Máakúsʉ 5
5
Yěso ghʉ ŋuu yi məzəghʼə tə́poŋ lə pə́ mbə̂u yé shwítə
(Mat 8.28-34; Lks 8.26-39)
1Yěso gháp pə ngaŋə-jyêʼ-no* yé cʉ̂ʼ ntə̂u lətʉŋ-nci Galilêi tə nkə́u lə̂ cǒ njʉŋə́ cər paghʼə-ngoŋ pye Gadazanyê, 2Yěso ghi kwǎr kənyúʼ tə tə́ʉ sê, cǒ ŋuu fû təcər mətû-lə́shi ńtó ńtə́ʉ mbi zʉ́, mə́i zəghʼə tə́poŋ* lə kə̂u mə́ lə́ zʉ́, ə́ ncʉ́ʼ nyáŋ mbə̂u yé. 3A lə cî yé pə́ təcər mətû-lə́shi mêi, káa ŋuu lə póu nkə́ nkûʼ yé lə̂ ndághʼ cêŋ ńkâp yé. 4Pə́ lə yaa nyáŋ ndâghʼ pəcêŋ ńkə̂r mbô mé, ə́ mbou ndâghʼ mətə̌ʉ ńkə̂r məku mé, lə́ a kə̂ nzéʼtə́ pəcêŋ zeʼtə́, ə́ mbóu mbwóʼtə́ mətə̌ʉ tə lə́u cǒ ŋuu yi a pǒu mbyér ngwó mətəʉ lə̂ ndághʼ ngǒu yé kə̂ mbə̂ yé wó po. 5Ə́ lə pə̂ ntə̌ʉ-nəu gháp lətwûʼ, a ŋâa sótə təcər mətû-lə́shi, ə́ ŋáa ŋə̂i ndəu məkôr ḿmâʼ wâr, ə́ mbou ndâghʼ məghǒ ńgwátə mbəʉ ye.
6A lə tə́ʉ ndǐ təsə ńjwó Yěso, ə́ ndǎghʼ ndyʉ ńtó ńshíʼ ńkʉ́ʼtə́ sê mbi zʉ́, 7ə́ mǎʼ wâr lə̂ təʉ ńdáʼ ngô: «O pfû hó mbó məŋ Yěso Môu Tsəpye Sê? N sʉ́ʉtə́ ghô lə̂ ləjôghʼ Sê ńgó koo o pə̂u ghâa.» 8Ńté no Yěso lə pə́ ndâʼ lə́ zʉ́ ngô: «Zəghʼə tə́poŋ*, fú lə́ ŋuu wo ńkwár!» 9Ə́ mbou ntúŋu yé ngô: «Ləjôghʼ zô wǒ?» A pwôr lə́ Yěso ngô: «Ləjôghʼ zâa Pətənzáa, ńté no paghʼ zǎa.» 10Ə́ ncʉ́ʼ mə́ sʉ̂ʉtə Yěso pə́ lə́ cʉ́ŋə́ ńgó koo a fû lâʼ páp ńzǔŋ məzəghʼə tə́poŋ mêi.
11Ə́ lə ghí pə́, ə cǒ mbuŋu pəkúnye yi pə́ lə pə́ nkóʼó pə̂ yʉʼ wó ndəu ləkôr, ə́ mə́ ŋáa nkár ńzʉ́. 12Məzəghʼə tə́poŋ* mêi sʉ̂ʉtə Yěso ndáʼ lə́ zʉ́ ngô: «Caghʼə́ wághʼ ńŋə́ cər mbuŋu pəkúnye yo, ə́ nyér paghʼ kə́utə́ lə́ páp.» 13Yěso pə̂i, məzəghʼə tə́poŋ mêi* cʉ̂ʼ nkə́ fú lə́ ŋuu wêi ńkwátə́, ə́ nkə́utə́ lə̂ pəkúnye pêi. Ə mbuŋu pəkúnye yi mboʼ pə́ lə kwaʼ, gháp pə̂ no tóusʉ pwô, ə nâa fú ndəu ləkôr sěi ńgwo ncwə́rə́ nci ńfə́m cər wó ńkwʉ́tə́. 14Pəpáp pəkúnye pêi jwô yə́rə́, ə́ nkhʉ̂ gháp, ə́ ngwǒ túsoŋ tə mbaa məyʉʼ mi pə́ sor məzə̂u məku wó, ə́ ndeʼtə́ no mə́u. Ə lâʼ kôʼ ńtó ńjwó zə̂u yi ə́ yǎa nděi. 15Gháp lə tó tə nkə́u mbəʉ Yěso, ə́ njwó ŋuu yi məzəghʼə tə́poŋ* lə pə́ lə́ zʉ́ lêi, a nyâŋ sê tə ngwér məndǐ, mə́i jîno yé pəʉ mə́. Gháp jwô yə́rə́, ə́ fú mbóghʼ gháʼate. 16Pənzǔʼ-njwó pyêtə ńdáʼ pye lâʼ ghíʼ ə́ tə́i nděi. 17Pye lâʼ cʉ̂ʼ sʉ́ʉtə́ Yěso ńgó a fú lâʼ páp ńdə́r yé.
18Yěso pə̂ nkə̂u kənyúʼ lə̂ ndə́r, ŋuu yi məzəghʼə tə́poŋ lə fú lə́ zʉ́ ńkwátə́ lêi sʉ̂ʉtə yé lə̂ ntsə́ʉ nzəm zʉ́. 19Yěso lə̂ʼ, ə́ ndǎʼ lə́ zʉ́ ngô: «Pəʉ gho lə̂ nzeʼ gho ńkwátə́ pye pô, ə́ ndǎʼ gháp zə̂u tsəm yi Nde yǎa ndǎghʼ poŋə-ntə̂ʉ yé ə́ ngʉ́ lə́ gho.» 20Ŋuu wêi cʉ̂ʼ ndə̂r lə̂ lâʼ yi pə́ fûŋ ńgó Mətúsoŋ Ləghə̂m, ə́ ŋáa ŋə́i ńdeʼtə́ no yi Yěso yǎa ngʉ̌ lə́ zʉ́. Ŋuu ntsəm zûʼ, ə́ kəʼə yé gháʼate.
No môu Njalúsʉ yi məngyě gháp məngyě yi a lə kə̌u ndǐ Yěso
(Mat 9.18-26; Lks 8.40-56)
21Yěso lâghʼ kənyúʼ ə́ mbə̌ʉ ntə́u nci, ə́ ntó tə nkə́u lə̂ njʉŋə́ yi a kə yǎa mbə́ wó, ə́ mbyér ntə́ʉ pə́ nkaŋ nci, nou lâʼ jwǐ kôʼ ńkə̂itə́ mbəʉ zʉ́. 22Cǒ tə́-ndə̂ cûʼtə pəyúda yi pə́ fúŋ yé ńgó Njalúsʉ, tô njwó Yěso, ə́ mpfúŋ məku zʉ́, 23ə́ mbúʼ mbô ńsʉ́ʉtə́ yé pə́ lə́ cʉ́ŋə́ ə́ ndǎʼ lə́ zʉ́ ngô: «Môu ghâa yi məngyě cʉ̌ʼ ntə́ʉ pə́ ntsʉ ləwʉ̂, tə́sə́u tó ńzápə́ mbô mô lə́ zʉ́, â ncwór, ə́ mbə́ wó.» 24Yěso pə̂i, gháp tsə̂ʉ laŋə́ mə́ ndə́r, ə lâʼ tsə̂ʉ nzəm zʉ́ tə mə́ ŋə́i fâr yé pə̂ ndyəghʼə́ tsəm.
25Cǒ məngyě pə̂ yé nou lâʼ, mə́i mə́sóu ghaghʼə mə́ yé nguʼ ntsap pwô lə̂ ləghə̂m. 26Ə́ lə ghí pə́ mə́i a jwô mə́ ngwôʼ gháʼate lə̂ ntsúʼ mbəʉ ye mbó pəghʉ̌-mə́fu, ə́ fú ncôŋ nkâp ye ntsəm, lə́ káa zûʼ yé shʉʼʉ. Ə́ ncʉ́ʼ lə̂ shwítə́, ghou kʉʼʉ ngáʼ ghaʼá. 27A lə zúʼ ghíʼ pə́ kʉ̂ʉ Yěso, ə́ nyéʼtə́ fú pə́ nzəm cər nou lâʼ ntó, ə́ ngí pə́ kə̂u ndǐ ye, 28ə́ mə́ ndâʼ cər ntə̂ʉ zʉ́ ngô: «N ndə̌i ndû tə nkə̂u pə̂ ndaʼ məndǐ mé, mə́i n ngwo shwítə́.» 29A lə kə́ ndǔ tə nkə̂u ndǐ Yěso, mə́sóu wei lêi-lěi nzáʼá, a zûʼ cər mbəʉ ye ńgó a shwitə̂.
30Yěso kə̂ ntôghʼ nzúʼ ńgó məcó mətəʉ fú lə́ zʉ́ ńkwǎr, ə́ shərə́ ńtúŋú lâʼ ngô: «Wǒ kə̌u məndǐ mâa?» 31Ngaŋə-jyêʼ-no* yé pwor ngô: «O jwô mbə̂u yi lâʼ laghʼ ńfâr ghô ndyə́ghʼə́ tsəm, ə́ mbǒu ntúŋú ńgó wǒ kə̌u ghô áa?» 32Lə́ Yěso kə̂ mə́ nâŋ pə̂ yʉʼ lə̂ njí ŋuu yi a kə̌u yé. 33Məngyě wêi lə pə́ mbóghʼ ə́ mə́ ngwə̂r, ńté no a lə pə́ njî zə̂u yǐ lěi, ə́ ncʉ́ʼ nkə́ ńtó ḿpfúŋ ńnúŋ məku Yěso, ə́ ndáʼ yé no-lə́nə́ʉ. 34Yěso lâʼ lə́ zʉ́ ngô: «Ngwâa ghâa, pə̂i-ntə̂ʉ zô ghʉ o shwîtə, lər ghô lə̂ mbwórə, ghou zô mê.»
35Yěso pə̂ ndâʼ yə́rə́ lə́ məngyě wêi, pəcó pəghaŋə-ntə̂u fû nzeʼ tə́-ndə̂ cûʼtə pəyúda ńtó ńdáʼ lə́ tə́-ndə̂ cûʼtə wêi ngô: «Môu gho yi məngyě kwʉ mə́, koo o kə̂ ngághʼə́ Cícye.» 36Yěso ghʉ̂ ghíʼ a kə́ pə́i nzûʼ yé có no, ə́ ndǎʼ lə́ Njalúsʉ ngô: «Koo o pôghʼ, ghwǒ pə̂ pə̂i-ntə̂ʉ.» 37Ə́ ndǎʼ yə́rə́ tə́ ə́ kuʼ, a pə̂ ndə́r lə̂ nzeʼ Njalúsʉ, Káa pə̂i yé ńgó cǒ ŋuu tsə́ʉ nzəm zʉ́, tə ndyéʼ ndaʼ Pyêh ə́ ngʉ̌ Jâghʼ gháp fə̌r ye Jâŋ. 38Gháp lər tə nkə́u nzeʼ Njalúsʉ, Yěso jwô pye pə̂ wó mə́ ntsə́rə́, ə́ mbûʼ mbəʉ záp, pəcó pə̂ cwôr məngwuŋ, ə́ mə́ ndâa. 39Yěso kə̂u ndə̂ ə́ ndǎʼ lə́ páp ngô: «Pei fǔ ndǎa ə́ mbáŋə yʉʼ ndwuŋ wo gháʼa ńté hó? Môu kə́ kwʉ̂ yé, a pə̌ ndê lě.» 40Gháp zûʼ, ə́ njí lə̂ njwî yé. A ghʉ ŋuu ntsəm fû ndə̂ ńkwǎr tə ə́ cʉ̂ʼ ndaʼ tə́ môu gháp maa môu, ə́ ngʉ̌ ngaŋə-jyêʼ-no* yé pə́tárə́. A cʉ̂ʼ nkə́u cər lûm ndə̂ yi môu wei nǔŋ cər wó. 41Yěso pyê pô môu wei ngwô, ə́ ndǎʼ lə́ zʉ́ ngô: «Talita kum!» Ə́ ndaghʼ ńdâʼ ngô: «Môu məngyě, n ndaʼ lə́ gho; lěse!» 42Môu məngyě wêi kə̂ ntóghʼ mbəʼə́ mbəʉ ye, ə́ nděsê ńjǐ lə̂ ŋə̂i. Ŋuu ntsəm jwô ə́ kəʼə yé gháʼate. A lə pə́ môu nguʼ ntsap pwô lə̂ ləghə̂m. 43Yěso tôʼ gháp lə̂ nkʉ́ʉ tə ŋuu zûʼ zə̂u yi a ghʉ̌ zěi, ə́ mbǒu ndáʼ ngô: «Pə ŋə́ zə̂u a zʉ́.»
Currently Selected:
Máakúsʉ 5: NLA
Highlight
Share
Copy
Want to have your highlights saved across all your devices? Sign up or sign in
