San Marcos 15

Ku jä Jesús twinkuwake jä Pilato

(Mt 27.1-2,11-14; Lc 23.1-5; Jn 18.28-38)

1Ku ojts jä ijt jyatejk, jäts nyamyukete jä tee tëjk nyiwintsënta mëët jä israel myëyet jayeta jäts nawye'en jä juu tnijawetep jä kutujkenta: nijum jä jayeta juu jä kets ayuuk tkots oyetep. Wa'nit tyajknëjkxte jä Jesús këë'tsum, jäts yajkpïm jäm Pilato kyëm. 2Wa'nit jä Pilato tyajktïïwe:

—¿Tis mits jäwe jä judíos nyiwintsën?

—Mits we'en waampy —jä Jesús y'atseew.

3Jä tee tëjk nyiwintsënta yajkxon tnikotspäta may jep jä ayuuk, 4wa'nit jä Pilato tyajktiwekome:

—¿Ka' mits wintsoj mwa'any? Ku yëë jayeta yajkxon mnikotspäteta.

5Jä Jesús ka' ojts y'atsew; jä Pilato atïwa ojts tyan.

Ku tyajknikutujkete jäts jä Jesús y'ooket

(Mt 27.15-31; Lc 23.13-25; Jn 18.38—19.16)

6Ku jä Pascua xyëë tyuune, jäts jä Pilato tujk jä puxen tëjk jaye tyajkpitsem token meejkx, jä tyuump tsoj jä jayeta wya'anta. 7Tuk jä ya'atyëjk juu txëë Barrabás jäp wye'na jä puxen tïjkp, jäp juma jä jayeta juu yajkjaye'ookte ku ojts nyanipëketa y'atsuxtunta. 8Jä may jayeta jyetye, jäts, t'amotete jä Pilato jäts we'en tuunet tsoj min'kyuput. 9Jäts ojts jä Pilato y'atsew:

—¿Tis jä miits mtsojktep jäts ëts nyajkpitsemet jäp puxen tïjkp jä judíos nyiwintsënta?

10Ojts jä Pilato nijawen t'pïjk ku jä tee tëjk nyiwintsënta paaty ojts tkëë'yajkta jä Jesús ku jä tmu'ääketa. 11Jä tee tëjk nyiwintsënta tnïmyete jä may jayeta, jäts wya'antat jä Barrabás tanep token meejkx. 12Wa'nit jä Pilato ojts tyajktïwa:

—¿Ti mtsojktep tsoj ëts ntunet yëë juu miits mtij'tep jä judíos mëj yajkutujkpa?

13Jäts yëëta y'atsoote mëjk yajkxon kyotsta:

—Yajkcruzpäte yëë.

14Wa'nit jä Pilato nyëmxete:

—Tyëx ¿ti ka'oy te tun?

Jäts jä jayeta mëjk ojts kyotsta wya'anta:

—Yajkcruzpäte yëë.

15Ku jä Pilato, oy nyajk tan wa'anye mëët jä jayeta, ojts tyajkpitsem jä Barrabás token meekx, wa'nit tyajknëjkxte jä Jesús juma ojts tyajktsatsyi'paata, jäts ojts tkëë yajknë jäm jaye kyëmta jäts tyajkcruzpätat.

16Wa'nit jä tujpata tyajknëjkxte jä Jesús jäm kutujken tëjk aakem, tkuxëëta tujpata kyutujken tëjk, jäm nyamyujkëxete nijum jä tujpatëjkta. 17Wa'nit jä Jesús tpëmete tujk jä tsapts'yejk jä wit, jäts t'apijtmujkte jä yotspa we'en i'xun tujk jä kujän wa'nit tpëmete jäm kyupajk këxm jä Jesús. 18Wa'nit ojts mëjk kyotsta wya'anta:

—Juukyep jä judíos mëj yajkutujkpa.

19Jäts twoopte jäm kyupajk këxm mëët tujk pëjye kip, twinkutsujete jäts, twinkuxtenyete jäts jäwe y'ajotetep. 20Ku we'en nixiijkte tuxiijkte jä Jesús, wa'nit tpëjkete jä yejk tsapts wit, jäts tpëmetene jä wyitam wa'nit ojts tyajkpïtsemta jäts tyajkcruzpätat.

Ku jä Jesús tyajkcruzpäte

(Mt 27.32-44; Lc 23.26-43; Jn 19.17-27)

21Tuk jä ya'atyëjk Cirene jaye, Simón xyëë, jä tyee Alejandro jäts jä Rufo, jätyenep wyeneta kamjootm te y'ojtsta. Jäm wye'na nyax, jäts yajktukuwaane tpakëë'ët jä Jesús cryuz.

22Wa'nit tyajknëjkxte jä Jesús juma jä ijt txëëja Gólgota juuwe tïjtep pajk' ijtjootm; 23jäts tmootye jä uva në'ë juu mirra mëët jä Jesús ka' ojts t'ujk. 24Wa'nit tyajkcruzpäte. Jäts jä tujpata tnikuuyete jä Jesús wyit pen tiwe myutantap tujk jä nitujkta.

25Pet'xëë wyena taxtujktek yaaxp ku tyajkcruzpäte jä Jesús. 26Jäts tmujapyete jä kets ayuuk juma wya'an tiwe kyupëtp ku we'en jyaty: Jä judíos mëj yajkutujkpa. 27Jä mëët nawye'en tyajkcruzpäte nimäjtsk jä token jayeta, tujk y'akayen tsoj jäts jatujk y'anajem tsoj. 28Jäts we'en kyutyune tsoj jä kets ayuuk jäp japyet: Jäts we'en ojts yajkwaaneta jä kets ayuuk jä koy jayeta.

29Jä jayeta juu jäm naxtep juma jä Jesús yajkxon tmukotsnaxta, jä'ye jä kyupajk tyajkyojta jäts wya'anta:

—Mits, nmuketsp, ku mwaany jäts xyajkwintoket jä tsaptëjk jäts kutuujk xëë xyajk'oyenet jatujk ook, 30nyajkmatake mits këm jäts wanejke jäm cruz këxm.

31Jäts nawye'en jä tee tëjk nyiwintsënta tuxiijkta jä Jesús jäts nawye'en jä yajk'ixpëjkpata juu jä kutujken tnijawetep. Wya'anta:

—May jä jaye tyajkmataky, jäts ka' y'oyexe xyam këm nyajkmataket. 32Nyajkwaneke mits Mesías jäm cruz këxm, mits Israel nyiwintsën, jäts ëëts n'ixet jäts ëëts njaantsyjawat.

Jäts nawye'en jääta juu jäm myëët cruzkëxemta yajkxon tmukotsnaxta jä Jesús.

Ku jä Jesús y'ookne

(Mt 27.45-56; Lc 23.44-49; Jn 19.28-30)

33Ku ojts jä ijt kyujk xëëja, wa'nit nijum jä ijt naaxwin ojts kyotsekix tuujk yaxp we'en ijt. 34Ku we'en jä ijt naaxwin jyaty, wa'nit ojts jä Jesús mëjk kyets wya'an: Kunuukxtee, Kunuukxtee, ¿Tyex ëts natyëm xyajktan?

35Winkëx jä jayeta juu jäm wenyetep, ojts tmoteta jäts wya'ante:

—Amotenaxta, jä jyawa myuketsp jä kukexepa Elías.

36Wa'nit tujk jä tujpa nijkx nuump, jäts ojts tyajkxeek jä pïxten mëët jä xuunen në'ë, wa'nit tumutsuume tujk jä kip jäts tmoy jä Jesús jäm y'akëxm jäts t'uuket jä në'ë, wa'nit wya'any:

—Matsojkta, we'en t'ijxme pen mäjtspam'ej jä kukexepa Elías jäts tyajkwaneket jäm cruz këxm.

37Wa'nit jä Jesús mëjk ojts ya'ax jyek, jäts y'ookne. 38Wa'nit jä tsaptëjk atëtyujken ojts kyëts wajkx ijt kujk, jäm këxm jäts apa't jye'y. 39Jä tujpa nyiwintsen roma jaye, jäm wye'na jä Jesús winkukm, wa'nit ojts t'ixpaaty jäts te tam y'ookne, jäts wya'any:

—Tïwam tam'e yëë ya'atyëjk jä'am yëë ijt jä Kunuukxtee y'unejk.

40Nawye'en jäm wyeneta jä te'extëjkta jäm jekem y'aaxtëjkta; juu jäm wenyetep jä María Magdalena, jä Salomé, jäts nawye'en jä María jä Santiago tyaajk jäts jä José juu kumujtsk. 41Yëë te'extëjkta tpayoyta jä Jesús jäts nawye'en tputëjkete ku jäm wye'na Galilea. Jäts jäm nimay wyeneta jä te'extëjkta juu panëjkxe jäm Jerusalén.

Ku jä Jesús tyajknaaxtëjkete

(Mt 27.57-61; Lc 23.50-56; Jn 19.38-42)

42Jä xëë wye'na juma tyajk'oyeta tyajkpaateta jä kyaaky jä tyojkx jä judíos jayeta, kuwe, ku'ux jä pookxen xëë tpaaty, jäts tanan wye'na jä ijt, 43José Arimatea jaye jä nawye'en jäwe tnimëjep jäm juma jä kets ayuuk tkots oyeta tkots paateta, jä nawye'en y'ax'ijtp jä Kunuukxtee kyutujken, jäts nïjkx mëjk aa mëjk joot juma jäm jä Pilato jäts ojts t'amote jä Jesús nijkx kyopk. 44Jä Pilato, atïwa ojts tyaan kut nijawe jäts te y'eek jä Jesús, wa'nit tyaxmiin jä tujpa nyiwintsen jäts tyajktïwat jun'ijt we'en jyaty. 45Ku jä tujpa nyiwintsen ojts tnikets tsojwe tjaty, wa'nit jä Pilato ojts tyajkjaty jäts yajkmoet jä José jä Jesús jä nyijkx jä kyopk. 46Wa'nit jä José ojts tjuy jä wit juu wats oy, jäts tyajkwakte jä nijkx jä kyopk jäm cruz këxem wa'nit tuwinpijte jä wit. Jäts ojts tpëmta juma jä tsaa jut juu tyajk'oyeta tyajkpäteta, jäts tuakëtye tujk jä mëj tsaa jä tsaa jut. 47Jä María Magdalena mëët María jä José tyaajk, ojts t'ixta juma yajkpïm jä Jesús jä nijkx jä kyopk.

Currently Selected:

San Marcos 15: JKAYUUK

Highlight

Copy