Judit 6
6
Jiñi Aquior tsa' ochi ti' tojlel israelitajob
1Che' ti' jumuk'lel, jiñi ya'bä joyolob ti' t'ejl x-e'telob yik'ot yumälob tsa' ñäjch'iyob. Che' jiñi, jiñi Holofernes iyum icha'añ xjisayajob, che' ya'añ ti' itojlel moabitajob yik'ot ti' tojlel wiñikob ñajtbä tilemob, tsi' isu'be Aquior:
2«¿Majkiyet jatet mi' apoj al Aquior? ¿Bajche' mi' axäñ otsañ abä atik'oñ? Jatet yik'ot jiñi xjisayajob acha'añ tsa'ix achoñola abä ti' itojlel israelitajob, ixku wäle wolix awäl cha'añ ma'añik mik cha'leñ lojoñ jisaya yik'otob cha'añ jiñi iCh'ujutatob mi' ikajel ikäñtäñtelob. ¿Mi' aña'tañ cha'añ añ yambä ch'ujulbä machbä jiñik Nabucodonosor? ¡Jiñäch kyum lojoñ! Jiñi ip'ätälel mi' ikaj ijisañ jiñi israelitajob ila ti pañämil, ixku jiñi iCh'ujutatob ma'añik mi' ikaj imejlel ikoltañob.
3»Joñoñ lojoñ mik cha'leñ lojoñ e'tel ti' tojlel Nabucodonosor, yik'ot mi kaj kisañ lojoñ jiñi israelitajob che' bajche' ibajñel juñtikil jachbä wiñik. Jiñob ma'añik mi' ikaj iläk'ob jiñi k'ächälo'bä xjisayajob. 4¡Mi' kaj ilaj kjisañ lojoñ pejtelel jiñi wiñikob! ¡Jiñi ich'ich'el wiñikob x-ixikob mi kaj ti ajñel ya' ti' iñäk' wits, yik'ot jiñi joktältak mi kaj ibujt'el ti chämeño'bixbä! Ma'añik mi kaj imälbeñon lojoñ. ¡Mi añik juñtikil kuxulbä mi' ikaj ikälel! ¡Che'äch tsa' iyälä jiñi Nabucodonosor, ixku jiñi ixik'ojel mi' ikaj its'äktiyel! Jiñäch iyum pejtelel pañämil.
5»Ixku jatet, Aquior, ma'añix mi' kaj achäñ k'ele' kwut jiñto che' bakibä k'iñ tsa'ix käk'beyob itoj imul jiñi tejklum tsa'bä puts'i ti Egipto. Jiñi at'añ tsa'bä awälä mi' ikaj iyäk'eñet itoj amul. ¡Jatet ya' juñtikilet jach xjisaya amonitajbä mu'bä ichoñ ibä ti' itojlel majki oñbä itak'iñ mi' toj! 6-8Che' bakibä k'iñ mik sujtel ktilel ti jisaya, mi' kaj atoj amul chobejtäbilbä acha'añ. Jiñi xjisayajob yik'ot jiñi x-e'telob kcha'añ mi' kaj isäp julet yik'ot jaläp, yik'ot mi' kaj ijaw ts'ijetob yik'ot ijek'oñibäl. Wale, kuxuleto mij käyet, ixku jiñi x-e'telob kcha'añ mi' kajel ipäyetob majlel ya' ti wits, ya'i mi' kajel ikäyetob ti' jump'ejl tejklum. Ya' ya'i mi' kajel ataj jiñi chämel temel yik'ot israelitajob.
9»Pejtelel chuki tsa' kälä mi' ikajel its'äktesañ. Mi' ti' isujm ma' añop ti' apusik'al cha'añ ma'añix majch mi' mel imälbeñ jiñi tejklum, mach yom ma' mel apusik'al».
10Che' tsa' ujti ti t'añ, jiñi Holofernes tsa' ixik'i jiñi x-e'telob icha'añ, cha'añ mi' kächob majlel jiñi Aquior, yik'ot cha'añ mi' iyäjk'el ti' itojlel israelitajob chumulo'bä ya' ti tejklum Betulia. 11Jiñi x-e'telob icha'añ tsa' ikächäyob yik'ot tsi' ichokoyob lok'el ya' ti lejch'empat. Tsa' ixäñayob jiñi kolem joktäl yik'ot ti wi'il tsa' letsiyob majlel ya' ti wits, jiñto tsa' k'otiyob itajob jiñi ipasib ja' ambä ya' ti yeñtälel jiñi Betulia. 12Che'bä jiñi wiñikob año'bä ti Betulia tsi' ik'elbeyob jiñi iyaj jisaya icha'añ Holofernes, tsi' ch'ämäyob lok'el jiñi ye'tijib cha'añ tsäñsaya ya'i tsa' kajiyob ti letsel ya' ti ñumeñ chañbä wits. Jiñi xjisayajob yujilo'bä julbäl yik'ot päräntuñ, tsa' kajiyob ichok-eñob xajlel cha'añ ma'añik mi' mejlelob ti letsel. 13Che' jiñi, jiñi xjisayajob icha'añ Holofernes tsa' ju'biyob ya' ti wits, ya' ya'i tsa' ikächäyob kälel jiñi Aquior. Ti wi'il tsa' sujtiyob majlel baki añ yumäl icha'añob.
14Che'bä tsi' ik'eleyob, jiñi israelitajob tsa' ju'biyob majlel ti' itejklum ya'i tsa' k'otiyob k'älä ya' baki añ Aquior. Che' tsa'ix ijitiyob, tsi' päyäyob majlel ti Betulia ya'i tsi' ipäsäyob ti' tojlel jiñi x-e'telob ya' ti tejklum. 15Ti jiñbä k'iñ añ iye'tel ti yumäl jiñi Ozías iyalobil Miqueas lok'eñbä ti' p'olbal Simeón yik'ot Cabris iyalobil Otoniel yik'ot Carmis iyalobil Malquiel. 16Jiñob tsi' itempayob pejtelel xñoxob, yik'ot x-ixikob yik'ot ch'itoñob ya' ti tejklum, yik'ot tsi' yäk'äyob jiñi Aquior ti' yojlil ya' ba'añob. Jiñi Ozías tsa' kaji ik'ajtibeñ Aquior cha'añ mi' itsiktesañ chuki tsa' ujti, 17ixku ili tsa' kaji itsiktesañ chuki tsa'bä iyälä ti' tojlel jiñi yumälob icha'añ xjisayajob icha'añ asiriojob. Che' ja'el tsi' isu'beyob chuki woli iña'tañ jiñi yumäl Holofernes, yik'ot bajche' ili tsa' iyälä cha'añ mi' ikaj ti jisaya ti' tojlel israelitajob.
18Che'bä tsi' yu'biyob ya'bä tempäbilob iliyi, ti' pejtelelob tsi' iñokchokoyob ibä jiñto mi' taj lum ipam, cha'añ mi' ich'ujutesañob Lak Ch'ujutat. Ti' pejtelel k'am tsi' iyäläyob: 19«¡KCh'ujutat ti pañchañ, k'ele bajche' mi' ichañ-esañob ibä jiñi xts'a'leyajob ti ktojlel lojoñ! ¡Kojach woli ibajñel sajkañob iñuklel! ¡P'uñtañ jiñi utsbä atejklum! ¡Koltañoñ lojoñ, awilañ, acha'añoñ lojoñ!»
20Che' tsa'ix ujtiyob imelob iliyi k'ajtiya tsa' kaji iñuk'esabeñob ipusik'al jiñi Aquior. 21Che' ujtemix jiñi tempabä, jiñi Ozías tsi' ipäyä majlel Aquior ti' iyotot, baki tsa' iyäk'eyob ñukbä k'iñijel cha'añ pejtelel año'bä iye'tel ya' ti tejklum. Tsa' iñusayob jump'ejl ak'älel ik'ajtibeñob jiñi iCh'ujutatbä icha'añ Israel cha'añ mi' ikoltañob.
Currently Selected:
Judit 6: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM