Epacerero 14
14
Abraamu onimukhavihera Loti
1Ehuhuweene yeele Amrafel, mwene a oXineyari, Ariyokhe mwene a wElasari, Kedorlawomeri mwene a wElami, ni Tidali mwene a oGoyimi 2yaarowa owana ni Bera mwene a oSodoma, Birxa mwene a oGomora, Xinabi mwene a wAdema, Xemeberi mwene a oZeboyimi ni mwene a oBela ori Zowari. 3Ootheene ookisera awo yaahaatakansa anakhottwaaya oreyareyani wa oSidimi, eraayawo ephareiya ya maakha. 4Wa iyaakha muloko ni piili yaamurumeela Kedorlawomeri, mene wa eyaakha yanaamuloko ni tthaaru yaarukunuwelana. 5Vano mwa eyaakha yanaamuloko niixexe Kedorlawomeri ni mamwene yiiraanne ni yoowo, yaahaawina aRefayimi a wAsterote-Karnayimi, aZuzi a oHami ni awEmiti a oXave-Kiriyatayimi, 6ni aGori okhuma nyaako sa oSeyir mpaka wEli-Parani, vakhiviru wa nikare. 7Vahoolowaya yaahokolowa, enarowa wEni-Mispate, ori oKadexi, ni yaawinawo elapo yootheene ya awAmaleki ni ya awAmori yaamanke oGazezoni-Tamari. 8Vanonto mamwene a ilapo sa oSodoma, oGomora, wAdema, oZeboyimi, ni oBela, ori oZowari, yaaheetta erowaka okhottoni, enawana oreyareyani wa oSidimi 9ni Kedorlawomeri, mwene a wElami, Tidali, mwene a oGoyimi, Amerafel, mwene a oXineyari ni Ariyokhe, mwene a wElasari. Wa ootheene yaari mamwene maxexe ewanaka ni mamwene mathanu. 10Oreyareyani wa oSidimi waasareya ni soowiixera soopakiwa ni ettoko, ni vano, etthawaka mamwene a oSodoma ni oGomora, yaavuluwela mwemmwe. Vano atthwaaya akina yaahanle yaatthawela omwaako. 11Anamawina yaakuxa mihakhu sootheene sa oSodoma ni sa oGomora nitho soocasene, enarowa. 12Yaamukuxatho musulwaawe Abraamu, Loti, ni mihakhusawe sootheene, niwoko Loti aakhala oSodoma. 13Vanonto, mmoha oopongwe, aarowa omuthalihera Abraamu, muHeberi, yeele yeereiye. Owo aakhala vakhiviru wa nyiri sa ikarivalyu* oMamre. Vano Mamre ori munna a Eskoli ni a Aner, mwa yaawo Abraamu iiraanannaaweno. 14Abraamu iiwaka weera musulwaawe ootthukiwa, aahaakuxa arumeiyaawe ootureene yaayariwe vaatewawe, wookwana macira mararu ni muloko mmoha ni athannaararu, anaattharelela amwiittana mpaka oDani. 15Moohiyuni aahaakawanyiha anakhottwaawe mipatta-mipatta, anaawanano ni aahaawina. Vano yaapwaherera waattharelela mpaka oGoba, ori wookela mpatta wa ottuttuwani wa elapo ya oDamasku. 16Aawera ohokoloxa mihakhu sootheene, anamoopola musulwaawe Loti ni mihakhusawe, vamoha ni asithiyana ni anamatthukiwa akina.
Abraamu ni Melkisedeki
17Abraamu ahokolowaka vahoolo wa owana ni Kedorlawomeri ni mamwene oowiiraananaawe, mwene a oSodoma aavenya weera akumaneno oreyareyani wa oXave, ori oreyareyani wa Mwene. 18Vanonto, Melkisedeki, mwene a oSalemi, aari musaserdoti* a Muluku Musulusulu, aahiixoonihera akuxaleene yooca ni eviinyu. 19Aamureeliha Abraamu ni masu ala: “Ooreelihiwa akhale Abraamu ni Muluku Musulusulu, Yoowo opattunxe erimu ni elapo ya vathi. 20Ooreelihiwa akhale Muluku Musulusulu, ooweringhe waawina amwiittanaawo. Vano, Abraamu aamvaha mpatta wanaamuloko sa sootheene. 21Mwene a oSodoma aamweerela: “Okivahe paahi atthu, mene sooreela ti sawawo.” 22Abraamu aamwaakhula mwene a oSodoma: “Kinlipela ni ntata kimweemexeraka Yave, Muluku Musulusulu, opattunxe erimu ni elapo ya vathi, 23weera yeeyo eri yawinyu nkintthunaru. Vekhaikhai, nkintthuna hata eciikhwe, naari muramba weera kitthukele ikwakwaatta. Nkintthuna weera nyuwo mweere: ‘Ti miyo kimpuhinghe Abraamu.’ 24Vano wa miyo, kintthuna paahi yeele arumeiyaaka aciiyaaya ni mpatta ophwanenle wa yaale yiitakansale ni miyo, eyo tiiyo Aner, Eskoli ni Mamre. Yaakhele mpattaaya.”
Currently Selected:
Epacerero 14: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
