ Yudêi khʉ ə́ ndâghʼ ndə̂u yi məkôr ńgwo ndwô. 17Ŋuu yi a táa pə́ lə̂ tətáa yi ə́ pə́ ntsôʼ ndə̂, a pâa lə̂ shíʼ ńgó a wo pyê zə̂u ndə̂ poŋə́ lǎghʼ khʉ̌. 18Ŋuu yi a táa pə́ nkâʼ, a páa lə̂ ndáʼ ńgó a wo pə̌ʉ ndə̂ pyé ndǐ fwôghʼ ye. 19Yêe ngwôʼ pəngyě pi ə́ táa pə́ pi shuŋə́, tə mbaa pi ə́ táa pə́ nóŋə ghəpə́-paŋə́ lə́ mêi məleʼé! 20Pei sʉ́ʉtə́ Sê ńgó koo a ghʉ̂, ə mpfu yi pei ghʉ̌ pə́ ŋáa nkhʉ̂ yə́rə́ tâa mbə́ mpfu caghʼ-caghʼ mbʉŋ, kəʉ pə̂ leʼé nji lo. 21Ńté ńgó ngwôʼ yi táa kə́u pye, táa záa gháʼate, tə ə́ pə́ yi pə́ laa kə́ jwô có yə́rə́, tə fú ghíʼ Sê lə tsuŋú nzʉ̂, ə́ ngwo nkə́u mpfu wo, pə kə́ mbóu ndáʼ nkə́ njwô yé có yə́rə́ po. 22Lə́ ə́ mbə́ yi Sê lə ghíʼi, ə́ ndə́iʼ jwó ńgó a wo cwótə́ mêi məleʼé pó mə́i mboʼ cǒ ŋuu ye lâʼ ncwôr yé po. Lə́ a lə laghʼ pə̂ no pye pi a lə tsóʼ gháp, mboŋə́ cwótə́ məleʼé lâʼ mêi. 23Ə́ pə̂ yə́rə́, ŋuu lə̌i ntáa ndáʼ lə́ pei ngô: “Nzaʼ-nkʉ* wo yaʼa gháʼá”, kəʉ pə́ ńgó “Â yi yiʼi”, koo pei pə̂i. 24Ńté no pənzaʼ-nkʉ pi məlaa, gháp pə pətsətə́-nkəʉ Sê* pi məlaa táa kwatə́, ə́ nyarə́ pətə́koʼ mələiʼi, ə́ ghʉ̌ mənkəʼə-məno lə̂ ndághʼ futə́ pye tə nzáa, tə ḿbə́ yi gháp ghíʼi nkûʼ, mə́i mboʼ gháp futə tə mbaa pye pi Sê lə tsóʼ gháp. 25Ə́ yo, mə́i n nkə́ mə́ nzáʼ nzʉ̂ ncwotə́ wéi.»
26«Ə́ pə̂ yə́rə́, pə́ lə̌i ndáʼ lə́ pei ngô: “Pei jwó, Nzaʼ-nkʉ* yi koŋə-məkwaʼá”, koo pei wô yʉʼ wó, ə́ ndǎʼ lə́ pei ngô: “Pei jwó, â wo a lwǒ yaʼa lo”, koo pei pə̂i. 27Pei jí ńgó ə́ lə̌i ḿbə́ yi nyǐ mbʉŋ ghʉ ńgó ŋwâŋ, ə́ fú sǎʼ-nəu, ə́ ngwó nkə̂u ntsǒ-nəu pə́ naa njwô gháʼá ló, mə́i Môu Ŋuu* táa tó pə́ yə́rə́. 28Yʉʼ yi pfû zə̂u ghʉ̌ pə́ wó, pəghə̌u ghʉ̌ kə́ kəitə́ pə́ yʉʼ wó».
Môu Ŋuu táa tó
29«Mêi məleʼé ngwôʼ táa lěi, ə̂ pə́ mpfu wêi mə́nəu lêi-lěi shə́rə́ shʉ́ŋ, mə́saŋ kə́ ntə̂ yé po, pəcwôʼ-saŋ fú tʉ̌-lə́faŋ ə́ mpfúŋtə́ sê, ə zə̂u tsəm yi ə́ pə́ ləfaŋ ə̂ nâa ntághʼə́. 30Ləiʼi Môu Ŋuu* cʉ̂ʼ ńkə́ nkwár ləfaŋ. Məngoŋ-mə́ngoŋ mi ə́ pə́ ndəu ndesé khwôʼ ləwʉ̂ ńdǎa, pə cʉ̂ʼ ńkə́ njwó Môu Ŋuu* pə́ cər məlâm tʉ̌-lə́faŋ mə́ ntó, ə́ ngwǒ ləghûʼ tə mbaa tə́koʼ mətəʉ, 31ə́ tə́u pəcwôʼ pé, gháp tóŋ tə́koʼ ntaŋ, ə́ ndǎghʼ nkə̂itə́ pye pé pi a lə tsóʼ gháp cər nzʉ̂ məsaghʼə́ ləkwo, gháp fú məsʉ̂ məsʉ̂ ntó.»
Saghʼ-ləghaa lə̂ tʉ̌ mbwʉ̌-ngə́m
32Pei pyé fəiʼ lə̂ tʉ̌ mbwʉ̌-ngə́m, pei lei tə njwó məfu mé kurə tə kə̂ ncí njí lə̂ ntáp, pei jî ńgó, mpfu ləu pə mə́ ntó. 33Ə́ kə́ mbə́ ndʉŋ-ndʉŋ ghíʼ pei lə̌i ndáʼ njwó mwo məno, pei jî ngô: Môu Ŋuu* tô mə́ tə ḿbə́ ntsʉ ndə̂. 34Məŋ ndâʼ wéi, kwaʼ lə́nə́ʉ, pye pi ə́ pə́ cər nzʉ̂ mpfu wo, gháp wo láʼ nkwʉ́tə́ gháp tə mě tə́ ghó mwo məno mə́tsəm ə́ tó mə́ po. 35Ləfaŋ gháp ndesé táa mě lə́ tsâr zâa láʼ ncwî yé po.
Môu ŋuu táa woghʼə́ woghʼə́ tó
(Mks 13.32-37; Lks 17.26-30,34-35)
36Lə́, ə́ nkə́ ngwó lə́ leʼé zêi, gháp mpfu yi mwo məno táa lěi, mə́i káa cǒ ŋuu pə́ njî yé tə mbaa pəcwôʼ Sê* pi pə́ tʉ̌-lə́pû, tə mbaa Môu Sê, ə ndaʼ Tə́ zə́ghʼə́-zʉ́ lə́ pə́ njí. 37Môu Ŋuu* táa ghǐ tó, məno mi ə́ lə ghʉ̌ mpfu Nówa kə̂ ncí ngʉ́. 38Nci lə ghí kóʼ zʉ́ yʉʼ, ə pye-mə́soŋ pə̂ mpfâr zə̂u, ə́ mə́ nó, ə́ mə́ nzóʼ, ə́ ŋə̂ ghəpə́ záp məndə̂ nzǒʼ, tə nkə́u leʼé yi Nówa lə kə́u cər láanji, 39ə lâʼ pəi mə́ ngwô gháp có no mə́u po, tə nci ghʉ nkóʼ, ə́ fú mbə́ghʼ gháp pə́tsəm. Môu Ŋuu* táa ghǐ tó, ə̂ kə́ mbə́ pə́ yə́rə́. 40Mbiŋə pwô táa pə́ nkâʼ, pə lághʼ tâʼ ŋuu ńdə̂r, ə́ nyêr cǒ. 41Pəngyě pə́pwô pə́ ngôʼ zə̂u lʉŋə, pə́ lághʼ tâʼ ńdə̂r, ə́ nyêr cǒ. 42Ə̂ zə̂u yi ə́ ghʉ̌ pei páa lə̂ ngwáʼá mbəʉ zéi, ńté no káa pei pə́ njí wéi leʼé yi Nde wei wo tó. 43Pei tsúŋú njí ńgó, ngaŋ nzeʼ lə̌i tə́i mə́ njî mpfu yi ntsǒŋ wo tó, mə́i mboʼ a lê tə́ lê, ə́ mbáp tə lə́u ntsǒŋ kə̂u yé nzeʼ zʉ́ po. 44Ə́ pə̂ yə́rə́, tə mbaa pei zéi, pei ntsûŋtə́ mbəʉ zéi ḿbáp, ńté no Môu Ŋuu* táa woghʼə́ woghʼə́ tó.
Ə no ngaŋə-faʼ yi shʉʼʉ gháp yi tə́poŋ
(Lks 12.41-48)
45«Ngaŋə-faʼ yi a nzǔʼ, ə́ mbou ngwô jîno pə́ gháʼá? Â yi tə́ faʼ ye lə nyér pye pé mbó zʉ́, ghíʼ a wo cʉ́ʼ ŋə́ məzʉ̂ lə́ páp lə̂ mpfu yi ə́ pə́ ntúŋú. 46Â ndʉʉ-mboŋ ghíʼ tə́ faʼ ye lə̌i ngí pə̌ʉ nzəm, ə́ njwó a pə́ fâʼ faʼ zêi. 47Məŋ ndaʼ wéi, kwaʼ lə́nə́ʉ, tə́-faʼ ye wo nyér zə̂u pé ntsəm lə́ zʉ́. 48Lə́ nkə́ mbə́ yi â ngaŋə-faʼ tə́poŋ, mə́i a wo lǎʼ cər ntə̂ʉ zʉ́ ngô: “Tə́-faʼ ghâa wo tóghʼ tô yé po”, 49ə́ jǐ lə̂ ŋə́ ngwôʼ mbó pye pi gháp pə pǎp faʼá, gháp pə məpʉ̂ʉ-məluʼ kə̂itə́ ḿpfár zə̂u, mbou nó məluʼ. 50Tə́-faʼ ye wo woghʼə́ woghʼə́ tó, lə̂ leʼé gháp mpfu yi kâa pə́ njí yé, 51ə́ tó, ə́ cóghʼ ngwôʼ tû zʉ́ gháʼate, ə́ zǔŋ yé, a lə̂r lə̂ yʉʼ yi pə́ zuŋ pəsap-ndwô-fʉ́ŋ ə́ ŋə̂ wó, ə́ nyáŋ yʉʼ wó pə́ lǎa, lóŋ ye pə́ nkóʼ.»
Currently Selected:
Matyê 24: NLA
Highlight
Share
Copy
Want to have your highlights saved across all your devices? Sign up or sign in
