Lucas 19

Jä Jesús mëët jä Zaqueo

1Ku jä Jesús jyey jäm Jericó kyapën këjxm jäts tunaxuk'waany jä kajpen. 2Jäm ijt tsyïna tu'k jä jotkujk jaye juu txëë Zaqueo, jä nyiwintsën juuwë tyajkmujkp jä kupëëmen juu kyextep jäm Roma. 3Jä wye'ena jya'ixwäämpy jä Jesús, jäts ka' y'oyexe tsoj t'ixpaatet jä ku may jaye jäm wye'ena juma jä Jesús jäts jä Zaqueo kona jä ijt. 4Wa'nit jä nuump jyayepe, jä ijt t'ixte juma jä t'ixpaatet oy, wa'nit pyëjt jäm kïp këxm tem juma jä Jesús wye'ena nyaxwan. 5Ku jä Jesús nyax jämtsoj, wa'nit jä pyat'ix, jäts yajknïmye:

—Zaqueo, jatye jäm wanejke, xyam ëts ntanwa'any jäm mits mtëjk jootm.

6Wa'nit jä Zaqueo jatye wyajkne jäm, jäts wa'ajts oy jä tkupijk jä Jesús jäm tyëjk'jootm. 7Ku jä we'en t'ixte, jä may jayeta wa'nit tpakotsta tpaxi'ijkta jä Jesús, jäts wyanta jäm nëjkx tyanwa'any jä token jaye tyëjk jootm. 8Wa'nit jä Zaqueo tyenye jäts tnïmye jä Wintsën:

—Xyam ëts nwa'any, mits Wintsën, nmootap ëts jä ayowa jayeta kujkwajkx juu ëts nijum nmëët; jäts pen pën jaye ëts nmeetsaa, nmoyempijnep ëts jä majktaax ook muniyujk.

9Wa'nit jä Jesús wya'an:

—Xyam tjyeya jä kunujkxën yaja mtëjk jeet, yëë ya'atyëjk xyaja jä yëwe'e jä y'ap y'ok jä Abraham. 10Jä Jaye y'unek jä'ä nïmäts jäts t'ixta jäts tyajkmataket juu toke'ijtp.

Tsoj tumu'ixa jä'ä meen

11Jä jayeta jäm wye'ena t'amotenaxta jä Jesús tsoj jä kyets ayuuk tmëëta, wa'nit jä yajktumumatyëjkte tsoj tumu'ixa, teman wye'ena jäts jyeyetat jäm Jerusalén jäts jä jayeta ojts tpayoyta jäts tëwan jäwe jä Kunu'kxtee kyutujken tyajkminwaane.

12Jäts yajknïmyete: Jäm y'ijt tu'k jä ya'atyëjk juuwë oy jaye, jäts ojts nyïkx jekiem, jä tu'k ijt jä tu'k naax, juma jä yajktukotspejt jäts jäwe y'ijtep yajkutujkpa jää kyapen këxm jäts wimpïjtnet. 13Kanem wye'ena tsyenem, jäts tyaaxe nimajk jä tyuumpa, jäts tkëëmoy majk apëjken jä'ä meen jäts yajknïmyete: Yajktuntat yajkpejkta yëë meen jäts xyajkmayetat konem ëts nwimpïjtnet jäts xyajktenet. 14Jä jayeta juma jä kyukajpena ka' jä yajktsejk jäts y'ijtet jä yajkutujkpa, wa'nit tupakexte tu'k pïjk jä jayeta juuwe'e wa'antap: Ka' ëëts ntsejk yëë ya'atyëjk y'ijtet ëëts nyajkutujkpa.

15Ojts jä kyutujken tpïjk jäts jäwe y'ijtep yajkutujkpa, wa'nit jä wimpïjtne juma jä kyapën. Ku jä jyeyne, wa'nit tnikäjxe jä tyuumpata juu wë'e jä myeen tyuujkmutaan, jäts tnijawat we'enjun jä myeen tyajkmayeta këjääta. 16Jä mutu'k jyey jäts wya'an: Wintsën, jä meen juu mits myajk të jä nyajkmaya majk ook nax niyuka. 17Wa'nit jä yajkutujkpa y'atsoowe: Wa'ajts oy we'en; oy tuumpa mits; oy mtu'n jyatum jiinima jäwe, mits ëts mpïïmp yajkutujkpa jäts xyajkutujkat nimajk jä kajpenta. 18Wa'nit jätu'k jyey jäts wya'an: Wintsën, jä meen juu mits myajk të ëts jä nyajkmaya mujooxk ook nax niyuka. 19Wa'nit jä yajk'atseew nawye'en: Mits ëts mpïïmp yajkutujkpa jäts xyajkutujkat jä nimujooxk kajpenta.

20Wa'nit jätu'k jyey jäts wya'an: Wintsën, xyaja mits jä meen juu ëts xmooy. Jäp ëts yëë nkoonejk nyajk'ijt payo wintsum, 21tsejkep ëts mits oy, jä këx ku mits mëjk myajkutujk, jäts mits xkonmujk juma ka' nitiya xkayajky jäts xpejkmujk juma ka' te mni'ip. 22Wa'nit jä yajkutujkpa nyë'ëmxe: Mits ka'oy tuumpa, jä m'ayuuk mits këëm mtoken'payoyjep. Pën mnijawep jäts ëts mëjk nyajkutujk, jäts ëts nkonmujk juma nitiya nkayajky jäts npëjkmujk juma ka' te ni'ip, 23¿Tyëx ëts jä nmeen ojts xkapïm jäm juma myayat, jäts jaxip meen unek mëët xyajkne ku ëts twimpïjtnet ntëjk wintëm? 24Jäts yajknïmyete juu jäm wenyetep: Pëjketa jä meen jäts moota juu majk ook nax jä meen tyajkmaya. 25Wa'nit jä'äta wya'ante: Wintsën, yëë jepan tmëëta majk ook nax. 26Jäts jä yajkutujkpa y'atseew: We'en miits nëmeta jäts pën pen may tmëët, jä jak yajkmoep muniyujk; jäts juu ka' tmëëta nitiya, jyatum yïïnema juuwë'e myëët tyum jak yajkpëjkenep jä nijum. 27Jäts jä koyjayeta juuwe'e ëts xkatsojktep jäts n'ijtet yajkutujkpa, yajkminta yaja jäts xyajk'ooktat ëts nwinkujk:

Ku jä Jesús tyëke jäm Jerusalén

(Mateo 21.1-11; Marcos 11.1-11; Juan 12.12-19)

28Kuwen kyotskïx, jäts jä Jesús tyuu tpëjne juu nëjkxp jäm Jerusalén. 29Jäman wye'ena jyeyawa'anta juma jä kajpen txëëja Betfage jäts Betania, teman jäm wyeneta juma jä kopk juut xyëë Olivos, wa'nit jä nimäjtsk tkex jä y'ixpëjkpata, 30jäts tnïmye:

—Nëjkxta xëm ye kajpen awinkujk. Ku jäm mjyeyetat jäts xpaatat tu'k jä burro kuwiin, juu nipëna tkatutsynanem. Jäts xmukäjat wa'nit xyajkmintat. 31Ku pën tyajktïwaty tyëx xmukäjeta, jäts xnëjmetat jä Wintsën tsojkp.

32Wa'nit jä y'ixpëjkpata nyëjkxte jäts tpaate wintsoj jä Jesús nyë'ëmxete. 33Jäm wye'ena tmukäjeta jä burro, jäts jä nyiwintsenta ojts tyajktïweta:

—¿Tyëjx xmukäjeta yëë burro?

34Wa'nit jä'äta y'atsoowte:

—Jä Wintsën yëë tsojkp.

35Wa'nit jä jyepä'än tpëëmete jä burro, jäts tyajknëjkxte jäm juma jä Jesús wa'nit jäm tyajktsïïnyete. 36Wintsoj jä Jesús yo'oy, jäts jä jayeta jä wyit tuwinyä'äpta jä tuu. 37Teman jäm wye'eneta jä Olivos kyopk waanijkwin, wa'nit nijum jä jayeta juu wye'ena payoyetep jäts mëjk xiijkta xyontëjkta jä Kunu'kxtee mëjk t'ajooteta ku jä nyimëjen t'ixte. 38Jäts wya'anta:

—Kunuukx jä yajkutujkpa juu mäjtsp jä Wintsën xyëëkëx, Jä y'oyen jäm tsajpjotm jäts nawye'en jä xoonkyen jäm këxm.

39Wa'nit jä fariseos juu jäm wenyetep may jaye y'akujkmta jäts tnïmyete:

—Wintsën, nëmeta yëë mjayeta juu mpayoyetep jäts y'amontat.

40Wa'nit jä Jesús y'atsowete:

—We'en ëts nwa'an ku yëë y'ijt y'amontat, yëë tsaa paata n'ijt kyots'pëjktat.

41Temam wye'ena jäts jyeyat jäm Jerusalén, ku t'ixpaaty jä mëj kajpen, wa'nit jä jesus tnixaaxy jä kajpen, 42jäts wya'an: Ku ijk xyam ke xwinmoteta tsoj xpaatat jä oy'aa oy joota. Jä'ä xyam yu'uts jä ijt ka' y'oya tsoj xpaatat. 43Jeyäp jä xëëta juma mits mëjk wye'ena jä tsatsyipaaten xyajkna'axy, juma jä mkamääjkxpa myajk'atujkpeetet mëët jä mkajpenta. Jäts myajknaawitat wa'nit jä tyëjketat muxem muyam jäts myajk'ooketat, 44jäts nijum mits wintojkekëxet. Wa'ajts jä mjayeta y'ookextat, jäts nitiya kyo'ok taanet nituka' jä tsaa nikompeet, paaty ku ka' mits texmëjpïm ku jä Kunu'kxtee t'mjanimätse.

Ku jä Jesús tyajkwa'atsyi jä tsaptëjk

(Mateo 21.12-17; Marcos 11.15-19; Juan 2.13-22)

45Wa'nit jä, Jesús tyëke jäp tsaptïjkp jäts twopijtsëm kïjx nijum jä jayeta juu jäp wye'ena tooktep. 46Jäts yajknïmyete:

—Tsoj jä kyets ayuuk jäp wya'an, ëts ntëjk jä y'ijtet tsapkotsken tëjk, jäts miitsta jä t'xyajkwaantene määtsken aank.

47Ijtp jä Jesús y'ijt yajk'ixpïjk jäp tsajptïjkp, jäts jä tee nyiwintsenta, mëët jä juu yajk'ixpëjktep jäp tsaptïjkp jäts jä jayeta juu niwintsënetep jä kajpen t'ixteta tsoj tyajk'ooktat jä Jesús. 48Jäts ka' tpaata tsoj tuntat, jä ku may jaye oy juu jä kyets y'ayuuk t'amotenaxtep tsoj jä wya'an.

Currently Selected:

Lucas 19: LKMIXHUI

Highlight

Copy